【派發愛心飯活動正式結束】

雖然傑仔已經辭任區議員一職，但早前都做埋最後一次派長者愛心飯嘅活動，亦希望藉住機會同一班登記攞飯嘅公公婆婆道別。派飯活動期間亦派發由善心人士捐贈嘅一批口罩俾一眾長者，在此感謝是次嘅慷慨捐助。最後傑仔亦要感激 #琦興餐廳 一直以嚟對愛心飯活動出心出力嘅支持，全靠佢哋幫忙先令活動能夠順利完滿咁進行🙌🏻🙌🏻

#俗語有話家有一老如有一寶
#能夠認識到咁多寶
#係傑仔嘅福氣
#往後要拜託各位街坊繼續撐住琦興

辭任前的工作跟進1：關注75小巴早上班次不穩引致學童遲到

六月至七月期間其實傑仔收到唔少區內家長反映75小巴早上班次不穩引致小朋友遲到。其實大家都知75小巴班次不穩主要係因為青山道一帶早上非常塞車，所以7點幾嘅車出咗去未必能夠順利返嚟。傑仔近日同咗小巴公司反映，獲得正面回應，簡單情況如下：

1）傑仔同小巴公司講希望可以加車，就算加唔到車都希望喺7點半至8點左右返回富昌嘅小巴入面預留一架去協助學生返學。小巴公司表示會加車，不過要等運輸署批准，批咗就預計兩個月後會幫75綫加多架車。

2）小巴公司同時建議就讀長沙灣一帶小學嘅學生（例如基福小學等），如果擔心75綫班次不穩可以試吓去深旺道乘搭75B小巴，喺長沙灣站B出口近消防局位置落車行返學校都可以。上車站點近V Walk商場外701巴士站上車嗰個位置，另外由長沙灣回程富昌嘅落車點就喺近富怡樓702巴士站。

【第一次都係最後一次漂書活動】

傑仔未來一星期嘅下午都會返辦事處處理善後，之前收集大家嘅書做漂書活動，隨住辦事處結束營運都要處理埋。

如果大家望到門口鐵架上嘅書，歡迎嚟攞返屋企慢慢睇（唔使還返俾我，亦唔好俾新嘅書我），呢個年代，讀多啲書係非常重要。呢幾日收拾期間有任何棄置而又有用嘅物資我都會放喺門口，大家有需要都可以留意吓。

昨日宣布辭任以後，有唔少街坊話未趕得切同傑仔道別，近排都會斷斷續續返嚟處理善後，如果真係想見面傾吓偈都可以Whatsapp/FB Inbox搵我預約時間。而辦公室電話27782533同時停止服務，不會接聽電話，敬請留意。

【再見、珍重、平安】

各位富昌、榮昌及凱德苑街坊：

傑仔於今天下午已向民政總署遞信辭任深水埗區議員，即日生效。換句話講，傑仔嘅區議員生涯正式完結。感謝曾經投票給我的4281位街坊，遺憾未能完成任期，傑仔在此向各位街坊道歉。

呢份工作俾到我嘅使命感同埋助人嘅快樂，以及街坊俾我嘅鼓勵我都會銘記於心。以「區議員」作為大學畢業第一份工作嘅我，呢一年半要感謝好多人，好多前線嘅同事對我嘅教導，令我獲益良多，讓我有一段畢生難忘嘅經歷。

無奈時不與我，能夠直抒胸臆嘅空間已經所剩無幾。

今天起大家再無民選議員為大家發聲，唯有希望大家繼續喺社區「化依賴為自救」，助人互助，將「區議員」留低嘅社區願景繼續透過自救同互助流傳落去。

感謝各位街坊陪伴我哋走過呢一年半嘅旅程，儘管社區嘅改變可能愈來愈渺茫，但相信只要大家仍然堅持信念，韜光養晦總會走出黑暗，遇見黎明。

各位珍重，平安、再見，有緣再會。

#慶幸仲幫咗唔少長者登記消費券
#原諒我無同大家一一道別

==========================================
註：之前我哋想搞漂書，原諒我哋平時工作繁忙遲遲未安排到，辦事處雖然已經停止運作，但都有一段時間要收拾辦事處嘅物資，各位街坊有需要可以落嚟攞返本書睇下。

另外，我哋都有少量剩低嘅工作要完成同埋需要匯報俾各位街坊知，我哋儘量會於今個月交代晒。

抱歉原定的證件相活動將會取消，稍後我會通知各位已登記的街坊。

做個記錄，今日係我最後一次開區議會會議。

今日區議會嘅地區設施委員會通過更換深水埗公園泳池裡面嘅低壓電制櫃。低壓電制櫃係泳池嘅供電命脈，已經運作咗36年，機件已經有生鏽及腐蝕嘅情況出現，的確有更換嘅迫切性。工程預計於2022年2月至4月開工，更換後泳池嘅供電將會更加穩定，大家游水會更安全。

【凱德苑第一次業主會議即將舉行】

相信各位凱德苑業主近日都有留意到管理處喺大堂張貼嘅業主會議通知，將會喺今個星期六（7月10日）晚上喺長沙灣社區中心禮堂（近李鄭屋邨）有業主會議，將會決定成立屋苑法團等事項。

新屋苑成立法團十分重要，希望各位凱德苑街坊親身踴躍出席業主會議，投票選出未來決定屋苑事務及運作的法團。儘量避免使用「授權票」，以達致「自己屋苑自己救」的精神。

如果凱德苑業主及街坊對法團成立及業主會議內容不瞭解，管理處特意於今天（7月5日）晚上八時聯同民政署於凱德苑召開有關成立法團的簡介會，歡迎各位有興趣參與屋苑事務或欲了解更多成立法團資訊的街坊參與。

#自己屋苑自己救
#凱德苑 #業主會議
#難得有票投大家緊記珍惜

【協助登記消費劵】

電子消費劵今日開始接受申請，傑仔與團隊亦特意安排咗特別辦公時間，時間為上午10時至下午2時，協助有需要街坊嚟辦事處登記。

除填寫書面表格外，辦事處亦協助去年曾登記一萬元現金發放計劃嘅街坊透過網上系統登記。欲登記街坊請帶備所需資料，包括身份證及所選支付工具嘅號碼；如以網上登記，則需要同時帶備銀行帳戶號碼資料。

登記網站：
https://www.consumptionvoucher.gov.hk/tc/index.html

備註：辦事處不會協助以上載身份證或「智方便」方式作網上申請，敬請留意。

【東鐵綫紅磡站至旺角東站服務將於明天暫停】

因應配合沙中綫過海路段新軌道接駁工程，港鐵東鐵綫旺角東站至紅磡站列車服務將會於星期日（7月4日）作第六度暫停，如街坊欲轉乘東鐵綫請勿於屯馬綫紅磡站下車，而需乘搭該綫至大圍站轉車。另外，替代路線亦可以選乘新巴702線往九龍塘站接駁東鐵綫，而港鐵亦會安排接駁巴士服務往返紅磡站及九龍塘站，敬請各位街坊留意。

資料來源：
《東鐵綫旺角東站至紅磡站段 第六次星期日暫停服務訂於七月四日》（港鐵新聞稿）
https://www.mtr.com.hk/archive/corporate/en/press_release/PR-21-048-C.pdf