انوح...فوگ الهزل بيدي الحبل
و اتأمل حسين ايرد
اروح...من دون اخو ابكتر العدو
هاي اللي بالحيل اتهد
جروح...بعيوني من ضيم الحزن
شلون الضعن من يبعد

من حرگوا اعلينة الخيم
ما ردنة بس حسبة علم
ابچف كافل ايرف عالضعن
بس شفتة بعيونة السهم

عرفتة ما يردلنة...وگع كتر الفرات
و صحت يالبلخيم طلعن...أركضن بالفلاة
و ركضت ابحيرتي اهنانة...ألمّن بالبنات

تالي رحت...عالتلة
ابن امي ردت...أوصلة
شفتة و صحت...يا خوية...تعال

يهل الشيم...يخواني
♕♕♕♕♕♕♕♕♕♕♕♕♕♕
ظلام...درب اليسر يذبح خدر
يذبح دلال اخواني
حرام...آنه انتحب و اطلب عذب
هيچ الوكت خلاني
خيام...راحت ألي و راحوا هلي
چان الگمر صيواني

من چفة لچفوف العدة
رحت و تركتة الوحّدة
ابيا حالة هسة ابيا وضع
بعدة التراب اموسّدة

اندفن لو بعدة عالغبرة...السهم ماخذلة عين
ايتعذر لسة و اينادي...يخوية يا حسين
و اختهم بالغرب ضاعت...و اخذ حيلي الحنين

آنه احتضر...عالناگة
الحامي الخدر...مشتاگة
ابدرب اليسر...و بچفوفي...حبال

يهل الشيم...يخواني
♕♕♕♕♕♕♕♕♕♕♕♕♕♕
عذاب...درب السبي الهاي العبي
الهاي الحرم و ايتامي
مصاب...ركض الفلة ابطف كربلة
خلاني اضيّع اخيامي
جواب...من كافلي ردتة ألي
بس هو طايح ضامي

ما عاتبت بس فزّعت
چي بالغرب تالي ضعت
و الأصعب امن اموادعة
عالهزلة لمّن ودّعت

يمروني على اخواني...و انة اعيوني تشوف
و شگلهم من يشوفوني...حبل فوگ الچفوف
چنت زينب لچن أسمي...انسلب برض الطفوف

كلشي انسلب...من يمي
يسوة العتب...والله اسمي
و فوگ التعب...شافولي...خيال

يهل الشيم...يخواني
♕♕♕♕♕♕♕♕♕♕♕♕♕♕
بچيت...من هظمتي و فگد اخوتي
شيردني اموت اوياهم
صفيت...بين الغرب وحدي ابدرب
چان الخدر بحماهم
نخيت...و آنه ارتجي ابن امي يجي
و استبشر ابملگاهم

حزن العلي يكسر ظهر
و من كربلة گلبي انكسر
هد حيلي شام اهل الغرب
ما يدري بية اخت الگمر

تمنيت اشكثر ميتة...ابصحاري الطف و اصيح
يگلبي الليلة شمتاني...عفت بالبر ذبيح
صرت من حيرتي اتعثر...و اموتن من اطيح

شحمل بعد...من حزني
الأصعب و اشد...الهاظمني
ما شفت ابد...بالغربة...دلال

يهل الشيم...يخواني
♕♕♕♕♕♕♕♕♕♕♕♕♕♕
حسين علي الزهيري

يم فضائلچ...گلبي سجد
حزني رتلچ...و اطلب مدد
منچ او ألچ...و ابلا عدد
ناذر دمع و اجروح

دمعي و الحزن...كلة الأجل
گلبچ اليون...فوگ الهزل
للبكاء أحن...ابطاري الحبل
امن اسمع خدر مذبوح

آآه يا عقيلة هاشم
گلبي ابمصابچ هايم
ناذر عمر بعتابچ
قبليني عندچ خادم

قبليني...اوية كل خدامچ بالخدمة و رزقيني
جرح ما يبرة و لا يبرد بسنيني
و دمع من ينزل يجرح يمة ابعيني
♕♕♕♕♕♕♕♕♕♕♕♕♕♕
عايش الدمع...عيني اليصب
حالف انفجع...و اكسر گلب
و الطم الضلع...يالبلغرب
محتارة فوگ النوگ

آنه غايتي...أحضر عزة
و ابدي هظمتي...العمري الجزة
أجري دمعتي...و ايفززة
جرحي عذاب السوگ

لو مرة وحدة اتناسة
گلبي و يموت احساسة
أذكر مصايب گلبچ
بالصحرة عايف ناسة

بالصحرة...گمر و اچفوفة العافتهن عالغبرة
و ضلع متكسر من اخيول العشرة
و جسد ظل دامي و مسبي اوياهن نحرة
♕♕♕♕♕♕♕♕♕♕♕♕♕♕
لو نويت اضج...بس للخدر
بالبچي ابتهج...و اسجد شكر
ناري من توج...أصرخ نذر
لخيام ابو السجاد

يا گلب يظل...ما محترگ
و گلبچ اشتعل...وي الحرگ
خاطرچ ذبل...يوم السحگ
و تالي الخيام ارماد

نار المخيم ناري
ثار العقائل ثاري
و ثار البقة اعلة الغبرة
و الصعبة طايح عاري

و الصعبة...ضمة و ظل ضامي الماي شلون ايشربة
بقة ابلا ناصر وحدة ابنص الغربة
يفزّع كافل كاسر ظهرة و گلبة
♕♕♕♕♕♕♕♕♕♕♕♕♕♕
أصعب المضن...شام الغرب
حاير الضعن...ابهذا الدرب
ما إلة وطن...عايش غصب
بالغربة عگب حسين

و الهظم بعد...أم الخدر
صعبة و الأشد...دخلت قصر
ماكو من نشد...ابدرب اليسر
و الحرة تربي العين

وين المشوا بضعوني
حسرة اعلة طرف اعيوني
وين الهواشم ترجع
الديرة هلي ايرجعوني

للديرة...يردني الكافل خدري و راعي الغيرة
أريدن چفة ايفل حبل اختة ايسيرة
أخت و اشتاگت هية اهنانة الحيرة
♕♕♕♕♕♕♕♕♕♕♕♕♕♕
حسين علي الزهيري

#أربعين مولاتي العقيلة صلوات الله عليها

تعالوا يالمشيتوا
هلي الليلة انتظركم
ترة اهواية بطيتوا
و يهد بية هجركم
علية اتعطليتوا
و انة ابالي صوركم
متت يالغربيتوا
و اريد اشتم عطركم

متت شوگ...و اريدن تعتنوني
متت شوگ...أأيس لو تجوني

ادموعي من شوگي هون
اعيوني من دمعي انعمن
♕♕♕♕♕♕♕♕♕♕♕♕♕♕
أحلفكم يخوتي
تعالولي المسية
فگدكم يعني موتي
و اشد من المنية
صحت و ابعالي صوتي
اشكثر ضيم آنه بية
يولياني و تچوتي
تهدني المغربية

ألف موت...و لا موتت سفركم
ألف موت...يولياني انتظركم

ردوا يحماة الضعن
اعيوني من دمعي انعمن
♕♕♕♕♕♕♕♕♕♕♕♕♕♕
و لا واحد لفاني
لمن غمضت عيني
و بعدني الهسة اتاني
تجوني ابأربعيني
يفرگاكم سباني
و لا هوّد ونيني
أخذ حيلي و عماني
متت يمفارگيني

صحت ليش...يهلنة و آنه اسيرة
صحت ليش...بقيت ابلا عشيرة

و هظمة نسواني انسبن
اعيوني من دمعي انعمن
♕♕♕♕♕♕♕♕♕♕♕♕♕♕
شجاكم يالنشامى
أحشم و انتو سكتة
و عگبكم ما أنامة
أنة الليل و سهرتة
اناطر عاليتامى
الضعن بالطف كفلتة
الخدر موش ابسلامة
و علة النوگ آنه ميتة

علة النوگ...متت بس آنه عدلة
علة النوگ...يموت اليفگد اهلة

اتحملت ضيم و محن
اعيوني من دمعي انعمن
♕♕♕♕♕♕♕♕♕♕♕♕♕♕
يعباس ارد اخبرك
شني الصار اعلة زينب
ابگطعتة خوية نحرك
ولوني و گلبي ينحب
بقيت اشگد انطرك
و انادي و صوتي يتعب
أصيحن خوية خدرك
على الهزّل تسلّب

علة الصوت...يبعد اعيوني وينك
علة الصوت...ترة امسلبيهة عينك

خوية و اجدامي انچون
اعيوني من دمعي انعمن
♕♕♕♕♕♕♕♕♕♕♕♕♕♕
بعد كل الجرالي
و بعد ذيچة غربتي
لهسة و نفسة حالي
و اعاين ظلمة گبتي
أعاين صحني خالي
و اگولن يا حسرتي
منو ايجيب الغوالي
يطفولي جمرتي

منو ايجيب...كفيلي و اشيجيبة
منو ايجيب...بعدني آنه الغريبة

و كل مناراتي انطفن
اعيوني من دمعي انعمن
♕♕♕♕♕♕♕♕♕♕♕♕♕♕
حسين علي الزهيري

يال هاشم...آنه زينب يال هاشم
نعشي عوزة امتون خوة
گلبي من الهم تلوة
بين ناس ابلا امروة...ما ايصير الموت لازم

ما اتعدي الليلة اضنهة
اشتذكر السلبوا ضعنهة
ونّت و شيفيد ونهة...الشافت اركاض الفواطم

هاا يخوتي...وينكم هالليلة عن زينب يخوتي امتانيتكم و انتظر و امعطلة موتي
راح صوتي و ماكو ليرد راح صوتي
♕♕♕♕♕♕♕♕♕♕♕♕♕♕
يا اجروحي...يا حسرتي و يا اجروحي
والله يهلي الليلة ميتة
و نعشي مطروح ابغربتة
وينة اخوي الكافل اختة...والله طلعت مني روحي

غربة هذا الشام غربة
و بت علي الملچومة صعبة
بس طلب هالليلة اطلبة...تعتنوني و يهدة نوحي

هم صحتهة..."وين طالب ثار زينب" هم صحتهة
وين يا عباس زينبكم عفتهة
بين غربة و هاي ديرة الما ردتهة
♕♕♕♕♕♕♕♕♕♕♕♕♕♕
طال عمري...أرد اموتن طال عمري
هاا يهل زينب چبيرة
زينب و لساعة اسيرة
حيرة فرگتكم يحيرة...بيهة راح اهناك خدري

لسة بالطف دمعة الية
لسة و احچايت سبية
ما گضت يهل الحمية...منهة خلّص حتى صبري

بالخرابة...أسمي ظل اهناك يهلي بالخرابة
موت درب اليسر و اشيحمل عذابة
بين كوفة و شام گلبي انهد عتابة
♕♕♕♕♕♕♕♕♕♕♕♕♕♕
الشام غربة...اخذوني منهة الشام غربة
ابديرت البيهة سبوني
شلون اموت و يدفنوني
لا يخوتي اتلاحگوني...غربة والله الشام غربة

ابكربلة اخذوني ابكتركم
و گبري خيرافگ گبركم
آنه اختكم و انتظركم...وحشة يهلي الشام دربة

امتانيتكم...يهلي لا تبطون يهلي امتانيتكم
عاد بآخر ليلة ارحموا ابحال اختكم
گبل جية موتي يخواني ردتكم
♕♕♕♕♕♕♕♕♕♕♕♕♕♕
حسين علي الزهيري

يحسين اجيتك حافية..ما بية اشوف و غافية
يحسين خوية
جيتك يبعد اعيوني...كل خوفي لا يسبوني
يحسين خوية
گوم و دشوف اعيالك...عالغبرة من يبرالك
يحسين خوية

يا خوية أجيتك بين النار
ما بية أشوف و گلبي احتار
يا بعد العمن يا بعد الروح
لخيامي ردت واحد نغّار
♕♕♕♕♕♕♕♕♕♕♕♕♕♕
يحسين اجيت اشكيلك...بچفوفي صرت اوميلك
يحسين خوية
كونك شفتهة اچفوفي...ارحمني و ارحم شوفي
يحسين خوية
بس خل اصدلك سالم...ما أدري ميت نايم
يحسين خوية

يا حيلي ترد حيلي امن اتگوم
يالبيكم خدر زينب ملزوم
عاذرتك لچن يبن امي شلون
بالهيمة عفت ضعنك مهظوم
♕♕♕♕♕♕♕♕♕♕♕♕♕♕
الما صايرة و لا دايرة...هدت علينة الغايرة
يحسين خوية
و صوت الفزع من سمعن...نسواني بالبر طلعن
يحسين خوية
امن الخيمة اجيتك راكضة...اگبالي الحوافر عارضة
يحسين خوية

الخاطركم ركضت ابين الناس
و عالتلة اشبچت عشرة اعلة الراس
كل ظني امن اصيح آنه اتسمعون
لا أنتة الگمت لا رد عباس
♕♕♕♕♕♕♕♕♕♕♕♕♕♕
ياهو البعد نمشيلة...و وكت المسة اشباقيلة
يحسين خوية
گرّب ظلام الهيمة...و ما عدنة حسبة خيمة
يحسين خوية
حرگوهة كل اخيمك...منعونة نگعد يمك
يحسين خوية

ردناهة نظل يمك و انّام
ما ردنة العذب لا ردنة اخيام
ما عدنة وكت بس هذا الليل
و صبح الله نغرّب لرض الشام
♕♕♕♕♕♕♕♕♕♕♕♕♕♕
طر الفجر يبن امي...راح امشي و آنه ابهظمي
يحسين خوية
ايتام و حرم مچتوفة...و النية لرض الكوفة
يحسين خوية
و الحيرت محتارهة...شام الهظم و اخبارهة
يحسين خوية

من هسة و افكّر بيهة شلون
عالهزلة تطب للشام ام عون
مو گدري أمّر ابذاك السوگ
يا خوية و تصد الضعني اعيون
♕♕♕♕♕♕♕♕♕♕♕♕♕♕
حسين علي الزهيري

مجبورة من عفتك
لو بيدي جا شلتك...وياية عالنوگ
لو بيدي ماعوفك
توميلي بجفوفك...و عالغبرة محروگ
حگك على اعيالك
محد ركض شالك...و ظليت مسحوگ
بس يا عزيز اهلك
منعونة نوصلك...و گادونة للسوگ

ابكلهن يبعد ام عون مجبورة
شتصير اختكم والله معذورة
و جسمك توزع بالفلة
ابكل وصلة خوية ابكربلة
بيهة لگيتك و آنه مكسورة

ما بية حيل...و اجدامي تعبانه
آنه العزيزة آنه...گوم امشي ويانه
الغربة يخوي...ترضاهة ماشوني
للضيم عفتوني...و محتارة بضعوني
♕♕♕♕♕♕♕♕♕♕♕♕♕♕
يبن امي من رحنة
گوم اشكثر صحنة...بس خوية شتگوم
من كل كتر تنزف
و من التعب ترجف...و الحافر ايحوم
مروني من يمك
و اشگد صحت بسمك...و دلالي مهظوم
و كلما أصيح افزع
اتگوم و ترد توگع...من كلشي ملچوم

ماريد اصيحك و الچم اجروحك
ماريد ازيدن دمعك و نوحك
بس خوية حگي لو صحت
چا غير عالهزلة رحت
راحت غريبة اعلة الهزل روحك

حل الوداع...و مامش بعد رجعة
طفولي چم شمعة...شفت اخوتي صرعة
فوگ التراب...چم جثة عريانه
و فوگ الهزيلة آنه...تعبني الامتانه
♕♕♕♕♕♕♕♕♕♕♕♕♕♕
من خلصت اوياكم
و عالغبرة عفناكم...و ودونة للشام
ما ندري شنسوي
و نار اليتم تچوي...بگلوب الايتام
و النسوة عالهزّل
من دم دمعهن هل...و ايريدن اخيام
و ماگلك ابحالي
ألغربة تبرالي...رد لو بالاحلام

من رحنة درت اعليكم اعيوني
هلبت تگوم و تلحگ اضعوني
و من ابتعدنة اتحيرت
لاچن ابد ما أيست
ابكل خطوة اگولن هسة يلفوني

هسة ابن ابوي...يفزعلي و ايردني
آنه ادري ميهدني...و هوة اليصعدني
عالناگة من....يچهبني ضي عيني
مو طبعة يجفيني...و لا طبعة ياذيني
♕♕♕♕♕♕♕♕♕♕♕♕♕♕
أرد اشكي يخواني
الضيم التولاني...و ارد اشكي الاجروح
ما بين ال ايسبهة
و بين اليعذبهة...زينبكم اتنوح
يخواني مو سهلة
مشوني عالهزلة...ميتة و بلا روح
ما ينحچي المرني
و كل ذكرة تكسرني...و من بالي متروح

شيصير لو ميتة آنه وياكم
متعودة ماعيش الة بحماكم
چا كون اموت ابهالمسة
بس حيرة ياهو الهالنسة
و اتغربن يهلي اوية فرگاكم

باچر يخوي...الديرت علي و جدي
بس آنه ارد وحدي...و حزني يرد يبدي
باچر أحير...من اوصل ادياري
شلون اگعد ابداري...و ابن امي ظل عاري
♕♕♕♕♕♕♕♕♕♕♕♕♕♕
حسين علي الزهيري