لاچن اگول تخف الجروح
ما مات مثل حسين مذبوح
وظل عاري فوگ الرمضه مطروح
ولا بالحوافر طلعت الروح
وللخيل صدره ومنحره سوح
وعيال ما عنده سبي تروح
ما عنده اخت عالهزّل تنوح
وبرمح راس اعزيزهه يلوح
تناديه خدري العالي الصروح
راح وبعد ميرد اليروح
مجروح گلبي بهاي مجروح
مسموح شوفي صار مسموح

✍️ ياسر حسن
شوال ¹⁴⁴⁵

شهادة الرسول الأعظم ص وآله...

اغلى واعَز انسان .. راح من اديه راح من اديه
فارَگت ابوي الچان .. خيمه عليه خيمه عليه
„„„„خَير الناس واشرف واعظم فارگني وظَل مُظلم بيته
(صلّى اللهُ عليهِ وآله) چان اكبر خيمه اعله بنيته
روح الله اوياك ارحل گتله ومَيروح شگد تمنيته
ياعافيتي وعُمره شيسوه العايش ومفارگ عافيته

شتِسوه حياتي وبان .. خيط الرزيه خيط الرزيه
فارَگت ابوي الچان .. خيمه عليه خيمه عليه
„„„„
اوّل ما غمّضهه عيونه انفتحت صفحة مِحنه اطويله
اعليَّه امصايب دهري القاسي دارت وآنه اعليله انحيله
مكسورة بيا صبر اتجلّد فَيض احزاني اتفجّر سيله
وبين الباب وحايط باچر ظالم يعصرني بكل حَيله

ويخضّب الجدران .. دم الزچيه دم الزچيه
فارگت ابوي الچان .. خيمه عليه خيمه عليه
„„„„
بلِحده توسّد هادي الامه ياريت مغطّيني ترابه
ولا عايِن لمچانه الخالي ولا وحشة داره ومحرابه
ولا عدوانه الگالو يهجر يشتموني ويشتّد اصوابه
بهَجمة احقاد يواسوني ويضرمون النار ابابه

ويامُر عبيده فلان .. ويهجم سويه ويهجم سويه
فارگت ابوي الچان .. خيمه عليه خيمه عليه
„„„„
مفجوعه وعيني اعله اولادي التّمو بالدمعه الهمّاله
الحسنين وزينب صاحو راح الچِنه بخَير بجاله
وباب ومحراب متانينه وسَم ونَحْر ورَض خيّاله
وناس اسلام يگولون احنه تجازي الهادي بسبي عياله

وزينب بلا وليان .. تمشي سبيه تمشي سبيه
فارگت ابوي الچان .. خيمه عليه خيمه عليه
„„„„
اتذكّرته وزدات عَبراتي بسكرات الموت وناداني
يا بضعة گلبي ويا روحي من آذاكِ فقد آذاني
واتذكّرته من يدگ بابي ويستأذن ويظل متاني
يارب العن اول ظالم وآخر تابع سَن عدواني

ما چنّي بت سلطان .. كل البريه كل البريه
فارگت ابوي الچان .. خيمه عليه خيمه عليه
„„„„
إنچان بتشييعه وناديته وا أبتاه بالدمع الجاري
باچر زينب بالطف تصرخ يا جد صله اعليك الباري
هذا حسينك گطعو راسه وظل مسلّب جسمه وعاري
ومن شفته شلون انحز نحره تمنيت هنا تعمه انظاري

ابن امي عالتربان .. عفته رميه عفته رميه
فارگت ابوي الچان .. خيمه عليه خيمه عليه
„„„„
ياسر حسن
صفر ¹⁴⁴⁶

وَصْل اعتذاري للوِديعه
وعَنهه إخفي چفيني الگطيعه
ما عفتها .. لحَد ما غَفل عافتني اديه
ما عفتهه .. وسَهم النظر شاهد عليه
″°″°″″°″°″″°″°″″°″°″″°″°″″°″°″″°″°″″°″°″
مكسور اجيت وكَأن ،، مو اخو فاگد وطن ،، بصوتك احس غربه
ما شوف بس گلبي حَس،، گوّه تجر النفَس ،، وبونتك حَسبَه
اسمعتك تصيح بقهر ،، الآن ظهري انكسر ،، وطولك الي محَدبه
والعدو بينه شِمَت ،، واحوالنه اتشبهت ،، بنبض وفگد گلبه
اوصيتي يبو گلب العطوف ،، عن زينب اخفيهه الچفوف

خايف تموت بهالبوادي
لو عاينت نزف الايادي
اتذكرتهه .. من اتبدّه جودي اعله الوطيه
اتذكرتهه .. وسهم النظر شاهد عليه
″°″°″″°″°″″°″°″″°″°″″°″°″″°″°″″°″°″″°″°″
اگرَب يضَي كربله ،، وكت الموادع حِله ،، چم دمعه وحچايه
منّك يخويه اعتذر ،، لن سببتلك كسر ،، واذّيتك هوايه
وسامحني (خويه) صحت ،، هالچلمه لمّن طحت ،، بيهه الي غايه
خافن اموتن گلت ،، واحچيهه انت ردت ،، (خويه) يمولايه
شبيدي وجِرحتك ياحسين ،، لمّن شفتني بلايه عين

لو ينخفي صوابي خِفيته
ولا ظهرك اعليّه حِنيته
ما ردتهه .. يمّي تجر ونّه شِجيه
ما ردتهه .. وسهم النظر شاهد عليه
″°″°″″°″°″″°″°″″°″°″″°″°″″°″°″″°″°″″°″°
خلني اعله هذا الالَم ،، ورِد وحّدك للخيم ،، بالماي انَه مواعد
خويه المن ارجع بعد ،، كون ارد وافي الوعد ،، من المستحه مارِد
وفد ساعه خويه تره ،، جثتك تظل عالثره ،، لتشيلني وباعِد
يشيلك منو من الذبح ،، تنشال راس برمح ،، وابناتك اتشاهد
اتحاضنو دمعه بلا كلام ،، بس گال ابو فاضل سلام

يحسين سلم النه اعله اختنه
وگلهه المنيه فارگتنه
فارگتهه .. وابّالي عاشت للمنيه
فارگتهه .. وسهم النظر شاهد عليه
″°″°″″°″°″″°″°″″°″°″″°″°″″°″°″″°″°″″°″°
رَد للمخيم يوِن ،، واتلگته ام الحزن ،، وتلطم غِدت عالراس
مكسور اجيت شعجَب؟ ،، وتتعثر من التعَب؟ ،، لو ضيعت عباس؟
خل اعتني لمصرعه ،، بجروحي متگبعه ،، بلكن باخير انفاس
الگاه والم رايته ،، وسيفه وبعد جربته ،، والگه الدرع والطاس
ردهه الحسين بدمعته ،، وگلهه الاعادي شامته

يكفيني يازينب شماته
وعباس گال آخر حياته
واعدتهه .. افديهه لاخر شهگه بيه
واعدتهه .. وسهم النظر شاهد عليه
″°″°″″°″°″″°″°″″°″°″″°″°″″°″°″″°″°″″°″°
الحره لخيمهه ارجعت ،، شبگت حسين ونعت ،، ودمع الهضم هامل
صاحت كفو والنعِم ،، من التِهابه الزلم ،، عباس ابو فاضل
ادّيت حگ خوّتي ،، معذور يا عزوتي ،، وفّيت يالكافل
مشكور ما گصّرت ،، مو عتب لاچن حِرت ،، من اسمعت راحل
منهو اليباري هالحرم ،، بعدك يشيّال العلم

خلافك يخويه استضعفونه
بالنار للخيمات اجونه
واسمعتها .. من الحسين آخر وصيه
واسمعتها .. وسهم النظر شاهد عليه
″°″°″″°″°″″°″°″″°″°″″°″°″″°″°″″°″°″″°″°

ياسر حسن
محرم ١٤٤٦

أعمال ليلة القدر
ليلة ٢٣

ياسيف الگِدَر ياذيك .. يَمرَجف الزلم طاريك
يا اعظم ولي
تِتفايض دماك شلون .. وباقي ما فِنه هالكون
صعبه يا علي
°°°° °°°° °°°° °°°° °°°° °°°° °°°° °°°°
هذا يا سيف التجرّه و خسف بدرك
وما عِرف قدرك علي يالعالي قدرك
والله لو ما ساعة السجده يغدرك
كل سيوف الدنيا ما تگدر تقهرك

من احروفك تهاب اعداك .. سيف الله النبي سمّاك
واسمك معتلي
صعبه وانت داحي الباب .. بدمّك يغرگ المحراب
صعبه يا علي
°°°° °°°° °°°° °°°° °°°° °°°° °°°° °°°°
ضَجّت الاملاك في كل البرايه
ودمعة القران سالت آيه آيه
وصاح جبرائيل من عُظم الجِنايه
اتهدمت والله اركان الهدايه

شحال الفقره والايتام .. سمعو طايح الضرغام
دمهم يغتلي
يعيشون بيتِم للدوم .. وجوع وكل عمرهم صَوم
صعبه ياعلي
°°°° °°°° °°°° °°°° °°°° °°°° °°°° °°°°
بدارهه زينب ونادت ويّه جبريل
گبورنه شالتنه ريت ولا علي ايشيل
تراب فوگ احجابهه بحسراتهه تهيل
ادخيله من فرگاك وانت حامي الدخيل

يا خيمتنه وين تريد .. نعايدمن صباح العيد
يا ضحكة هلي
نعيّد بالثياب السود .. وديوانك يظل مسدود
صعبه ياعلي
°°°° °°°° °°°° °°°° °°°° °°°° °°°° °°°°
تعثر بهمهه وتگوم ولن اجوهه
على چتاف اخوانهه محمول ابوهه
گابلتهم بالمناحه وگابلوهه
شلونه ابوي وراح ابونه جاوبوهه

ناداهه الحسن وحسين .. بونّچ زيدي لتهيدين
الهم ما ينجلي
راسه منجسِم نصّين .. وباقي اويانه بس يومين
صعبه ياعلي
°°°° °°°° °°°° °°°° °°°° °°°° °°°° °°°°
كل يتيمه وكل يتيم اباله ذكره
وي علي ايام حلوه بدنيه مره
منهو بعدك النه ظلت بينه حسره
چِنّه ما نعرف دوه تشافينه نظره

ارجع يا بو چلمة هاك .. هاك اعمارنه التفداك
بهجرك ننولي
نِلت بهالشهاده الفوز .. اخسرناك ولفانه العوز
صعبه ياعلي
°°°° °°°° °°°° °°°° °°°° °°°° °°°° °°°°

ياسر حسن
شهر رمضان ¹⁴⁴⁴

للامام علي الهادي عليه السلام...

يا عاشِر صواب .. بگلوب الاحباب
جرحك يهون وكل جرح
من نذكر الطف والذبح
بگلوب الاحباب
؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:
من المدينه اتغربت يالهادي مجبور
سافرت وحدك ما خَذِت ربّات الخدور
وحسين حتى الـ بالمهد رافگه لعاشور
بس ظلّت اعليله بهضم وبگلب مكسور

عفت الاميرات .. بدارك عزيزات
الوداع الاصعب يتضِح
من نذكر الطف والذبح
بگلوب الاحباب
؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:
بسامره يوم اللي انزلت صح يصعب امرك
صح ما الك صاحب نعم محّد ينصرك
بس خيل عشره ماشفت منتظره صدرك
ولا شفت تل لا مشرعه يكسرن بظهرك

اي صدره ينداس .. من يمشي عباس
وما بي كثر سالم يصِح
من نذكر الطف والذبح
بگلوب الاحباب
؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:
عالطاغي يالهادي ادخلت مجروح الاحساس
نكرو مقامك يا وسَف وانت اشرف الناس
بمجلس يزيد حسين اجه بلا جثه بس راس
وزينب تعاينهه الخلگ من كل الاجناس

اذكرنه اصعب ايام .. بالكوفه والشام
اذكرنه سبي ونوگ ورمح
من نذكر الطف والذبح
بگلوب الاحباب
؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:
سجنك ظلامه ووحشته بالذاكره تعيد
اليل الخرابه ولوعته وجروحك تزيد
من صاحت ارقيه هله براسك يالعميد
يا بويه ها ليش اگطعت بينه يصنديد

ميته لگوهه .. يم راس ابوهه
نذكرهه والمدمع يسح
من نذكر الطف والذبح
بگلوب الاحباب
؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:
دمّك حُسيني انت لذا اذكرلك حسين
سامره صارت كربله وذبحونه مرتين
كلت اعله حب سبط النبي يرخص ضوه العين
وگلت امشو دوم لكربله لو گطعو ايدين

ونهجك حييناه .. لا ما نسيناه
وكل طاغي لابد ينفضح
من نذكر الطف والذبح
بگلوب الاحباب
؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:؛:

ياسر حسن ¹⁴⁴⁴
رجب الاصب