**ابوذيه / لموضع إفتخارنا وشهيد المقاومة الأول السيد حسن نصر الله رضوان الله عليه

يمن چان المهابة تسير يا سر
ربك شنهي أسكن بيك يا سر ؟
دمك يذبح وبِعداك ياسر
إلك وَصله بذبيح الغاضريه

- أبو زينب علي الظالمي**

أزلام وموثقه عهد ويه الحسين
وچنها بالطف كل كتيبه البيها

وچن خيم زينب ينظرون الجنوب
وعيب غاشم معتدي أيصل ليها

نصر رضوان أويه عباس وبدر
الباري يحسرها العلي إيباريها

وأعلى من الغيم هدهدهم يلف
بكل هدف مخفي غده إيوافيها

وروح أبو هادي عزم منها وسداد
وعين مَهديّ الامم تربيها

عصبه كل ما نوت تضغط ع الزناد
يا علي ، يافاطمه إتعليها

المثلها تبقى كابوس اليهود
مثل فاتح خيبره واليها  

- أبو زينب علي الظالمي

لا بچي ايسچنه لا نوح ولطم
كسرت امصابك يسيد بالعظم
ولا يفَوخ اگلوبنا ذبح اليهود
الدنيا من بعدك فلا بيها طعُم
ياهو وي راسك نحطه ونرضه بي
شَح جِبيلك كافي بس هذي هظم

ابوذيه / للامام الحسين عليه السلام
درب الحسين

شدر إبعرجي من دم در بي لحسين
يربي وخلني لازم درب الحسين
إشما دورن وأَلها دور بي لحسين
وخله أوياي كل صبح ومسيه

- أبو زينب علي الظالمي

أبوذيه / للامام الحسين عليه السلام

اساس الفضل هوه كل هالاحسان
وخير المِله الدنيا كلها لحسين 
هَلي تسلم هظيمه وكل هَل حسين 
سِبايه راحوا لطاغوت أُميه

- الشاعر أبو زينب علي الظالمي

هوسات للعباس عليه السلام

بيرغ عِزه رف لهاشم
لو طب حومه يرجع غانم
تدري علومه كل الوادم

بساعة مَلگه … ما رد خاسر

——-

زينب بت حيدر محسوده
عدها الكافل تمشي بزوده
ياخو لإخته ينطي إزنوده

وحَسْ إمقصّر … أردَف عينه

———

الكافل محد غاص إبحره
ربنا العالي إمجلل قَدره
إحسين إيعده إحزام لظهره

ويكفي بهذي … عَليَه ومفخر

—-

خل تتنومس أم الكافل
صيته لكل العالم واصل
يوم البالطف راد إينازل

الشرده بيومه … صارت شيمه

-أبو زينب علي الظالمي

يا أم الحسن مُزجاة وقليله أدري البضاعة
وبيد أم الحسن صك الشفاعة

من زغري أنتهج حبها عقيدة
وإعله الخاصموها أعلن عِدائي

.

ياحسين…

مُصاب حسين حاشه إيصح نظيره
ومثل ذاك الظُهــــر ما جَـــت ظهيره

هَمْ وغــربـــه وحــــزام الظَهــــــر راح
چثيره إجروح جسمه لو نهض طاح
وصوت أعداه حي اعله السلب صاح

وأَشَدهن هذي ومضيع نصيره

~ يا حسين ~

لربك قدمت نحرك
صفه كل الدهر دهرك

ذِكر خالد مجد ، قائد

صار إسمك أبو الأحرار
فرد ، متعدد الأدوار

صُبَرت وناتج لصبرك
صفه كل الدهر دهرك

#نبارك لكم ذكرى ولادة الإمام الحسين بن علي عليهما السلام لِحْسين ربنا إيحب ترى ولِحْسين طه إيقدس
وأول كرامة بمولده جنحين رد لفطرس
يامن تعاديه أَخْبِرَك للجنه تدخل ! أَيِّس
من نار هدمك بالگبر لا لا تظن من سندس
ويا نور يضوي حفرتك ؟ لو چان لحدك هندس
للرِشد ارجع وتْبَعَه ،يالبالجَهَل مِتْمَرس
وميِّز أعداء المصطفى إمن البات عنه يحرس
لا تبقى لهوائك عَبِد لعصبة هَلَك متحمس
وأختار لو ضِل العرش لو دَرَكَ أسفل تجلس
باچر الزهره الشافعه ، كل الشوارب تخنس
وبكيفك أتريد إلعَدَن ، لو في جهنم تندس

الشاعر : أبو زينب علي الظالمي