،،،،،،،،،،،،،،،،،،،،نعي،،،،،،،،،،،،،،،،،،،،،،

الدهر يتمنه بغيابك يبانه
ثگل حزنه يبي راضه يبأنه
بأمصابك خبر عنده يبانه
خبر عن كربلا وارجاس اميه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،
فرگنه الدهر ننخاك لمنه
بفگدجدي اوظلع مكسور لمنه
علي يابويه جرح الراس ألمنه
يتامه ابغيبتك راعي الحميه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،
علي الشيعه حماهه من تجلهه
تزيح اهمومه انته من تجلهه
ابكل شدات حيدر من تجلهه
تزول ابهيبتك حامي الحميه
،،،،،،،،،،،،،،،،،،،،،،،،،،،،،،،،،،،،،،،،،،،،،،،
ماخاب الندب حيدر علينه
ألتزمنه ابعروت الوثقى علينه
الگبر لو ضيگ اترابه علينه
يحضرنه علي حامي الحميه
،،،،،،،،،،،،،،،،،،،،،،،،،،،،،،،،،،،،،،،،،،،،،،،
لشاعر اهل البيت عليهم السلام
خالد عامر الزيادي

حيدر علي لمن وگع احزنله محرابه
اهتزت اركان الهدى من بين اخضابه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
من طاح حماي الحمه الكون كله اظلم
واهل الارض واهل السمه تلعن ابن ملجم
جبريل ناده امن السمه اهناك نصب مأتم
لمن نزل يم الوصي ايضمد اصوابه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
اليوم ابو الزهره حضريم يم علي داحي الباب
وام الحسن تهمل دمع تتفگد المحراب
هاي اليتامه بالحزن يا ويلي لمن غاب
اشحال العقيله ام الخدر لوطول اغيابه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
تصرخ ابدمعات الحزن يابويه ياحيدر
نيران الك وسط الگلب ياوالدي تسعر
طحت ابمصايب وابحزن واندب يبويه احضر
ابفگد الحسن ياوالدي ادموعي سچابه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
صوبني يابويه الدهر بسهام چتاله
لو ردت اوصف كربله واحچيلك الحاله
حال الحسين اوعترته وانصاره واعياله
يابويه لوحال السبي لوحالت امصابه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
للشام يابويه ابهظم ودوني واتمرمر
اوراس الكفلني اعلى الرمح ينضرلي يتحسر
هانت عليه امصيبتك من طف المكدر
بمصيبت حسين اوهله يابويه واخضابه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
لشاعر اهل البيت عليهم السلام
خالد عامر الزيادي

راح واليكم يشيعه راح الولي راح
والحزن عم الوسيعه راح الولي راح
راح الولي راح. راح الولي راح
………………………………………………
ناده جبريل الوحي ينعى المصابه
انهدمت اركان الهدى هذا خطابه
اظلمت ارض اوسما ساعة غيابه
التمت حشودالمله تبجي اعلى بابه
حيدر ابراسه انطبر راح الولي راح
راح الولي راح. راح الولي راح
……………………………………………….
حضر طاهه المصطفى سيد البريه
اوكل ملائكة السمه ويه الزچيه
ننعى والينه علي حامي الحميه
انواسي زينب العقيله الهاشميه
اتصيح ياخير العمل راح الولي راح
راح الولي راح راح الولي راح
………………………………………………
اليتامه الليله حزنت لبو اليمه
ويه دمعه لزينب ترد بسمه
اشلون واليهه اوابوهه ايسيل دمه
والحزن عم عالوجود الدنيه ظلمه
الحزن بالكون انتشر راح الولي راح
راح الولي راح راح الولي راح
……………………………………………….
بويه ماطابت اجروحي الظلع امي
انه بعدك بالمصايب زاد همي
بويه وبفگد الحسن متحيره باأمري
بويه وحسين الوگع بالحومه مرمي
طاح ضامي ابكربلا. راح الولي راح
راح الولي راح راح الولي راح
………………………………………………
بويه طاحو كل اخوتي اعلى الوطيه
بويه فوگ الزان راس ابن الزچيه
اچفوف عباس الگمر بالطف رميه
اوزينب انه ياعلي امشي سبيه
زينب الحره انسبت راح الولي راح
راح الولي راح راح الولي راح
……………………………………………....
لشاعر اهل البيت عليهم السلام
خالد عامر الزيادي

جابوهه جابوهه جثت الوالي جابوهه
خلوهه خلوهه فوگ الجسر خلوهه
اليوم انعادت ذيچ الطبره
اوكسرو ظلع البضعه الزهره
عادوهه عادوهه طف كربله عادوهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
من نسل طه محمد موسى ابن جعفر يشيعه
وارث الكرار جده بالعلم احيه الشريعه
وابصبر امه الزچيه فاطمه البضعه الوديعه
اشبه حسين ابغربته الفگد حتى رضيعه
شبه حسين اعياله التاهت
بكل وديان العالم هجت
اتولوهه اتولوهه والظلام اتولوهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
من سجن هارون عانه امگيد وينزف وريده
والأشد هاي المصايب مگيده رجله اعلى ايده
وبسجن طاموره ظلمه والحزن صاير وسيده
چالعليل امگيدينه والحديد ايحزله جيده
جالسجاد اوينزف دمه
مايتوصف حزن العتره
ظلموهه ظلموهه عترة طه ظلموهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
قاوم الطاغي ابثباته بالصبر اثبت وجوده
اتحده هارون ابعباده بكل ركوعه وكل سجوده
الشيعه تتنطر رجوعه تدعي للباري يعوده
واعد الشيعه ابن جعفر وفه ما اخلف وعوده
مايدرون ابهذا الموعد
موسى الكاظم عنهم يبعد
انتظروهه انتظروهه هاي الساعه انتظروهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
من اجه الموعد لگوهه عالجسر جثه رميه
صرخت الشيعه ابحزنه رجعت اعلينه ال اميه
من بني العباس بالسم چبده ممروده اودميه
عادت اعلينه المصايب بفگد ابن حامي الحميه
اتدگ اصدورالشيعه وتلطم
من ياهم تخلص ياهم
اتلگوهه اتلگوهه ايشيعون الجثه اتلگوهه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
شاعر اهل البيت عليهم السلام
خالد عامر الزيادي

هـذا مولاكم يشيعه اعـلى الـجسر
چـالـگـمـر عباس طـايح عالـنهر
ـــــــــــــــــــــــــــــــــــــــــــــــــــــــــــــــ
الـيوم طـاح الـمرتضى خـير العمل
من هوى بمحرابه أبسيف الاجل
مـوسى ابـن جـعفر يـاشيعه رحـل
چـن علي الكرار بـالراس انـطبر
ـــــــــــــــــــــــــــــــــــــــــــــــــــــــــــــــ
اليوم طـاحت فـاطمه اتهل الـدمع
بـالـگلب نـيران مـن كـسر الظلع
الـكاظم الغيض الـگلب منه انفجع
يـاحـزن يـشبه حـزنهه اويـاقهر
ـــــــــــــــــــــــــــــــــــــــــــــــــــــــــــــــ
الـيوم بـالسم انـــمرد چبد الحسن
الـتمت اعلينه المصايب والمحن
يشبه الجده الحسن چبده انسحن
چـم گلب بمصابه ظل يهلب جمر
ـــــــــــــــــــــــــــــــــــــــــــــــــــــــــــــــ
اليوم طاح حسين وأعياله انسبت
چـبود عطشانه ابضماهه اتمردت
رجعت اعلينه الـطفوف اوعـودت
الـيوم دنيانه اظلمت غـاب الـبدر
ـــــــــــــــــــــــــــــــــــــــــــــــــــــــــــــــ
اليوم سبـع الگنطره اتعنه الفرات
گـال يـانفس الـصبر حتى الـممات
اتحاوطت بيه الكفرمن كل جهات
مــن گــصـد لـلـمـاي مـارد الـگـمـر
ـــــــــــــــــــــــــــــــــــــــــــــــــــــــــــــــ
چنهه عادت كربله اعلينه صحيح
هـذا صوت الـناعـي اعلينه يصيح
هـذا أمـام الـرافضه بـالسم ذبيح
ويـن خـوانـه أوهـلـه اليوم اتحضر
ـــــــــــــــــــــــــــــــــــــــــــــــــــــــــــــــ
چـثـه ظـلـت لاعشيره اولا عمام
گـومـو شيعة فاطمه انشيع الامام
خـل نواسي المنتظرنقره السلام
أنـگلـه يـامولاي شـو طـال السـفر
ـــــــــــــــــــــــــــــــــــــــــــــــــــــــــــــــ
انـگلـه يامـولانـه والـيمتـه بـعيد
احنه چم هارون شفنه اوچم يزيد
والطغات اعلينه اشد من الحديد
بـغيبتك مـولاي كـل ساعـه ابعسر
ـــــــــــــــــــــــــــــــــــــــــــــــــــــــــــــــ
لـشـاعـر اهـل الـبيت عليهم السلام
خـالـد عـامـر الـزيـادي

ابسجن هارون ابسجن هارون
ابن المصطفى او حيدر
،،،،،،،،،،،،،،، ،،،،،،،،،،،،،،، ،،،،،،،،،،،،،،، ،،،،،،،،،،،،،،،
امير المؤمنين اليوم مسجون أبألف حسره
والطاغي الدعي هارون لاهي ابنسوته اوقصره
تناديه الخدم ياحيف امير اتعظمه واتكيره
وابن اطهر نسل بالكون امگيد جيده اونحره
امام الكون امام الكون
ابن المصطفى او حيدر
،،،،،،،،،،،،،،، ،،،،،،،،،،،،،،، ،،،،،،،،،،،،،،، ،،،،،،،،،،،،،،،
من سجن السجن مولاي اتحيرظالمه ابأمره
صبرشبه النبي ايوب حتى الصبر مل صبره
عجز محتار ضل هارون جاب الجاريه اتغره
أمة شرف سواهه امن الكاظم خذت عبره
عبر وأيات عبر وأيات
ابن المصطفى او حيدر
،،،،،،،،،،،،،،، ،،،،،،،،،،،،،،، ،،،،،،،،،،،،،،، ،،،،،،،،،،،،،،،
غريب ابسجن وأمگيد شبه الضامي ظل وحده
الشيعه اتلهفت لجله خبر من جاهه من عنده
واعدهه ابجسر بغداد امام او ما خلف وعده
سگاه السيندي ابسمه انمرد مثل الحسن چبده
ابجسر بغداد ابجسر بغداد
ابن المصطفى او حيدر
،،،،،،،،،،،،،،، ،،،،،،،،،،،،،،، ،،،،،،،،،،،،،،، ،،،،،،،،،،،،،،،
اجت شيعة ابن جعفرلگوه اموسد او مطروح
وسيد امگيد اوينزف امن الگيد الجسم مجروح
صرخت ياعلي الكرار بدموع او بواچي اونوح
ردت كربله اعلينه هذا حسين ها لمذبوح
تصيح ابصوت تصيح ابصوت
لبن المصطفى او حيدر
،،،،،،،،،،،،،،، ،،،،،،،،،،،،،،، ،،،،،،،،،،،،،،، ،،،،،،،،،،،،،،،
شاعر اهل البيت عليهم السلام
خالد عامر الزيادي

باب الكسرظلع الزهره خله الگلب يلهب جمره
من ذاك اليوم الهاليوم
شيعتهه ظلت بهموم
مهظومه اوتهمل بالعبره
ــــــــــــــــــــــــــــــــــــــــــــــــــــــــــــــــ
من انكسرمنهه الظلع البضعه بنت المختار
ظلت تلوج امن الألم والعين اتصد للكرار
الهظم محسن من وگع يومي بأيده اعالبسمار
والدمع منهه سچاب
اتنادي ياداحي الباب
مهظومه اوتهمل بالعبره
ــــــــــــــــــــــــــــــــــــــــــــــــــــــــــــــــ
خلفو وصيتك والدي بيعتهم او نكروهه
بجمع السقيفه اهل الرجس ام الحسن ظلموهه
اول هظمهه الشافته بالباب من عصروهه
جم ضيم الشافت جم هم
عترتهه بچتول اوسم
مهظومه اوتهمل بالعبره
ــــــــــــــــــــــــــــــــــــــــــــــــــــــــــــــــ
او بعد الزچيه الطاهره اتواكبت هاي المحن
جرح الصميده حيدره الشيعه ونتله ابحزن
والحره زينب حايره فگدت وليهه اخت الحسن
بفگد امهه وامصاب الولي
مهمومه زينب بت علي
مهظومه اوتهمل بالعبره
ــــــــــــــــــــــــــــــــــــــــــــــــــــــــــــــــ
والمسموم وجرح امصابه والچبده الظلت مسمومه
وحسين الظل فوگ الغبره عطشان امخظب بدمومه
ولوعت زينب يوم العاشر مسبيه اوامست مهظومه
ابلا والي اتظل بين الناس
لا يمهه حسين او عباس
مهظومه اوتهمل بالعبره
ــــــــــــــــــــــــــــــــــــــــــــــــــــــــــــــــ
وي ونت زينب ونينه واشگدشفنه آآهات اوظيم
چم ظيمالشفنه اوعانينه چم ارگاب السالت دم
متمسكين ابحب العتره اشما ضحينه او مانهتم
اشما جارت بينه الكفار
تتعنه العتره الزوار
مهظومه اوتهمل بالعبره
ــــــــــــــــــــــــــــــــــــــــــــــــــــــــــــــــ
لشاعر اهل البيت عليهم السلام
خالد عامر الزيادي

ياذينه امصابچ يالزهره
ياذينه امصابچ يالزهره
➖➖➖➖➖➖➖➖➖ـ
ياذينه امصاب البسمار
من صابچ من باب الدار
لجله العين اتهل اعبار
والفگدچ ونينه ابحسره
➖➖➖➖➖➖➖➖➖ـ
ظلع المكسور ايأذينه
فگد المحسن عايش بينه
حيدر واجروحه اتبچينه
لجله العين اتهل بالعبره
➖➖➖➖➖➖➖➖➖ـ
اتسيل دموم الداحي الباب
سالت وي دم المحراب
والهم اكبر هم من غاب
بسم واچتول اخلافه العتره
➖➖➖➖➖➖➖➖➖ـ
سبط الهادي الچبده انمردت
من نيران السم احترگت
منهه الشيعه ابفگده اتچوت
والهل يوم اتضل مستعره
➖➖➖➖➖➖➖➖➖ـ
لحسين انظل نبچي ابلوعه
والچف عباس المگطوعه
اوزينب واطفاله المفجوعه
والجسمه الظل فوگ الغبره
➖➖➖➖➖➖➖➖➖ـ
نقسم نتعاهد يالزهره
مانخلف حبنه او يالعتره
ماننسه حسين اشمايجره
وايظل حسين اعظم ذكره
➖➖➖➖➖➖➖➖➖ـ
لشاعر اهل البيت عليهم السلام
خالد عامر الزيادي

فاطمه يافاطمه يافاطمه
فاطمه يافاطمه يافاطمه
ألچ لوعه ابكل گلب يافاطمه
ألچ تبچي اهل الارض واهل السمه
………………………………………………………
الچ دمعه ابكل جفن يم الحسن
شبه طوفان الدمع فوگ الوجن
اجيال بعد جيال نورث هالحزن
الكل مصيبه اوكل جرح ننزف دمه
فاطمه يافاطمه يافاطمه
فاطمه يافاطمه يافاطمه
………………………………………………………
يامصيبه او ياجرح منهن يطيب
كسر ظلعچ لو فگد طه الحبيب
لو جرح بالباب و المحسن يغيب
لو جرح حيدر علي حامي الحمه
فاطمه يافاطمه يافاطمه
فاطمه يافاطمه يافاطمه
………………………………………………………
ظلعچ المكسور ياهو الجبره
نعتب اعلى الباب لو عالكسره
او فگد حيدر نار بينه اموجره
حسره ظلت بالگلب و اتألمه
فاطمه يافاطمه يافاطمه
فاطمه يافاطمه يافاطمه
………………………………………………………
حسره ألچ مولاتي اوحسره ألي
شلون بأذن الله من شفتي الزكي
ساعد الله اگليبچ او گلب الولي
اعلى المصايب والحزن يافاطمه
فاطمه يافاطمه يافاطمه
فاطمه يافاطمه يافاطمه
………………………………………………………
شلون شفتي حسين انصاره تطيح
هذا ينزف ذاك مجروح اوذبيح
وزينب الحره تناديچ او تصيح
حرگت اخيامي الزمره الظالمة
فاطمه يافاطمه يافاطمه
فاطمه يافاطمه يافاطمه
………………………………………………………
حبچ امن الباري اعلينه فرض
نحمدالله او نشكره ابهاي الارض
احنه شيعه او بالحشر يوم العرض
بالشفاعه اتفوز شيعة فاطمه
فاطمه يافاطمه يافاطمه
فاطمه يافاطمه يافاطمه
……………………………………………………....
لشاعر اهل البيت عليهم السلام
خالد عامر الزيادي

نـزل مـرسال الـمنيه
استٱذن السيد الـبريه
حـيدر ايـفارگ اخـيه بالأنين
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
الليله بدموعك يحيدر ودعت سيد الرسل
ياعلي وايعينك الله اشلون گلبك يحتمل
اشلون ودعته اخيك مـن گـرب ليه الاجل
بقت لو وياه روحك راحت اوياه من رحل
راح طاهه ابهل مسيه
صعبه كلش هالقضيه
حـيدر ايـفارگ اخـيه بالانين
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
اشحال الأيوسداخيه بيده وابوكت الدفن
وحسرة الفاگد عضيده مايفيد الهه الحزن
ماتوفي ادموع عينه لو تصب شبه المزن
عظم الله اجرك يحيدرعالمصايب والمحن
ياعـظـم هـاي الـرزيه
وحده ظل حامي الحميه
حـيدر ايـفارگ اخـيه بالأنين
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
الليله بـغيابه حزينه فاطمه ابحسره اوألم
جارت اعليهه النوايب من رحل سيدالأمم
الأبوخيمه اعلى بنته لوتحس بنته ابهظم
ابياألـم ياحسره ظلت ابيامصاب اوياظلم
من تون ونـه شجيه
راح ابوالزهره الزچيه
حـيدر ايـفارگ اخـيه بالأنين
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
الليله بالـهم ابـغيابه الـحسن دمعه ايـهمل
والغريب حسين بعده بحسره ماضله امل
شافواخلافه الاذيه مـن ظلم اهـل الـجهل
واليتامه اتلوع ضلت لاولي لاعـدهه أهـل
الـحزن عـم عالوطيه
راح ابوالطلعه البهيه
حـيدر ايـفارگ اخـيه بالأنين
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
لشاعر اهل البيت عليهم السلام
خالد عامر الزيادي