**بیر گون بو تایا سن دہ او تایدان گلہ جڪسن
ڪئچمیش او سینیق ڪؤرپولو چایدان گلہ جڪسن

درویشلریلہ شاہ نئجہ گیزلین گؤروشرمیش
ویران ائویمہ شانلے سارایدان گلہ جڪسن

اَینیندہ ایشیق ڪؤینه‌یے، اولدوز اته‌یینده
اون دؤرد گئجہ لیڪ آے ڪیمے آیدان گلہ جڪسن

قارشیندا اولان یاخشی_ یامان تهلوڪہ لردن
قورخماز سوووشوب هرنہ اولایدان گلہ جڪسن

غملر قوشونون قیرماغا حسرتلے سینہ مده
بیر آندا چیخیب اوخ ڪیمے یایدان گلہ جڪسن

قابلار دوزولوب یان-یانا ، قلبیم سئوینیر ڪی
اود اوستہ هاچان قاینادے چایدان؛ گلہ جڪسن

گلمیشدے دونن باغچادا بولبول اوخویوردو
قوشلار زومارین وئرمه‌یہ یایدان گلہ جڪسن

"آیلار"دے دوشوب ڪؤنلومہ بیر قانلے قیامت
سانڪے بیلیرم سس دولو هایدان گلہ جڪسن...

ثریا_بخشی_آیلار**

اونوتماق ایسته‌رم، اؤزوم اؤزومدن
بیر داها آیریلیب هاچالانماییم.
گئجه‌لر یاتیرام بیر فیکیرله من،
سَنی دوشونمه‌ییم، سَنی آنماییم.

بو ائله قایغی کی، بو ائله غَم کی،
آزدیرار یوز ایللیک یولوندان سَنی.
سَحَر ده، آخشام دا دوشونورم کی،
گَرَک دوشونمه‌یم هئچ زامان سَنی.

اونودار فیکیرده، خَیالدا تَکجه،
اونوتماز اورکده سئوَن ,سئونی.
مَن اؤزوم اؤزومه "اونوت!" دئدیکجه،
اؤزومو اونودوب تاپیرام سَنی.

اونودوم دئییرم، آنجاق نه فایدا؟!
یادیمدان چیخمامیش دوشورسن یادا.
عشقیمین اودونو سؤندوره بیلمیر،
غَضَبین سئل کیمی آشیب داشسا دا...

#بختییار_واهابزاده.

**تانرینین عالمه باخدیغے گؤزده
سئوگیلَر باشلانان اَزلسن گؤزه‌ل
ڪرمین اصلیه یازدیغے سؤزده
جیغایا بزنمیش غزلسن گؤزه‌ل . . .

دوداغین قؤوشدورور سؤزلَرےجوته
گؤزلرین گیله‌سے بنزه ییر سوته
قیزارمیش یاناغین لاله‌دن اؤته
سن گوللردن بئله گؤزه‌ل‌سن گؤزه‌ل . .

گئجه‌نین گوندوزده باتدیغے زامان
شافاغے گونشه قاتدیغے زامان
دوعالار گؤیلَره چاتدیغے زامان
دیلڪ‌لر ایچین‌ده اوزَلسن گؤزه‌ل . . .

ڪاتيب اوغلو سؤزون بیتدیيے زامان
دیلیم ڪوفور دئسه ایسته‌رَم آمان
چیخ اورتایا بلڪه او یاریم قالان
تانرینین پارچاسے دوزَلسین گؤزه‌ل . . .

✍:ڪاتب‌اوغلو**

https://t.me/joinchat/AAAAAE35jqdoNzejrY7s1Q

https://t.me/joinchat/AAAAAE35jqdoNzejrY7s1Q

نه وار

جاوان یاشاماغا یوز ایللر بویو
انسانی انسان تک دویسالار نه وار
گونده بیر دله دوز مین کلک قورور
ساکیت یاشاماغا قویسالار نه وار

آرتدیقجا ظولوم لر توُکولور یاشلار
شیشدیکجه قارینلار بوشالیر باشلار
دونیانی بوتونجه اودان اوغراشلار
تکجه بو دونیایلا دویسالار نه وار

بهمن  اویوم اویوم اویورلار بیزی
سونرا تره زی یه قویورلار بیزی
بیر گونده یوز دفعه سویورلار بیزی
بیر گونده بیر دفعه سویسالار نه وارکی

بهمن وطن اوغلو

آ ظالیم

تانیمیرسان یاخین نه‌دیر، یاد نه‌دی
یادا دوست سان، دوستا یادسان آ ظالیم!
اوره‌ییمده بیر گونشین اودو وار
کور قورویار کوره آتسان آ ظالیم!

داغ دایانماز بو آغرییا بو غمه
غم دریاسی آخیتمیسان سینه‌مه
قیصاصین وار آل، بو جانیم، بو قمه
بو قصدیندن یامان شادسان آ ظالیم!

دانیشمیرسان یوخسا دیل‌دیر باخیشین
گاه خنجردیر گاه دا میل‌دیر باخیشین
هم اؤلدورور هم دیریلدیر باخیشین
نه سئحیرکار بیر جلّادسان آ ظالیم!

✍سؤز:ممد آراز
?سس:پونهان ایسماعیللی

باشدان باشا آغ گئیینن گؤزلیم
بئله گئیمه آغ اؤلدورر شاعیری
سینه م اوسته چالین چارپا چکدییین
بیر ساغالماز داغ اؤلدورر شاعیری

گؤزللردی جانیمیزا قصد ائدن
بیزی واختسیز آیری سالا بسله دن
قیصاص آلار منیم کیمین خسته دن
سنین کیمین ساغ اؤلدورر شاعیری

آغ یاناقلار ائله بیل کی لئچک دی
سئون کسلر سئودیییندن نه چکدی؟
وار اندامون گوله باتمیش چیچک دی
اَل دَیمه میش طاق اؤلدورر شاعیری

دونیا هئچ دیر نور دونیاسی اولماسا
گؤزللرین صافی خاسی اولماسا
"زلیم خان"ین حاق سئوداسی اولماسا
وعده کئچه چاغ اؤلدورر شاعیری

زلیمخان_یعقوب