للمدينه لــو لـمـشـهـد تهمـل العين
بالرضا احتارت الدمعه وجد الحسين

حتار شوكي المن يزيد
والدرب كـلش بـعـيـد

•••_•••_•••_•••_•••

ليا فجيعه دموعي تنزل للرضا لو للرسول
ثنينهم روحي هوتهم والدرب ادريي يطول
فكري تايه يهل وادم والله حاير شارد اكول
بفكد ابوها لو ابنها بـيـمـن انـعزي الـبتول

وفاطمه تون المسيه والدمع سال
ثنيهم سـم الكـتلهـم بـيـد الانذال

والذبـح بيت القصيد
والـدرب كـلش بعيد

•••_•••_•••_•••_•••

دمعي المن هسه ينزل حاير وما عـندي بال
عيوني كـلت ثنين هـنـه بيـهـن المدمع زلال
وكـلـت اوزعـهـن عِيوني بالتساوي وبـعـتدال
للرسول اليمنه صارت وللرضا دموع الشمال

هل مصيبه شكد عضيمه اتهدل المتون
ومو دموع العين اطـيح كــون الـعـيـون

بالنواعي ابقه اعيد
والدرب كلش بعيد

•••_•••_•••_•••_•••

تراب من مشهد اريد ويثرب اشتم منها ريح
والهم شكد كلبي رفرف رايـد يبوس الضريح
والله لو عله اجتني وابـقـه بفراشي طــريــح
عيوني لو تنضر كببهم كـل مرض مني يطيح

هيه بالصوره المناير تشفي الجروح
شلون جا لو بالحقيقه تفرفح الروح

كبـة الـجـد والحفيد
والـدرب كـلش بعيد

•••_•••_•••_•••_•••

يهل وادم كبة خضره تنحني يمها الرؤس
ومن ذهب كبه شحلاها يمها ترتاح النفوس
مو النجمه تغار منهن منهن تغار الشموس
وحده المَحليه المدينه وثانيه الي مَحليه طوس

الهن شكد يهل وادم عطشت العين
هنه ذني يصيرن ابعد واحـلـه كبتين

بس اشوفنهن اريد
والدرب كلش بعيد

•••_•••_•••_•••_•••

كــون اروح وبالنيابه عـن ابـو صالح ازور
وربي احلفنه بمحمد ورضا ايعجل الضهور
نموت راح وما نشوفه يا كلبنه شكد صبور
ضلمه دنيانه تراها وهوه بس المهدي نور

بهل عزاء ارد ارفع ايدي وادعي هل يوم
ربــي عـجـل فـي ضهوره وزيـل الهموم

هل مسه المدمع يزيد
والــدرب كـلـش بعيد

محمود محمد العطواني

استشهاد رسول الله (ص)

تدري بتك بويه شنهي اخبارها
فزعت اعليها العصابه بـنارهـا

🔗🔗🔗🔗🔗

صحت وا ويلاه اه يا والدي
حيره من يا سوط وياك ابتدي
تدري بيه اخلافك شسوه الردي
الكال عنك تهجر اعلي يعتدي

بويه ريحانتك حــركــوا دارها
فزعت اعليها العصابه بـنارهـا

🔗🔗🔗🔗🔗

علينه تدري الضيم بويه شكد سده
والمصايب هـــاي مــن اهل الـرده
الله لا يـنـطـي سـقـيـفـــة سـاعـده
منها ذبح حسيـن وعــيـالــه ابـتـده

والهزل والسوك من افـكـارهـا
فزعت اعليها العصابه بـنارهـا

🔗🔗🔗🔗🔗

بعده بيه صوابك الما ينجرع
وفزعوا اعليه الي ما بيهم سبع
اعليه يا بويه اندفع ذاك الجذع
وفوك كسري اعليك كسرولي الضلع

ومني يا بويه العده اخذت ثارها
فزعت اعليها العصابه بـنارهـا

🔗🔗🔗🔗🔗

بموتتك يا حيف هل دين انعدم
واعله اهل البيت جم غادر هجم
تصيح ربعك يال ثـارت الـصـنـم
نحرك الباب وغداً نحرك خــيــم

والوصيه الگيدت صـكـارهـا
فزعت اعليها العصابه بنارها

🔗🔗🔗🔗🔗

ويه اكل اذان ابـقـه اعليك احن
بفركتك ضل دوم يرهملي الحزن
ومنعت الانذال بويه اعليك اون
الله لا يـنـطي ابو كـلـمة (وأن)

والسياط اعله الـمـتن اثـارهــا
فزعت اعليها العصابه بـنارهـا

🔗🔗🔗🔗🔗

ويلي صحت بصوت يا بعد النضر
بين باب وحايط ولـيـدي انـعـصـر
ومن بـعد عـيـنـاك يبرالي الـقـهـر
وراح الحكك هيه حسبت جم شهر

وسر كبر بتك بقه امن اسرارها
فزعت اعليها العصابه بـنارهـا

محمود محمد العطواني

اخافن لا اموتن بـالسنه الجايه
وما ابجيلـك وما امشي مشايه

•••.•••.•••.•••.•••.•••

احلفك بالمشت عـالهزله مـسبيه
اريدن فضلك يضل كل سنه اعليه
انه الــكل عام اخدمك بيه ما بيه

وما انساك لامك منطي الحجايه

•••.•••.•••.•••.•••.•••

شاني ارفعته من دموعي طاحتلك
وعشت عيشت ملوك بساعت اخدمتك
ومثل ذيجه السنه يحسين من كتلك

طوّل عمري حتى اقرالك قرايه

•••.•••.•••.•••.•••.•••

طوّل عمري مو طمعان بالدنيه
ولا خاطر تشم هذا الهوه الريه
اريدن كون الك احضرلي لطميه

والطم والمدامع تنزل هوايه

•••.•••.•••.•••.•••.•••

طوّل عمري لجل الخدمه بالموكب
ولـزوارك اوكــف سـيـدي مـعــزب
بالعام اليجي عطـرك اريـده ايـهـب

واشتمه اريدن واحزن برايه

•••.•••.•••.•••.•••.•••

صحت من مجلسك ماريد تحرمني
وبالعام اليجي يــحــســيـن وفـقني
لـعـزائك يابو الاكبر هـم تـحـزمـنـي

واترف كون بيدي بكل سنه الرايه

•••.•••.•••.•••.•••.•••

خايف لو اموتن مـن يـدفـنـونـي
بلون ابيض يحيف اهلي يچفنوني
وانه المتعود اسود دوم الك لوني

مو من موتي خايف خوفي من هايه

•••.•••.•••.•••.•••.•••

اعرف لو اموتن انتا تـحـضـرني
ومن عيني البجت لجلك تقبلني
ومثل لزمة رقيه ادريك تلزمني

ولجنة عدن تتمشه ويايه

الشاعر محمود محمد العطواني

يا سلاب تاج حسين كــلي ويـن لـبـاسـه
كلها التاج شلج بي ذاك اعله الرمح راسه
*•*
زينب طلعت بعاشور تـنـشد ويـنـه والـيـنـه
تركض عل جمر وتكول طايح ويـن ابو سكينه
مــا يفزع عـلـى العدوان من عدهم يحامينه

الفدوه يروحلك يا حيف حدك يل طحت داسه
يــا سلاب تــاج حسين كــلـــي ويـن لـبـاسـه
•
ما بين الزلم يا حيف ركضت اخت ابو فاضل
مـره تطيح مـره تكوم ضـل بيها الحمل مايل
تنشد وين طاح حسين لو تنشد على الكافل

حتارت بين ابو السجاد ويلي وبين عباسه
يا سلاب تاج حسين كــلــي ويـن لـبـاسـه
•
طلعت لاكت السلاب شــايــل بـيـده العـمامـه
كبل لا اطبره شفته يكول دايــر عـيـنـه لـخيامه
اثنعش طبره يكلها انه طبرته بسيفي عل هامه

شافانه بهليب النار الله يساعد احساسه
يا سلاب تاج حسين كــلي ويـن لـبـاسـه
•
طلعت والزلم صوبين وبكل كــتــر موجـوده
وصاحت خويه يل عباس حدك عبرو احدوده
الف يا حيف ابو الكلفات طايح جفه يم جوده

وينك خويه يل عباس حدنه الناصبي داسه
يــا سـلاب تــاج حسين كــلي وين لـبـاسه
•
يا وسفه والف يا حـيف طايح يا بـعـد عـيـنـي
وجيوش العده يحسين حـالـت بينك وبـيـنـي
وشمرهم جاب خويه حبال يجتف بيها جفيني

اعله اخت حسين اجت الكوم لمن خلصت انفاسه
يـــا ســلاب تــاج حـسـيـن كــلـــي ويـن لـبـاسـه

المستهل من كلمات الملا وحيده ومن جاراها في النصوص محمود محمد العطواني

يا هلا بشجعاّنه == يا هلا بشجعاّنه

====

زينب امن الخيمه طلعت عاينت صوب الزلم
ويــا هـلا بــالشيموني صاحتلم والــنــعــم
شدو سروج الاصايل للحرب وين الــشــهــم
وشـاهدت راس المعاره مـدنكلهم وبـــعــزم

هلا بهيبة هاشم خدري بيكم زايم

ما خليتو الطف يركد

الهيبه ذوله اسباعنه == يا هلا بشجعاّنه

====

صال الاكبر يا حلاته الهيبـه اول هـاشـمـي
عل عساكر ضل يهوس وينه وينه العلكمي
يل حثاله بـصـوتـه ناده لا مفر من صارمي
حـيـدري بطبراتي انــه وبالملامح فاطمـي

وبالمخيم ليله تعاين وتدعيله

محد لاكاا وسالم رد

يا وريث اجدادنه == يا هلا بشجعاّنه

====

ضـهـضب ربـات المضايف فـزع بـهـدوم الـعـرس
غاضب شمحلاته من هد وجهه احله امن الشمس
رمـلـه كــالـت هــا يـغـالـي عـدانـه لـقنهم درس
والـيسـولف راسـه كـصـه حتى لو يحجي بـهـمـس

هل زلم لاويها ورايتك عليها

جفك حنيّ بلون الدم

يا بخت ديوانّه == يا هلا بشجعاّنه

====

فزعت النه تـلـث كـواكـب مـن سـماء ام البنين
جـعـفـر وعـبـدالله اجونه ويه عثمان الـحـنـيـن
عـدهـم طـبـاع الـبـداوه وللحرب مـتـحـزمـيـن
ما تضل كل قاده ضدهم ساعت الطك من تحين

تفر كل القاده من عمام الساده

هدو خلو الطف يشرد

نفخر بخوانّه == يا هلا بشجعاّنه

====

رابــع ســبــاع المعاره سـرفن وهد الكمر
محد امن حدوده يدنه ومنهو جا سالم عبر
سطرته تضيع الاعادي وخرته تنشف النهـر
كلها شردت من اجاها ومـحـد يـلاوي كدر

مشيم البدويه كافل العلويه

من شال الواه هتز الطف

يا كفيف حجابنه == يا هلا بشجعاّنه

====

صار دور الوالي هسه وشرد اسولف عل حسين
يـرتـجـز مـن هـد عليهم انـه ابـن الـخـيـرتـين
فارس ليوث الهواشم كـفـو من شـيـخ الـعـرين
سكتت اكباله الاعادي ويـنـسـمـع بـس الـونـين

من صعد ميمونه كامو يهابونه

من هد خلا الطف يون

يا جبير خيامنه == يا هلا بشجعاّنه

محمود محمد العطواني

صوت جبرائيل بالطف يعتلي •• لا فتى الا علي الجده علي

شبل ما عدهم ابد
ذوله ازغرهم اسـد

ـ
علي الاكبر ،، عـلـيـهم كـر ـ تـعـنـه وشـد لـثـامـه
الحجي لسيفه ،، تره بكيفه ـ مثل صـولـت عمامه

وعلي فّنه السلم منه وسبع هذا نـعــده
الدنت جدمه وگرب يمه بعد كلي شيرده
نمسح ذكره الحمد يقره عليه لمن يهده

فارس وصنديد ينعد اليفر •• وما يكوم هناك دوم المنسطر

تنادي روس بلا جسد
ذوله ازغــرهـم اسـد

ـ

سبع دومه ـ فنة الحومه ـ وكف بيها اعله طوله
يـلاويـهـا ـ يـحـاجـيـهـا ـ يعشگي امن الطفولـه

وصل يومي وتره علومي يحومه بيه تحچي
انه الاكبر مثل حيدر لاخلي الـقـاده تـبـچي
واذا اطيحن يمحلاها اعله ابو فاضل اتچي

هدته اعله الكوم هدت حيدره •• وناده عزرائيل لجنهم تره

يا علي الاكبر مدد
ذوله ازغرهم اسد

ـ
الذبح بادي ـ العده تنادي ـ على بختك يل اكبر
سبه الوادم ـ وابن غانم ـ لـكه حـدفـه وتـوذر

عداه ترجف نزل يهتف انه كـافـل رقـيـه
شمس تلهب ولا يتعب تره بسيفه المنيه
صدك زلمه ومثل عمه يسوي الغاضريه

حمزة الطف عاد بدر بكربله •• يحله كطع الروس اشهد بس اله

غيضه طافح ما ركد
ذولـه ازغـرهـم اسد

ـ
الهوه يشمه ـ علي اسمه ـ وبعد يـشـبـه مـحـمد
يـمـحـلاتـه ـ عـلـي بـذاتـه ـ يناس الحومه تشهد

الهوه بضهره و ركب مهره والا هل من مبارز
الزلم تطلع لجن ترجع فـقـط موته وجـنـايـز
سبع من هد سلم محد المعكسر كله عـاجـز

عمه من ابعيد يهتف والنعم •• كافي بسك عاد خلصت الزلم

وكله لا رايـد بـعـد
ذوله ازغرهم اسد

ـ
اذا يخزر ـ الجيوش تفر ـ وابد ما يبقه واحد
نـزل كبّر ـ ولا تـكـدر ـ تـره توصفه القصايد

ولا يوصف شجاع الطف فقط تحلاله هايه
ضوه الساده فنه القاده الزلم لبست عبايه
يكول احنه علي جدنه الذبح عدنه هُوايَــه

خولي صاح بصوت وكليبه ارتجف •• حيدر النه هنا شجابه امن النجف

مو حفيد نشوفه جد
ذولـه ازغـرهـم اسـد

محمود محمد العطواني

نزله اهوازيه

الجانت شوفتك تسگي ذابل من عكب عينك

ـ
رد يا والدي اعله العيد ضل جم يوم يل غالي
بعدك كلي اعيد شلون وانتـا بطولك اهـلالـي
كل عام ودموع العين بعدك بـويـه تـبـرالـي

ميت من بعد عيناك واليحيـنـي جـفـيـنـك
الجانت شوفتك تسگي ذابل من عكب عينك

ـ
يل صنديد احلفك بيش لحباببك تـرد سـالـم
تدري بروحتك هل يوم كسرت كل بني هاشم
ابو الاكبر عليك يـنـوح ويا لوعة ابو الـقـاسـم

ليش تشيل يل كرار رد يا خيمة حـسـيـنـك
الجانت شوفتك تسگي ذابل من عكب عينك

ـ
طحت وطيحتك يل شيخ طاح وياها كل حيلي
عكبگ ضـلـمـت دنـيـاي ومصباحي شبه ليلي
شاب وشيبت بـچـفـاك ويا عمري سبگ جيلي

من بعدك دموعي تسيل وينك يل رحت وينك
الجانت شوفتك تسگي ذابل من عكب عينك

ـ
عميد الساده شال اليوم وچفه الحسن دلاته
وضلت تـنسمع عـبـاس لذاك الصوب وناته
راح الـجـان روح الـروح وراحت ذيج ضحكاته

وترجع النه يل كـرار سـالـم جـا مـتانـيـنـك
الجانت شوفتك تسگي ذابل من عكب عينك

ـ
بعدك بويه أنه حسين راحي يصفگ براحي
يل غالي وگبل عاشور هجرك صار ذباحي
عدويي اغيابك الچتال ولا ما ينفع اسلاحي

يـال حيرت ريتي ويـاك بين الهوه وما بـيـنـك
الجانت شوفتك تسگي ذابل من عكب عينك

محمود محمد العطواني

ميمر كربلائي

مختلفه يا حيف الناس ••• اول علي لو رابع

=====

ما تفتهم هاي الخلگ عاذرهم
مو بالتسلسل قدرك شيقنعهم
سِيِد الرسُل طه لجنه اخـرهـم

العاشر لّون يحطوك ••• واضح تضل ما ضايع

=====

موش برقم قدرك عـلـي يــتـحدد
يل ما يعرفك بس إلهك واحــمــد
ودومه الوحي لدارك يجيي ويتردد

هذا الحمه بسيفه الدين ••• وذمته لاحد ما بايع

=====

الرابع حسب حيدر عرفنه جروحه
جـده تره الـفـقـاره مـاخـذ روحه
يكول العنب حامض تره الميلوحه

ومنهو اليلوح الكرار ••• بهاي الزلم ما سامع

=====

الرابع يكول اخذه اعلى كد عقليته
وكله شتضــن قدر الوصي نصـيته
لوما علي اول الله مـا شـگ بـيـتـه

الكعبه البناها ابراهيم ••• انشكتله حتى تبايع

=====

الاول علي قبل اكتشاف الارقــام
واكبر مصيبه انشافت بهل ايــام
اللاح الشمس يتقارن ويه الاقزام

شوف الفرق بالمقياس ••• ما حاجه اكلك شاسع

=====

الاول علي بكلشي تره متفقين
بس ذولفقاره يأشر برقم ثنين
معناها انه وشيعتي منـتصرين

من الرضاعه امن صباي ••• حبك يحيدر نابع

=====

باكبر كتبتهم شفنه هذا الشاهد
الثاني شـرد بالحومه واول واحد
الـثـالـث ثلث تـيـام كالوا شـارد

ابسط مثال انه انطيت ••• وشكد مصادر جامع

محمود محمد العطواني

علي علي علي علي علي يا علي

ـ
علي الاسم الاعضم ـ علي لا ما يـنـضـم
علي الهيبه الضيغم ـ بالحرب ما يرحم

علي دومه الـعـالـي ـ علي كـلش غـالـي
علـي راحـت بـالـي ـ بـحـبـه يا هنيـالـي

هذا الاسم من ينذكر الهم ينجلي
علي علي علـي عـلـي علي يا علي

ـ
علي النور الساطع ـ علي البدر الطالع
علي صيته الشايع ـ ولا حشاه مو رابع

علي بـ طه اتـكـفـل ـ عـلـي هـوه الاول
علي مصحف منزل ـ ذل زلم بس ما ذَل

تخشع سمانه بهل اسم من ينـتـلـي
علي علـي عـلـي عـلـي علي يا علي

ـ
علي راعي الشيمه ـ علي فّي بالهيمه
علي للحك خيمه ـ وبالقحط هم غيمه

علي ايه وسوره ـ علي العرش ايزوره
علي الكون ايدوره ـ كشخة المعموره

والـجـنـه لـمن تنسئل منهو الولي
علي علـي عـلـي عـلـي علي يا علي

ـ
علي رازق واهـب ـ علي سيفه الضارب
علي عالشر غاضب ـ امنتف اكبر شارب

علي حـيـل الـبـاري ـ علي بالـدم سـاري
عـلـي وانـه الـقـاري ـ اسمه من صياري

هذا النداء امن الصغر ضل يعتلي
علي علـي عـلـي عـلـي علي يا علي

ـ
علي مربع حيفه ـ علي شاطر سيفه
علي كلشي بكيفه ـ الوحي بداره وضيفه

علي احزام الهادي ـ علي باسمه انادي
علي ولجلك فادي ـ يالعزيز اولادي

هوه انه غيرك يل فحل جا منهو الي
علي علـي عـلـي عـلـي علي يـا عـلـي

ـ
علي ذخر الشيعه ـ علي امره انطيعه
علي لا مـنـبـيـعه ـ واله نهدي البيعه

علي اليصبح جاره ـ عـلـي ايبَـرد نـاره
علي واحنه انصاره ـ الميت و حّي زاره

لمن يدفنوني افتخر يمـه هـلي
علي علي علي عـلـي علي يا علي

محمود محمد العطواني

ثــار الله الــمــنــتــضــر ثار الله
وجده ردتله الشمس بعد الصلاه

،،،?،،،?,,,?،،،?،،،?,,,?,,,

١٥ شـعـبـان صـار الـمـنـتـقم
وصاحت الاكوان منك والنعم
بجيتك الانذال بــاجــر تـنهزم

هذا عالي وبالارض محد علاه

ثــار الله الــمــنــتــضــر ثار الله
وجده ردتله الشمس بعد الصلاه

،،،?،،،?,,,?،،،?،،،?,,,?,,,

بأجمل الاطوار غنت كربله
هله بهل مولود يا مية هله
نّور الاكوان شـيـخ الـمرجله

نّور بجيته ارض ربنه وسماه

ثــار الله الــمــنــتــضــر ثار الله
وجده ردتله الشمس بعد الصلاه

،،،?،،،?,,,?،،،?،،،?,,,?,,,

هذا هنياله الذي بحبه حضه
داره من الخير حاشاه ما فضه
هذا يا هل ناس جنه المرتضى

بالفضائل هذا واصل مستواه

ثــار الله الــمــنــتــضــر ثار الله
وجده ردتله الشمس بعد الصلاه

،،،?،،،?,,,?،،،?،،،?,,,?,,,

نهني نرجس بيه ويــه العسكري
واسمه من اقراه يــنسر نـاضـري
سـيـد الاكوان فــارس حـيـدري

اسمه يفرح بي جا كلمن قراه

ثــار الله الــمــنــتــضــر ثار الله
وجده ردتله الشمس بعد الصلاه

،،،?،،،?,,,?،،،?،،،?,,,?,,,

لا محال يصيح كلبك لا مـــحــال
يوم جيتك عـيـد ابـنـاء الـــحــلال
بس ضهورك ليش يـا مـولاي طـال

العطش لاسمك سيدي محد رواه

ثــار الله الــمــنــتــضــر ثار الله
وجده ردتله الشمس بعد الصلاه

،،،?،،،?,,,?،،،?،،،?,,,?,,,

اي وحگ قتال مرحب وابن ود
اغله من الكون هذا المـنـولـد
نــزل جـبـرائـيـل ويــوزع ورد

ووكف ميكائيل ويردد وراه

ثــار الله الــمــنــتــضــر ثار الله
وجده ردتله الشمس بعد الصلاه

،،،?،،،?,,,?،،،?،،،?,,,?,,,

يوسف و عيـسـى الــه كالو نـقـيـم
محفل بـهل يوم وويانه الـكـلـيـــم
غير هذا المهدي ذو الشأن العضيم

بعد هذا المهدي حجتنه شحلاه

ثــار الله الــمــنــتــضــر ثار الله
وجده ردتله الشمس بعد الصلاه

محمود محمد العطواني