‏فكرة إنك عشان تخلص من حاجه مضايقاك اتكلم عنها فكرة فاشلة الحاجة كل ما تتكلم عنها كل ما يبقى صعب تتخلص منها ، هتفضل لازقه في دماغك لحد ما تسود الحياة في عينيك الفضفضة بتريح اه بس مش طول الوقت وكتر الكلام مش هيخلي الوضع أحسن إكراماً للي كان وانتهى نسيانه .

‏انا مُدرك تماماً فكره ان مفيش حد هيفرق معاه اللي بيحصلي داخلياً وان كلنا بنعاني ومتصالح جدا مع الفكره دي، بس بقيت مُرهق جدا من فكرة احتواء نفسي بنفسي دي ومابقتش قادر وجبت أخرى.

‏بدأت اتصالح مع ان في حاجات مينفعش التعامل معاها غير بالتجاهل كإن كل الحلول نفذت ومتبقاش غير التجاهل.

شئ مُؤسف وحزين إنك تكون مش مُتقبل الواقع بكل الطُرق بس مجبر تتعامل معاه.

‏كل شخص محتاج على الأقل صدمه نفسيه واحده تهز كيانه، علشان يتعلم بعدها يحب نفسه و يركز في إختياراته للناس من غير ما يتنازل عن معاييره و لا يلعب دور الضحيه، علشان يتعلم فن الإنسحاب من أي شيء مايتناسبش مع أفكاره و راحته النفسيه و سعادته.

بتمنى اليوم يعدي، بعدي في ايام بدون أي إنجازات أو بذل أي مجهود لتغيير الوضع، بعدي في أيام وبكرر اليوم كل يوم.

لو حضرتك فضلت فتره بعيد عني ومبتسألش عليا وبعدين لقيتك بتكلمني عشان مصلحه، أحب اقولك مُرحب بيك مفيش أي حرج انك تطلب مساعدتي أنا مقدر مشاغل الحياه ومقدر انك شايفني اقدر اساعدك سيبك من كلام السوشيال ميديا ورسايل الرفض والكره والانانيه.

يعني أنت زعلان علي الساعة إللي ضاعت يسطا ما حياتك كلها ضايعة عادي.

‏مش سهلة خالص فِكرة إن الشخص يعافر يجاهد نفسه عشان يتعايش مع وضع هو مُجبر عليه، وضع لا يملُك فيه رفاهية الاختيار ، لإن الحقيقة هو ما كانش فيه خيارات عشان يقرر أو يختار ما بينهُم ، هو لقى نفسه مرة واحدة بيتفرض عليه واقع مُعيّن ومطلوب منّه يعيش ويتعايش مع الوضع دا من غير أيّ اعتراض.