شد حزام خلكك لورحت للماي
عرفك حيد باليحجون ماتهتم مم

لاتغضب اخاف النخل حمله يطيح
اذا رجفت السعفه گبالها تبسم

ياكشخت حسين وزمزم الحوراء
نودعك والخيام عليك تشبع هم

رايح والگلوب بجربه اخذهه وياك
من اتروح خويه يموت المخيم

غربه انصير بعدك تايهين الراي
حسين بلايه سيفك خويه يتيتم

يلمعجز الحجي وكلمن يسولف بيك
الحجي مرات مثل السيف يتثلم

احلى من الگمر يل مايظمك غيم
تشع بالنور حته وكونك ملثم

اخاف عيونهم ماخايفه من السيف
مرات الحسد امضه من المسمم

كل ماحللو دمك الگو تعجيز
اخوك حسين يجري بوسط مجره لدم

تحير خوتك عباس من يانوع
الوكع بالبير جان بغيرتك يحلم

عشره يصيح عندي وطاحو من العين
ونته تطيح بس عالكاع تتجسم

من حگي افتخر وصعد عله التاريخ
اخت عباس انه وبيكم اتشيم

فلاح طالب الماجدي

العمر الاجله اخو زينب بدرنه
وحبه نشتريه واجب بدرنه
انولد ياناس هليله بدرنه
اخو الحسين حماي الحميه

هوسات للعباس ع
٠٠٠٠٠٠٠٠٠٠٠٠٠٠٠
من خزرت عينه   
الجيش انحل وتخربط
٠٠٠٠ ٠٠ ٠٠٠٠
ورطه تورطينه وياه وياهو اليمه جابانه
ابن حيدر ويارجال اليوكف ابميدانه
القائد بيهم من الخوف تيه سيفه والسانه

واحد وبكيفه    
عليهم ظل يتشرط
٠٠٠٠ ٠٠ ٠٠٠٠
قسم عباس بالعباس والعباس بالعباس ظل يحلف
النهر بالجربه الج يم عون اله اجيبه مجتف
صفنت كلها بالطف خوف بس شربه الجان ايريف

يمشرد القاده
سيفك يل مايفحط
٠٠٠٠ ٠٠ ٠٠٠٠
شارد ماكو عد عباس كله تموت جدامه
اخو زينب وباسم حسين  طبهه وشد العمامه
ومن صعدة الغيره البيه يجدح  نار صمصامه

فات عله زماطه  
هذا المايتكمط
٠٠٠٠ ٠٠ ٠٠٠٠
وكف وسط النهر عباس شاله ويرجع يبديه
ولا شارب واكو رجال يوكف  يمه ويحاجيه
حكهه ام الخدر هاليوم  ذاك رباهه تفخربيه

بلسم لجروحي    تصيح الكافل ينحط

٠٠٠٠ ٠٠ ٠٠٠٠
خادم اهل البيت ع
فلاح طالب الماجدي

ظلمه البيت اصبح شالت الزهره
٠٠٠٠ ٠٠ ٠٠٠٠
الله يعين زينب من زغر سنهه
مجلبات المصايب مايهد انهه
جبريل اليون المن سمع ونهه
الليالي ام الصبر والضيم سمنهه

الله يعينهه من شافت الصطره
٠٠٠٠ ٠٠ ٠٠٠٠
يابيت الوحي من الوحي خالي
تصيح فراك امي شلع دلالي
تروح بهل عمر ماجانت أبالي
من شالو نعشهه بحلم حسبالي

راحت والگلب عالضيم شيصبره
٠٠٠٠ ٠٠ ٠٠٠٠
يا جلمت ييمه لماتت بيتي
ورث ليه الحزن يل زهراء خليتي
اسمج من يمرني تختنك ريتي
مشيتي ومن مشيتي خذتي عافيتي

بعيوني طبعتي الباب والعصره
٠٠٠٠ ٠٠ ٠٠٠٠
اصد عالباب وانه تصورج يمه
الضلع مكسور علمسمار ضل دمه
صرخ حيل كل مصباح يايمه
الرزايه من الزغر عليه ملتمه

من عندي الصبر يمه اخذ صبره
٠٠٠٠ ٠٠ ٠٠٠٠

يتيمه بهل عمر يل ماشفت فرحه
من اشوف حسين گلبي ينفتح جرحه
گبال العين باجر الطف يذبحه
ياليل هدعش ماينجرع صبحه

عليه الناس كلهه شابحه النضره
٠٠٠٠ ٠٠ ٠٠٠٠
خادم اهل البيت ع
فلاح طالب الماجدي

دورت الفرح من موالدج لليوم
السمج فرح يخت حسين ماقاري

زينب الو صحت العقل وين يروح
يرسم كربله وتشتت افكاري

ويهل الدمع كل مااصيحن شام
منين ابدي حرت يابلسم اشعاري

شمادارت سنه تدور الجروح وياج
ومن نار المخيم وجرت ناري

يامدرست عفه والحجاب حجاب
ياستر العبي الغاطيهن الذاري

مشيتي بهبتيج وياج وروس العزاز
سفر للشام صحتي وهاذي اقداري

يالبوت علي يل ماحناها الضيم
رغم جان؛ الجمر وصط الكلب ساري

خورستي الاسن التفرظ بديوان
ثاري حسين صحتي واخذ ابثاري

كد كيدك وسعه سعيك والله لا تمحي ذكرناه

خطبتي وزلزليتي الشام وهل الشام
يامثلج سبيه وترد من تصره

راسج من رفع والدنك ابن ازياد
ذليتي رغم مايحكم بقصره

السانج بالمكاون احد من السيف
من زود ابوفاظل ماخذه الشمره

رغم مذبوح اخوه وراسه فوگ ارماح
الماعنده صبر بت حيدر اصبره

تقبل يالاهي تصيح الك قربان
هاي المنهه لازم ناخذ العبره

غصبن عله الشام وبغض الهل الشام
يزينب تنبنيلج  بالغرب حضره

خادم اهل البيت ع
فلاح طالب الماجدي

موشح بحق مولاتي زينب ع
عنده فراق الزهراء ع
٠٠٠٠ ٠٠ ٠٠٠٠
وانه طفله والدمع خاواني
اكبر وتكبر وياي احزاني
٠٠٠٠ ٠٠ ٠٠٠٠
من الرزايه عشت عمري مدوهنه
ياهي مثلي بنيه ماشافت هنه
ظهري من الظيم ياناس نحنه اخذ عمري ياقدر شمتاني
٠٠٠٠ ٠٠ ٠٠٠٠
وانه طفله حزام سويت الصبر
شفت صوره الكون منهه ينذعر
بت رسول الله عله حايط تنعصر
وصار هل بمسمار مجرم ثاني
٠٠٠٠ ٠٠ ٠٠٠٠
عالزجيه ظعاف ظاعف بل الم
جنه مو بسمار ياوادم سهم
من طلع وياه ظلع امي نثلم
وانه طفله واليتم ينعاني
٠٠٠٠ ٠٠ ٠٠٠٠
يامصيبه الكون من عدهه يميل
الصار عالزهره ابد ماله مثيل
السطر ولمسمار والباب الثجيل
وموت محسن ياخلك فجعاني
٠٠٠٠ ٠٠ ٠٠٠٠
شنهي ذنبه ينحرم من الهوه
بعده عوده ماتخوشن ورتوه
اخوي يمشي اوياي رته النينوه
ويالكفل يوكف يرد عدواني
٠٠٠٠ ٠٠ ٠٠٠٠
هالرزايه العگل منها ينذهل
زمره ماترحم جنين ولاطفل
اليوم بالمسمار وباجر نبل
تخلص ابطف كربله خواني

٠٠٠ ٠٠ ٠٠٠٠
خادم اهل البيت ع
فلاح طالب الماجدي

اجيت من السبي محد تلكاني
بس ايتام عندي وين خواني
٠٠٠٠ ٠٠ ٠٠٠٠
اجيت من السبي يخواني شوفوني
من حر الشموس مزوركه متوني
ابكل ديرت شمات وسوك مروني
ويتفرج عليه القاصي ولداني
٠٠٠٠ ٠٠ ٠٠٠٠
جيت وحيلي يل خوان موهوه
طحتلي بناس ماكو عدهم امروه
طريج الشام بيه شسوه وشسوه
المالحك ضربني خويه شتماني
٠٠٠٠ ٠٠ ٠٠٠٠
اهل الشام كلهه عيونهه علينه
وحته طفالهم كامت ترامينه
يسمعنه حجي كلمن يمر بينه
انه ام الخدر ودهري خاناني
٠٠٠٠ ٠٠ ٠٠٠٠

كمت اركض ركض حته اسبك الناكه
والعباس للعباس مشتاكه
ماضنيت وي اكبور نتلاكه
المن اشتكي من ضيم عدواني
٠٠٠٠ ٠٠ ٠٠٠٠
اسولف ياجرح وانه الجرح بيه
ياديره الطبهه تموتلي ابنيه
ضاعت مني خوله وضاعت رقيه
فوك امصيبتي والشمر ضرباني

٠٠٠٠ ٠٠ ٠٠٠٠
هناه المن طحت وتعثرت ببني
اسولف عالكبر وياهو يسمعني
هناه الشمر كام ابرمحه يدفعني
يضحك من حرك بالنار صيواني

٠٠٠٠ ٠٠ ٠٠٠٠
خادم اهل البيت ع
فلاح طالب الماجدي

عباس اجيت من اليسر
كوم اكعد تلكاني

بلايه رقيه من السبي
يحسين الك ردينه

يخوان تدرون الخدر
طب القصر مرجانه

عباس هضمانه الدرب
گوم اگعد وشجينه

الراس اخو فوگ الرمح
المن يسوالف ضيمه

الله يعينج يامولاتي
٠٠٠٠ ٠٠ ٠٠٠٠
مشي الناكه يحيرني 
ماترضه الهلي تردني
بهيده تنگل الخطوات
وانه الشوك ذابحني

اركظ واركاض يريد مني الحيل
وانه الحيل ماعندي
مره وعمري جزه الخمسين كون ارتاح
هضيمه دمعتي بخدي
عذبني طريج الشام حته النوك
شوجنه صبحت ضدي

بمشيها عذبت حالي
وعلي مشتاگه للغالي
حسين انه الربيت وياه
راسه برمح يبرالي
٠٠٠٠ ٠٠ ٠٠٠٠
يناكه شبيج ارحميني
بلايه خوان شوفيني
سرعي بالمشي ترجاج
يالله بساع وصليني

سوالف كلها بيها اجروح ضيم الشام
  ويمهم ارد اسولفهه
عليه تفرجت وادم اشكال وجوه
الشام وكل طوايفها
المايعرف اخت عباس هاي منين
صار اليوم شايفها

هظم الشافته عيوني
بمجالسهم يدخلوني
صحتلهم اخت عباس
ومن عرفوني سبوني
٠٠٠٠ ٠٠ ٠٠٠٠
ضيم الشفته مامشيوف
هظيمه اسمي صبح معروف
عليه الناس كلها تصيح
من خوهه گطعينه اجفوف

بذيج الساعه ياعباس يا خويه
شكثر سيفك تمنيته
كلمن يحجي عله اختك تشوفه لويل
بخزرت عين رديته
منيه وماتصح وياي عكس الناس
وماصحلي التمنيته

كون الموت ماخذني
ولاغربه الترجبني
عالناكه صعت اشلون
تمنيتك تشاهدني
٠٠٠٠ ٠٠ ٠٠٠٠
رديت بكلب مكسور
ممش ايام جنه اشهور
الخواني ذبحني الشوك
وادري اتلاك وي گبرور

اطش روحي عله كبر حسين موش دموع 
وادري الدمع مايشفي
وصيحن خويه  مهضومين من الشام
حبلهم ماترك جفي
نهضمنه مجلس الشمات زحمه عيون
وجمر الهضم مايطفي

شفنه أشكال من الشام
اليليه بخرابه النام
اذا عليه اكول اتهون
تشيب حالت الأيتام
٠٠٠٠ ٠٠ ٠٠٠٠
خادم اهل البيت ع
فلاح طالب الماجدي

الضيم كاتلها
ردت من سبيها
٠٠٠٠ ٠٠ ٠٠٠٠
غير  التنهضم واحد يشجيها
شلعان الگلب مالايگ عليها
عدها عتاب ياعباس مال احباب
ليش بابهم توكف تخليها

الله يعينها بياحال ردت والگلب محروك
هاي بياوكت عباس زينبكم تطر السوك
تتفرج عليها الناس وشيب مستحاهه النوك

محد يگلها 
شلونج خويه زينب
٠٠٠٠٠٠٠٠٠٠٠٠٠٠٠
زينب جايبه من الشام ياذكره
ياذاك القصر ماينجبر كسره
فشله طبت الديوان عالنسوان
رجعن والوجوه من التعب صفره

زينب مرمراها الشام ولمن بالقهر تشكي
مجتوفه وتطب ديوان وعليه الخلك تحجي
اختك وسفه ياعباس من كثر الهضم تبجي

تطيح دمعتهه
موهينه العقيله
٠٠٠٠ ٠٠ ٠٠٠٠
اجت من السبي وتصيح شوفوني
ياذيج الخرايب بدلت لوني
راح اسمي وماتنكال هاي ام عون
ردوني الخوي حسين ردني

عگب ذاك الخدر والجاه واسمي المحد يلفضه
هسه مجتفه عللنوك وصيرن للزلم عرضه
تتفرج عليه الناس واخوي حسين مايرضه

يدير بعيونه
شماصيحو سبيه
٠٠٠٠ ٠٠ ٠٠٠٠
درب الشام ماخله فكر عدها
حسبه اتجيبه وحسبات التردها
ياهو الشافه يبجيها بالحسرات
عن عباس عمد الشمر ينشدها

خوه عالرمح راسه وجمر نار الكلب تسعر
زينب ذكرت العباس وعله الخدر تتحسر
مابين الغرب تطلع ياهو الجان يتصور

شافو خيالي
صاحت يبو فاظل
٠٠٠٠ ٠٠ ٠٠٠٠
خادم اهل البيت ع
فلاح طالب الماجدي