?قصيدة : بشمس نايم مامش فياي
?الرادود : عباس عجيد العامري
?الشاعر : رائد الناشي
~
سمعت انه يون وتكربت ليه
لكيت الف وتسعمية جرح بيه
~~
شلونك كلتله وكال تعبان
زينب يخويه هواي عطشان
سمعت انه يون وتكربت ليه

طاح كالولي اعله وجهه ودمه يا زينب يخر
تحيرت ياصوب اروحن من رجع خالي المهر
اركض ودليني اصيحن خويه بيا كتر
عميه عيني الرمل يجوي وحاره الدنيه الضهر

بالشمس نايم مامش فياي
ومن الصبح ماضايك الماي
ولكيته اعله الرمل متوسد ايديه
سمعت انه يون وتكربت ليه
~~~
طاكينه بكل مجان وماخذ ابن امي النزف
مامبين وجهه ذاكه وعلى رسومه الدم نشف
موش ذاك حسبن اخيي من الطعن ماينعرف
حيرة من ياجرح يشكي العبرن جروحه الالف

جروح الولي كلهن غميجات
بس من كثرهن مامبينات
وهنه مو جرح واحد واداويه
سمعت انه يون وتكربت ليه
~~~
تكربت يمه ونشدته تريد اشدن ياجرح
جم سهم صابك يخويه وبيك جم طعنة رمح
يعينك الله شخله بيك الطعن من ذاك الصبح
ساحكاتك بالحوافر خيلهم كبل الذبح

خويه ارد اضمدك حايره منين
من كل مجان النزف يحسين
حرت ياجرح اشده وياهو اخليه
سمعت انه يون وتكربت ليه
~
لن اسمعه يكلي زينب عوفي كل هاي الجروح
بس جرح كلبي يزينب منه ماضلتلي روح
عاينت لن جبده طالع بالسهم والدم يفوح
صحت ياتالي العشيره خلاف عينك وين اروح

يابت ابوي جروحي هينات
لاتضمدين هواي طعنات
بس جرح البكلبي عينج عليه
سمعت انه يون وتكربت ليه
~~~~
الشمس مردت كلبي يختي هلبت تسويلي في
عطش وجروح وحوافر كلهن التمن علي
غير السهام التجيني وكمت اشاكفهن بدي
خويه زينب هذا حاله الينولي وماعنده خي

ميت عطش ماضايك الماي
بس الضهدني السهم بحشاي
ومعصبج يختي زينب شديه
سمعت انه يون وتكربت ليه
~~~
جنت عود اتنوع الجن والمخيم شفته طاح
ومدري ياهو بسيفه طكني على عيوني وشوفي راح
كلهم التمو عليه بالسيوف وبالرماح
منين ما التفت طعنه ومايخلوني استراح

شدي الجرح يازينب بساع
هلبت شويه يطول الوداع
وعلى كيفج يزينب لاتلجميه
سمعت انه يون وتكربت ليه
~~~
من الخدر ملهوفه اجيتك خايفه وكلي ارتعد
كلت اتجيلك بديه وللخيم تكدر ترد
مادري بسهم المثلث مارد كليبك مرد
من عساني وياك ميته حسين يابعد الولد

حسبالي تكدر ترجع وياي
للخيم وانسويلك فياي
واضمدنك واشوفن جرحك شبيه
سمعت انه يون وتكربت ليه
°°°°°°°°°°°°°°°°°°°°°°°°°°°°°°°°°°°°°°

#للوحشه

يحسين الوحدي مخليني
دخان اخيمكم عاميني

///////////////////////////////////
محتاره بنسوان وعيله
ماتخلص ياهاي الليله
شيغمضها اخلافك عيني
///////////////////////////////////

يالليل الوحشه وياضيمه
زينب محتاره ابلا خيمه
وماظل عباس ويحميني

///////////////////////////////////

يحسين اخيامك محروگه
واطفالك ماتت مخنوگه
يانارك هيه التچويني

///////////////////////////////////

وحشه وبنتك ماموجوده
اتنخيت المگطوعه ازنوده
يدركني وبيها ايدليني

///////////////////////////////////

ميتين وعفتوني بحيره
وين الكافل راعي الغيره
بس يگوم انطيه چفيني

///////////////////////////////////

بين اعداكم لتخلوني
الموطن جدكم رجعوني
هاي الگوم انوت تسبيني

///////////////////////////////////

للشام وللكوفه اخذوني
گومو الزينبكم ودعوني
عدوان اخلافك تحديني

///////////////////////////////////

ياماي عيوني ودللالي
اشكيلك يبن امي احوالي
عليك امي الزهره تحاچيني
///////////////////////////////////
الشاعر سيد حسين آل بو صلوات الأشبال الحسيني

(ابو ذيه) الى زينب الحوراء عليها السلام

حزينه وتضل مثل أمها يسرها
وبعد بالشام مايخلص يسرها
راح الجان بجفوفه يسرها
اجفوفه اتكطعت وامست سبيه
-------------------------------------------
راح الجان من تمشي لواها
الدهر من طيح اخوتها لواها
الجبال الصمم من تنشج لواها
اتحطم من هظم بنت الزجيه
-------------------------------------------
خان الدهر والزهره لها ون
كل الكون من كالو لها ون ( وإن )
لزينب مو وان كالو لها ون ( وين)
غريبه لوحدج بالغاضريه
-----------------------------------------
غريبه بلا أهل ضلت بلا حد
وبلاها البين بهمومه بلا حد
صفت زينب بلا والي بلا حد ( حادي)
حاديها الشمر حادي الرزيه
-----------------------------------------
الشمر حداي يتشمت ولهلاي (.ولاني )
ولاني وماكو إخواني ولهلاي
أنه لحسين الي عبره ولهلاي ( وله اه )
والعباس الي ونه خفيه
-------------------------------------------*

محمد دعبل النوري

البارحه ݘانت اميره البارحه
والصبح زينب اسيره رايحه

البارحه ݘانت اميره مدللـه
اخت راعي العلم حامي العايله
بجاه اهلها مايمرها كل بله
ايامها وياهم گضت مرتاحه
البارحه ݘانت اميره البارحه

حالها تغير بوادي نينوى
شافت اعله الشاطي كافلها هوى
والݘفوف وياه طيحتهن سوى
بروحها احزان الاسى لواحه
البارحه ݘانت اميره البارحه

وين ݘانت زينب وهساعه وين
ݘان اخوها والگمر يحمي العرين
هسه شافت منگطع نحر الحسين
وينظر الها بكربله ذباحه
البارحه ݘانت اميره البارحه

راس اخوها نظرته فوگ الرمح
والعده حضروا مهازيل الصبح
وهذا عالحره صفى اعظم جرح
والعمر تگضيه بݘي ونياحه
البارحه ݘانت اميره البارحه

تگضي ايام العمر نوح وحزن
عالبقوا برض الطفوف بلادفن
يظل گلبها للاهل دومه يحن
وتنصبلهم بالخرابه الفاتحه
البارحه ݘانت اميره البارحه

بالخرابه تنصبلهم تعزيه
والدموع من المصايب جاريه
مصبية اخت الگمر كلش قاسيه
تكاسر الليل ابالم مصباحه
البارحه ݘانت اميره البارحه

وينه عنها ابوصالح مايجي
ينشف العماته دمعات البݘي
بجيته يسكت لسن اهل الحݘي
وراية الحگ ترفع بالساحه

خادم اهل البيت / ابومحمد العاشور

الشاعر ظاهر حبيب الهليجي

حركوا خيــام -------- تـاهــت ايتــام
يوم عاشر من محرم
---
يا مصيبــة عاشـر وذيــج اليتامه
من بعــد وليانهه تعيــش بظلامـه
تلمهـم بدمعتـه زينـب جن حمامه
عل الهواشم كربله صارت قيامـه
وحشة الليل ------------ تصهل الخيل
يوم عاشر من محرم
---
كبـــر اذان الحــزن بـالغاضــريـه
صاح حي اعله الوادع بهل مسيــــه
يـــا زمــان الخلــه زينــب بي سبيـــه
ويا وكت بي تنظرب سكنه ورقيـه
امذبحه ارجال ------------ فوك الارمال
يوم عاشر من محرم
---

هـاي رملـه تـودع القاسم ابنـهـه
والرباب تنــوح عبداللـه بحظنهه
وليله يـم الاكبــر بدمعــة حزنهه
بلمدامع هل هل الضحايه يودعنهه
تودع احباب -------- بديرت اغراب
يوم عاشر من محرم
---
طفلــه وكفــت يــم ابوهــه بدمعة العين
هـايـبـويــه انـــه سكنــه احنـــه ماشييــن
صرنه من عكبــك سبايـه ابلا صواويـن
تاهــت بهــل البــر رقيـه تصيــح يحسين
عشنه بهموم -------------- انهض وكوم
يوم عاشر من محرم
---
زينــب أعل التل تنـادي ياهظيمــه
وين عباس ويشاهـد هل الظليمـــه
ليل جلجل وانه وحـدي بلايه خيمه
جم يتيم بكتري خايــف جــم يتيمــه
خويه عباس ----------- هجمت ارجاس
يوم عاشر من محرم

نعي لزينب بنت علي عليهما السلام

ضلت وحدها ضلت وحدها ..ما ضل بعد خوان ضلت وحدها
لاوالي عدها لاوالي عدها ..بين العساكر هاي لاوالي عدها
منهو اليردها منهو اليردها...لو هاجمتنا الخيل منهو اليردها
والعادي صدها والعادي صدها..توجهت صوب حسين والعادي صدها

مابين عدوان مابين عدوان..ركضت حرم وأطفال مابين عدوان
لاغيره لاشان لاغيره لاشان..عند العرب ياحيف لاغيره لاشان
وسطت الميدان وسطت الميدان..صرعى الزلم عالكاع وسطت الميدان
غطتها تربان غطتها تربان...الغيره والناموس غطتها تربان

بالهيمه ركضن بالهيمه ركضن...فرن بنات حسين بالهيمه ركضن
المن يفرن المن يفرن...بين الجمر والجيش المن يفرن
رادن يمرن رادن يمرن...للوالي والكفال رادن يمرن
من الخوف يبرن من الخوف يبرن...لبت فاطمه من الخوف يبرن

مابين ظلام مابين ظلام .عترة رسول الله مابين ظلام
من جمر الخيام من جمر الخيام..تتجوى هاي وهاي من جمر الخيام
كبعت بالالام كبعت بالالام..بت حيدر الكرار كبعت بالالام
الحره تنظام الحره تنظام...لو فكدت الخوان الحره تنظام

ضل الحرم مابين عدوان
ولاوالي عدها ولا كو خوان
اطفال تتراكض ونسوان
بالبيدا طش كل ظعن الحسين

العيال ضلو بين ظلام
وفرهدو بيته الجاب الإسلام
بالنار شعلو كل الخيام
وتفرهدت كل الصواوين

محمد النوري

شنهي الأسفار يبويه شنهي الأسفار
مو عليله يبويه مو عليله
///////////////////////////////
انه بنتك واگدر امشي اوياكم
بويه خذني فدوه اترجاكم
لو مشيتو بعد وين الگاكم
والله اموتن والدي ابفرگاكم

عمري لو طال بدونك عمري لو طال
ما أريده يبويه ما أريده
//////////////////////////////
يا سلوتي ومهجتي والريه
ارحم ابگلبي يبو الحنيه
عالسفر أگدر يبويه وبيه
والتواسيني أخيتي ارقيه

سلوه ليه أخيتي سلوه ليه
وي سكينه يبويه وي سكينه
//////////////////////////////////
خذني اساهر ليلي ويه الغالي
ما يفارگ عيني يبقه اگبالي
لو خذت عبدالله وشيبقالي
لو مشه عني بقيت الحالي

خله يمي حبيبي خله يمي
امعوده اعليه يبويه امعوده اعليه
////////////////////////////////
شلي بالدنيا إذا تجفيني
تصبح اثگيله عليه اسنيني
شلي بيهه الماتشوفك عيني
كون تطفه ومن ترد تشفيني

انه يعگــــوب اصيرن انه يعگــــوب
اتحط قميصك يبويه اتحط قميصك
///////////////////////////////////
انه فاطم وانصبت بيت الحزن
اعليك كل صبح ومسه يابويه اون
حيل تعبني غيابك والشجن
سددالي إسهام وارماني الزمن

ضيعاني زماني ضيعاني
هم سباني يبويه هم سباني
//////////////////////////////////

كلمات خادمكم محمد الدلفي

شبول هاشم فرعت شبانها
وجردت للحرب بيض اسنانها
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
شبول هاشم نزلت لسوح القتال
غيمه ترعد غضب تمطر بالنزال
الحومه غصت من فعلهم بالرجال
هدموا بالموت كل اركانها
.....................................
شبول هاشم جرت سيوف اليقين
بعزم من حيدر شديد ومايلين
انوت اعلا الكفر ضرباً بالوتين
نصرتاً للدين ولسلطانها
..................................
نار شبت عاصفه وزاد اللهب
وجيش اميه بكامله الها الحطب
لاكتايب صمدت ولاضل سرب
جمله ملك الموت جاب اجالها
........................................
موت احمر بالسيوف الصارمه
بيد فرسان الوغا المتحزمه
شبول حيدر ماخطتها الغانمه
شما يزود الجيش زاد افعالها
،،،،،،،،،،،،،،،،،،،،،،،،،،،،،،،،،،،،،،،،،،،
الميمنه ماجت ولامنا الثبت
واليسار وكم عددها تخاذلت
ماتحس بزلم بلحومه وكفت
لا مشاة البكت لاخيالها
،،،،،،،،،،،،،،،،،،،،،،،،،،،،،،،،،،،،،
زمجرت بسيوفها أهل الوفاء
حسين بيهم فاخر أملاك السماء
عل الكفر طوفان نزلو بلبلاء
فيضها دموم الترس وديانها
،،،،،،،،،،،،،،،،،،،،،،،،،،،،،،،،،،،،،،،،،،،،
صكور تطرد صيد والمخلب يلوح
ماخطت والسلم ماخذته الجروح
اعتنو ميدانها بضحا الصبَوح
بطبر سيف وطعن طول اسنانها
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،
مو غريب الصار والحل بالعدا
من حماة الدين بجيوش الردا
بالفلا والصوت رداه الصدا
اللكم الهادي ضمنها اجنانها
،،،،،،،،،،،،،،،،،،،،،،،،،،،،،،،،،،،،،،،،،،،،
عن وثوق وماكو شك ولاضنون
لوحياة حسين لو دونه نوهون
لايطاق العيش جنب الفاسقون
الهادي علمنا بختام اديانها
،،،،،،،،،،،،،،،،،،،،،،،،،،،،،،،،،،،،،،،،،،،
خاتمتنا الموت واحلا من الشهد
ولو يصح مرات ويزود العدد
كون نفدي حسين من ولد لولد
هذا ريحانة فخر عدنانها

باسم محمد العمري

اويلاه ياابوالفضل
اويلاه ياابوالفضل

حسين اجاه من فزعه. اويلاه ياابوالفضل
طايح لگاه بالمشرعه. اويلاه ياابوالفضل
منه الچفوفه مگطعه. اويلاه ياابوالفضل
يكت الدمع يمه ويهل. اويلاه ياابوالفضل

حيلي يبوالغيره انهدم ---------------
انهض يشيال العلم-----------------
الجيمه فزعت عالحرم---------------
ياهو اليردهم يانفل-----------------

زينب عله التل نادتك----------------
تحمي خيمهه راتدك-----------------
مادرت هيچي حالتك---------------
عالنهر وافاك الاجل------------------

مفضوخه بالطف هامته------------
والسهم زارف جربته--------------
سلبو درعه ولامته-----------------
مايه السكينه ماوصل--------------

حامي الحرم راسه انهشم-----------
وبعينه مشچوچ السهم-------------
ضهري يعباس انجسم--------------
بعدك وماضلالي حل--------------

الماي بيده وماشرب--------------
ون اعله عبدالله ونحب------------
ذبه ودنه المهره وركب------------
هم روحه لكن ماوصل------------

طاحت يمينه وماگعد-----------
باليسره كض سيفه وصعد--------
يوصل يريد اعله الوعد-----------
لكن عكس رايه الحصل------------

طاحت اليسره ومارجف-----------
كض سيفه بسنونه ووكف----------
بس الف ياحيف وأسف-------------
چان العمود اخر فصل--------------

خادم أهل البيت عليهم السلام
الشاعر غالب النهيراوي

حادي النوگ ساگ النوگ مدري وين منواها.
وانه اوياي بس ايتام يالعباس تراضاهه.
……………………………………………
هاي ابياوكت عباس
زينب ع الهزل تركب
وانته افياي جنت الهه
يالبيك الوصف يتعب
هذا وذاك شافاهه
اليمهه الليل يتحجب
مشدوده ابحبال الايد
تمشي وراسهه امترب
هذا الحال يالكفال دمع العين سلواهه.
وانه اوياي بس ايتام يالعباس تراضاهه.
..................................
من جلجل عليه الليل
زادت ونت اطفالي
ذيج اتصيح يابويه
وهاي اتصيح يالوالي
طيره ابلاغصن ضليت
ويمي ايحوم جتالي
لا اكدر احط بالكاع
ولاابقى ابسما العالي
حيلي راح دون اجناح روحي الموت وافاهه.
وانه اوياي بس ايتام يالعباس ترضاهه.
………… .…………………………… .
خد امي انسطر عباس
وانه السوط بمتوني
خلف الباب عصروهه
وانه ابنار حركوني
شحجيلك بعد ياضيم
والله اعداك هضموني
من گد التعب يااخوي
فوگ النوگ نوموني
خويه النوم تعرف وين عيني اعله الهزل جاهه
وانه اوياي بس ايتام يالعباس تراضاهه
………………………………………………
لوعندك بقت انفاس
هسه وتلتقي بيه
يالعباس بالعباس
لازم تنشد اعليه
متغيره الرسوم اهواي
واسمي صار مسبيه
الاسود جان ابيض صار
وحتى اعيون ماليه
لختك شاب جفن العين يوم الراح رجواهه
وانه اوياي بس ايتام يالعباس ترضاهه
……………………………………… .
اذاهه البعد ياخوي
روحي اعليك معتاده
عفتك ع النهر مطروح
وسهم حسين بفاده
وبس الروس ويانه
فوگ ارماح مياده
تتنادس عليه الناس
شوفو عمت الساده
هاي ام عون جن يحجون راحو وين ولياهه
وانه اوياي بس ايتام يالعباس ترضاهه
…………………………
خادم اهل البيت ،حسن فالح المياحي،