‏أنا من يوم شفتك .. فزّ كلي
‏وصافحت الزمن كله بيديّـا

‏لبست أحلى الكلام وجيت اهلّي
‏هلا بالعمـر .. يا سمح المحيّـا

‏مثلك لا صفى لإنسان مثلي
‏زهت قـمـرا و غنت هالثريّـا

‏أبد .. ما كنك إلا قسمةٍ لي
‏عطيّـه جيت من رب البريه

‏وأنا اللي كل ماشفتك أصلي
‏ألا يا الله مابي غير ضيّه

‏ودي أكمّل معك حتى الحياة البرزخية
‏وين تلقى عاشقٍ يبغاك حتى في مماته

‏من يشوفك يدري إن الموت حاجة عايديه
‏كل ليلة في طوارف مبسمك يعلن وفاته

‏هات فنجال الهوى بإيدك وحطه في يديّه
‏لو تصبّ الموت في فنجال حبّك " قلت هاته "

جيت تحت اهداب عينك يا حبيبي اتفيّا
‏عن شموس وعن ليالٍ بردها يوجع مهبّه

‏ما يهم ان جارت ظروفي ولو عرت يديّا
‏انت من ترعاه عينك اشهد ان الله حبّه

‏"أحبك!والمدى
‏والشمس،
‏وكل فجرٍ علي شهود"

دريت اني سمحت من المواصل يوم دمعي سال
‏وانا تحت المطر .. طرِّيت حيِّيني وامواتي

‏ولا اجهشت بْدموعي في رجا تتحسن الاحوال
‏ولا كانت عسى ربي يردِّك ضمن دعواتي
‏- نوف العثمان

مزينك الغلا ما زينّك فضة وعقد الماس
‏كثر ماهو بمغريك الترف مغريك حبي لك

‏أراقب جيّتك واحفظ عيونك من عيون الناس
‏واجاذب خصلةٍ لوّن طوارفها دجا ليلك

‏على النجم المعتّق مستقرّك والسحاب لباس
‏ولا اشرح من مداهيل الديار إلا مداهيلك

‏يخايلك بدوّي ماهو بطرقي ولا عسّاس
‏لقى فيك الحيا اللي رد روحه في مخاييلك

‏مجيّك ما يخطْفْ انظار عشّاقك يخطْفْ انفاس
‏ولا أبرك من مجيّك يالمهاه الا مجيّي لك

‏ما مليت الدروب وكثرها لو خاطري حسّاس
‏ليا مني سريتك شوق تسري بي مواويلك

‏أنا مهما شكيت من المسافة ما شكيت الياس
‏ترا كل الدروب اللي تودّيني .. تودّي لك

‏ماخذٍ قلبه غلاي وماطمع قلبي بغيره
‏قصةٍ فيها تركنا من منادمنا بقيه

‏قلت قلّي وش تحب؟ من الكبيره للصغيره
‏غير حبّك للفضايل والفضا والافضليه

‏قال وش أقول؟ وأنتي كل خير وكل خيره
‏وكل صبح وكل ليل وكل نور وكل فيّه

إن كان قلب اللي أحبّه وسعني
ماهمني ضيق الزمن واتساعه