قصيدة إلى مولاي عبد الله الرضيع عليه السلام

ترف وتلوگله بس جلمت اسم الله
نقص بالجنه طير وخذو عبدالله

وجه الفجر بعيونه..... لون الذبح مو لونه
.......................................................

المثل ابني ابمجان الگمر ينحط كون
مايرهم ورد وتراب ينخبطون
شگد حلوه ضحكته تعقل المجنون
يا اهل الله الزغار شلون يندفنون

مثل لون الگطن واترف بعد خدة
التراب يغير ارسوم الحلو شحده

زغير وهله يحبونه...... لون الذبح مو لونه
.......................................................

مو يمه جبير عليه ثوب الموت
اليرهم للعب مايرهم بتابوت
المن صوته خذو للمطر وطو صوت
كون يضل عمر مو بل گماط يموت

دعيت شگد يرد ردت نضر عميان
ياسورة أبدي بيهه وميت القران

بوسط السمه يخلونه..... لون الذبح مو لونه
.......................................................

شوصف عطره ونعناع يمه يحير
وجه الصبح يم وليدي ضلمه يصير
شما يكبر دقيقه يزيد عدنه الخير
ياهو اليدفن عيون أحله من طير

البعمر الورد مو بل گبر ينضم
بمجان الهوى من ينگطع ينشم

منه الهوى يعطرونه..... لون الذبح مو لونه
.......................................................

بكاروكه شخلي وعقلي شيقنعه
من يعقوب يوسف ياهو ليطلعه
مني أكثر دمع ما باجيه الشمعه
الخرس گام يفهم وني ويسمعه

خل تعمه لعيون وروحي خل تطلع
ابطل من ونيني بشرط من يرجع

شلون الدوه يدفنونه..... لون الذبح مو لونه
.......................................................

عايفته الكبرتي لحملي هوه يشيل
بس ختلف كلشي وخذ مني الحيل
گماطه وذكرياته هواي بيه تعيل
يخلص عمري كله و ما يخلص ليل

طلابه ويل وجع عافالي ماتنحل
تربع وسط گلبي صوابهم يندل

سر دنيتي يسمونه..... لون الذبح مو لونه
.......................................................

خادم الحسين عليه السلام. عمار غازي الساعدي

نزله إلى سيدي ومولاي اباالفضل العباس عليه السلام

بسيف ابوي اتنست أمي
و صارت الحومه ويدمي

انه عباس. انه عباس

.......................................................

انه ابن الفحط خيول وزلم
انه ابن اليهزم وما ينهزم
ابن وادم علمنايه شد حزم
سيفهم گد ما يحش روس يثلم

عالم وبل حومه علمي
بسيف ابوي اتنست أمي

انه عباس. انه عباس
.......................................................

احنه منهاج ارجوله اليندرس
احنه نحرس دارنه مو ننحرس
خاف ناسين ارد اذكركم با أمس
الطب عليكم هاذ ابو رد شمس

مو بسيف بخزرة اعمي
بسيف ابوي اتنست أمي

انه عباس.. انه عباس
.......................................................

ماأترسهه الجربه عدي براسي راي
راح اروحن لنهر ماجيب ماي
قبل ما باوع عليه يگلي جاي
راح اخلي العلگمي يركض وراي

بل حرب يختلف فهمي
بسيف ابوي اتنست أمي

انه عباس.. انه عباس

.......................................................

عشرة عدنه و يلحرب تعرفنه زين
من نطب بيهه نطب محزمين
أنعرف طگت سفينه ومتيقنين
ما نرد لو ننتصر لو ميتين

وبل سهام انكتب اسمي
بسيف ابوي اتنست أمي

انه عباس . انه عباس
.......................................................

اليبرز على الحومه وينه اليرتجل
ياهو ليحب عله حافر ينسحل
بله ياهو ابن ابو ليضل عدل
الما يلوحه السيف بل هم ينكتل

جيوش التلاگيني حلمي
بسيف ابوي اتنست أمي

انه عباس. انه عباس

.......................................................

خن أعدن جيشهم سبعين ألف
هواي صح لا جن ولا واحد تجف
راح اشابه بل أمام وبل خلف
رأس ماينشاف بس رگبه ونزف

ومثل شكل الماي رسمي
بسيف ابوي اتنست أمي

انه عباس. إنه عباس

......................................................

خادم الحسين عليه السلام ، عمار غازي الساعدي

لامام الحسين عليه السلام ?
عندما ذهب الى مصرع مولاي علي لاكبر عليه السلام

يا نسمت هوه ينتعش بيك الكون
المثلك بلسمه مو ارب يتگطعون

عزيز الروح يالاكبر... عگبك كلشي ماأگدر
.....................................................

باخر نفس عدك گلت اودعنك
حبست انفاسي اريدن حيل اشمنك
احتاريت لمن ردت اشبگنك
عبالي من اجيك تگوم احضننك

حلات عيونك ويا حلو بسالفتك
قبلك كون اموت وبل دفن رتك

على أفراكك شلون اصبر.... عگبك كلشي ماگدر

....................................................

گالو طاح لاكبر طاحت عيوني
وگفت اگبال جسمك وختلف لوني
انته وعمك العباس غيروني
يمكن من اردن مايعرفوني

متعلم عليك بدونك اتئذه
الماعده علي جا كلشي ماعده

الطولك سنين انطر.... عگبك كلشي ماگدر
......................................................

راسملك تجي والعطش مو وياك
ومحضر حنان شكثر يتلگاك
ماشم الهواء من اختنگ بس انخاك
مو من طين ربك مني من سواك

تگيل الثوب مو بس نفس ثكلان
مجانك مايترسونه سلف لمجان

على عيوني صعب منضر..... عگبك كلشي ماگدر

......................................................

مو تدري الأبن للابو يصير افياي
اريد بضلك اگعد يا لمگطع حشاي
الماي يعيش الكلشي اليضل هواي
بس انته التعيش حسين موش الماي

يماي العين يضواي وگمر ليلي
حيلي بلايه وجهك مايضل حيلي

تسوة اتعبلك واسهر.... عگبك كلشي ماگدر
.....................................................

يمرهم لجروح وللگلب بلسم
يل جيتك حياة وغيبتك مئتم
انته اتنفسك موش الهواء الينشم
انه احتاجك بگلبي أكثر من الدم

اريد اصفن عليك هواي حيل هواي
بجيتك يروى گلبي مو بجيت الماي

ثگيله بموتتك احضر.... عگبك كلشي ماگدر

......................................................

خادم الحسين عليه السلام . عمار غازي الساعدي

قصيدة إلى مولاي زين العابدين السجاد عليه السلام

كل يوم المشاهد بالسرة تنعاد
ومثل طكت الحجر يطشر السجاد

موش المرض ماذيني..... شايف ذبحته بعيني

.......................................................

الخيل الداست على حسين اذني
شما كسرن عضم ينكسر شي مني
گطعو خنصرة و الهوى نسد عني
ما خلولي بلطف واحد يحبني

هسه لطف خلص روحي شيخلصها
روح الفاركت لحسين المن بعد ضلتها

بواجي يخلصن سنيني ... شايف ذبحته بعيني
.......................................................

لمن صاح ابوي وماكو اي ناصر
جن السمه نطبگت علي با لعاشر
راح وشفته كله نداس بل حافر
من عدهه وگلت كون أنه ما صاير

كون بزغر سني وميت احسلي
ولا شوفنها كلها بلايه روس اهلي

ريت الموت يلفيني ..... شايف ذبحته بعيني

.....................................................

انه المذبوحة روحه گباله ويشاهد
انه الوي رأس ابو يمشي بدرب واحد
كضيت الرمح لن رمح بارد
ياهو ليقبل الدم أعله ابو جامد

ياهو اليرضه من الگفه يذبحونه
ويا هو اليقبل بلا ابو يخلونه

يلاهي لا تخليني.... شايف ذبحته بعيني

.......................................................

اقوه من المرض منضر أعيال حسين
من تشرب ناگه وهمه عطشانين
من تامر عليهم خلگ مو زينين
من الناس تفرج وحنه مسبين

شايل رأس ابوي بصفي يمشي هواي
وكلما باوعتله گبالي بده الماي

احس بگلبي يجويني .... شايف ذبحته بعيني

.......................................................

بس جم يوم ردنه من العطش مهله
بعد بعيني حته الماي ما يحله
الگضو أهله عطاشه بالنهر شله
اليعطش من هلي يروونه بالنبله

الماي ألما وصل لرياگ ابو سكينه
لا يوصل لحدنه ولا يمر بينه

گطعومنحر حسيني...... شايف ذبحته بعيني

.......................................................

خادم الحسين عليه السلام: عمار غازي الساعدي

هسه انته متت وبسيفهم ذبحوك
شضنو بيك ترجع لون ماسحكوك

المات ومنگطع نحرة.... ما يرجع بعد عمرة
......................................................

ماعدك نفس المن مگطعينك
على كل لارض بلسره موزعينك
خير وزاد عدهم هل مطشرينك
ثواب وللحوافر سحگ مطينك

مايدرون بيك انته شمس بليل
مجانك بالسمه مو جوه حافر خيل

متبدي الورد عطرة..... مايرجع بعد عمرة

.......................................................

أبا وع للخيول والزلم تركض
شما ادنه ليك دگوم حيل ترض
طينتهم نفاق وكلها التحرض
طلابه بگطع رأس حسين يله تفض

فضت يا الحسين شلون فضوهه
شكو وردة بحديقة روحي گطعوهه

المثلك صعب هجرة..... مايرجع بعد عمرة

.......................................................

ماباگو المحبس خنصرك باگو
شكو ماعده دين على الجسد دلو
ضلو ياخذون ألثوب ما عافو
خذو كلشي خذو بس لعطش خلو

منين ابدي من اسولف حته مالجمك
اذا لون السمه تغيرت من دمك

منك مابقت قطره..... مايرجع بعد عمرة

.......................................................

من شفت الشمر حط خنجره وذبحاك
شما يگطع وتر تنگطع روحي وياك
دار الكون لمن عالوجه داراك
انته اول هوى تنذبح من مكفاك

مايدرون ذبحو شكو انسانيه
بحيث الدنيا صارت كلهه مو دنيه

كل الدنيا مطشرة.... مايرجع بعد عمرة

.......................................................

شاخذ منك وللحرم شطيهن
منك يا عضو يسكت بواجيهن
وردات وحنانك ماي يرويهن
الخلن كلشي لجلك لا تخليهن

حيرة صير يا ابو علي من يسئلن
اله وياي ترجع خاطر يقنعن

فينة وگطعو الشجرة.... مايرجع بعد عمرة

......................................................

خادم الحسين عليه السلام . عمار غازي الساعدي

نزله إلى مولاتي زينب عليها السلام تخاطب ابن مرجانه لعنه الله

انه بت فحل الفحول ... انته ابن من يله گول
...................................................
اخت عباس الكمر مابقه كباله بشر
بجربته حط النهر تعرف الكافل يصول
...................................................

بينه مجنونه الخلك المايحبنه ماعشك
احنه وادم كلنه حك اليطلب الحاجه ينول
....................................................

انه ابوي اول سره ونته ابوك اليوره
انشد عليه خيبره للحرب محله نزول

....................................................

شوف نضرت كافلي زلمه اذا تدنه الي
ميته وتخوفك هلي زمن بيكم مايطول
...................................................

احنه بينه لبس شهم انته ابد ماتفتهم
مانعدك وي زلم يلي ماعدكم عقول
....................................................

غير امهم فاطمه اخواني احله من السمه
مايغيرهم دمه فاطمه امنه البتول
...................................................

عيونهم جنه بأرض للصلاه صارو فرض
للكلب همه نبض غير قائدنه الرسول
....................................................

بينه يشتم الهوه احنه لضلمه ضوه
لكل جرح صرنه دوه يمنه كل الهم يزول
....................................................

اخواني يا محله الزلم بني هاشم ونعم
صيتهم ويا النجم عدنه بس للله ميول
....................................................

خادم الحسين عمار غازي الساعدي

آخر گعده جانت يم الحسين
صفنت شگد علي ما شبعت العين

ياخسارتنه الجبيرة ..... حسين يسواله عشيرة

.......................................................

سولفنه بسوالف بجت اسرافيل
حسين يودع أخته وسمه تون حيل
شگد اطي من عمري ويطول اليل
بس يبدي الضوة بسحگ تبدي الخيل

هنه جم دقيقه وجنهن اسنين
آخر گعده جانت يم الحسين

خلافه كلشي يصير حيرة ..... حسين يسواله عشيرة
.......................................................

لمن ينذبح ما راد اشوفنه
يدري بروحه كلشي مايضل منه
مو للحافر ولسيف هذا النه
كله يفرهدونه حسين جا وحنه

هوه يروح وحنه نعيش ميتين
آخر گعده جانت يم الحسين

يروح مايقبل ضميرة..... حسين يسواله عشيرة

.......................................................

اسهام ورماح ودم يغطي العين
شني يگطعون رأسه وهو رأس الدين
مالاگن عليه أسوالف الميتين
هوه حسين مايرهمله غير حسين

ماتسمع حجي بس تسمع ونين
آخر گعده جانت يم الحسين

صعبه المنه بحصيرة..... حسين يسواله عشيرة

.......................................................

ابو روح العزيزه ألما امل منه
كلشي خلاف عينه ولا احتاجنه
موش زاد حته الهوى اگطعنه
ألما شمه الحسين شلون اشمنه

سولفنه بحجي ايفطر الحياطين
آخر گعده جانت يم الحسين

صبحت زينب اسيرة.... حسين يسواله عشيرة

.......................................................

اجه وكت الوداع وجن ملك يوحي
واخر كلمه گلي وزيدت نوحي
گبال عيونج ايسحكون بجروحي
طلع جلمتة بس طلعت روحي

انه تمنيت يبقه اليل قرنين
آخر گعده جانت يم الحسين

فاضن دموع لاميرة.... حسين يسواله عشيرة
.......................................................

خادم الحسين عليه السلام. عمار غازي الساعدي

السلام عليكم ورحمة الله وبركاته
سيتم نشر ما رزقنا الله تعالى به لشهر محرم الحرام 1446 قريبا وتباعاً  ... نسأل من الله ان يرزقنا زيارة المولى ابي عبد الله عليه السلام في الدنيا و شفاعته في الاخره  ....

القصيده فزاعيه ?

غيم  وكلفه غيومه....  زين وتشع اعلومه

طبهه الگمر.... طبهه الگمر  
....................................................

عباس ابو الغيره البطل تدرونه
كافل الحره زينب يسمونه
وين الزلم خليهم ايلاكونه
جاب ماي العلكمي اعله امتونه

منه الزلم ملجومه.... زين وتشع اعلومه

طبهه الگمر... طبهه الگمر  
....................................................

اخته ونخيته وللحرب طباهه
الروس كلهه بلا جسد سواهه
تترادم الزلم بزلم خلاهه
احتارت وماتفتهم منواهه

ياهو البرز للحومه.... زين وتشع اعلومه 

طبهه الگمر... طبهه الگمر 
....................................................

للحومه طب اوبيده ذوالفقاره
واذكر الوالد وشبت ناره
يطلبله ثار وجاي ياخذ ثاره
خله الرگب فوك النهر  طشاره

يطلبله ثار ويومه... زين وتشع اعلومه

طبهه الگمر... طبهه الگمر  
....................................................

لمن سمع كل الخيم عطشانه
اختاض عباس اورفعهه اردانه
ماضل بشر ما شرد من عدوانه
جاب النهر كله واجه لخوانه

محله الگمر ورسومه... زين وتشع اعلومه 

طبهه الگمر   ....  طبهه الگمر 
....................................................

الجيش صاح ادخيله هاذ دخيله
ام البنين او زينب التدعيله
نحتار ياهو انعوفه ياهو انشيله
ما خله واحد سالم يضل حيله

خله الحرس مندومه... زين وتشع اعلومه 

طبهه الگمر  ..   طبهه الگمر
....................................................

خادم الحسين عمار غازي الساعدي