لو شفت هِمَّتك نقصت أو قَلّت في مشوار حفظ القرآن الكريم؛ ادعي كتير في السجود وغيره إنو ربنا يوفقك ويعينك ويرزقك حفظ كتابه.
واستعين على رفع الهمة برضو بإنك تحضر فيديوهات الناس الحفظو القرآن وهم في وضع صعب شديد،أو زول معاق ذهنياً واجتهد عشان يحفظ، أو واحد عمره كبير في الستينات وربنا وفقه وحفظ، أو الأطفال الصغار الحفظو في عمر مبكر .. الخ..
دي كلها نماذج بترفع همتك وبتجدد نشاطك بإذن الله.
#تنبيهات_للحفاظ

**40 دقيقة تصنع يومك

من بعد صلاة الفجر لبعد الشروق بي 10 دقائق كدا دي 40 دقيقة كفيلة بإنك تراجع فيها القديم لو انت حافظ، أو تحفظ فيها جديد.
لو مامرتبط بعمل أو دراسة في الزمن دا فبنصحك إنك تخلي دي عادة عندك ثابتة يومياً مهما كانت ظروفك سيئة، وسترى بركتها إن شاء الله.
في البدايات حتبقى ليك القعدة حارة وداير تخلص سريع أو داير تقعد 10 دقايق بس وتقول طالع! لكن اثبت وثبِّت نفسك وحتتعود إن شاءالله.**

احرص على قراءة وردك القرآني في الفترة الصباحية مبكراً، وحبذا بعد الفجر مباشرةً قبل أن تقوم من مكان صلاتك، ولا تسمع وساوس الشيطان الكثيرة التي لن تنتهي أبداً إن طاوعته فيها.

**وصايا لتحسين صوتك

♦️أكثر من السماع للمشايخ المتقنين:
أهم شيء متقن دي عشان ماتعود سمعك على غير المتقنين فتتأثر بأخطائهم، وللأسف اليوتيوب مليء بالناس الأصواتهم سمحة لكن عندهم أخطاء تجويدية كثيرة.

♦️اختر شيخاً قريباً من طبقتك الصوتية:
ما تختار ليك واحد صوتو واطي وانت صوتك عالي أو العكس، أو خامة صوته لا تناسب خامة صوتك.

♦️لا تسمع لواحد فقط:
نوِّع وعدِّد للبتسمع ليهم، عشان بعدين ممكن تعمل ليك مِكس كدا في الأخير من مجموعة الأصوات دي فيطلع صوت جميل إن شاءالله.

♦️حاول أن تقلدهم بعض الأحيان:
ماتقلدهم عمرك كلو ? عندك الفترة الأولى من استماعك لهم وإتقانك لأصواتهم بعداك حاول إنك تستقل عنهم..

♦️الالتزام بأحكام التجويد مقدم على كل شيء:
ماتخلي الصوت ولا النغمة العايز تعملها يزيدوا ليك في المد ولا الغنة ولا ينقصوا زمن الحروف.**

مراجعة الخاتمين (2)

لو انت حفظت القرآن بتكرار بسيط أو اتفلت منك بعد حفظته فالبرنامج دا ممكن يفيدك إن شاءالله:

1- تشتغل مراجعة عادي زي ماكنت شغال وماتوقف المراجعة نهائي وخلي أغلبها من رأسك لو قدرت.

2- ابدأ ختمة تثبيت بمقدار 3 أو 5 صفحات في اليوم وتكررها 50 مرة، بعد تحفظها تمام سمعها آخر اليوم لشيخ متقن كلها مع بعض، ماتفرقها.

3- اليوم البعدو قبل تبدأ الصفحات الجديدة اقرأ صفحات أمس من رأسك أول وبعدها ابدأ.

4- الصفحات الجديدة البتثبتها دي لامن تتم جزء تقوم تبدأ بيها ختمة من رأسك، يومي بعد المغرب أو العشاء تقرأ من بداية حفظك لحد محل واقف في ختمة التثبيت. ولو عملت أكتر من 10 أجزاء ممكن تقسمها على يومين.

5- النقطة الأولى مهمة تنتبه لي إنو الصفحات اللي لسه ماحصلتها في التثبيت تراجعها وماتهملها..

الخلاصة:
• ختمة التثبيت يومي 5 صفحات بتكرار 50 مرة
• يومي بعد المغرب أو العشاء مراجعة من الرأس للصفحات الجديدة .
• في خلال اليوم تراجع الأجزاء اللي لسه ماحصلتها في الختمة.

#تنبيهات_للحفاظ

**مراجعة الخاتمين (1)

انت حفظت القرآن كله وعايز تثبت القرآن ويكون راسخ في ذهنك؟ ممكن إن شاء الله البرنامج التحت دا يفيدك ويوصلك المرحلة دي بإذن الله:

1- لو حفظت من الأول بتكرار كتير(40،50،60) مرة وحفظك قوي فسوي ليك برنامج مراجعة يومي 10 أجزاء لمدة 3 شهور.
? ال10 أجزاء دي ماتشوفها كتيرة؛ من رأسك بتقرا الجزء بالحدر في 20 دقيقة يعني الساعة 3 أجزاء. يعني 3 ونص بتخلص ال10 أجزاء دي بالراااحة..

♦️ قول انت صليت الفجر 4:30ص وبديت المراجعة الساعة 5 ص، قعدة وااااحدة كدا لحد الساعة 8:30ص بتكون خلصت ال10 أجزاء حقت اليوم، وباقي يومك كله بقى في يدك لو شغال ولا بتدرس ولا عندك مشاغل أخرى..

?المراجعة دي من رأسك وحفظك ما من المصحف،

? والأفضل إنك تقراها في قعدة واحدة حسب فضاك لكن ماشرط ؛ لأنك ممكن تكون شغال بعد الفجر بساعتين مثلاً، فممكن تقعد ساعة ونص بعد الفجر تراجع وباقي الزمن تراجع فيه الباقي خلال اليوم إن شاءالله..
2- في باقي اليوم خلي يكون عندك ختمة ماشرط يكون مقدارها كتير، حتى ولو حزب بس في اليوم تسمعه لشيخ أو زول صحبك متقن عشان تتأكد من حفظك زيادة ولو في أخطاء في التجويد يصلحك فيها..
3- بعد ال3 شهور دي ممكن تنقص ال10 أجزاء ل 5 مثلاً أو خليها على حالها أفضل لتنال بركة القرآن في يومك وعمرك?
4- اقرأ بالحافظو دا في صلاتك النافلة بعد المغرب وبعد العشاء وقيام الليل؛ ترسيخاً لحفظك وعبادة لربك ?**

**قبل تحفظ الصفحة الجديدة حقت اليوم أقرا الصفحتين الفاتن قريتين خفيفات كدا تنشط بيها حفظك الجديد.

الحفظ الجديد دايماً بكون في الذاكرة الأولية وبكون طري،
فمراجعتك ليه على فترات متقاربة بتخليه قوي إن شاءالله.**

**في مراجعتك اليومية للقرآن الكريم خليها كلها من رأسك بدون ماتفتح المصحف إلا لو وقفت ليك آية وماعرفتها.

قلل اعتمادك على مراجعة حفظك من المصحف لأقصى درجة تستطيعها، ولو قدرت إنو مايكون جمبك أحسن.
لامن تراجع من المصحف طوالي ماحتعرف إنك قوي في ياتو حتة وضعيف في ياتو حتة، وماحتعرف إنك بتقدر تسرد السورة كاملة ولا لا.. وحفظك كدا حيبقى ضعيف جداً..
وحتجيك أوقات في الشغل ولا في المواصلات ممكن ماتقدر تفتح مصحف أساساً؛ فلو ماعودت نفسك إن تقرأ من رأسك ماحتقدر.**

لامن تكون شغال في برنامج الحفظ؛ لا تترك أبداً برنامج المراجعة اليومية من رأسك.
الحفظ اليومي بدون مراجعة يومية؛ زي الزول البشيل موية من البئر وبرجعها في البئر تاني! ما استفدت شيء ولا شلت معاك في قربتك موية تنفعك وتتزود بيها.
فلو عملت ساعة للحفظ طوالي خت في برنامجك معاها ساعتين للمراجعة ❤️****

**أثناء مراجعتك ماتنط أو تخلي سورة لأي سبب من الأسباب.

يعني لو انت حافظ المصحف كلو تقراه من الفاتحة وبعدها البقرة وكدا لحد ماتحصل وتختم سورة الناس، وماتقول جزء عم دا أنا حافظو أساساً من زمان ومافي داعي! غير إنو النطة دي حتأثر على حفظك؛ حتفقد البركة والأجر العظيم والدعاء المستجاب في إنك تختم القرآن في كل مراجعة ليك.
وبالنسبة للحافظ 5 أجزاء أو غيرها فالمراجعة بالترتيب برضو مهمة شديد ليه عشان يحافظ على مستوى حفظه.**