#Rauf_Parfi_75_yoshda

«ҲАМЛЕТ» ТУРКУМИДАН

«Сўлдирма! Дунёга шафқат қил, қизғон!»
Шекспир

Бош эгиб тонглардан тонгларгача то
Виждон шевасига ташбеҳ излаймиз.
Одамда виждон ҳам бўлмасми, ҳатто!
Сўзлаймиз, жигархун бўлиб сўзлаймиз.

Сен, эй сен хилқатнинг ёвуз бандаси,
Не бало солгайсан маъсум бошларга,
Бўғилиб ётгандир виждонинг саси,
Бошингни ёрсанг-чи уриб тошларга...

Замондошим менинг, жафокаш Ҳамлет,
О, дўстим, дунёда хунхорларни кўр,
Ожиздир бу қалам, ожиз тасаввур.

Қонлар оқмоқдадир, сўнмоқдадир нур.
Турибсан-ку давр билан бетма-бет,
Наҳот изтиробда доим тафаккур?!

© Рауф Парфи

@esdalikuz

#Rauf_Parfi_75_yoshda

Сени менга бетоб дедилар,
Бу сўз ёмон, бу сўз кўп оғир.
Сени менга бетоб дедилар,
Оқди ёшим мисоли ёмғир.

Сени менга бетоб дедилар...
Менга дунё ҳазин туюлди.
Булутларга тўлди осмон-
Аччиқ-аччиқ ёши қуйилди.

Сени менга бетоб дедилар...
Лекин келдинг, келдинг сен ўзинг,
Қора булут тамом йўқолди.
Ҳолбуки, мен... Йиғлайди кўзим.

© Рауф Парфи
@esdalikUz

АГАР

Ўлай агар сизни севмасдим
Бу хаёлим бўлса жойида.
Ахир сизга йўқ эди қасдим,
Қасам ичсам ҳамки бефойда.

Наҳот ноз-у истиғнонгизни
Севгим учун рағбат деб билдим!?
Бир фаришта мисоли сизни
Ўзимдан ҳам авайлаб келдим.

Қачонлардир йўлингиз тўсиб,
Айтмасайдим шарҳи дилимни.
Йўлларимга тиканлар ўсиб,
Ютиб қўйсам эди тилимни.

Соғинмасдим, бундай юрмасдим,
Туйғуларга қўярдим танда.
Ўлай агар яхши кўрмасдим,
Худо сизни учратмаганда...

© Хуршид Абдурашид

@esdalikUz

АКАЛАР ҲАҚИДА ҲИКОЯ

Акалар – шумтакалар
Укаларни яккалар.
Араз урдик, еб кетди
Маккаларни ҳаккалар...

Бола эдим беш яшар,
Акаларга эргашар.
Акаларимга эрмак,
Доим туртиб-тергашар.

Эсингизда бордир-а?
Қийнайди бир хотира.
Сутдек туман, Жийдали,
Юрак потир-потира.

Мен жонсарак йўрғаман,
Йўл танийман зўрға ман.
Акаларим ёнимда
Айтинг, кимдан қўрқаман?!

Акалар-шумтакалар
Атрофимда ҳаккалар.
Бирдан ғойиб бўлишди
Ёрилди ўтакалар.

Анов қора бўрими?
Анов шарпа ўғрими?
Акаларим йўқ, айтинг,
Манави йўл тўғрими?

Аввал йиғлаб бақирдим,
Исмин айтиб чақирдим.
Тасаввур қилаверинг
Жужуқ бола пақирни.

Юрагим тамом тушди,
Томирларим увушди.
Қўққис қибла томонда
Оч бўрилар улишди.

Ерни қучиб йиғладим,
Елкам учиб йиғладим.
Сутдек туман ичида
Чўчиб-чўчиб йиғладим.
Худди чиққандек ердан
Акалар пайдо бирдан.
Кулишади хахолаб
“Ўла, сендай ботирдан!”

Акалар-шумтакалар
Қийқиришиб ҳаккалар.
Жичча уят, жичча ор
Юракчамни тилкалар.

Кифоя шу ҳикоя,
Топган яхши ниҳоя.
Лекин пича оғриқ бор,
Юрагимда бор соя.

Ҳаёт экан, кейин хўб
Акалар топдим тўп-тўп.
Ўйин қилиб кўнглимни,
Озор бергани ҳам кўп.

Жиддийроқ иш лек энди,
Бири қўққис чекинди.
Қўлин юлиб қўлимдан
Туман ичра бекинди.

Гоҳо ўпкам тўлади,
Акам яйраб кулади.
Бўри бўлиб ўзича
Қўрқитмоқчи бўлади.

Акалар — шумтакалар
Укаларни яккалар.
Араз урдик, еб кетди
Маккаларни ҳаккалар...

Дилимни дард лаънати
Сурнай қилиб чалади.
Ярим йўлга етганда
Бу ўйинлар ғалати.

...Ўшанда билмагандим,
Ростдан дил тиғлагандим.
Акаларим адашиб
Кетди деб йиғлагандим...

© Иқбол МИРЗО

@esdalikUz

Hayot sahnasida raqqos odamzod,
Kuyga esh turlanar. Ohanglar turli...
Mohir raqqoslarni taqdiri saxiy
Siylab, yo'l ko'rsatar.
Yo'llarchi - nurli.

Bunda o'yin bilmas raqqosga qiyin,
Alam qilar kuyga bo'ylolmasligi.
Toleni so'kar.
Lek anglamas, uning
Baxti - kuyga monand o'ynolmasligi.

© Dilmurod Do'st

@esdalikUz

Shivirlar daraxtning yashil tillari,
Ba'zan yaproqlarday to'kilgay dilim.
Horib yastanadi qishloq yo'llari -
O, mening Xudoga cho'zilgan qo'lim.

O, olis yo'llarning tanish g'ubori,
Sizga yuz bosmasam hayotim bekor.
Boqsam ko'ylaklari yaltiroqlarning
Xuddi yuragini bosganday g'ubor.

Axir u yoqlarda ko'z ochar birga,
Yostig'im chetida mudragan sahar.
Yopiq derazalar, yopiq eshiklar,
Oq tongni xonamga qo'ymaydi shahar.

Qancha yig'laganman o'zimga ayon,
Ba'zan qirg'og'idan toshganday dengiz.
Men ketsam, suyganlar, etmang g'alayon,
Siz axir o'shanda qayda edingiz?!

Ko'rdim. Balandlarning dili poygakda,
Bugun balandlardan tolayotirman.
Eski qishlog'imga yangi ko'ylakda,
Eski qalbim bilan borayotirman.

© Gulrux Xudoyorova

@esdalikUz

Millatim iymondir...

She'r muallifi: Dilmurod Do'st

Rejissor va operator: Abdukarim Mirzayev

@esdalikUz