مو وفاته استشهاده ياناس الرسول
هو اليحجي عن موته والسانه شيگول

روايه بلبحار اتوضح المضموم
يحجيها محمد والحجي مفهوم
كل مقتول من اهل العبه بكل يوم
لو مذبوح لو تلگه الجبد مسموم

هذا ايوضحلنه الغايه والحاله تطول
هو اليحجي عن موته. والسانه شيگول

بالعلات كل واحد يمر هضمه
ورسول الباري بالحمه ضعف جسمه
علي وصه زوجته ابلا دوه اتطعمه
لان هوه الدوه يتسبب بسمه

ملعونه بت الاول ملعونه بذهول
هو اليحجي عن موته. والسانه شيگول

مرات البشر يتشافه من نظره
وطه اعتقد يتعافه بالزهره
بس شنگول للي استصغرت قدره
رفضت اي بشر يدخل من العتره

بس حيدر طب وشافه وحيرها العقول
هو اليحجي عن موته. والسانه شيگول

الخميس البي رزيه من دمه تگطر
محمد راد للامه خبر يخبر
والملعون گالاها ابعلن وبسر
اتركو طه من گد الالم يهجر

ملعون اشلون اتجرأ ويحجيها بقبول
هو اليحجي عن موته. والسانه شيگول

وانقلبو ناس الكالو اصحابه
بعد موته بحقد هجمو على بابه
والتاريخ لو ينكر شنو أسبابه
اطلابتنه جبيره واحنه طلّابه

ندافع عن العتره وننصر البتول
هو اليحجي عن موته والسانه شيگول

✍️كرار الفاطمي

حلم بي خوف لمرأه چبيره
بأرض الاطفوف طفله زغيره
مطفيه بيها النار مختلفه عن الازغار
بيها الالم يحتار. طفله زغيره
_______
ليله امن الهجر ام الوفه نامت
ام عباس بالروؤيا بحزن شافت
اراضي كربله وبيها الحرم هامت
شافت بالحلم طفله اشكثر ناحت

حلمها شاف چويه بأديهه
لچنها تخاف يعله بچيهه
تتسائل ام احسين هالطفله هاي منين
ماألها كل امعين طفله زغيره
_______
ركضت للنهر للماي عطشانه
بمشيها ام گمر عدنان حيرانه
بيديها تشيل الماي لهـفـانـه
تركض صوب جثه وحيل تعبانه

تگله الماي جبته بديه
دگوم اوياي بداعة رقيه
تتفاجئ ام عباس جثه بدون الراس
تحاچيها بس بحساس طفله زغيره
_______
اجاها بسوط واحد چنه گاصدها
ضربها بسوطه تبجي دم ترس خدها
تحاجي الجثه وتريده يساعدها
تحشممن يبويه الـمات والـدهـا

اثاري احسين الجثه الرميه
ولفاه البين بالغاضريه
بالحلم تبچي بصوت وسفه خذاك الموت
بيتي صبح تابوت طفله زغيره
_______
تعرفه احسين بي ميزه وفي وبساع
أليـحـشـمه يـجـيـله لو وذر بالگـاع
ومن صاحت عليه الطفله صار اشراع
گام وطاح عمت عيناي حيله ضاع

ييمه احسين. اسئل سؤالي
الطفله من وين جاوب يغالي
جاوبها بتي هاي جابت بديها الماي
وتگلي كوم اوياي طفله زغيره
_______
راحت يمها تسئلها منو هيه
معالمها بحلمها اهواي مخفيه
منو انتي اسئلج گولي يبنيه
تجاوبها عزيزة گلبه انه ارقيه

ماظل الج حيل وبزغر سنج
شو دمج ايسيل شو تارس اذنج
فزت بنص الليل والدمع منها ايسيل
مابيها ظل كل حيل طفله زغيره

الخادم كرار الفاطمي

يابوفاضل. خويه رايح ماتجيني وهاي هيه
يابوفاضل. احنه متفقين موتتنه سويه

شلون اودعك والله مااعرف يغالي
ياگمر دنيايه يمضوي الليالي
راح ابجي وراح الطم هذا حالي
شلون ترضه دمعتي اتغرگ خيالي

يابوفاضل. ضيم باجر راح اشوف وكل اذيه
يابوفاضل. احنه متفقين موتتنه سويه

طولك اشراع وصفه ايفيي علينه
ومن يطيح اشراعها اتطيح السفينه
خويه باجر لو متت يعدل سبينه
وين گلي نروح ياعزنه او ولينه

يابوفاضل. خويه من اتموت راح امشي سبيه
يابوفاضل. احنه متفقين موتتنه سويه

موفقط گلبي يبوفاضل تكسره
حسين من اتموت هم ينكسر ظهره
حسين يبقه لوحده ومحد ينصره
وبعد موته يسحگنه اخيول عشره

يابوفاضل. تسحگ احسينك اخيول الاعوجيه
يابوفاضل. احنه متفقين موتتنه سويه

الطفل من العطش يبست لهاته
ومن رحت صوب النهر رايد نجاته
وانه خلفك ادعي سمعوني الشماته
الله لا ياخذ اخو امدلل خواته

يابوفاضل. وتالي ماتالي رحت من بين اديه
يابوفاضل. احنه متفقين موتتنه سويه

لو يجن الليل امشي صوب جسمك
لچن خويه خايفه لمن احشمك
صعبه لو واحد يطگني واني يمك
راح احاول اسكت ودمعي يكلمك

يابوفاضل. اوياك الي يابوالوفه اخر مسيه
يابوفاضل. احنه متفقين موتتنه سويه

✍️كرار الفاطمي

بسم الله الرحمن الرحيم

زينب اميرة كربلاء قائدت اعلام الاباء

نبدي بسم احجاب زينب يعني هيه البسمله
لو قرينه الطـف تُثـير اعقولنه كم مسئله
ابد مانعقلها زينب تمشي بيد مسلسله
چانت الحره اميره على الناگه بـكربله

ميهزها زينب اي بلاء قائدت اعلام الاباء

زينب اليحرسها ربها ماتهم بالاجنبي
خل ابينلك قضيه تخص بت الطالبي
الگوم ضنو همه اخذو بت علي وبت النبي
الحقيقه اهنا يسامع زينب اخذتهم سبي

والحره تفعل ماتشاء قائدت اعلام الاباء

طبت الكوفه عليها صعبه لكن ماتهم
من حجت زينب الخطبه سكتت كل الزلم
گالت اني ربي فوك الدين منطيني علم
انطاني عباس الصلابه حسين منطيني عزم

خطبت خطاب الاولياء قائدت اعلام الاباء

الشام طبتله بعزمها زلمه وبهيئة مره
تمشي للقصر الرئاسي مثل مشية حيدره
اتذكرو يم الشريعه شسوه سبع الكنطره
طبت الحره الاصيله وهمه ردو ليوره

گدامها الكل جبناء قائدت اعلام الاباء

يايزيد ايامك انت تره محسوبه عدد
الكون والگاع بأسمنه الله منطينه سند
ابد ميهمنه شتسوي احنه اسياد البلد
هسه لو اشر بصبعي السمه تدزلي مدد

بس ماكو داعي للسماء قائدت اعلام الاباء

الخادم كرار الفاطمي

دفنته اشصار يعمه يعمه
احسين طشار يعمه يعمه
ياعمه انشدك جاشنهي ردك
@@@@@@@@@@@@@@@@@@
يعمه غيبتك طالت عليه
شنو الأسباب بينها اليه
يگلها جنت بارض الغاضريه
دفنت احسين واهلي بهالمسيه

يبن الاحسين يعمه يعمه
الساعدك وين يعمه يعمه
ياهو سندك ياعمه انشدك
@@@@@@@@@@@@@@@@@@@@
انه همي يعمه بثگل الاجبال
ابوي اعله الوطيه امگطع اوصال
دفتنه وچنه نحره كلمه الي گال
رضيعي وسده فوگ الصدر بالحال

وسده ارجوك يعمه يعمه
صدره كاركوك يعمه يعمه
لحدي اويه لحدك ياعمه انشدك
@@@@@@@@@@@@@@@@@@@@@
يعمه وبعد هذا جان الاحساس
رحت يم الشريعه وشفت عباس
ابوفاضل بفگده اتشمتت الناس
بعد عينه انگطع من والدي الراس

عالنهر نام يعمه يعمه
بگلبه الاخيام يعمه يعمه
گتله اعله فگدك ياعمه انشدك
@@@@@@@@@@@@@@@@@@@
دفنت انصاره كلها بفرد حفره
لچن عمي جبيب بدفنه اعبره
دفنته لوحده واسمع حچه بعبره
محلاها البصف احسين گبره

كل الاجساد يعمه يعمه
بكربله غاد يعمه يعمه
يالتمشي وحدك ياعمه انشدك
@@@@@@@@@@@@@@@@@@@
يعمه من اكلج اجرح العين
اكو عمه مصيبه بدفن الاحسين
دفنته بتسع اصابع خنصره وين
يعمه مالگيته ودورت زين

تسع اصابع يعمه يعمه
صبع ضايع يعمه يعمه
شنهي اليصمدك ياعمه انشدك

الخادم كرار الفاطمي

يالبيك الاسرار. يانور الانوار
ياعلي الاكبر

طب عليهم زودك اليشوفه يشرد حيل
انته طولك هيبه ومن عطرك صار الهيل
كربـلـه بـنهـارها وانـهـارهـا سـويه ليـل
اذبح الخياله الوحـدهـا اتـهـج الـخـيـل

يالطولك اشراع ماتكفي الك گاع
ياعلي الاكبر

حسين اجه وگلالك يوليدي طب اعصار
العسكر وهداتك يالغالي اعليهم نار
الگابلاك بسيفك مايكدر هم يحتار
انت عمك ضيغم يالجدك كله اسرار

سويهه تذكار من علي الكرار
ياعلي الاكبر

من تطب وصوتك يتعالى متظل ناس
كربله وميزانيها ميكفيلك مقياس
خلي منهم ثله يالاكبر هالارجاس
سيفك وظرباته ايشبهونك بالعباس

متهمك اعداء تخليها اشلاء
ياعلي الاكبر

لاتهم بالفارس يالشايل حيدر سيف
انت جنك جدك.من. تهجم بس بالكيف
اليشرد ومتلوحه اتعناله بسيفك طيف
عزمك ونوماسك لو يبرد وسفه وحيف

ضرباتك اهواي ياعلي مولاي
ياعلي الاكبر

اتعنه بس للزلمه والحرمه شلك بيه
والشرف لو عدهم ضرباتك رد احييه
بخيمتك يدعيلك احساسك بس رد ليه
ابن غانم ذبحه وبالحومه لتخليه

اتدوسه رجليك ياهو الگدر ليك
ياعلي الاكبر

✍️كرار الفاطمي

لحن تحيرني وتذكرني لمولاتي العليله عليها السلام

ترد ليه     الك نيه    شوكت ياوالدي الجيه

يلماخذ هلي كلهم          بغيابك ينشلع گلبي
تسافر وانه ابقه أهنا.     بعد ماينوچد دربي
امشي اعليك دمعاتي     وامشي عشرتي وحبي
اريدك ترجع اعليه          دعائي هيجي وي ربي

الحجي يكثر    يبو الاكبر   اموتن بويه يوميه

اريدك تگعد بصفي     ونسولف عالعمر مره
اريد اشبع نظر منك    ماكو بغيبتك نظره
اشتاگ بغيابك حيل     شوگ الصحره للمطره
ورحيلك كسر ظلوعي   واشبه جدتي الزهره

اذا تبعد    گلب تمرد     وبعد ماترجع اعليه

عله اعيونك تصد عيني    واسولفلك جرح عمري
يتيمه تقبل بهايه.             اظلن بويه من زغري
انه ادري بروحتك يحسين   ماترجع الي ادري
لذالك دمعي حظرته        انحنه من هالمسه ظهري

ترد اردود    اطش اورود    يبو الحلوه معانيه

طلب لاكن صعب ادري      بضعنكم يالابو امشي
العله تروح من جسمي      وحگك مايظل كلشي
واذا ابقه بطرگ روحي      يشيب بغيبتك رمشي
يصير البيت تابوتي           وغرفتي يالابو نعشي

فرد كلمه      يبو اليمه.      يتيمه واني علويه

اروحن وين انه اخلافك    اعيش اشلون من دونك
انه المتعوده كل مصباح    أصبح بويه بعيونك
انه ازغيره واظل وحدي  وتمشي ابدوني اضعونك
اذا جان المرض عذرك     دواي ابوسة امتونك

الدوه انته     يمن بخته      يدري شبيه مابيه

✍️كرار الفاطمي