**بين الخرابه والسجن// ياخذني ويردني الحزن
هينه السلاسل بيدي تنشال
بس المصيبه عدنه الحبال

سافرت بيه افكاري _ وجابت لزينب طاري
وهلت دمعتي
مسجون انه بزنزانه _ وهيه انسبت عطشانه
ويلي اعله عمتي
عمتي ليل أنهار بس ابجي عليهه
الله يدري الحبل شمسوي بااديهه
يابشر حاير مثل حيرت سبيهه
بجرح يوميه الزمان ايعيل بيهه
من غربتي هواي اعتذر // صارت غريبه ام الخدر
من اذكر اسمهه اوكف اجلاال
بس المصيبه عدنه الحبال

اباب السجن سجاني _ شمحتاج من ناداني
شمحتاج مولاي
تذكرت الما انساهه _ ثمانين طفل وياهه
تدورلهم الماي
باب سجني يقفله سجاني تعود
والخرابه لا سكف لا باب ينسد
خايفه جانت يصد اعليهم احد
وكت خله الحبل بيد الحره ينشد
وانه بركبتي الجامعه// وابالي ذيج الفاجعه
فوك التراب تنام الاطفال
بس المصيبه عدنه الحبال

خلصت غريب اسنيني _ والزينب تهل عيني
بغربتهه ملجوم
تهيج الخرابه اجروحي _ من اذكرهه تطلع روحي
اذكرهه كل يوم
عكب ذاك العز اميرتنه والخيام
عمة الساده سبيه طبت الشام
عالهزل لو بالخرابه شتكدر تنام
هيه تسهر وبحظنهه تغفه الايتام
مسلوبه تبقه راحته// المسبيه عنده عمته
من المصايب شافت اشكال
بس المصيبه عدنه الحبال

اعرف اخبار اعيالي _ مطمئن كلبي وبالي
محد سباهم
لا حركو اعليهم خيمه _ لا شمر وسط الهيمه
يركض وراهم
بين حيطان السجن خلصته عمري
راح اودع دنيتي مسموم ادري
امنيتي كون الحافر يدوس اعله صدري
ومو نعش كون الحصيره تصير حدري
رظرظت ساكي السلسله// ودمعاتي تجري لكربله
ما باك محبس جفي جتال
بس المصيبه عدنه الحبال

مفارك احبابي وناسي _ والسبي سابي احساسي
ياغربتي تهون
لاخر نفس اشتمه _ ابجي الهذيج العمه
التشكي من المتون
جاي اواسي عمتي بكيود الايدين
بين سجني والخرابه وحزن الاثنين
عمري خلصته بواجي اعله اخت الحسين
هيه زينب وينهه اوين الدواوين
لتظن حزينه قصتي // ألاعظم مصيبة عمتي
قصتهه لازم توصل اجيال
بس المصيبه عدنه الحبال

تمت ____ علاء الزيدي**

هونك يدفان * ماعدهه خوان
مبينه غريبه هالمره // صفنت عليهه المكبره
//////////////////////////////////
الفاره الدنيه بسبيهه شباقي بيهه
شويه يادفانهه هون عليهه
بلكت آمن اخوانهه واحد يجيهه
خاف ماتدري الحبل رضرض اديهه
شوف النعش زين * هاي اخت الحسين
ياهو بسبيهه مادره // صفنت عليهه المكبره
//////////////////////////////////
جي غريبه بالنعش ينسمع ونهه
بالك اتراب اللحد يلجم متنهه
دموع غربتهه تره بخدهه جونهه
جنازه لا بيهه اخوهه ولا ابنهه
مبحوحت الصوت * ما جاهه زاتوت
جنازت غريبه محيره // صفنت عليهه المكبره
//////////////////////////////////
وسع اشويه الكبر خليهه ترتاح
ظلوع كسرو منهه تدري بكعب الرماح
طبع بالمحني ظهرهه تكض الصفاح
بالسبي يكومهه جانو شتم واصياح
التلجمهه الخيام * مسبيه للشام
ليش بحزنهه موزره // صفنت عليهه المكبره
//////////////////////////////////
شويه من الشوج فدوه نضف التراب
السحكته الشوج بجدمهه لهسه ماطاب
وللحجار اشويه اريدك تحسب احساب
بحجر اهل الشام صعبه انوب تنصاب
من كل سطح دار * راموهه بحجار
ويدرون بيهه مخدره // صفنت عليهه المكبره
//////////////////////////////////
جوه خدهه وصله خلي امنكعه احساس
وصله من راية اخوهه الكمر عباس
حزن زينب عالكفلهه عجب الناس
طول درب السبي غيره يدخن الراس
ما شافت افياي كرهت شكو ماي
الشافت هذيج المجزره // صفنت عليهه المكبره
//////////////////////////////////
لا تعلي اتراب كبر الحره تزعل
اتراب الهوايه تره يذكرهه بالتل
انعادت الوحشه عليهه من الاول
شكد مصايب ياكلب زينب تحمل
طف كربله بعيد ** وشوفت اخو تريد
الشمات وكفو دائره // صفنت عليهه المكبره
//////////////////////////////////
تمت ____ علاء الزيدي

بداعت اوليد الرباب // خل ادكلج مره باب
مولاتي هالمره صدك حاير
خايف اموت وانه مازاير

يم عون انه اريد العون _ عليج بكلبي الف حسره
شوكت امنيتي تتحقق _ وازورج بالعمر مره
مالت علي دنياي
وعندي امنيات اهواي
ويالرايح ويالجاي __ ابعث الج سلام
حتى بمنامي ابجيج
تصيحيلي اجي متانيج
محتركه روحي عليج _ مثل حرك الخيام

بغربتج عندي شعور // ولذالك ارد ازور
شتبقه بملامح وجهه اليساهر
خايف اموت وانه مازاير
*
عليج الغربن وياج _ اريدن منج ابشاره
امشي اعليج ابو فاضل _ اقسميلي هالزياره

مو عمري عود ابخور
لايكضي يمته نزور
يشبه رجب عاشور _ رايدله حفنه ادموع
زينب بجي الخدام
جي وحدج بالشام
تقبليهه هذا العام _ دربج صدك ممنوع

يمتى اطب ذاك الضريح // وياغريبه هناك اصيح
بالغربه هسه بحالج شصاير
خايف اموت وانه مازاير
**
الرجعو منج انشدهم _ ويرد مدمعهم اعليه
يكلولي نحس زينب _ بعدهه لهسه مسبيه

يكلولي من اتروح
كلك ترد مجروح
كبالك تحس مذبوح _ حسين وتسحكه الخيل
وياسدت البيبان
ما الهه اي عنوان
تحس بعبد عطشان_ بس يعتنيك الليل

وهناك صعبه من تنام // تضل تحلم بحرك خيام
براسك خيام بصدرك الحافر
خايف اموت وانه مازاير
**
صحنج فارغ يكولون _ هاي التهضم اهوايه
كسرة خاطرج يمعون _ مبينه برفت الرايه

وهاي اصعب الصعبات
حرمه بوسط شمات
الشبعت بجي وطيحات _ التغفه اعله ضهر النوك
الخنكت اديها احبال
ماتلكه راحت بال
مكابلها جم جتال _ محاوط صحنها السوك

عندي يامولاتي راي // لكربله يمنه تعاي
ومنج لخيج ركضت العاشر
خايف اموت وانه مازاير
**
تعبني الزمان اهواي _ وبذلت لجيتج جهدي
ضل عندي امل واحد _ اجيج بطلعت المهدي

وباجر زماني يشوف
اتعنه الج ملهوف
بالحضره راح نطوف_ ونشبك عله الشباج
عدنه برجب تحضير
اكبر عزاء يصير
من الدمعه للتطبير _ ونبجي مثل مبجاج

المهدي من يعلن حداد // الدنيه تلبسلج سواد
نسبي السبوج وداعتج باجر
خايف اموت وانه مازاير

تمت ____ علاء الزيدي

**راجع _ تتوجه اعله الحيطان
راجع _ جنازه وعوزك دفان
راجع _ ملثم حزنك بالشيب
//////////////////////////
اهواي تتلفت اشوفك ..... تعبن اعيونك
تفكر بولدك اعرفك ..... من يلاكونك
وانته ابو الايتام حيدر ..... مو يسمونك
كبال عينك صار بيتك ..... وانخطف لونك

دافن _ وتابوتك فارغ جاي
دافن _ بعيونك حجي اهواي
دافن _ جرحك مااظنه يطيب
//////////////////////////
مصيبتك كلش ثكيله ..... والله مالومك
دمعك الباجي عليهه ..... مبلل اهدومك
حيدر افراك الزجيه ..... غير ارسومك
ياكمر ظليت وحدك ..... غابن انجومك

حيدر _ فراكك بااول ساعات
حيدر _ وجدمك شابع عثرات
حيدر _ وسفه العاشرته يغيب
//////////////////////////
هاي اول مره تنحب ..... مرتبك وضعك
هواي تتلمس اشوفك ..... حيدر بظلعك
شبيهن اظلوع الزجيه..... وما نشف دمعك
عالي ونك وانته تحسب..... محد يسمعك

تكلي _ شحجيلك ياسلمان
تكلي _ مشينه لبيت الاحزان
تكلي _ وغير ادموعك لتجيب
//////////////////////////
غسلت روحك بديتك ..... همك شكبره
تراب ذبيت اعله راسك..... ماتت الزهره
روح طب اشتم عطرهه..... تارس الحجره
صعبه من تحجي ويه واحد..... نايم بكبره

غربه _ بعيونك حلمك مات
غربه _ وكل جيرانك شمات
غربه _ طكات الدنيه تصيب
//////////////////////////
ادري اليفارك خليله ..... ينهدم حيله
قالع البيبان صعبه ..... انه اتجيله
بذكرياته يبقه يفتر ..... من يجي ليله
الرحمة الله الراح منك..... الفاتحه اهديله

صبرك _ يالدافن ام حسين
صبرك _ بجيك يعميلك عين
صبرك _ الذكره تعذبك تعذيب
//////////////////////////
خايف اعليك اعله ساعه ..... رويحتك تطلع
زينب اتانيتك تدري ..... ياعلي ارجع
اليوم حزن الدنيه كلهه ..... ابابك اتربع
كسرتك فرحت شماته ..... وفرحو اتوقع

حكك _ راجع حيلك متعوب
حكك _ بنص دلاالك مصيوب
حكك _ ظنونك بالفرحه تخيب
//////////////////////////
تمت ____ علاء الزيدي**

ياموت اخذني وياهه // صعبه امي راح انساهه
من راحت امي ___ من راحت امي
////////////////////////////
بنص ذاكرتي صورة امي متعلكه
مرورتهه بلهاتي ظلت الفركه
مثل امي جذب بالدنيه راح الكه
شايف يم كبرهه تكتلك الحركه

ويصير انه تمنيته // كبر امي الي ياريته
من راحت امي ___ من راحت امي
////////////////////////////
يصير وياهه ابدل عمري وسنيني
الوي صورتهه احجي وما تحاجيني
عالتابوت شابك وشلت عيني
اخذني وياهه بعد المن تخليني

باليل اشم بثيابهه // كاسرني حيل اغيابهه
من راحت امي ___ من راحت امي
////////////////////////////
بحجرتهه امن افز بلكي الله الكاهه
بمكان التكعد امي الفاتحه اقراهه
اطب للبيت هسه متاني ملكاهه
ياموت انحرم من عدهه ترضاهه

فاجئني كلش موتهه // مشتاك اسمع صوتهه
من راحت امي ___ من راحت امي
////////////////////////////
الجنت ليليه انه اغفه اعله ريحتهه
الهسه منيدي ماتيهه سبحتهه
انظلمت حيل امي الدنيه جرحتهه
اكل كلبي الحزن جنت انه فرحتهه

اهلي اذا يضيعوني // بالمكبره يلكوني
من راحت امي ___ من راحت امي
///////////////////////////

جلمت يمه جانت حلوه بلساني
ابجي اعليهه ويسكتوني خواني
نتشابك نضل واحد عله الثاني
يموت نصيح اخذنه وياهه شمتاني

امن الزهره عنه بعيده // حتى الهوه منريده
من راحت امي ___ من راحت امي
////////////////////////////
طاحت ياهظيمه الليله خيمتنه
من يمسح بعد من نبجي دمعتنه
يزينب يالحسن ليش امي عافتنه
عوز اللمه امي وتحله لمتنه

معقوله غمضت عينهه//وعافت يتيم حسينهه
من راحت امي ___ من راحت امي
////////////////////////////
تمت ____ علاء الزيدي**

**لا تجفنها _ بويه تانيني
انده الزهره _ خل تحاجيني
تفتر عالوجوه حيرة حزنهه
شمسويه وظلوع مكسوره منهه
////////////////////////
رخي ياحيدر جفنهه _ شويه من جهت الصدر
امي متهشم ضلعها _ والجفن ياذي الكسر

تباوع بيهه وشو تندار
شلايح كلب امي البسمار
توقع حيدر شيضل بيه
اليوكع فوكاه باب الدار

هجمو اعليهه _ تخيل المنظر
لقوة العصره _ الحايط اتفطر
وارماد الجذوع عدله ودفنهه
شمسويه وظلوع مكسوره منهه
////////////////////////

حرمتك صفحت وجهه _ مورمه لطراف الجفن
تنلجم لو وسدتهه _ شلون رايح تندفن

شتغسل حيدر شتعوف
بوجه ام بيتك طبع جفوف
مطفييه من السطره العين
جانت بس بوحده تشوف

بويه ياجانب _ من توسدهه
اظلوع مكسوره _ ومنسطر خدهه
للمكبره تروح وازرك جفنهه
شمسويه وظلوع مكسوره منهه
////////////////////////

تلكت الباب بااديهه _ وانه كلبي ظل يدك
ثاري فوك المحسن ابنك _ جذع طايح محترك

صاحت فضه ركضي وياي
طفي اوليدي بطاست ماي
للحجره من ايدي اخذيه
انه الوحدي وهمه اهواي

تجوت الزهره _ شوف اصابعهه
توكف وشامت _ يجي يدفعهه
تكلب بالجذوع تدور اعله ابنهه
شمسويه وظلوع مكسوره منهه
////////////////////////

بويه فدوه اندهه اليه _ عندي وياهه حجي
احسب امن تشد جفنهه _ يعني اموت امن البجي

جانت كعده الزهره تنام
من الباب تخاف الاحلام
متفاجى حتى التابوت
راح يشيعله اجم عام

زينب ابدونج _ تعاني كللهه
ترضه بسنيني _ امي ابدلهه
ما يكدر الكون يعوضني عنهه
شمسويه وظلوع مكسوره منهه
////////////////////////
الرحه من تفرهه جانت _ صوت يطلع ينسمع
تدري توني اله عرفته _ ياعلي صوت الظلع

من تمشي تكض الحيطان
تضل تشهك شهكت غركان
بهاي الحاله تحاجي حسين
يوليدي خو ما عطشان

اليوم ياحيدر _ صبحت زينه
فدوه كللهه _ لا تخلينه
بلكي الله وتكوم تلمنه بحظنهه
شمسويه وظلوع مكسوره منهه
////////////////////////

موسم افراك الزجيه _ تميز ابموجت يتم
بويه بس يطلع نعشهه _ مايظل عدنه حلم

مايتعوض بويه الراح
المكسوره ظلوعه شيرتاح
لكبره الغالي من يروح
لايرهم باب ومفتاح

تدري ياحيدر// البرد ياذيهه
بهدمك بهيده// بويه غطيهه
امي من الالام ناحل بدنهه
شمسويه وظلوع مكسوره منهه
////////////////////////
تمت ____ علاء الزيدي**

صاحتلي وكالتلي _ عن الما يخطر عالبال
من اتكبرين بالخمسين _ تنشد بيدج راح احبال
كالت زينب مااوصيج * تكبرين الطف متانيج
///////////////////////////
انه وياهه _ نكعد نسولف _ تهل دمعهه
تسولف وتسكت _ كوه تتنفس _ من ظلعهه
ارفع جفوفك _ خويه خل ندعي _ عالصفعهه

متأذيه من ظلعي هواي _ لو بيدي ابد مااعوفج
كالتلي بس تكبرين _ ينشد حبل بجفوفج
يذبج زمانج بالشام _ بحسرة عزيز يشوفج

فاطمتي محيرتني _ بقمصانك تشتم يحسين
اسألهه وتكلي _ بعدين اهناك اتعرفين
راح الدنيه ادور اعليج *** تكبرين الطف متانيج
///////////////////////////

يمهه صاحتني _ تلمست متني _ وكلبي حاير
السوط والسطره _ هم يلوحني_ بيوم عاشر
تدري حته اسمي _ راح يتبدل _ خويه باجر

انطتني عبايتهه تكول _ بس بالسبي تلبسيهه
التصابح ابوجه حسين _ راح الرمح يعميهه
الما طلعت الباب البيت _ تنطي الجمر رجليهه

اتجوه واتحمل _ وامشي بدرب الما مسحوك
بس بهاي كلي شلون _ صعبه اعليه طبت السوك
تجيبج حسبه وتوديج*** تكبرين الطف متانيج
///////////////////////////

نطتني سبحتهه _ البيهه ريحتهه _ تكلي ذكره
وبيك وصتني _ من تودعينه _ بوسي نحره
حسين من يكبر _ يسحك الحافر _ ظلوع صدره

مفجوعه وادري تفهمين _ شنهو حجي المفجوعه
من اطشر الغالي الخيل _ تلمين اريد اظلوعه
ومسحي التراب يأذيه _ من ركبته المكطوعه

باالاامك واسهامك _ لو حاجيتك احجي وياي
تذبحني لو كتلي _ يازينب ما عندج ماي
جم موقف راح يبجيج*** تكبرين الطف متانيج
///////////////////////////
كون مااكبر _ حتى ماافكدك _ ياابو الاكبر
وكون مااشوفه _ بدمك ملطخ _ شيبك احمر
ركضتي صعبه _ اكبال شماتي _ خويه واعثر

امنيتي اظل انه وياك _ بهذا العمر يحسيني
انته يتانيك السيف _ وانه السبي متانيني
يضيعك عليه الدخان _ بس جيب اليدليني

اتمنه واتمنه _ عمرك كله تضل مرتاح
صدكني شما تكبر _ يكبر وياك الذباح
دمعج كالتلي يواسيج*** تكبرين الطف متانيج
///////////////////////////
حظرت روحي _ وحزمت صبري _ للمصايب
غربتي غربه _ ودهري ما يسوه _ بيه اعاتب
ثلث من عمري _ يخلص بلحظه _ بالخرايب

القهرتني طبت الديوان _ مامره اجتي ابالي
معقوله بت اهل البيت _ تبات بخرايب تالي
جتالك حسين الماي _ وانه الحزن جتالي

يتعبوني يعذبوني _ لا ام عندي ولا خوان
كالتلي هم يصير _ زينب عندج بيت احزان
شيب الحركه يبين بيج* تكبرين الطف متانيج
///////////////////////////
تمت ____ علاء الزيدي

https://youtu.be/gvfFl3Kee9Q?si=0CaIRaEVv5bZfnff

https://youtu.be/e1oR9-uv2do?si=dFTsrK3nyyUBHOGB&sfnsn=mo

https://youtu.be/VnlzVI0a47g?si=pXp9figffGbRL-eC