Күндү хаартысканан күрэх кыттааччылара уонна куоластааччылар !

Балаһыанньа быһыытынан кыттааччы уонна куоластааччы баһылык Степан Саргыдаев (@sargydaevstepan) уонна "Чурапчинский улус" (@churapchinsky) телеграм-каналларыгар булгуччу сурутуулаах буоларгытын санатабыт.

Күрэххэ ситиһиилэри баҕарабыт!

Улуус салалтатын уонна тус бэйэм ааппыттан Чурапчы улууһун олохтоохторун быйыл Россияҕа Дьиэ кэргэн, Саха сиригэр Оҕо саас, улууска Ыал саргытын сылын чэрчитинэн Оҕо көмүскэлин күнүнэн бары ийэлэри уонна аҕалары, олохпут сибэккилэрин - оҕолору итиитик истиҥник эҕэрдэлиибин!

Сыл ахсын бэс ыйын 1 күнүгэр үгэскэ кубулуйбут кэрэ бырааһынньыгы – Оҕо көмүскэлин күнүн бэлиэтиибит. Оҕо хас биирдии ийэни, аҕаны дьоллуур, үрдүккэ кынаттыыр, үчүгэйи, үтүөнү оҥорор дьулуурун, оҕотун көмүскүүр, харыстыыр баҕатын, тапталын, кыһамньытын, олоххо дьулуурун күүһүрдэр, эппиэтинэһин үрдэтэр.  Оҕо барахсан хараҕа аһылларыгар, элбэҕи билэ-өйдүү улаатарыгар хас биирдиибит үтүө холобур буолан, сиэрдээххэ, кырдьыкка уһуйан, ыарахаттартан чаҕыйбат дьоллоох киһи буола үүнэн тахсарыгар тирэх буоларбыт үөрдэр.

Оҕо көмүскэлин күнүн үрдүк анала – судаарыстыба уонна биһиги хас биирдиибит оҕолорго сөптөөх усулуобуйаны тэрийэр, утумнаахтык иитэр-такайар сорукпутун санатыы. Россияҕа - Дьиэ кэргэн, Саха сиригэр - Оҕо саас, улууска - Ыал саргытын сылын чэрчилэринэн оҕолоох ыаллары өйүүр дьаһаллар кэккэлэрэ өссө кэҥиир. Тус сыаллаах хапытаалы уонна ситиһиилээх, бастыҥ үөрэнээччилэргэ биир кэмнээх биһирэбиллэри таһынан үөрэх уонна доруобуйа харыстабылын хаачыстыбата үрдүүрүгэр араас өрүттээх үлэлэр, эти-хааны чэбдигирдиинэн уонна успуордунан дьарыктанарга инфраструктураны сайыннарыы, оҕоҕо билиини, сатабылы биэрэр араас куруһуоктар үлэлэрэ тиһигин быспакка бара турара астыннарар.

Удьуору салгыыр дьоһун ыччаты иитэн таһаарыы – хас биирдии киһиэхэ улуу дьол. Ол дьолтон тирэх ылан, биһиги улууспут ыччатын сарсыҥҥыта сырдык, кэскилэ кэрэ буоларын туһугар туох кыалларын барытын оҥоруохпут диэн бигэ эрэллээхпин!

Күндү оҕолор! Бу сырдык кэрэ бырааһынньыгынан эһиэхэ элбэх үөрүүнү, дьолу-соргуну, үтүө баҕа санааларгыт туолалларыгар баҕарабын! Хас биирдии дьиэ кэргэҥҥэ, алаһа дьиэҕэ оҕо саҥата дьиэрэйэ туруохтун!