معذور أشتريد تگول معذور
ما لومك ابد وألگالك أعذار..

عليه أشكال مرن وانتَ مرتاح
لياليك هنا ولاساعه تحتار..

العلى وساده تمدد خالي البال
مو مثل اليگضي الليل عالنار..

انتَ تنام تگعد تسهر تگوم
وأنه حتى بهذن ما اگدر اختار..

التهدم ساف منة يفيده ترميم
مو مثل التفلش كله ونهار..

وتسولف علـ مواقف وانتَ خواف
شنو بصفحة حياتك شلك تذكار..

حديد انتَ ورجفت بساعة الضيج
وانه خشبه ووكفت بوجه منشار..

انه العندي حجيته وبلغت بيه
وجليت من الحقيقه هواي زنجار..

الحلگ الموت أنه تعنيت مرتين
موبيه الذنب بسنونه الگصار..#رحيم_المالكي

لا تعلگون برگبتي السلسلة البيها القرص
اسمي عنواني وهويتي بصدري المطرزه القنص …

كلشي ماشفت بحياتي .. لا مواعيد بحدايق .. لا كرستال الفنادق .. ولا گضيت الليل باحضان الرگص..

طبعي ابن فلاح طبعي عمري گضيته بشگص..

من امر بشارع الـ 60 تتحنه البنات
وشارع السادة يهلهل والچوادر تنخبص..

بالحجابات التدخن مرصيت احلى السنين
حتى ترچيتي موازن تبقى خرخاشة بيارغ عاليه وما تنملص..

#جبار_محيبس

لاتسولفلي على جرحك عمري ضاع،
الجرح يشفى سنيني وين الكيها..

تبجي چي مايك تبده على السراب،
اني روحي لخاطرك جافيها..

كون مو كد الهوى شجابك عليه،
جفوفي مو يمك شكو تلاويها..

لاتبرر ذبلت الورده بديك،
انت مو كدها الشمس شعليها..

ورده ماتت المن ترشلها ماي،
وهذا ياهو الكالك تحييها..

صرت كتّالي برگبتك دمي صار،
وذيج روحي بذمتك خليها..

سالفة العاف القفص يرجع عليه،
شعنده راجع بعد لاتحجيها..

اني ردتك لمن جانت بيه روح،
ترجع المن بعد روحي شبيها..

#ميثاق_الهلالي

واني و وعودك صفــــيت بلايه وعدك،
واني دمعات الحزن شاتلها ضليت على خدك..
واني سجة درب سواني زماني،
يا حريمه..
يا حريمه..

15/1
#ناظم_السماوي

المن متاني شعجب نومك فزيز،
المايودوله رسايل مو عزيز..

#عبدالكريم_القصاب

اجيتك بزر كعده اليحبوني هواي،
مو بس هدمي ناس خيالي لازمته..
وصلتك والهلا حديثه البنص السوك..
البايع واليعامل عينه رايدته..

شمس من اعتينتك من وصلتك ليل،
وحل بيه الغروب المااجه بوكته..
اني عندي خلك يحمل سفينة نوح..
لكن ثكل وجهك ماتحملته..

#حسن_الخفاجي

دورني وغلاتك سهله مو صعبه،
انه طير المراقد مااروح بعيد..
من الصحن للكبه..

بآخر صرخه كون تشوفني وتندار،
رعيد يبين الشريان بالرگبه..

انه تمنيت كون وداعك تجربه،
ضكت موت السجج وياك..
نص جسمي هلي دفنوا..
ونصي الثاني بالغربه..

#مرتضى_جبريل

ضيعني بسهل واخسرني كون تريد،
"بس توعدني روحك ما تضيعها"..
اذا روحك بدوني تعيش باستقرار.. **اقبل عـ البدوني بشرط ينفعها..

خاف بلحظه تغلط تخسر الموجود،
عُمر تركض اللحظه وماترجعها..
اماناتك ثكيله منيلك صندوك؟..
يحصل مثل روحي وبي تودعها..

عرفتك بيك هيبه وعالي ماتنلاح،
والمتلوكلك متروح تتبعها..
وكلتلي الناس هيج وانت غير الناس..
بعيوني اشتريك وروحي ادفعها..

كلتله اشواگ بيه تريدك ومليت، امنعها ردت ماقبلت امنعها..
وكلتله الروح بيدك طين مامجيوس..
على الشكل التريده بكيفك اصنعها..

وبعد ماصار بيني وبينك الميصير،
وعرفت شكد ولع روحي المولعها..
منك للاسف من بعد هذا الصار.. سمعت كلمات مامتوقع اسمعها..

(اني المالي داعي شلون صارت هاي!..
احجيها على روحك شوف تقنعها؟..
اني الما اهمك هيج صرت اليوم..
واني بكل امورك جنت مرجعها..
لسانك كطعاني وتدري بيه شلون..
الدنيا مو لسن لو اريد اكطعها)..

ولك خوفي عليك تعتبره جبن ياحيف،
والمصايب انت تدري بخزره أجزعها..
ما اجرع انفاسي لون تخطي وياي.. وانت بكل هدوء اخطائك اجرعها..

خريفك واعتنيك بكل وكت لو اريد،
ومن جف الاغصان اوراقك انزعها..
كادر بس كلت لا ولك لايفلان..
الورود بماي نارك لاتنكعها..
ماتصعب علّيَ كل سالفه من احتاج..
الوره قرص الشمس بحجايه اطلعها..

تعيشني بندم جي ما ردت فد يوم،
الصعبه العندك اني بسهل افرعها.
#جبار_رشيد اتمنى يفهمها البعض..*

الفجر غطيت گلبي لنه واعي،
عليك ولا مسودن لا انه واعي
بجه وعت روحي كوه للنواعي
ينرادلي لهمي فريضه..
وطب عرب لعيوني المريضه..
وشيوخ عشره ورايه بيضه..
بلكت يهيد الوجع البيه.

#محمد_ثامر

افرشلي ايدك،
روحي نعسانه ارد اموت..

موتي حق ولاتدورلك عذر،
اليموت بشبكه يتسجل شهيد..
الحب شفيع العاشگ بيوم الحشر..

#احمد_المطوري