آخر خميس من هالسنة🥲

{وَأَطِيعُواْ ٱللَّهَ وَأَطِيعُواْ ٱلرَّسُولَ وَٱحۡذَرُواْۚ فَإِن تَوَلَّيۡتُمۡ فَٱعۡلَمُوٓاْ أَنَّمَا عَلَىٰ رَسُولِنَا ٱلۡبَلَٰغُ ٱلۡمُبِينُ}

اول مبارح كنت عم اشتغل بالزريعة وعوّرت ايدي، ما اخدت واعطيت بالموضوع لان كان منمّل ف مش كتير حاسة فيه.. بالليل بلّش الوجع، ما نمت منيح، ويوسف لما فلّ الصبح ما وعّاني ومش عارف اني كاينة موجوعة..
ف لما وعيت، اصبع ايدي كان ورمان كتير ولونو موڤ، بعتت ليوسف صبّح عليه، ما رد عليي لان كان بالاجتماع، ف دغري لبست ورحت على المستشفى، لما كنت بالاشعّة، تحت الارض، ويوسف عم يدقّلي ما في ارسال ابدًا يعني مش قادر يوصلّي، وغبت عن السمع ساعة ونص بسبب العجقة وناطرة التقرير وهيك، كان يوسف صار جاي ع البيت، صار ع الطريق يعني، لما ردّيت عليه سمعت كم كلمة منو كيف بختفي ومش عارف عني شي وأوّل مرة بتصير..
خبرتو شو صاير معي ووين أنا وهيك، دقائق قليلة وبلاقيه صار عندي بالمستشفى، اخدنا الصورة والتقرير ورحنا على كذا دكتور، لان كان اصبعي كل ما عم يورّم ومعش فيني حرّك كف ايدي!!
بالاخير الحمد لله مشي الحال، وخلصنا، وهو معش راح على الشغل كرمالي، فقرر يضهرني وناكل برا لان ما فيني اشتغل شي اساسًا..
اديش كان معصّب مني وخاف عليي؟ اديش صار حنون لما عرف ب يلي صار معي..
ف مبارح ما خلّاني اعمل شي واخد اجازة صباحية، يعني يتأخر عن شغلو شوي..
-بعدِك نايمة يا عمري؟ يلا قومي حبيبتي رايحين مشوار صغير..
بلاقيه محضّر ثيابي لأوّل مرة بحياتو ومحضّر ثيابو ومشتغل بالبيت، لبسنا وفلّينا، بعدني موجوعة وما عندي حِيل على شي وما سألت لوين وكيف..
وصلنا على مكان بالجبل، كلو شجر بلّوط حوالينا، بينزل من السيارة واول شي بيعملو انو بيعبطني..
-اليوم، لاوّل مرة، حبيبة عمري بتطلع بالسيارة ما بتعبطني، تضايقت شوي ما بخفي عليكِ، بس بتفهم انك موجوعة وتعبانة..
فتحنا على المطعم، كتيييررر حلو، حسّيت انردلتي الروح ما بعرف ليش، يمكن تعلّقي بالطبيعة بتأثّر عليي كتير، حدنا موقدة والكراسي خشب من القدام وهيك جو بجنن!!
عملنا صبحية وتروقنا وتحدّثنا..
-لأوّل مرة بتقلقني هيك عليكِ، لأوّل مرة بخاف هالقد عليكِ، اديش كنت اتوتر عليكِ بالحرب؟ أول مبارح كان غير، غير كليًا!! لو ما لقيتك بالبيت وبعدني مش عارف عنِّك شي، كنت خربت الدنيا، معش تعيديها..
-حبيبي كنت تحت الارض وما فيني اطلع لفوق قبل ما آخد الورقة لان رح ياخدولي دوري وشفت العجقة..
-سما، مش انتِ دايمًا بتقوليلي بخاف عليك من بعدي؟ سما مبارح عشت ربع يلي ممكن يصير معي بغيابك!! سما، انتِ كل شي عندي..
-وانتَ كل عيلتي يوسف..
خلصنا صبحيتنا، اخدني جبلي لعبة، صارت هالعادة جديدة عندو، ورح يصير عندي مستودع ألعاب..
وصّلني على البيت ت ارتاح وراح على الشغل ولما إجا على البيت كان جايب معو غدا والأجمل من هيك بعد شي نص ساعة بيندق الباب..
-حضرتك سما؟
-اي نعم.
-انا من شركة التنظيفات.
-بس انا ما طلبت حدا!
-كيف هيك؟
دغري اتصلت ب يوسف وهي كانت عم تحكي من الشركة تتأكّد، عرفت انو يوسف طالبها لتساعدني بشغل البيت..
ساعدتني بكتير شغلات يعطيها ألف عافية وطلب مني يوسف ما اعمل غدا وتغدّينا نحنا وياها وتسهّلت على بيتها ويوسف راح على النادي من بعد ما دقق كتير اذا ناقصني شي او موجوعة..

#يوسف #سما

{وَمِنَ ٱلَّذِينَ قَالُوٓاْ إِنَّا نَصَٰرَىٰٓ أَخَذۡنَا مِيثَٰقَهُمۡ فَنَسُواْ حَظّٗا مِّمَّا ذُكِّرُواْ بِهِۦ فَأَغۡرَيۡنَا بَيۡنَهُمُ ٱلۡعَدَاوَةَ وَٱلۡبَغۡضَآءَ إِلَىٰ يَوۡمِ ٱلۡقِيَٰمَةِۚ وَسَوۡفَ يُنَبِّئُهُمُ ٱللَّهُ بِمَا كَانُواْ يَصۡنَعُونَ}

#رسائل_عالبال

رح تصير الساعة ١، بعدك سهران؟ كيف كان نهارك؟ مع مين تضّحكت من قلبك؟ او كان نِكِد؟
فيني خبرك شي؟ وما بتزعل منِّي؟ اكيد؟ بتوعدني؟ طيِّب.. اليوم ما فكّرت فيك إلا ٣١ مرّة.. وبكل مرة، بتذكّر ضُحكتَك.. كيفك؟
انا كيفني؟ كتير منيحة، كان نهاري مخبوص بطريقة اوووووف شو صار أحداث ورِحِت على كتير أماكن، ما تسألني كيف تحمّلت لان قلبك مش رح يتحمّل جوابي.. المهم، انتهى هلأ تقريبًا، ب كتابة هالرسالة وانا بتختي حاضنة مخدّتي..
جبت شغلات كتير اليوم، كنت حابة فرجيك ياهم، او بالاحرى تشوف حماس الأطفال يلي فيني، صرت عم استمتع بالوقت يلي بقضيه اني اهدي نفسي وقال لما إجي على البيت بتفاجأ شو اشتريت..
بلشت انعس، بكرا نهاري جدًااااا طويل، بيبدأ من الساعة ٧ الصبح، ما بعرف امتى بيخلص، بس يلي بعرفه انتظاري إلك مش عم يخلص..
رح سكّر ونام، حاول تزورني بالأحلام، تصبح على خير..

-سَمَا #سما