من ظلام الگاع فز اخر ضوه
وغطة السمة
وفاضت النهران شوگ
وزخت الدنيه النده ومات الضمة
وأذن بآخر شبر بالگاع فز اخر امام اليغسل الگيعان من فيض الدمه !!

ابين الحياطين چانت حرمه تطلگ والتعب نام بجفنها
وصرخت بأول أمام
بيا علي وجابت ابنها

١٥ شعبان چان الليل ملتم والسمه امضيعه گمرها
والدروب اتفيض خوف
والشوارع وحشة چانت سيّر الضي ابعمرها

راكده النهران چانت والنوارس تصفگ ابجنح الحزن
وباهته الدنيه گبل ما بيها لون
وفزت اعيون ابو صالح والفرح غطه المدن
ونشغت ابهمها الهواشم ،، فز الينشف الدموع من الجفن

وابتدة الحب من جديد
وغنت العشاگ املها
وصار طاري المهدي  للدنيه نشيد

وصار للعشاگ والفقره علامة
وصار نيشان العطش للذابلين ويرسم الحب بابتسامة

هستوه يكبر وانترس بالغيض گلبه وصوت لچمه الريح جاب
وسولفوله اعله الضلوع الكسروها والعبي الشبعت تراب
وسولفوله اعله الخرايب والضعن الذاك المشه ادروب ومضايف باب باب
وسافر ابحزنه ولچمته ( المهدي غاب )

سافر وضل يشتل ابكل خطوه سافرها الضعن خيمة ودموع
ويغفه والنهران بعيونه اشكبرها
وغربته اتطفي الشموع
اااخ يلمهدي اشكثر گلبك يلوع

يشرب الليل ابدمعتك والصحاري اتغثك من اتمر عليها
وتنطفي من الشوگ عينك تعثر بوحشة غربتك تبچي بيها

ومن زمان المهدي غايب ،،، يمشي وعيوني غريبه
وگالو الجمعة الظهور وهاي چم جمعة التمر نفس المصيبة 
ابصفنة العطشان تلگه الغيمه ماي ،، وصفنتك حگ انوخذ لازم تجيبه

الروح عطشانة وتريد ابزمزمك ترجع خضار
دورت كل المحطات اعله اسمك بلكي تعثر بيك سچة وعطرك ايجيبة القطار
يمته تشتل بالدروب ايام ملگة الوحشة شتلتني صليب
وروحي يوجعها الحنين وتعبت من الأنتظار

ومن زمان المهدي غايب ودافن ابروحه الهظم والشوگ جمرة
وينعة والليل اعله طوله يبات حدره
باچر المهدي يفز  يمحي الضلام ويرسم اعله الگاع ثوره
باچر ايخيّط الجروح ويغله بين الناس عمره
ابچفه باچر ينبش ابگبر الخليفة الغيضه منّه ويصلب اعيونه اعله شجره ،،!
الثار ثار وبيده لازم ياخذه اشما طال عمره !!
___
عبدالله بريسم

‏مقطع صوتي من أراك هجرتني

ياموتي ليش اتأخرت .. ردتك تمر من زمان
اتمنيت مو  هذا الوكت .. ولا غمض  بهالمكان
الشام ديرة كل جرح .. مابيها اي شي امان
بالطف ردت يگضي العمر .. يمي كفيلي چان

موت الغربه ايغث الروح
وكل شهگة موت الگه اجروح
اتمنيت  اشگد  يا عباس
نعشي ابچف يمناك ايروح

بالغربه عمري ضاع
وچان السبي متاع
خل اخلص واموت
اسم الغريبه ذاع
__

بالطف ردت كون العمر .. يخلص گبل سنين
ولا اعيشن لهذا الوكت .. لا كافل و حسين
ما يمي واحد من هلي .. لا تنطفي يعين
وجنازتي بسكته تمر .. مابيها حس ونين

اااخ الشام اشگد لچمات
سَمعوني اسموم الچلمات
هاي الماضل عدها اخوان
المسبية الشبعت عثرات 

اشگد شفت جراح
واشگد بچي ونياح
واشما ردت انام
راس الگه عالرماح

__

اشچم لچمة الي بهذا العمر .. واشگد شفت عذاب
واشگد غفى بعيني الدمع .. ومر بيه چم مصاب
ياروحي كُفي من الدمع .. بالغربه عمري ذاب
طف كربلة كلشي خذه ..و من عندي كلشي غاب 

موت ودم وسحگة خيل
وركضة هيمه اتهد الحيل
خوف وبالطف كلشي انباگ
اشگد ضّيع اطفال . الليل

شنسه وحياتي هاي
خلصت ضمة اعله ماي
كل ذكرة بيها موت
تمطر ألم سماي

___

كل لحظة اشهگلي جرح .. وابچي عله اللي راح
واسهر واگل لدمعتي .. چا يمته نستراح
ماكافي من هذا الحزن .. ياروحي والنياح
شوفي انطفه ودم اخوتي .. يابس على الرماح

ااه يافشلة ذاك السوگ
بي مريت وهزله النوگ
شگد حاولت اخفي الدمعات
بس شخفي وصبعك مبيوگ

بيه اشكثر عتاب
يا خويه عمري ذاب
بيدك ردت اموت
وفوگي تذب تراب

-----------

يا روحي هذا اخر نفس ... بي اشهگ الدموع
كلشي انگضه وعمر انطفة .. خيط بوسط شموع
مامش جرح ينزف بعد .. ولا چوية بالضلوع
راح التقي براعي الخدر   .. يا گلبي لا تلوع

ابكل لحظة اذكر بيه اشصار
من ابهدمي اشتعلت نار
شنسه . التل . عثرات النوگ ؟
لو ملگه الشام البحجار !

ياروحي عمري طال
انحلت وصرت خيال
بالطف ردت اموت
من شدوا الحبال

*عبدالله بريسم

غمض ابدمعك يجفني وهسه نام
هاي اخر مره تحلم بالخيام

نام وانسه اللي جره
وذيج الرماح السره
وهسه نام .... ياجفن
_____
نام واغمض يا جفن
ويا گلب بطل تون....  هاي آخر شوغه الك

واحلم بضحكة صبح
ولا اكو خيمة ولا ذبح .... وگعده وي لمة هلك

وانسه يا جفني الدرب
وامسح اثار الضرب .... راح تلگه الدللك

سفرة عمر هسه انتهت راح اخلص وانسه السبي
ومامش بعد چويه وحرگ ولا يبقى عطاب بعبي
راح ارجع لـ اسمي الگبل بنت العفاف الطالبي

يا جفن اخر دمع
ذرفه خل يطفه الشمع
وهسه نام ... يا جفن

_____

نام يلعشت الألم
وشفت دخان الخيم ... والاجساد البلشمس

وكلشي شفته بكربله
اوداع طشر عايله ... وذبح من عدنه عرس

تذكر اشگد اركضت
نام ادريك اتعبت  .... يا جفن بيك انه احس

اشما اغفه يلچمني جرح ايفززني ويفكلي ألم
ويرسملي راس وع الرمح متخضب ابشيباته دم
وبصفه عين من الضوه مطفية من لچمة سهم

كلشي راح انساه وراي
هناك يم اخواني ماي
وهسه نام .... ياجفن
_____
نام وانساها الهزل
وانسه جرات الحبل ... والحچي الغث الگلب

وانسه شام النايبه
والخرابه المتعبه ... وضيم كل ذاك الدرب

راح تخلص يا عمر
وينتهي كل هالكسر .... هناك ما يمك غرب

تعبني يخواني البعد والغربه سلت روحي
ماكو الينسيني الألم الشام زاد اجروحي
محتاره لـ اولادي من أون لو اون عله مذبوحي

غاثني اهواي الزمن
من البچي عيوني عمن
وهسه نام ... يا جفن
__
نام واترك مدمعك
وانسه كل اليوجعك ... واغمض عيونك بعد

اترك احمول الحزن
كافي تسهر يا جفن  .... طيف الخيام ابتعد

هناك ما تلگه الركض
هناك خوفك راح يفض ... وطفل يضحك بالمهد

ريت انسه  بس ما ينسي الشام هذا وسوگه
طبيت بي امشي بحبل وفوگي العبي محروگة
الديوان ذابحني ذبح من وگفته مخنوگه

بهالعمر كلشي شفت
خل اموت انه اتعبت
وهسه نام ... ياجفن

___

اغمض ويطفه الضوه
وبيه تعرض نينوى ... واشهگ بحسرة عطش

بخوف گضيت العمر
من وره اركاض الضهر ... وغربتي بليل اهدعش

سلمت شمس الوفه
چنه من عندي اكتفه .... عمري راسملي نعش

تانيت وحدي وأنتظر واحد يجي من اخواني
ويغسّل اچفوفي ابدمع حز الحبل اذاني
وحشة الجنازه ابلا اهل ولا صوت الي الينعاني

حلم وي روحي كبر
بيده يدفني الگمر
وهسه نام ... يا جفن

عبدالله بريسم

‏مقطع صوتي من عبدالله بريسم

موعد رحيلك يا عمر
خلصت بعد ما تنتظر
رحلة عذابك والألم

كلشي انطفه ابروحي وذبل
يعين الله گلبي اشگد حمل
ضيم السبي وحرگ الخيم

اتأخرت صح ياعمر طوّل عذابي
أتمنيت اموت ابكربله وادفن عتابي
مو وحدي بالغربه اندفن بارد ترابي

من اخواني محد اجه يدفني بيده
عافوني كلهم هلي بموتي وحيده
الشام ادري عن كربله كلش بعيده

مولاتي يا زينب اه يلغريبه
____

لم ذكرياتك يا حزن
وخل دمعك ايهوّد الجفن
هد روحي كافي

اشتتذكر بهذا العمر
ياگلبي بس ضيم اليسر
وغربة عفافي

يابس على عيوني الدمع يچويني كلساع
شنسه واذا دم اخوتي ضل تارس الگاع
منها وردت يگضي العمر من الخدر ضاع

خلصت بعد ياروح سبلت اديه
بلكي من اموت ايروح اسم السبيه
هناك الكفيل الگاه كاسرلي فيه

مولاتي يازينب اه يلغريبه
__

اشگد ذكريات بهالگلب
تخنگني والمدمع يصب
من عدها شنسه

درب السبي وممشه الهزل
لو جرة اچفوفي ابحبل
دمعي اشيحبسه

هوايه السوالف والدمع بخدودي يروه
مخنوگه من هذا العمر بي خل يگضي فدوه
بجدامي مدري اشچم حرگ گوه امشي خطوه

مهيوبه كافل چان يحدي ابضعوني
من چفوفه لمن طاح غربة الخذوني
ادروب اشكثر طريت واهلي نسوني

مولاتي يا زينب اه يلغريبه
_

ضل يثكل اعليه الهوه
مر بي عطر من نينوى 
وذيچ العذابات

جايبلي من الطف نعش
بي ريحة اوداع وعطش
وركضة مسافات

دار الوكت بيه لحد ما غيٌر اسمي
ليهسه دخان الحرگ باقي اعله هدمي
وحشه من اموت وكافلي ماهو يمي

شيجبره كسر الشوگ والغربه صعبه
ليفارگ اهله يموت بالحسره گلبه
انه الأميره شلون يحدوني غربه

مولاتي يا زينب اه يلغريبه
_
مشتاگه للخويه اشكثر
منسية من ذاك الضهر
من راح الحسين

حدر الحوافر ودعت
جسم اخوّتي والبر ضعت
ما اندل امنين

ماطالع اخيالي گبل واسمي بأمانه
بفياي اخوتي امدللة وخدري بمكانه
تاليها من حبل لحبل وسوط بگفانه

ما مره جفني ارتاح لو چن نحيبه
شيهّود المذبوح مبسم حبيبه
حافر يودي حسين حافر يجيبه

مولاتي يازينب اه يلغريبه
___

الما يمه واحد من هله
ايموت ومنو اللي يغسله
ابلا دمعه وصياح

غمض يجفني انسه العتب
هاي اخر انفاس التعب
كلشي انگضه وراح

يتعذب ابموته اليضل وكل اهله تنساه
بالسكته تمشي اجنازته محد مشه اوياه
بالغربه زينبكم غفت يخواني ويلااه

راح اندفن ويموت وي روحي حزني
ويبطل من النوح والدمعه جفني
اذاني حيل الشام يا موت اخذني

مولاتي يا زينب اه يلغريبه

عبدالله بريسم

باب البيت تره اثگيل وجذع
ع الحيطان عصر اترف ضلع
وصوت الزهره ضل ما ينسمع
عمية اعيوني

خلف الباب طلع صوت الكسر
وصوت الااخ فطر گلبي فطر
والبسمار بضلع فاطم يجر
هواي اذوني

باب المرتضى يندفع ليش عله الزهره
ويتشضه الحلم والعشگ حايط ايعصره
شيطفي الوجع بيه نار ابروحي مستعره

طفه كل الضوه ابروحي
ونزف دمعي وطلع نوحي
الزهره اول اجروحي .. الحبيبية

غفت مكسورة الخاطر
الباب اشچم ضلع كاسر
روحي ويه الهوه اتسافر .. غريبة

ما لحُزني مدى ومدمعي لكِ جارِ
السلام على .. قتيلة المسمارِ

---------
تتنفسين وجع وانه انلچم
يا زهره وحرگ بالبيت اشم
يا ليل الگدر حزني يلم
زايد نوحي

ع الحيطان رَسم دم وكتل
وصرخة صوت صداه طيحة طفل
بعتبة بابي باقي لهسه ضِل
ضِل اجروحي

من بعد الحرگ ذاك غفت بيه چم لوعة
صدري اشگد تمنيت اشوف مكسره اضلوعة
واشعر بالعذابات وأون ونه مسموعة

ينزف من ضلعها الدم
وابروحي العشگ مأتم
جفنها من الوجع سلهم .. حياتي

الوصية امگيدة اچفوفي
وياهم ضاع معروفي
تموت الزهره يا خوفي ... بعباتي

ينام في مقلتي رماد حرق الدارِ
السلام على قتيلة المسمارِ
______________ضل ع الگاع اثر دم الولد
وما بطّل دمع جفني وبرد
الحيل ابفرگة الزهره ركد ... شينسيني

جرح الباب ولا مثله جرح
شنسه وكلشي بعيوني ذبح
جرح اموادعج بيه رمح .... ومأذيني

خلصت ذيچ الأيام بالعيون بقت ذكره
رماد الباب يهيج جرح ضلعج وكسرة
بغيابج يزهرة العمر ينگضي بحسرة

اشيگضي ايامي من دونچ
التراب التم على اعيونچ
عالحايط يدفعونچ .... جريمة

بالبير اندفن سرچ
ويا وسفه وذبل عطرچ
دفنت اسنيني عد گبرچ .. هضيمة

في البئر اخفي الدموع وادفن الاسرارِ
السلام على قتيلة المسمارِ
__________

شما اغفه الگاچ على عيوني حلم
وياخذني الشوگ الچ وبجدمي اهم
كلساع ابذكره منچ انلچم
اشگد ابچيتچ

واترجه اچفوف تلم دمعي اليصب
لو منچ صوت يجي ايبرد الگلب
وحدي ابكل ليلة انه وضلّي غرب
اشگد تانيتچ

حيدر انه يا زهره واتعثر ابضلي
واتچه الحياطين و ارد منكسر كلي
چنتي ابكل ظلام اسمچ ايدلي

بچفوفچ ردت گبري
نفذ من الصبر صبري
خلص يا زهره كل عمري .. بغيابچ

يگمرة روحي وعيوني
الدمع نايم على اجفوني
وحقج صبّغت لوني ... بترابچ

ما نفع عمري وقد دفنت ضوء نهاري
السلام على قتيلة المسمارِ

عبدالله بريسم

هاي الأمانه يا محمد ،،، نامت عله اتراب
مدلها چفك خاف تبرد ،،، معصوره بالباب

ماتت ابحزنها ،،، وانذبح ابنها

يا اغله الاحباب
----------

بنتك يبو القاسم الك جايبها بيدي الليله
مهظوم اجيتك بالدمع ويغثني دم الشيله
طگوها گالو وافزعت بس الوصيه اثگيله
بالعصره محسنها انذبح مابيها حيل اتشيله

گالو وأن بالدار فاطم ،،، خل نحرگ الدار
گالوله هاي من آل هاشم ،،، وزاد الحطب نار

وانكسر غصنها ،،،، ماتت بحزنها
يا اغله الاحباب ،،، يا اغله الاحباب

----------

ناشف على اخدودي الدمع والتم الليل ابداري
وبروحي محبوس الهظم وبگلبي شبت ناري
لوما وصيتك يلنبي چا ما بطيت ابثاري
يعرفوني قتال العرب ويدرون زين اخباري

من عرفو ابسيفي تركته ،،،، چتفو اديه
وگبال عيني انه شفته ،،،، الطگ الزچيه

جيتك لدفنها ،،،، ماتت ابحزنها
يا اغله الاحباب ،، يا اغله الاحباب
،،،،،،،،،،،،
يخنگني بيتي من ادخله يا غربتي ابغيبتها
ما علمتني اعله الحزن چنت اغبش بضحكتها
چانت ضوه اعيوني وهلّي والجنه احس غرفتها
ماتت وانه بصبري متت وضليت اشم شيلتها

بالشيله ضل اثار دمها ،،، ام المحنه
طاحت ضوه ومدري شيلمها ،،، ومتنه احنه كلنه

وياها مات ابنها ،،،، ماتت ابحزنها
يا اغله الاحباب

-------

وياچ اماني اشگد طفن يازهرتي المضلومه
عمرچ بعد يطلب عمر لا مو وكت هالنومه
لمن دفنتج شاهدت دم واعرفت ملچومه
واتشضه حلمي اعله الرمل والگبر باگ ارسومه

رديت والدمعه اعله عيني ،،،، مادري محتار
يمچ اضل وانزف ونيني ،،،، لو ارجع الدار

سلهمت جفنها ،،،، ماتت ابحزنها
يا اغله الاحباب

عبدالله بريسم

مهظوم اجيت ابحسرتي
ع الخد تبين دمعتي
يا زهرة فگدچ كسرني
من دونچ ابقه ابغربتي

فرگني عنچ زماني
يا جرحي يا ام حناني
ليل الدمع فت دليلي
شوگي اعله گبرچ خذاني

يا زهره عگبچ عشت ابمصيبة
شله ابحياته اليفگد حبيبة
مشتاگ اشم عطرچ واغفه يمچ
گلبي لچمني وزايد نحيبة
______
اغفه ويفززني حلمچ
البي الگه روحي انه يمچ
وارجع واغص ابدمعتي
ع الحايط من الگه دمچ

واصفن وانام اعله حزني
ياموتي للزهره اخذني
روحي انطفت من بعدها
بس چفها چان اليلمني

دمعي وحنيني وشوگي لعطرها
من عمري ادعي يچمل عمرها
عمري گضيته وما حاسبلها
للزهره بيدي احفر گبرها
_____

بعيوني ضلمة المدينة
معقولة يخلص حچينه
وتدفن عشگنه الليالي
عمري انطفت كل سنينه

يلچنتي بيه اشحلاتچ
يلزهرة گمت وغلاتچ
كل ما ذكرت الهظيمه
اتغطة وابچي بعباتچ

هو اليفارگ يتمنه موته
تبقة دمعته اتسولف سكوته
وطاري اليحبه اينام اعله صدره
بكل نسمه يسمع چن بيها صوته _____
كل لحظه يكبر عذابي
وين اشكي حزني ومصابي
ابچي واموت ابحسرتي
ودمچ يزهره اعله بابي

بگلبي اشيبردها ناري
بدموع اخلص انتظاري
بالگوه اسكت اذا اشوف
بعيني ،، الحرگ بيده داري

لولا الرسول و صبر الوصية
بيدي شطرته الطگ الزچية
ااخ اعله ثاري الموبيدي اخذته
ضل ذو الفقار ايحشم بديه

عبدالله بريسم