صداقة اللاش مثل الشمس تالي النهار
‏لو كان تسعى وراها غايبه غايبه

‏- خالد مبارك

من يقول الكون واسع والأرض أربع جهات
‏كيف يقنعني وأنا أشيل كبدي .. في يدي
‏
‏ — ناصر الحمادين

"لو قالت اليسرى يمين، وقالت اليمنى يسار
‏أقول كيفك يا حياتي زيّ ما تبغينها."

‏—وصل العطيّاني.

‏ماهيب لحية صباح الورد والياسمين
‏لاوالله الا صباح الجمده البارده

— عابر

باقي كم شهر ويدخل الصوم ?

عامين واكتب خلف الاسم المستعار
‏ما به جديد الا القصيد المستمر

‏رقيبي الذاتي مطاليبه كبار
‏وانا ماقول الا مطاليبك امر

‏والشعر فكر و كان مافيه ابتكار
‏يصبح شجرة ماطلع فيها ثمر

‏ولاني بحاجة ملهمة خلف الستار
‏والهامي صدوف الزمان المندمر

‏وايامنا حطت عواقبها اختبار
‏مثل اختبار الطيب من فوق الجمر

‏فيها تعرف الرجل لا اشتد الحصار
‏اللي حبى واللي مشى واللي طمر

‏واحلامنا من عام قيد الانتظار
‏راحت رهينة طيش في ليلة سمر

‏في صدري اللي غادي مثل الوجار
‏ عند بدوي ما يشب الا سمر

‏والبارحه بين التنازل والوقار
‏سرتني الذكرى على ضو القمر

‏واقف على الاطلال فاطراف الديار
‏في ساعة عيت دقايقها تمر

‏غيبت عقب الوقت صدر لي قرار
‏اشد من تغييب شراب الخمر

‏لولا القصيد وسالفة هاك النهار
‏يمديني من العام في نفس الممر

‏ما بيني وبينه هزيمه وانتصار
‏وثوب الهقاوي حده الوقت وشمر

‏بعض الخطايا ما يكفرها اعتذار
‏لو تعتذر باللي بقى لك من عمر

‏- راكان الشعيلي

Instagram

‏الا يا وجودي وجد من طاح محدٍ جاه
‏تمكن صوابه ما لقى من يشلونه

‏و قفى بذوده حنشل بأوله و اتلاه
‏صواريم قوم كل ريع يذبونه

‏ولا عنده إلا مرقبٍ ما قدر يرقاه
‏يشوف العرب بس العرب ما يشوفونه

‏وتدانى كما زرعٍ يبس من عروقه ماه
‏تصرم مثل ماه و هو على نبتة غصونه

‏على صاحبٍ لي سبعة اعوام في حماه
‏ولا ينفع المحموم بالماء يرشونه

‏ولا كل من يطرد ورى اللي يبي يلقاه
‏و كم واحدٍ له مطلبٍ و انثنى دونه