طبیعت بیرینی گؤبورتدان گؤبورد
بیرینی ظریفدن ظریف ائیله‌دی
بیرینی جاماللا چکدی زیروه‌یه
بیرینی کاماللا تلطیف ائیله‌دی

هره بو دونیادا گزدی عینینی
ایشلتدی باشینی یوردو بئینینی
بایقوش بوز قانقالا سالدی مئیلینی
بولبول قیزیل قوشو تعریف ائیله‌دی

سئوینجه‌ده باخدیم غمه‌ده باخدیم
سئوینج‌ده باختیمدی کدرده باختیم
تک سئوینج اولسایدی کیم اولاجاقدیم؟
غمیم منی"حسین عاریف" ائیله‌دی

حسین عاریف

🍂🍁@paeizanam🍂🍁

سنی سئویرم💔❤️‍🩹

🍂🍁@paeizanam🍂🍁

منی سئوسن اوره ییم قان چیله مز سئودیجه ییم!
او گؤزون کؤنلوموده گول له له مز سئودیجه ییم!

تبریزین هر یئرینه شَمس یاغیر مولوی تک
کی نسیمی کوچه لرده مَله مز سئودیجه ییم!

میغناطیس لرده سنین عشقینه جذب اولمادادیر
سئویلن سئودییینی سئوگیله مز؟سئودیجه ییم!

سنی من بئینیمه چکدیکجه کووانتوم داریخیر
نیوتُن قانونودا هئچ دیله مز سئودیجه ییم!

منی گَل قونیه دن کئفلی بوراخ گؤزلرینه
بورا مِشکین دی گؤزون سورمه له مز سئودیجه ییم!

من،سن اولدوم ایکیمیز بیر بدَنین سورگونویوک
بو دیلک کؤینه ییمی دویمه له مز سئودیجه ییم!

نییه اَل چاتماز اولورسان فیزیکین سونسوزو تک؟!
کی دومان یالچینی هئی کؤلگه له مز سئودیجه ییم!

پاتلاییشلاردا اَتُم بومبانا اوخشار باخیشین
هیروشیما اوزومو شیلله له مز سئودیجه ییم!

گَل بو کیبریت کیمی یاندیر اوره یین سیگارینی
و کولک سون آلووو هئچ پیله مز سئودیجه ییم!

"سوسقون"ون داد،هارایی قارلا،قیروولا قاریشیب
ساوالان دا منی هئی پیلله له مز سئودیجه ییم!

صابر جهانگیرزاده-سوسقون

🍂🍁@paeizanam🍂🍁

تبریز

آی آنام ده یرلی دوغما دیاریم!
پوزولماز گولشنیم،سولماز گولزاریم
باخیشی اوره ییم،سئزن قراریم
آرزومون گول آچان بوتاغی تبریز!

سسیندن آییلمیش،دویوخموش زامان
الیندن آلیبدیر ایگیدلر نیشان
هر سحر تک دوغاندان اولدوزومسان
یوردومون ایشیقلی چیراغی تبریز!

چؤللرین،قوشلارین سن اؤلنگی دیر
حوسنونون جیلوه سی شافاق رنگی دیر
آچیلمیش گوللرین ائل چلنگی دیر
حیاتین گولومسر دوداغی تبریز!

تاریخی عؤموردور کئچن هر دمین
سینانمیش ائلیندیر یاخین همدمین
آلیب سهنددن ووقار گؤرکمین
اؤنملی دوستلارین دایاغی تبریز!

یول آچدین قلبیمه گؤز بَبه ییمدن
ان اؤنده دوروبسان هر گره ییمدن
وارلیقین دوغولموش ایلک دیله ییمدن
گونشلی سئوگیمین ساچاغی تبریز!

ائللرین سوردوگو هر بیر چاغیندا
حؤکمونون متنی وار هر بوجاغیندا
شاعیرلر یاتیبلار سیخ قوجاغیندا
شعریمین توکنمز نووراغی تبریز!

سؤزونو دانیشان دیلیندیر دیلیم
نه قدَر واریمسان اولماز نیسگیلیم
وورولموش عاشیقم سنسن سئوگیلیم
یاشاییش عشقیمین ماراغی تبریز!

ستارخان آدینا باغلانیب آدین
ایفتیخار یارادیر هر گنج ائولادین
تَملین قازیبسان سن استبدادین
اینقیلاب اوردونون اوجاغی تبریز!

کریم خجیر-باریش

🍂🍁@paeizanam🍂🍁

‍ منی جاندان اوساندیردی،جفادن یار اۇسانمازمی؟
فلک‌لر یاندی آهیمدان،مرادیم شمعی یانمازمی؟

هامی بیمارینه جانان،دوای درد ائدر احسان
نه‌چون قیلماز منه درمان،منی بیمار سانمازمی؟

غمیم پنهان توتاردیم من،دئدیلر یاره قیل روشن
دئسم اول بی‌وفا بیلمم،اینانارمی؟اینانمازمی؟

شبِ هجران یانار جانیم،تؤکر قان چشمِ گریانیم
اویادار خلقی افغانیم،قارا بختیم اویانمازمی؟

گلِ رُخسارینا قارشی گؤزومدن قانلی آخار سو
حبیبیم!فصلِ گُل‌دور بو،آخار سولار بولانمازمی؟

دگیلدیم من سنه مایل،سن ائتدین عقلیمی زایل
منه طعن ائیله‌ین غافل سنی گؤرجک اوتانمازمی؟

"فضولی"رند و شیدادیر،همیشه خلقه رسوادیر
سورون کیم بو نه سئودادیر؟بو سئودادان اوسانمازمی؟

حکیم ملا محمد فضولی

🍂🍁@paeizanam🍂🍁

سئو دئیه کیمسه یه یالوارمامیشام
سئویب آتاجاقسان سئومه سن آللاه!
اورک آلیم-ساتیم مالی دئییل ها
آلیب ساتاجاقسان سئومه سن آللاه!

عاشیقین دئییلدیر هر سنی اؤین
سئونده اوره یین گؤزو ایله به ین
یوز گوناها باتار بیر قلبه ده ین
دییب باتاجاقسان سئومه سن آللاه!

چوخدا اوره ییمه یاتانلار اولوب
کؤنول تئللریمی توتانلار اولوب
دونیامی"دومان"ا قاتانلار اولوب
سنده قاتاجاقسان سئومه سن آللاه!

عدالت دومان

🍂🍁@paeizanam🍂🍁

قاراداغلییام

منی جوشلاندیرر شهریار طبعی
دئمیرم بابکم یا قاچاق نبی
حقیقت گوزلدیر کئچمیشین دبی
ائلین عادتلرین گرک ساخلایام
آشیقلار سویله یین قاراداغلییام

کئچمیشده مقصده دوستلار چاتمیشام
اجنبی یاغییه گٌلله آتمیشام
بابام کوراوغلویا ال اوزاتمیشام
دده قورقود تکی ائله باغلییام
آشیقلار سویله یین قاراداغلییام

تعریفه لاییقدی گوزل موغان،میل
ایگیدلر بسله ییب بو طایفا بو ائل
خداآفرین خاندی،سولطان اردبیل
دوشمن باغرین قارداش گرک اوخلویام
آشیقلار سویله یین قارا داغلییام

کپز قوشقار سالام سویلور ساوالان
سهندی ائل سئویر شیوری زامان
اوچ قارداش زیروه سی دوماندی هر آن
چیسگین دومان یوللارینی باغلایام
آشیقلار سویله یین قاراداغلییام

گوزل باکی حالین نئجه دیر نئجه؟
تبریز جانیمدیسا گوزومدی گنجه
اوشاق تک آغلادیم آنام گلینجه
آنام غملی دیسه گرک آغلایام
آشیقلار سویله یین قاراداغلییام

"وطن پرست" اینجیمسین دوداقلار
بولبوله گه ل دئسین گوللو بوداقلار
وطن کئشییینده دورسون قوچاقلار
زامان بیلمه لیدی منده حاقلییام
آشیقلار سویله یین قاراداغلییام

نوروز عبادی-وطن پرست

🍂🍁@paeizanam🍂🍁

سؤزوم یازیمدا بوغولدو قارالدی بایرام عمی!
ائلیم-اوبام قیشا دؤندو نه حالدی بایرام عمی؟!

یاغیش یاغاندا بیزیم دام گؤزون سیخیر باشیما
ایچیمده گؤر نه سایاق قال‌ما قالدی بایرام عمی؟!

قارانقوشون سسینه آچمیشام اورک قاپیسین
سنی چیچک گوله جکدیر؟محالدی بایرام عمی!

نه قیش قوووردو منی،نه سازاق،نه قارلی گئجه
منی اورک یاراسی مندن آلدی بایرام عمی!

داغیلمیشام کوچه لردن سسیم پوزولمادادیر
آیاق ایزیم کورا یوللاردا قالدی بایرام عمی!

زامان-زامان"دومان"ین آغریسین گونش قاناجاق
قوجاق-قوجاق یاشیل آرزیم سارالدی بایرام عمی!

سنین گلیش یولونا پرده چکدیگیم گئجه دن
سطیر-سطیر غزلیم فیکره دالدی بایرام عمی!

دوواردان آسلادیغیم لال سازین کؤکون قوراراق
ایچیمده بیر کیشی بیردن قوجالدی بایرام عمی!

دونن گئجه سنی دؤزدوم قار آلدی قاپ-باجانی
اَریک آغاجلارینی شاختا چالدی بایرام عمی!

آماندی گلمه بیزیم یوردو قارقالار تالاییب
یازیمدا بایرام اؤزو مین سوالدی بایرام عمی!

فیض الله بختیاری-دومان مییانالی

🍂🍁@paeizanam🍂🍁

لال سئودا

گَل آیریلاق آی گول دئمه یوخ قالمادا قوی گئت
باختیم وایا قیلماز سنه قارق اولمادا قوی گئت

سئومک سنی قییمیر منه گئت اولما حاییف پای
یالقیزلیغیمین باغرینا ساورولمادا قوی گئت

لال سئودامیزین گؤیلون آلیب کوسدوره رم من
گیزلین باخاراق آغزینا سؤز سالمادا قوی گئت

اینجیت یارا وور دانلا کی کؤنلوم دویا سندن
هر یاخشیلیغینلا جانیمی آلمادا قوی گئت

سنسیزلیییمی یوللارا قاندیرمیشام آی گول
خوشبخت اولاسان آرخایین اول سولمادا قوی گئت

قوی بیر من اولوم بیر فلکین تاپماجا اوینو
سئودا شوتونا نیسگیلیمه دالمادا قوی گئت

عیسی زینی

🍂🍁@paeizanam🍂🍁

سن کی یوخسان، بوشونا بیزده باخیر پنجره‌لر
من داریخدیقجا‌، گولوم‌سن، داریخیر پنجره‌لر.

بیر اوتاق نیسگیلیله قول-بویون اوللام گئجه‌نی
آیریلیق ماهنیسینی بیر-بیر اوخور پنجره‌لر.

سنی باغریمدا یاتیردار خیالیم هر گئجه‌لر
دوردوغو یئرده اؤزوندن ده چیخیر پنجره‌لر.

سحرین قارشینا سنسیز من عاغیلسیز گئدیرم
چاتلادیقجاق گؤرورم کی سینیخیر پنجره‌لر.

«آی بو سنسیزلیگه لعنت!» دئییرم اؤز-اؤزومه
اؤرتولرکن اوزومه تئز دونوخور پنجره‌لر.

هووخوروب اوستونه هرآن یازیرام: «ایندی گلر»
قان اولوب تئز یازیمین اوسته آخیر پنجره‌لر.

باخیسان هرگئجه سن پنجره‌دن گؤز یاشیما
سنین عطرینله سحر، بیل کی قوخور پنجره‌لر‌.

من یولا گؤز تیکیرم آی قارا گؤزلوم، داها گل!
منه ده حسرتیله بیزده باخیر پنجره‌لر...

#ميلاد_فطين_حور_دالغین

🍂🍁@paeizanam🍂🍁