‌paeizanam

یاش اؤتوب، آییلیب گؤرورسن بیر واخت
هئچ نه یازمامیسان عؤمور یاری‌دیر.
آلنینا یازیلان قیریش‌لار آنجاق،
عؤمرونون شکایت مصراع‌لاری‌دیر.

تَلَسیک قلمی آلیرام اله،
اورک ده تیتره‌ییر ال‌لرین کیمی.
لاکین گؤرونورسن وطنه، ائله،
سن ده یازیلمامیش اثرین کیمی.

بعضاً قوشا دؤنور ساعات دا، آن دا
آخشام گزدیگینی سحر تاپیرسان.
ائله ده اولور کی، باختین توتاندا
داش آختاران یئرده گؤهر تاپیرسان‌.

کائنات دئییم‌می من شعره، سؤزه!-
اونون مین دویونو، مین آچاری وار.
اونو دویا بیلمز اونداکی کؤزه
قلبینده کؤز تؤکوب آلیشمایان‌لار.

بلی، دوی بونلاری ای شاعر یولداش
سسینی کسمه‌سین هر اؤتری سس.
نهرین قاباغینا آتیلان بیر داش،
اونون سرعتینی ساخلایا بیلمز!

دوی کی، طوغیانیندا بورانین، قارین
اودلو بیر اورک‌له یازان اولوبدور.
چوخ زامان نَعشه‌دن دم ووران‌لارین
اثری نعشه‌لر پوزان اولوبدور.

سؤز گرک اوخ کئچمز قایادان کئچه،
یوخدورسا سؤزونون کَسَری- یازما!
اؤزون سئومه‌یینجه، سئویلمه‌یینجه،
اؤزگه‌دن محبّت اثری یازما.

عیب ائتمز اوچوشدا ییخیلسان بیر آن،
تکی دئمه‌سین‌لر قانادسیز قوشدور.
گؤی‌لری فتح ائدن بیر آنا ترلان
کیم دئییر بالایکَن ییخیلمامیشدیر؟

شعریم، چوخ دانیشدیم، دئیه‌سن، بیر آز،
سن نییه سوسموسان؟- دانیشان منم؟
یوخ، شئعیر اوجاغی آلووسوز اولماز
آلیشدیران سنسن، آلیشان منم.

شعریم، ائل سازیندا مضراب وور تئله،
اونسوز دا اؤتری اؤتن آز دئییل...
اؤزلری دونیادان گئتمه‌میش هله
آدلاری دونیادان گئدن آز دئییل.

ائلین نَفَسی‌دیر ان بؤیوک اثر
دویسام دا، اؤزومو اؤیه بیلمرم.
یوز بولبول سسی ده منه وئرسه‌لر،
ائل‌سیز بیر نغمه‌نی دئیه بیلمرم.

شعریم، شیمشک‌لردن قاناد ایسته سن،
یئره‌سه انسانین نَفَسی‌له گل.
دونیادا بیر داملا اولماق ایسته‌سن،
دونیایا سن عمّان هوسی‌‌له گل...

#ممد_آراز

‌‌‌‌‎‌‌‎‌🍂🍁 @paeizanam 🍁🍂

paeizanam

دوراغین ساعاتی بئشی گؤستریر
هله بئش یاریما نئچه ایل قالیر!
بو جانسیز ساعاتین ایشینه باخ سن
بیر سورو جانلی‌دان نئجه جان آلیر!

گؤزله‌مک انسانین نفسین کسیر
آسیلی بویونو ایپ کسن کیمی
انتظار جانیمدان ائله کام آلیر
ماجال دا وئرمیر کی ایچم چاییمی...

هایاندا قالدی بس بو قاطار آلله؟!
سؤیله‌نه_ سؤیله‌نه، ایچینی یئییر
یولونو گؤزله‌ییر عسگر اوغلونون
باغرینا باسدیغی او شکیل دئییر.

هایاندا قالدی بسـ... بو هاراساندیر
بوغلارین چئینه‌ییب ال‌لرین اوْوور
سئوگی دولو گؤزلریله آمانسیز
آمانا یول سورن ساعاتی قوْوور

هایاندا قالدی بس بو قاطار.... منم
بو سفر منم کـیـ......گلدی ، گلدی، گلــ...
ازدحام ایچینده ها  بویلانیرام
نه بیر تانیش دوشور نه قالخیر بیر اَل

یئنه ده گلمه‌دین، گلمه‌یه‌جک‌سن
اَه، بو کؤینه‌یین ده یاخاسی داردی!
اومودومون  قالان سون پارچاسین دا
قاطاردان سون دوشن آدام آپاردی

آدام‌لار، هیجان، دوراق، چای، ماسا
بو سایاق باشیما فیرلانیردی یئر
بیری: «چایینیزی داغیلتدیم، باغیشـ...»
منیم دونیام ایدی داغیلدی بوش وئر!

#خان_صنم

‌‌‌‌‎‌‌‎‌🍂🍁 @paeizanam 🍁🍂

‌‎paeizanam

دۆشدوم ازلده زۆلفونه، دام اوْلمادان هنوز
ایچدیم لبین شرابی‌نی، جام اوْلمادان هنوز

گؤردوم یۆزونو کعبه‌ی اهل صفا ایله
قیلدیم طواف، کعبه حرام اوْلمادان هنوز

یازمیش یۆزونده سوره‌ی رحمان علیَ‌السّلام
عرش ایله کۆرسو، لؤوح و قلم اوْلمادان هنوز

گؤردوم یۆزونده نورِ تجلّی و شؤوقونو
آی و گۆنشده نورِ قیام اوْلمادان هنوز

دۆردانه دیش‌لری‌نی نگارین گؤرنده من
دۆرِّ صدفده نظم و نظام اوْلمادان هنوز

وجهینده یازمیش ایدی اوْنون اوْتوز ایکی حرف
خطّ بیانی حرفِ کلام اوْلمادان هنوز

گؤرموش ایدی نسیمی، یۆزونده نشانِ حق
اوْل دم نشانِ صۆبح ایله شام اوْلمادان هنوز

مولانا سید عمادالدین نسیمی

‌‌‌‌‎‌‌‎‌🍂🍁 @paeizanam 🍁🍂

paeizanam
**‍ ‍ شانه

شانه  ویر  تئللرینه وئر یئله قربانین اوْلوم
ناز ائله باغدا آچلمش گوله قربانین اوْلوم

زلفووین عطرینی یای باغچامزا گول یئرینه
قوی گله بلبل شیدا دیله قوربانین اوْلوم

ایذن وئر قوی دولانم باشینه پروانه کیمی
اینجییبسن سه ائله حوصله قوربانین اوْلوم

اوْ گؤزل سس کی سنین وار ائشیده بولبول اگر
اوْخوماز غوصصه گلر بولبوله قوربانین اوْلوم

باخیسان یانی یانی گؤزلریوین دردین آلیم
اؤلورم رحم ائله باخما بئله قوربانین اوْلوم

هاشم عؤمرون قورتاریر تاپ گینه مئیخانه لری
یئتیشر مقصده بو قافله قربانین اوُْلوم

هاشم فرح آسا**

‌‌‌‌‎‌‌‎‌🍂🍁 @paeizanam 🍁🍂

‌‎‌paeizanam

اوْردا کی دیل-آغیز سؤزدن اوسانیر
سوْروشون مطلبی تئل‌لر سؤیله‌سین!
دوْداق دانیشارسا اوْد توتار یانار
گرکدیر زخمه‌لر ،أللر سؤیله‌سین!

#بولود_قاراچورلو

‌‌‌‌‎‌‌‎‌🍂🍁 @paeizanam 🍁🍂

و بیر گۆن قلم دییه‌جک کی؛

بو قدر یازدێغێن گؤرر

آرتێــق قارالا گئتسین...

‌‌‌‌‎‌‌‎‌🍂🍁 @paeizanam 🍁🍂

‌‎‌paeizanam
گئده جک

چتینی بیز اؤلونجه دی،
گئده جک، هامی گئده جک
بیز دونیادان گئدن کیمی،
دونیانین قانی گئده جک

سولاجاق باغچاسی-باغی
قورویاجاق سون بوداغی،
دنیزین سویو-بالیغی
ساحیلین قومو گئده جک

بیر تهر پیس می یاخشی می؟
یولا سالیب سون آخشامی،
سؤندوروب سونونجو شامی،
ان سون آدامی گئده جک

رامیز‌ روشن

‌‌‌‌‎‌‌‎‌🍂🍁 @paeizanam 🍁🍂

‌‎‌‌paeizanam

سنی گئریده بوراخا بیله‌جه‌ییمی
آخماقجا سانیردیم؛
آچدیغیم هر چاماداندا سن واریدین؛
گئیدیییم هر بیر کؤینک
سنین قوخونو داشیییردی؛
سنین شکلینه یئر وئرمیشدیلر
دونیانین بوتون گونده‌لیک قزئت‌لری؛
هانسی‌سا تئاترا گئتدیمسه
یانداکی اوتوراجاقدا سنی گؤردوم؛
آلدیغیم هر عطرین
صاحیبی سن اولدون؛
بس هاچان؟
بس هاچان سؤیله سنین وارلیغیندان یاخا قورتاراجاغام
منه همیشه یولداش یولچو!

نزار قبانی
چئویرن: ائیواز طاها

‌‌‌‌‎‌‌‎‌🍂🍁 @paeizanam 🍁🍂

‌‎‌paeizanam
کؤلگه‌م ایله من

بیر گون بئزدیم، من کؤلگه‌مه دئدیم کی:
«بسدیر داها، ال گؤتور بیر یاخامدان!
گئجه-گوندوز ایشین-پئشه‌ن یوخمودور؟
چکیلمزسن بیر دقیقه آرخامدان.
اوف دئمه‌رم، آیلار-ایللر اۇزۇنۇ
من گؤرمه‌سم او موبارک اۆزۆنۆ.»

کؤلگه‌م دئدی: «ائی وفاسیز، سنینله
بیر ساعاتدا گلمه‌دیک‌می دونیایا؟!
دادسیز عؤمرو نه ائیلردیم؟ ازلدن-
من سنینچون دوشمه‌دیم می غوغایا؟!
ائه، بیلسن ده، بیلمه‌سن ده عئینی‌ییک،
منه قالسا بیز آیریلان دئییلیک.»

احمد جاواد

‌‌‌‌‎‌‌‎‌🍂🍁 @paeizanam 🍁🍂

‌‎‌‌paeizanam

ال‌لرين اليمه دَیمه‌يه‌يدی كاش،
ساچلارين اوزومه توخونمايايدی.
گرک اوّل‌کی تک سن اوره‌یی داش،
ائله اوّل‌کی تک سايماز اولايدين.

بو ايستی‌لیک هاردان؟! سن كی بوز ایدین.
قلبيمدن سن نييه اووجوما دوشدون؟
سن منه ال‌چاتماز بير اولدوز ايدين،
گؤيلردن قولومون اوستونه دوشدون

بو دا ووصال گونو...يوخ، سئوينمیرم،
ايندی داريخيرام بس نه‌لر اوچون؟
من می بو ذیروه‌يه چيخديم، بيلميرم،
يوخسا سن داريخدين دره‌لر اوچون؟

دونَنه يول يوخدور ...زامان آپارد‌ی،
تأسّوف زامانا چاتار می گؤرن؟
داها سنه گلن يوللار قوتاردی،
آرزودان او یانا يول وار می گؤرن؟

اؤتن گون‌لریمه بير عوممان دئديم،
بوشالدی اوره‌ییم... دولمور کی، دولمور.
ساحیله چاتميشام... هارايا گئدیم؟
دنيزه مقصدسیز قاییتماق اولمور...

#نوصرت_کسمنلی

‌‌‌‌‎‌‌‎‌🍂🍁 @paeizanam 🍁🍂