اسوء شي شفته ليوم بنيه مزوجه عمرها 25 سنه صارلها 3 اشهر تاخذ موانع حمل حتى ماتحمل راجعت الدكتوره دزتها تسوي تحليل حمل وطلعت حامل 🌚

💟المشكله وين ؟ المشكله موانع الحمل اذا تؤخذ اثناء الحمل ممكن الها اثار جانبية و تسوي تشوهات فمن رجعت للدكتوره سوتلها سونار وفحوصات طلع الطفل بيه تشوه ف هنا لازم تسقط الطفل

💟ف لذلك لازم كل وحده تاخذ موانع حمل تتأكد كل فتره وثانيه وتسوي فحوصات وخاصه اذا تاخرت الدوره عليها اما الي عدها خلل بالدوره لازم كل شهر تقريباً تسوي فحص مادام مستمره على مانع الحمل
🌐 @Lab_Mostafa

والله ملامحهم ووگفتهم ماتنوصف حتى الي گلبة صخر هم يتحرك عليهم يعني همه ربوه وتعبو بدم گلوبهم وصلوهم ابنائهم والطلاب هم سهروا وقرو وتحملوا تعب وبرد شتاء وصيف كله علمود شنو؟ علمود يتعين ووين ؟ بأسوء وزارة الي هيه الصحة لا توفرلك حماية لا رواتب زينه لا عطل بالاضافه للأمراض المعدية والتعامل المباشر مع المريض وكل هاي وقابلين في سبيل يتعين ويكون حياته ويشوف مستقبله تعين قسم وتعوف قسم ليش ؟ اذا انت عندك زيادة بالاعداد ليش ماتنزل تصريح رسمي الغي بيه قانون التعيين المركزي والتعيين يصير حسب الحاجه خلص حالنا حال التربية والهندسة وباقي الوزارات ليش تخليه معلگ يدرس ويكمل وتكله ما الك تعيين ؟ ماكو اي تخطيط بهاي الدوله هسه انت جاي تكول اعين حسب الحاجه بعد ليش ماتلغي قانون التعيين المركزي وتنزل كتاب وقرار شكو طالب سادس راح يدخل قسم طبي ما اله تعيين التعيين حسب حاجه الوزارة.

بس هيه المن تشتكي ؟ المشتكى لله

🌐 @Lab_Mostafa

ليش تحليل السكر التراكمي اسمة HBA1C وشنو معنى هاي الرموز ؟

ركز وياي ال HB رمز الهيموغلوبين وهذا الهيموغلوبين بيه انواع وكل نوع اله نسبة بالجسم انواعة
💟HB A1 96%
💟HB A2 4%
💟 HB F 0%
💟HB S 0%

💟هاي بالنسبة للبالغين مثلنا اني وياك لان بالاطفال الهيموغلوبين السائد هوه HB F وبعد 6 اشهر تقريبا يبدي يقل و يرتفع HB A وخلال سنتين تقريباً يصير حاله حال البالغين

💟هسه ارجع ركز وياي بانواع الهيموغلوبين عند الكبار اكثر نوع يهمنا هوه HB A1 هذا هم بيه انواع
💟HBA1A
💟HBA1B
💟HBA1C

💟عوفك من كل ذني ركزيلي بصاحبنها HBA1C هذا النوع من الهيموغلوبين عنده القدره يرتبط وي السكر الجلوكوز الي موجود بالدم كلما زاد السكر بالدم كلما زاد السكر وارتبط مع الهيموغلوبين اكثر وطول فتره عمر ال RBC الي هوه 90_120 يوم مستمره بالارتباط بالسكر لذلك نكدر نعرف متوسط السكر خلال الثلاث شهور الفاتن

💟هذا الارتباط بين السكر والهيموغلوبين راح يكون عكسي مؤقت شنو يعني ؟ يعني أرتفع السكر راح ارتبط بالهيموغلوبين قل السكر انفك الارتباط وهكذا بس اذا السكر بقى مستمر مرتفع بالجسم هنا الارتباط يعني مثل لي يحبون بعض اكثر من سنه بعد صعب يفترقون فهنا اذا الجسم بقى مرتفع بيه السكر اكثر من شهر بعد صعب يفترقون السكر والهيموغلوبين الى يموتون وهذا يصير بموت خليه الدم الحمراء لذلك نقيسه خلال 3 اشهر لان بعد هاي الفتره تموت الخلية ويبدي ارتباط جديد
🌐 @Lab_Mostafa

قبل من جنت صغير من اروح لمستشفى او مركز صحي وينطوني علاج 🌟اذا انطوني علاج قليل اضوج وانقهر شنو منطيني قليل واذا انطوني هواي علاج او علاجات شكلها غريب وجديده عليه اكيف وافرح عبالك فد شي جايبهن لهلي وفرحان بس من كبرت يلا عرفت شنو العلاجات
اما هسه اذا يوصوني اهلي على علاج ماجيبلهم رغم العلاج يمي واخذه بلاش 😂💔

💟ف الي عرفته بعد ماكبرت ماكو علاج أمن 100% بدون مضار

💟وماكو علاج نهائي الانفلونزا والحساسية الموسمية

💟وكل الأمراض الي تصيبنا اكو منها فائده النا تقوي مناعتنا 🌟وتخلينا اقوى ويعرف جسمنا يتعامل مع المايكروبات🌟 الموجودة حوالينا بالبيئة

💟فهواي جاي اشوف ناس تاخذ علاجات على اقل شي مجرد ما عطس مره وحده اخذ ديكادرون وفولتارين واموكسلين وانواع واشكال لعلاجات المشكله راح تضعف مناعته بالمستقبل ويدمر صحته والكلى والكبد والمفاصل ويضل ماتشتغل عليه العلاجات الي اقوى منها واشوفهم من يرجعون ياخذون فقط ابر 🌟مايقبل لا حبوب 🌟 ولا شرابات 🌟 لان ماتشتغل عليه بعد وهذا الشي ما يأذي بيه فقط نفسه لا يأذي لعالم كلها وياه هاي المايكروبات بعد فتره تتعلم على هاي العلاجات تضل ماتشتغل عليها الى تصنع علاجات اقوى وهلشي صعب خاصه بالنسبه للمضادات الحيوية كل 10 سنوات يلا نكتشف مضاد حيوي جديد

💟فديروا بالكم على صحتكم وصحه اهلكم وانصحوا الناس وساعدوهم وذكروهم عسى تنفع الذكرى 💟
@Lab_Mostafa 🌐

اذا انت مريض سكري او عندك احد من اقاربك او اهلك مريض سكري او عمره فوك ل40 لازم لازم يسوي ذني الفحوصات 💟💟

💟السكر التراكمي .... كل 3 اشهر

💟قياس ضغط الدم .... كل 3 اشهر

💟وظائف الكلى .... كل 6 اشهر الى سنة

💟فحص الاسنان .... كل سنة

💟فحص الشبكية .... كل سنة

💟تحليل الدهون .... كل 6 اشهر الى سنة

💟فحص اعصاب القدمين .... كل سنة

💟يعني مرأة عمرها بل 40 سكرها 320 تكول عمري كلها مافاحصه هيه سكرها مفول تكول ماعندي اي اعراض فطبيعي يكون مريض سكر او مرتفع عنده سكر ومايحس بأي اعراض خاصه النوع الثاني

💟اما الكلى فسالفتها سالفه لمن تتعب كلش كلش يلا تظهر الأعراض هيه والضغط القاتل الصامت

💟فلازم واحد يجيك نفسه خاصه اذا عمره بدأ يكبر خاصه احنه بالعراق نمط غذائي ومناخي غير صحي بالنهايه الوقاية خير من العلاج والكشف المبكر يتعالج اسرع من المتأخر وان شاء الله مابينا غير الصحة والعافية 💟
🌐 @Lab_Mostafa

وانت بالمختبر 🌟واجاك خطيب بنتك وطلع مصاب بالايدز ؟ هذا السؤال وصلني هواي السؤال مثل ماموجود بالصوره هنا انت كمختبري شنو تتصرف

💟اذا انت بدائرة حكومية ف مبدئينا ماتكول الأي مريض بيك فلان شي يعني مثلا مريض طلع عنده ايدز او كانسر ف انت مو من ضمن مجال عملك ان تكول للمريض شبيك مابيك تمام فقط تنطيه النتيجة وهوه يروح للدكتور والدكتور هوه الوحيد الي مخول يكول للمريض شبيك من مرض تمام

💟زين ليش مااكول للمريض ؟

💟اول شي ماكو تحليل حساسيتة ودقته للمرض 100% يعني اكو نسبة تطلع نتائج خاطئة او كاذبة وهذا شي يعتمد على المواد المستخدمه والاجهزة وفتره ونوع المرض والكثير من الامور

💟ثاني شي : انت كمحلل ماتعرف التاريخ المرضي للمريض ماتعرف شنو من اكلات ياكلها شنو من علاجات يستخدمها هل هذا الشي عدهم وراثي او لا بالاضافه اكو امراض او حالات تصير طفره جينيه او خلل مناعي والكثير .

💟ثالث شي : يسببلك هواي مشاكل

💟انطيك مثال : لنفترض اجاك شخص طالب منه الدكتور تحليل سكر وانت قسته طلع 300 وهوه كالك ها عمي بشر شطلع بالتحليل انت كبل كتله ها عمي بيك سكري وهوه من الصدمه طكته جلطه او اكو خطأ بالتحليل وهوه اصلا مابي سكر وصار بيه سكر
💟او بنيه جايبها ابوها واخوها ودازها الدكتور على تحليل حمل وسويت انت وطلع ايجابي ابوها كالك شنو النتيجه انت بأبتسامة كتله عمي بتكم حامل الف مبروك هنا هوه راح يكطع العكال على راسك وراس اهلك لان بنته اصلا مامزوجه وشاكين بيها مسويه شي لا اخلاقي ف انت هنا اذا كسروك تكسير ماكو احد راح يحميك لا قانون ولا عشائر

💟بالاضافه انت ممكن يقتلون البنيه بسببك وممكن تطلع بريئة مامسويه اي شي والسبب بالنتيجه الموجبة خلل بالشغل مالتك او خلل هرمون او سرطان وهواي اسباب وممكن الدكتور مسويلها سونار وطالع عدها ورم وراد يعرف نسبة الهرمون شكد عدها او يتأكد من الورم شنو سببه كذلك يكدر الدكتور يعزل المريضه وحدها ويسولف وياها اذا الحمل اكيد ويشوف شنو سبب هل تعرضت لاغتصاب ،تحرش ممكن يدزها لدكتوره نسائية او نفسية تتعامل وي الحاله

💟الملخص : اذا اجاك اي شخص شخص اقاربك او شخص يريد بنتك او اي شخص غريب انت مامخول تكول للمريض بالنتيجه تمام دزه للدكتور وهوه يسولف وياه هاي كشغلك المهني تمام زين اني قريت النتيجة مال خطيبها وطلع عنده ايدز او كانسر ف انت هنا بعد مايكمل فحوصاته لان ممكن الدكتور يطلب منك تحاليل اكثر ف انت تابع الحاله وي الدكتور تكدر تكله خطيب بنتي شنو النتائج مالته هل مؤكد مصاب بالايدز بعدها تكدر تقرر انت وبنتك تفصخون الخطبه @Lab_Mostafa 🌐