Нечаканае ад Apple - баг ці фіча?

Сутыкнуўся з нечаканым ад Apple на iPhone - арганізацыя папак у галерэі.

Сітуацыя: трэба ў iPhone скапіраваць фота са свята, напрыклад 300-500 шт, каб можна было іх паказаць без інтэрнэту. Не самае тыповае дзеянне для карыстальніка iPhone, але такая сітуацыя вельмі рэальная. 

Тое, што стандартным спосабам гэта можна зрабіць толькі праз iCloud - таксама бязглуздзіца і глупства, але ж трэба Apple грошы зарабляць на сэрвісах. Так, я ведаю як гэта можна зрабіць праз розныя праграмы напрамую, але ж размова пра стандартныя спосабы.

Добра, стварылі альбом, праз iCloud закінулі фота - усё, здаецца, выдатна. Так, здаецца, пачынаецца самае цікавае.

Уявім, што перад капіраванне фота са свята карыстальнік зрабіў некалькі фота дакументаў ці іншыя патрэбныя фота, і яны былі апошнія ў галерэі. 

Калі трэба хутка знайсці гэтыя фота, карыстальнік ідзе ў галерэю, і чакае ўбачыць іх там апошнімі, ён жа пад фота са свята зрабіў асобны альбом - не, будзе зусім не так. Апошнімі будуць купа фота са свята, таму што асобнай папкі Камера у "ідэальным і выдатным" iPhone НЯМА!  У выніку карыстальнік нярвуецца - дзе ж мае важныя фота, спецыяльна ж здымаў, няўжо выдаліліся, чаму я іх не бачу?

Тут з цяплынёй успамінанш арганізацыю галерэі ў Android, дзе гэта папка ёсць, і апісаная сітуацыя немагчыма.

Пра тое, як арганізавана капіраванне файлаў на iPhone, і казаць не варта - гэта толькі лянівы не апісаў.

Хтосьці можа сказаць - можна зрабіць асобную папку для важных фота, ці памеціць іх як упадабаныя - але гэта дадатковыя дзеянні, большасць так рабіць не будзе.

Вось с такім нечаканым багам на iPhone сутыкнуўся, але прыхільнікі пакусанага яблыка будуць казаць што гэта фіча, так правільна.

#Apple #iphone #думкі

Вельмі часта пры ўзнікненні хоць мінімальных праблем з кампьютарам у карыстальніка ўзнікае думка: "Трэба пераставіць сістэму - і ўсё зноў будзе добра і шпарка".

Хутчэй за ўсё - не, не будзе. Калі кампьютар пачаў тармазіць - трэба высветліць, што замінае яму добра працаваць. Звычайна дапамагае павелічэнне аб'ёму памяці і перанос сістэмы на SSD.

Яшчэ вельмі часта сістэму тармозіць слабы працэсар, вытворцы невядома навошта робяць ноўтбукі, якія не могуць добра працаваць, але пра гэта я напішу асобна.

Звычай перастаўляць сістэму пры наяўнасці праблем - гэта падыход "матуліных хакераў", але ж пытанне ў тым, што ў карыстальніка сістэма наладжана для працы - праграмы, даныя, ключы, сертыфікаты, VPN і іншыя налады. Вяртаць гэта ўсё - доўга, неэфектыўна і блага аплачваецца.

Правільны падыход - знайсці ў чым справа, калі трэба - мадэрнізаваць кампьютар, пры наяўнасці праграмных пытанняў - паставіць паверх тую ж самую версію, гэта найлепшы варыянт.

Карацей - калі сістэма запускаецца - пераўсталёўка не трэба. Кал перастала запускаецца - аднавіць загрузку, і толькі ў зусім цяжкіх выпадках - пераўсталёўка, не забываючы пра захаванне даных. Пры правільным падыходзе сістэма ставіцца адзін раз - на новы кампьютар, потым толькі падтрымка.

І канешне, не забываем пра рэзервовае капіраванне - ніколі не стамлюся пра гэта казаць.

#windows #думкі

Як змяніць пошту Dropbox без доступу да яе

Вітаю ўсіх, знайшоў вельмі цікавую рэч у сэрвісе Dropbox - магчыма, будзе карысна і дапаможа захаваць час.

Сітуацыя: ёсць стары ноўтбук, на ім усталяваны кліент Dropbox, да яго падключана некалькі карыстальнікаў, вядзецца даволі актыўная праца. Узнікла неабходнасць перанесці гэты ўліковы запіс на новы камп’ютар. Здаецца, ну што складанага - паставіў кліента, увёў лагін-пароль, падцвердзіў, што гэта ты - і гатова. Пытанне ў тым, што пароль ад пошты, на якую прыходзіць ліст з кодам, паспяхова згублены, аднавіць не атрымліваецца.

Што рабіць у такой сітуацыі? Адзін з варыянтаў - зрабіць новы ўліковы запіс, сінхранізаваць файлы ў яго, зноў запрасіць супраўоўнікаў, але ў існуючым Dropbox даволі шмат месца дададзена за кошт розных акцый, запрошаных сяброў. Губляць гэта ці праходзіць ізноў - не варыянт.

Як аказалася - усё вельмі проста. На старым камп’ютары адкрываем папку Dropbox, клікаем правай кнопкай па любой сінхранізаванай папцы, выбіраем “Паглядзець на Dropbox.com” - і адкрывецца браўзер па змоўчанню ўжо ў Dropbox, з доступам да налад уліковага запісу. Ідзем у налады, змяняем адрас пошты, падцвярджаем яго - і пра стары можна забыць, ён болей не патрэбны.

Нават не ведаю, ці гэта баг у сэрвісы, ці фіча - але гэта вельмі добры варыянт аднаўлення поўнага доступу да Dropbox, калі няма доступу да пошты, на якую ён быў зарэгістраваны. Цікава, ці будзе нешта падобнае працаваць пад іншымі сістэмамі?

Не губляйце паролі, карыстайцеся праграмамі ці сэрвісамі захавання паролей, вельмі карысная рэч.

#dropbox #webservices #windows #дропбокс

Бывай, Evernote.

Сэрвісы нататак - вельмі добрая і зручная рэч, дапамагаюць у працы і ў жыцці.

Раней асноўным такім сэрвісам быў Evernote - вядомы “зялёны слон”, які, як і ўсе сланы нічога не забывае. Ён вельмі добра працаваў, быў сапраўды даволі простым і зручным, бадай, самай зручнай магчымасцю быў web-clipping - калі можна старонку ці яе частку захаваць у нататках

Я вельмі актыўна ім карыстаўся, нават даволі доўга плаціў за падпіску, і быў збольшага задаволены яго працай.

Але потым нешта з ім здарылася - і з лёгкага і зручнага сэрвіса пачалі рабіць нейкі мега-камбайн для проста супер-мега-прадукцыйных людзей. І зразумела, у лепшых традыціях такіх выпадкаў - ён пазбавіўся сваёй лёгкасці працы, потым прыйшло абмежаванне на колькасць прылад, павышенне кошту, яшчэ нейкія новыя функцыі, але разбірацца з імі было ўжо нецікава.

Я нават спрабаваў пераносіць базу заметак у нейкія іншыя сэрвісы, ужо і не памятаю куды, а потым зразумеў, што мне болей чым дастаткова звязкі Google Keep + Google Docs, і цікаўнасць да камбайнаў накшталт “зялёнага слана” знікла поўнасцю.

Пры чарговай чыстцы дыска я заўважыў, што база “зялёнага слана” займае некалькі гігабайт, і ляжыць на сістэмным дыску, вырашыў перанесці яе сродкамі лакальнага кліента ў іншае месца, і тут пачалося - версію трэба абнавіць, веб-версія настойліва, як п’яніца ля крамы просіць грошы за простыя функцыі…. А ці патрэбна мне гэткая гідота, нават і ў якасці архіва на хатнім камп’ютары? Нічога звышкарыснага там няма, калі што - можна глянуць у веб-версіі, калі яна перастане працаваць - ну і не вялікае здарэнне.

“Зялёны слон” выгнаны, назаўсёды, разбірацца з ім няма ніякага жадання.

Калі хто мае досвед добрай працы з сэрвісамі нататак - запрашаю ў абмеркаванне.

RadminVPN - выдатны варыянт VPN

Нарэшце, ёсць час і магчымасць напісаць сюды - праца забірае ўвесь час і сілы.

Спатрэбілася ў аднаго з кліентаў наладзіць друк з офіса на аддалены склад - супрацоўнік там зусім не сябруе з прагрэсам, то бок з камп'ютарамі, тым больш з сусветным злом 1С - вырашылі проста друкаваць з офісу.

Але як жа гэта зрабіць - не набыаць жа для аднаго капь'тютара статычны адрас, трэба нешта прасцей. Друк праз AnyDesk не варыянт - трэба падтрымліваць падключэнне, і вельмі хутка ён будзе прасіць грошы, якія ніхто плаціць не збіраецца. Трэба безкаштоўна, і каб працавала.

Беглы пошук паказаў наступнае: Hamachi просіць грошай, хоць раней і былі free планы, TailScale прыяднаўся да санкцый - я згодны, але ж працаваць трэба.

Застаўся RadminVPN - чуў пра яго, але не разглядаў як варыянт, але памыляўся, варыянт выдатны з усіх бакоў - ставім вельмі простае прыкладанне, на першым камп'ютары ствараем сетку, на астатніх да яе падключаемся. Што прыемна - "без рэгсістрацыі і смс", усё проста працуе.

Пра бяспеку - шыфраванне AES 256 - то бок бяспечна, не збіраць логі (Так і не збіраюць? Паверым, варыянтаў няма....). Абяцаюць аўтаматычнае абнаўленне - праверу, ёсць акрамя апісанага прыкладу яшчэ некалькі месцаў, дзе яго можна выкарыстаць.

Карацей - RadminVPN варты ўвагі, вельмі добры варыянт для падключэння да аддаленых камп'ютараў. Што трошкі псуе ўражанне - падтрымліваецца толькі Windows, але часта гэтага дастаткова.

Пачытаць падрабязней і сцягнуць можна на афіцыйным сайце https://www.radmin-vpn.com

Калі хто ведае іншыя і лепшыя варыянты - запрашаю ў абмеркаванне.

#windows #software #vpn

Radmin-Vpn

Radmin VPN | Download Free VPN

Radmin VPN allows you to securely connect computers, located behind firewalls. Download it Free.

Пра Firefox і памяць кампьютара

Невялікае назіранне - пра эфектыўнасць сучасных праграм на прыкладзе Firefox.

Кампьютар быў пакінуты ва ўключаным стане, прыкладна на дзень, увечары я зайшоў пад сваім ўліковым запісам і быў непрыемна здзіўлены маруднасцю працы. Тармазіў усю сістэму Firefox - пры гэтым там было усяго 6 укладак - адзін даволі цяжкі сайт, і астатнія невялікія. Памяці на ўсё гэта было патрэбна прыкладна 2 Гб, што зашмат, што цікава - было 46 (!) працэсаў Firefox - навошта?

Пасля закрыцця ўкладкі з цяжкім сайтам колькасць працэсаў панізілася да 45, а спажыванне памяці не змянілася.

Пасля закрыцця усіх працэсаў Firefox праз PowerShell, перазапуску браўзера (з абнаўленнем, як жа без яго :) ) і аднаўленнем сэссіі было ўсяго 12 працэсаў і прыкладна 800 Мб памяці. Кампьютар прадказальна ажыў, за ім стала магчыма працаваць.

Не толькі Chrome з’ядае ўсю памяць, Firefox таксама так можа :)

#firefox #soft #праграмы

Пра антывірусы.

Сутыкнуўся на днях з выпадкам, які ўжо стаў амаль мемам - два антывірусы на кампьютары, то бок, калі кажуць, што “антывірус - гэта такі вірус, што не церпіць канкурэнцыі”, то тут такіх два.

Канешне, добра сістэма працаваць у такім стане не магла, хоць гэта і быў новы, даволі добры ноўтбук, і калі я наладзіў яго для працы - то быў задаволены яго хуткасцю, а тут скаргі на “тармазы”.

Успамінаецца стары анекдот:

“ - Доктар, што зрабіць, каб не заразіцца СНІДам?

- Вельмі проста. Апранаеца адзін начэпнік, мажаце ёдам, апранаеце другі, мажаце зялёнкай, зверху апранаеце трэці. І галоўнае - ніякіх палавых кантактаў.”

Не варта ставіць на кампьютар два антывірусы, нічым добрым гэта не скончыцца, атрымаецца вельмі марудна працуючая сістэма.

Увогуле, пачынаючы з Windows 8.1 не бачу сэнсу ва ўсталёўцы знешніх антывірусаў - убудаваная Бяспека Windows разам з сістэмным файрволам працуе проста выдатна, не варта дадаваць смецце ў сістэму.

Усе ж ведаюць, што галоўны вірус сядзіць перад маніторам і націскае на клавішы? ?

#windows #бяспека #антывірусы

Як навучыцца набіраць не гледзячы на клавіятуру?

Як заўсёды - адказ у пытанні - не глядзець на яе. Проста не глядзець на яе, і ўсё. Не глядзець.

А як набіраць тэкст, ды яшчэ без памылак? Вельмі лёгка. Памылкі будуць толькі спачатку, потым пальцы вельмі хутка вывучаць клавіятуру, і набіраць не гледзячы будзе нават зручней.

Для пачатку, канешне, можна паглядзець, як павінны стаяць пальцы, якія дзе літары, але не варта зашмат пра гэта думаць, і асабліва не варта думаць, пад якім пальцам якая літара - хутка выпрацуецца аўтаматызм, пальцы самі пападуць на патрэбную літару.

Усе праграмы для навучання “сляпому набору” - непатрэбная рэч, ну каму цікава сядзець і набіраць нейкую лухту у гэткай праграме? Я спрабаваў некалькі праграм і сэрвісаў, але надоўга мяне не хапіла, лепей практыкавацца на патрэбных тэкстах, прагрэс нашмат лепш.

Яшчэ добрая звычка (трошкі садзызму, так) - набіраеш тэкст, і раптам паглядзеў на клавіятуру - стоп, выдаляем апошняе набранае слова, позірк на экран, і набіраем ізноў - вельмі добра дапамагае.

У выніку зараз мне усё роўна, што напісана на клавішах, можа і нічога не быць - напрыклад, калі карыстаешся ноўтбукам з нейкай нетыповай раскладкай - напрыклад, нарвежскай, шведскай, ці яшчэ якой экзатычнай.

Але як жа прыемна, калі пальцы пачынаюць хутка выкладаць думкі на экране… Гэта варта намаганняў, паўторнага набору слоў, гары памылак на першым этапе.

Паспяховага асваення сляпому набору, гэта вельмі зручна :)

#lдумкі