مواكب العزاء ----------- نصبت مواكبها الناس والدمعة نزلت بيها
---------------------------------------
نصبت مـــواكب للعــــزا وللـدمعــه
عالي علـــم عاشور بيها أتــــرفعــه
وصوت الحسين بكل مكان أنسمعـه

صوت اليهز كلب الكون ولفاطمه يواسيها
---------------------------------------
نصبت مواكب والحزن ماليها
بحب الحسين الناس نخدم بيها
تبذل الغالـــــي والثمين اعليها

لّبَيكَ يا حسين تصيح كلمه وتظل تحجيها
---------------------------
كلمـــه وعلــى مـر الزمن تجدد
الها حــرارة بكــل كلب ما تبرد
وهاي المواكب والمجالس تشهد

وجمرة حزن تلهب نار من يكدر يطفيها
-----------------------
هاي المواكب بيها تطهر الانفاس
تـــاخذنه للطف بشعور الإحساس
ذكــر الحسين البيها وذكر العباس

والزينب نادينه بآه من ينذكر طاريها
-------------------------------
هاي المواكب بها يُنّصب منبر
يصعد الناعي اعليه ينعه المنحر
وصـدر الحسين البلخيول اتكسر

وينعى الكمر والجفين عالمشرعه مكطعيها
---------------------------------
عالمنبر الرادود يصعد يقره
يهيج مشاعرنه بانين وعبـره
من يقره بالنار الخيم مستعره

ما تبقه بالعين ادموع من نسمعه نجريها
----------------------------------
نسالكم الدعاء
أبو باقر المالكي / 7/7/2024

الامام مسلم ابن عقيل ع ------------------------ من برز بالكوفة رجّ أركانها خلــه بركاب الزلـــم نيشانها
-------------------------------------
ارتجت الكــــوفه وبدء خوف الزلم
سألو اعله الصار ما عدهم علــــم
اظملت الدنيه وطفه ضّي النجــم
بحيره ظلت صحوه هذا لو حلـم

شافت المسلم دخل ميدانها خله بركاب الزلم نيشانها
------------------------------------
يمّه الثمانين الـــف عـــده وعدد
كالت يــا مسلـم الك جيش وسند
نادي بينه ومـا يظل راس بجسد
احنه الك انصار هاك اخذ العهد

ابمسلم الكوفه اعتله اذانها خله بــركاب الزلم نيشانها
-----------------------------
دكت أجراس الخطر واعلـن نفيــر
وصلت اخباره لعـــــد قصر الامير
فزعت جنوده وصدر امره الخطير
لازم يجيبونــه الـه مسلــم اسير

اشتعلت الكوفه بحطب نيرانها خلـــه بركاب الـــزلم نيشانها
------------------------
نار بالكــــوفه شعلها ومـــا طفت
وخوف بكلوب الزلم منه ارتـوت
بسيفه ركبه اعله جسد لا ما بقت
لكــــن الكالت اله انصار اختفت

جان كل هذا الغدر من شانهــا خلــــه بركاب الـــزلم نيشانها
-----------------------------
هاي موش رجال اشباه الرجال
انطو المسلم عهد يـــــوم القتال
لكن بهمة علــي يضرب مثـال
ما رجع سيفه لعد غمده محـال

حملته بحيدر علــــــي عنوانها خلـــه بركاب الـــزلم نيشانها
-------------------------------------
نسالكم الدعاء
أبو باقر المالكي // 6/7/2024

غايتك جود الماي يوصل خيامك
------------------------------------
راية علـي يا بالفضل يـــوم حملتهـا

فوك الشريعة بغيرتك انته رفعتها
بخيامك أطفال بماي من واعدتهـا    وهاي الامانه غايتك واله اكصدتهــا

عــــالنهر يـــا وفــــاي تعلن قيامك
-------------------------------------
جيش الشمر يم النهر تيه وجـــوده   يا زلمه من عدهم سيف تـرفــع زنـوده بكــربله بس الجثث ظلت جنوده والنهر يا بالفضل لازم حـدود

خيبره بيوم الطف صرح حسامك
-------------------------------------
مــــاي الفـرات بيمنتك حـــــويته    واليوصلك يـوصل حتـــــف منيته
جودك امل يروي أطفال لمن مليته    كطّعت كثره ركـــــاب مــا سلميته

مــا عرف كل الجيش هيبة مقامك
------------------------------------
غيــم سمه الطف وصار اظلم نهاره   والحـرب عالمشرعـــة مستعره نــاره
ما هدت روح الجيش ضلو حـــياره   سيفك بعد شن عالكوم غاره اعله غاره

للخيم ويه الــريح تبعث سلامـك
---------------------
تبعث سلامك للخيم هـــذي رسالـــه

بيها اثبت يامولاي كلمــة كفــــاله

اسمك كتب يم الماي هــــاي المقاله

يا نفس بعــد حسين هونــي وعياله

هــــالنفس يــــا عباس يختم كلامك
--------------------------------
نسالكم الدعاء
ابو باقر المالكي // 25/6/2024

الإمام العباس ع
-----------------
حيدر علـــي لو عباس هذا اليرف بالرايه
--------------------------
تتسائل عيون الكوم عن هالفتـــى واخباره
منهو النزل للميدان قطب الحرب من داره
كالو علي ونعرف زين من شمرته وبتاره

شافو علي بالعباس كــــــل زلمه تيه رايه
-----------------------------
طـــر الكتايب نصين ثـــار الرعب بالحومه
عليهم رسم خطة مـوت لمن صدر مرسومه
بيهم اخذ ضرب السيف رد خيبر ورد يومه

ما همه كثرة هـــالجيش لا همته الـــــرمايه
----------------------------
راعي الوفه وراعي الزود ولمرجله ولغيره
زلـــزل بـــراكين الطف خله العقول بحيره
حاطتهم حبـــال الخــــوف بيهم طبع تاثيره
رغما عليهم بالجود طب الفــــــرات ومايه
--------------------
 من عــرفوا لبالميدان هـــذا الامــر ذلاهــم
لا فكـــره لا عدهـــم راي لا مبدأ ليرعاهم
واحد وره واحــد لاذ هيج الـرعب خلاهم

سيفه الكتب اية موت اية أصبحت روايه
---------------------------------
ويــن المفـــر ولياصوب لا كنطــــره لتحميهم
بالطف ولا سمعو صوت صوت الكمر يكفيهم
مـــن اسمه دخان الخوف بكل جانب يمر بيهم

هــــذا شبل حامـــي الجار مـــــا همته المنايه
---------------------------------- 
26/6/2024

الأكبر ع
----------------
عايش بنفاسي  يبني وبحساسي بعد هلي وناسي  ...
الأكبر  يا لأكبر
----------------------------

يبني يا نبعه الــــروح ونته النـور لعيوني      ياريت اتردلي اخبار

اتمنه يابعد اهلـــي امشي وياك خلونـــــي      ما عــرفو بيه اصار

ما عيشاً انه بلياك يا شمعة ضوه ضعوني      بغيابك فكري احتار

يا نبضة كلبي  ... يا شمعة دربي  ... بعدك شنقاسي  ....  يا لأكبر  يا لأكبر
-------------------------------------
هجرت شوفتك عيني وضل بس الدمع بيها     مو بحسابي انته اتروح
تدري بصورتك اصحه من  انضر معانيها     ومن عدها العطر يفوح

نــــارك يبنــي ما تطفه ومـن يكدر يطفيها     غيرك يـــابعد الــــروح

زهرة ايامي  ... انكطعت يالغالي  ... وكلبي الما ناسي ....  يا لأكبر  يا لأكبر
-----------------------------------
يبني الولد عند اهله لـــو تــــدري شيسمونه       قطعه  من الجبد هــو

غالي وكلشي بيه اغله شلون الغالي ينسونه       الدنيه خلافه مـا تسوه

لــــو بالموت يتبدل ابــــروح اهله اليبدلونه       بنبع وجـــــوده تتروه

يا قطعة جبدي ... يا كلبي العندي ... عمري ونوماسي ....  يا لأكبر  يا لأكبر
يا شمس بسماي انته وانته هــلاله ونجومه         تضويلي هــــاي سنين
يبني يا ربيع الروح وين الطف انه ويومـه         ذلاني بدمــــوع العيـن
قرر ياخذك مني وتبقى اعله الثره نومـــــه         يا روحه وكلب حسين

يا حلم ايامي ... انظرلك دامي ... شيبته الراسي ....  يا لأكبر  يا لأكبر
---------------------------------
اغار من الهوه لـــو مــــر بوجهك يبني يمدلل يغير بهجتك يبنــــي

اضمنك وسط روحي وازعل الدنيه من تزعل        خله شما تحاربنــي

شاءت حكمـت  الباري واني بهالمشيئة اقبـل        بالطف  تاخذك مني

يا ضي دنيايه ... اتمنه ويايه ... تاريخي وساسي ....  يا لأكبر  يا لأكبر

--------------------------------
نسالكم الدعاء
أبو باقر المالكي  // 30/6/2024

شمعة الطفت بخامي
ختمت كتاب ايامي
ونته ذبيح وضامـي          بالطــــــف يجسام
----------------------------
تمشي يجاسم للحرب ما ترجع وعندي إحساس
تَبّيضّ عيوني من الدمع يبني وتشيبلي الـــراس
مهما تلوم وتنتقد حزني وعلـــــي تحجي الناس
حزن الجوارح يالولد ما ينوصف مــــا ينقــاس

انتـــه امل حياتي بيك اعقد امنياتي
شفتك خضيب ودامي        بالطــــــف يجسام
-------------------------------------------
لا شمس بيها كـربله لا كمــر لا ضي نجــــوم
ضل الظلام بكل كتر يا جــــاسم عليها يحـــوم
لمن برزت الحومتك نورك عمه عيون الكــوم
صاحت يربي شهالغضب هذا النزل بينه اليوم

لمن نفخت بصورك   بنور الحسن شع نورك
بدر وضوه كدامــي   بالطـــــــــــف يجســـام
-------------------------------
انـــــه الاسيره الهالحـــــزن وتقاسم ويــــــاه الليل
يا كلــــــب يحمل لوعتك كلـــــي يجاسم يـــا حيل
شفتك خضيب اعله الترب منك دمه الغيره ايسيل
شحمل دكلـــــي يا صبر والدنيه بجروحــي اتعيل

دنيه الغــــدر ماليهـــا    غيــــــر الام مابيهـــــــا
بكلبي سهمها رامـــي     بالطـــــــــــف يجســـام
---------------------
طول العمر انحب وون وحزن حزن ما له حدود
حـــر الدمع لاعين الــــي خله ولا خلــــه خــدود
انظـــــر الك وتــــــاملك سالـــــم الي يبني اتعود
لا خيمه ظلتلـــي بعـــــد لا ضل الــي كل وجـود

سد الكلــــب بيبانـه     ضل عايش باحــــــزانه
ويبعث الك سلامي       بالطــف يجســـام
-------------------------------------------
نارين شبت بالكلب منهـن شفت كثــر الام
نار البعد يبن الحسن خلتني أعيش بأوهـام
ونار الخيم خّلفّ  الي يبني رماد الاحــلام
شبيدي عليها كربله مـــا خلت العين اتنـام

يبني وزهو شبابي    ما حسبت مصابي
بهاي انختم كلامي    بــــــالطف يجسام
------------------------------- 
نسالكم الدعاء 
أبو باقر المالكير 17/6/2024

القاسم ع
--------------
كـــربله طفت يجاسم شمعتك
وعيني مشتاكه حبيبي لصورتك
------------------------------------
يبنـي يا جاسم يــروحي مــن الحياة
يالـــورثت مـــن الحسن كـل الصفات
شلون يبني اعله الحزن ترضالي ابات

رحت يبني وعمــري ذاب بروحتـك
-------------------------------------
رحت يبني وما بقى الكلب احد
تدري منهو الي يسد فكد الـولد
هذا وعد الله ورضيت بهالوعد

دمــــك الغالــي يسيل بحومتك
--------------------------------------
صورتك بعيوني يبني وما تغيب
تدري انته بدنيتي اجمــل نصيب
عني بُعدَك سهم وبكلبــي يصيب

وحشه بغيــابك يغـــالــي خيمتك
---------------------
حلت بكلبــــي يجاسم نــــازلـــه
بخيمتك حـــــزن النوايب منزله
كلشــــي امتلكه خذتــــــه كربله

بهالمصيبه ظلمه صارت دنيتك
-------------------------
هالقدر مرسوم الــي لازم تروح
وانه بعدك ابقى احسب بالجروح
الدنيه كلها النوحــي يلوالي تنوح

عفيه عنــدي عيون دامي شافتك
--------------------------------------
ابجـــي لمصابك دمــــه بدال الــدمع
ويبقى الك طول الدهر محني الضلع
صوتي بسمك يبني بالطــف مـــرتفع

شلــــون تترك امــــك الهَــم فركتك
------------------------------------------
نسالكم الدعاء
أبو باقر المالكي // 18 /6/2024

خدمة الحسين ع
----------------
خدمتك تنبض بنبض الكلب       خدمتك اشرف واعظم درب
-------------------------------------
يا حسين انه بخدمتك والله حس بأيامي
    اذكر الأمك يغالي وانـه انسه الامي
اشعر بلوعة مصابك ويه طيف احلامي  
  شلون كلبي بماي يروه ونت كلبك ضامي

عــزائك مـــــأتم بكــــلبي انصب
--------------------------------
يا حسين الدنية كلها تقتبس مــــن نورك  
  كل مفكر يا امامي نبذه اخذ مـــن دورك
واخذ دستور الكرامه من وحي دستورك  
  وعرف للحريه معنى من عَلَم عاشورك

الـــى الان يكتب اسمك مـــــن ذهـــــب
--------------------------------
يا حسين الناس كلها بخدمتك مشغـــوله  
  كلشي عدها اتقدمه لجلك والمراد اتنوله
لحظه متفكر تعوفـــــك هذي ما معقوله   
ولــــذي رايد يلوم لعنده خــــل يكـــوله

محبتك كــل مثـــــــل بهيــا انضرب
 -------------------------------------
هاي دمعات العيون بكل وجــن محفوره 
    مثل جرفين الفـــرات الحاطن المعموره

بسمة الشفــه المصابك سيدي محضوره   
  لان يومك رايه ظلت كل وكت منشوره

بمواكـب شفنـــــه مـــــولاي العجب
---------------------------
 للعشك قانـــون انته وهـــذا قانونك سند     
بخدمتك هاي المواكب كل محرم تستعد
بيها جمرة نــــار يوم والله مــا تبرد ابد    
دربك ابـــدا ما تعوفه ولا تصدك تبتعد

تخدمك تـدري  مـــي همهــــا التعب
--------------------------------- 
نسالكم الدعاء 
أبو باقر المالكي//  19/6/2024

السيده حميده بنت مسلم ع
-----------------------
مـــــدري بيــــا دار     منتــظره اخبـــــــار
هاي  المعروفه من الكوفه.... يا بويه يا مسلم
---------------------------------------
يابويـه بساط  الــــــريح  يمــــــك طيـر وداني      وحجيلك  بيه اصــار
اتنطر ما كــــو اخبار كلبــــي احتار وذانــــــي      ونتظرك ليل انهـــار.

يالعايش وسط العين بـــــويه شلون تنسانـي      عنـــك اعرف اسرار

وفكـــري المشغول    عنـــك شيكــــــول
يالعايف روحي بجروحي ... يا بويه يا مسلم
--------------------------------------
ابعثلك جــــم تصريـح يشرحلك عـــن حـــالي      بغيابك صعب الحال
بهالدنيه شلـــــون انعيش ونتـــه بعيد  الوالي      يالساكــــن بالـــدلال

بس اسمك شاغلني ولا ميروح عــــن  بــــالي      بسمك يـــرتاح البال

لا مـــــا انساك     يالروحــــي ويــاك
عايش بحلامي وايامي ... يا بويه يا مسلم
-----------------------------------
عشت وياك احلى سنين ريت اتعود بس لحضه     اتسامر بيها ويـــاك

كـــــل لحضه تمر بعام حزني عليك مـا يفضه      بالحسره وآه انعاك

بنــــار الشوك والهجران كلبــــي عليك يتلضه     ارجـــع ليه اترجاك

وحشــــه الأيـام     غـــــــــربه  والام
شصبر شتأمل  شتحمل ... يابويه يا مسلم
-----------------------------
انه وياك أي فدر روح مو روحين محسوبه     بحساسي أشعر بيك

لا قدر رب الكـــون لـــــو روحك مصيوبه     تتألم روحــي اعليك

وهــــالاقدار يــــابويه عـــالروحين مكتوبه     مـو بيدي ولا بيديك

امـــر الجبـــار      هـــــو اليختـــــار
يختار بكيفه  وتصنيفه ..يابويه يا مسلم
-----------------------------------------
بعدك بالآه والويـلاه اختم هــــاي كلماتـي.  بس مـا اختم الدموع

خّذني وياك ريت  الموت  ولا ظليت باهاتي    ولا تطفه بداري شموع

صار اليل بس احــــزان غابت بيه نجماتــي     ومحنيه عليــك ضلوع

وتــــــــدري بدهــــــــري       كــــــاسر ظهــــــري
بحاجة انفاسك وحساسك   .... يـــــــابويه يا مسلم
-------------------------------------- 
نسالكم الدعاء
أبو باقر المالكي // 2/7/2024

الحسين ع ------------------------- بلهفه وعطشنه هــواي ونته ادره بينه
والخدمه الك عشر أيـام بس مـا روينه
انته الوسيله ... المدمع نسيله .... يبن الزجيه
--------------------------------------
دايم عطشنه وما روه كلب المحب يالغالي
نبقــى ضمايه للخدمتك يـــا سيدي للتالي
منـــول محرم رأيتك اعلينه ترف بالعالي
نبدي عـزانه والدمع فوك الخـدود يلالــي

بهذا الحزن والاحساس دمعه جرينه
والخدمه الك عشر ايام بس ما روينه
انته الوسيله.... المدمع نسيله.... يبن الزجيه
------------------------
بكل المواكب سيدي منتظره هاي ايامـك
اسمك تكتبـــه لافته يعنـــي بدت الامــك
ليل ونهار وما تمل تتلكه كل خدامــــــك
وتنادي كل حنه الك فــدوه وبعد لخيامك

وراية عـــــزائك مــــولاي رفت بدينه
والخدمه الك عشر أيام بس ما روينه
انته الوسيله .... المدمع نسيله .... يبن الزجيه
-----------------------
عدهم سباق بخدمتك كـــل الـــــذي يحبونك
شاب وكهـــل طفل ومره بدمعتهم يخدمونك
كل واحد ينادي بفخر اني اصبحت مجنونك
سفرتنه انته الدايمــــه ونّظيف بماعـــــونك

سفرتنه يا حسين ودوم الها انتمينه
والخدمه الك عشر ايام بس ما روينه
انته الوسيله .... المدمع نسيله .... يبن الزجيه
------------------------------
قائم عزائك للابد بكل شارع وكل ديره
وبكـــــل حسينيه الك لمــة عزاء اجبيره
يا سر الاهي بهالامر الما ينعرف تفسيره
انته الحسين ومنهجك منهج عظيم السيره

موكبنه وحنه الخــــــدام بيك احتمينه
والخدمه الك عشر ايام بس ما روينه
انته الوسيله .... المدمع نسيله .... يبن الزجيه
------------------------------------
ننتظــر لحظات بألـــم نحسبله شهر مصابك
وراية عــــزائك تنرفع تحضرها كل احبابك
كل شاعر ورادود الك يقره بصطور اكتابك
واليلطم يوسم الــــوجه بذراته طين اتـــربك

كــــل كاع الك صارت طف يابن نبينه
والخدمه الك عشر ايام بس ما روينه
انته الوسيله .... المدمع نسيله .... يبن الزجيه
------------------------------------
نسألكم الدعاء
أبو باقر المالكي / 15/7/2023