‏الحميّا لـ/ السفاهة ، لا تحدّك
‏لو فعول أهل الجهالة / شوّهتها

‏ناقةً ماهي لأبوك ولا لـ/ جدّك :
‏وش يحدّك ، للمطامر فـ/غبرتها )؛

‏لا سوّلت للنفس خطوات الطريق
‏تنتابني وجهة .. حراويها أرق

‏على شفا المجهول يالصدر الطليق
‏وعلى أمل غيمة .. وبارق ما بَرَق

‏قِدمي من أبواب المسافة باب ضيق
‏محتوم .. ما بيني وبينه مفترق

‏لآخر رمق متماسك الحبل الوثيق
‏لين صارت معظم أحلامي .. ورق

‏كل الكلام اللي أقوله ما يليق
‏دام السكوت اللي أشيله ما فَرَق

‏الأرض ملّت جهد .. ما عادت تطيق
‏والناس تندا الناس .. ما تندا عَرَق

‏من البحر .. دايم ينجّون الغريق
‏المشكلة باللي على الأرض وغَرَق !

‏لاتغرك ظنون الطيب فـ اول مواجه
‏المقادير تفجع والهقاوي غشيشه

‏يوم للخيل في سوق المنايا عجاجه
‏مايسرّ اشجع الشجعان سرج الكديشه

‏ينقل الحمل هرشٍ في رقبته عواجه
‏وابرق الريش ماردّه من الموت ريشه

‏خل قلبك جسور وواجه اللي تواجه
‏مامع الذل عز ومامع الذل عيشه

‏السنافي يضرب الجمع ويشق ّ الصفوف
‏والردي يندب حظوظه والا ضاق اشتكى

‏والله اني لاآرد الجمّ وعيونك تشوف
‏وانت قزّرها شكاوي وقزّرها بكى

‏لاتحسب الناس في غير حاجتها تروف
‏كل ٍ بهمه ولا معه بالحال اشركا

‏والقصيد يقوله اللاش وتقوله هنوف
‏الفعل يبقى فعل ، والحكى يبقى حكى !

‏دروب الشعر للشاعر احيان سكة غيّ
‏لا منه تمادى فالهوى يطرق لحونه

‏على قولة ان الحي لابد يلقى الحيّ
‏يروح العمر ما يندرى وين يلقونه

‏تدور السنين ولكن احلامنا هي هي
‏على رفها في متحف الصدر مركونه

‏ويا كم مرةٍ هب الهوى واستدار الفيّ
‏واخذ قلبي المجنون لعيون مجنونه

‏عن اذنك يا طاروق الهوى لو سمحت شويّ
‏تذكّرت لي جملة لها وقت مسجونه

‏ترى هرجة الغيبه والاجحاف ماهي ليّ
‏لك الله ما قلنا من اللي يقولونه

‏يا راسي تسامى عن مقام الضعيف وعيّ
‏هاك الوقت لا شفته تعرفه من عيونه

‏عسى الزمرة اللي ظنّهم فالنشاما سيّ
‏عليهم من المعبود ما يستحقونه

‏انا اللي تعرفونه ليا من بغيتو شيء
‏والا ما بغيتو شيء لا ما تعرفونه

‏ياكثر ماضاق صدري من حلول المغيب
‏مع اني اللي يغيب ولا يحب الظهور

‏من اول كان يضحكني حبيب الحبيب
‏واليوم ماعاد له في ضحكة السن دور

‏ياما استشرت المجرب واستشرت الطبيب
‏واخذت من ذاك شور وخذت من ذاك شور

‏ما عاد عندي يقين ان هقوتي ماتخيب
‏بارت وانا اقول من زود الثقه ما تبور

‏يا الله إذا خارت القوّه وقلّ العتاد
‏وعيّت همومي على رجلي تسيّرني

‏واقْبلت مابين مكنون الأسى والمراد
‏تلْفظني دروبي ودمعي يذيّرني

‏لك وجهي اللي تقلّبه الظروف الشداد
‏لـْ وجهٍ تحبّه وترضاه غيّرني

‏وأوزعني أشكر نعمك ودِلّني للرشاد
‏واختار لي يا إلهي لا تخيّرني..

إعمل على تحرير عقلك من الآن
‏عقلك طريح بـ سجنه الإنفرادي

‏تاخذ !.. مزايا فلان ، و تقلّد فلان
‏وتفكيرك ينادي .. وعقلك ينادي

‏إذا تحبّ يكون لك .. قيمة وشان
‏لا تنسلخ .. من طبعك الإعتيادي

‏لا تصعد .. القمة على عاتق إنسان
‏مبادي ( القمة ) بـ حاجة مبادي

‏مهما !.. تصنّعت ، و تلوّنت بإتقان
‏يبقى شعور النقص حسب إعتقادي

‏اختر لـ وجهك لون من بين الألوان
‏ألا الرمادي !.. لا تكون ، الرمادي

‏الاختلاف .. يكون ( ميزة ) إذا كان
‏مبني !.. على التصرف ، اللا إرادي

‏بـ تحاول إنك تختلف قدر الامكان
‏الشهرة ( مْرادك ) ولا هي مرادي

‏يا مرضي أهواء البشر .. وأنت زعلان
‏توهمهم .. إنك مختلف وأنت غادي

‏صدقني حتى المختلف بعض الأحيان
‏لا حاول إنه .. " يختلف " صار عادي

- عبدالله السراهيد