دادي..دادي
بحب الطيران وبالسرعة القصوى، وبحب الصلاة البطيئة بس غالباً بتكون صلاتي ملهوجة وسريعة
بحب الضجة بالمشاعر والهدوء بالنسبة للناس
بحب التين والعنب وعجينة الخبز وأي شي بده حرارة لينضج
وبنفس الوقت..
عم حاول اقنع قلبي ما ينزع كلشي اشتغلناه من سنة وما يساوي أي حركة متسرعة.
كنا متخانقين وعم تحاول تشرحلي وجهة نظرها بس ايمت؟
تحت سماء مليانة نجوم، بمحل مافيه غير الهدوء و القمر مضوي على بقعة مبين منها قلب عم يخفق بسرعة، العما مو معقول هالتياب شو بتخايل ولو !
هي مشكلتها بتشوبر بإيديها كتير، طيب والله الواحد بتكون إيده متل منقار العصفور وناطر حبة قمح، وكلشي بيكون حوليه هو خمس أصابع وكل إصبع سنبلة شكل وعم تروح تجي قدامك
ما بيمشي الحال يا عيني والله ما بيمشي الحال، سايرتك طول الطريق بس ليك ليك شو حلوة بشرفك اتركني اعمل يلي بدي ياه ( قلبي )
أنا : بحياة كلشي هدينا يا زلمة ليك بلشنا دادي دادي ومشينا متل الحلوين وبلشنا نفهم على بعض فليش حابب تنزع كلشي !
ليك كيف عم تحكي وعيونها عم تلمع
العما، عيونها عم تلمع ! والله عم تلمع !
قلبي : هدي هدي شو رح تعمل؟
لا تنزع كلشي ولووووو!
ومديت إيدي ومسكت إيدها، وقف الوقت وسكت الهدوء ولقطت النجوم صورة حلوة كتير لأول عصفور بيولد وبيعرف يجيب أكله لحاله.
تاني يوم كان كلشي خالص وخسرت حكاية، العيون حتى لو عم تلمع فهي ملك الشخص وبالتالي إذا ما بده فما بده
والهداوة حلوة بتربح حالك وبتربح قناعتك وبتربح قصتك
عقلي : شفتوا كيف الدادي دادي أحلى؟
قلبي وأنا : أي خلص فهمنا
أنا : ليش ما وقفتني يا ترين؟
قلبي : المشكلة إني سبقتك وقتها.
أندرو عيسى

أستيقظُ وشفاهي تقطرُ عسلاً. يبدو أنَّني أتكلَّم عنكِ في نومي.
أندرو عيسى
صباح الخير.

سليم البطل المزوّر
..
حلقة الخلاف بضيعة ضايعة
بهي الحلقة ديبة وبديعة بيتخانقوا مع أسعد وجودة وطبعاً للوهلة الأولى ممكن أي حدا يحس إنه سليم هو البطل يلي عم يدافع عن حقوق أخته وعن صديقتها ديبة. بس لما بتتعمق شوي بتشوف الحقيقة البشعة. أول ما بتدخل بديعة على بيت أخوها بيقلها بما معناه فوتي عمليلنا شي لقمة ناكلها حاكم ما خلانا نتهنى بلقمة هالمجدرة
لما بتفوت بديعة لتعمل أكل بتلاقي المجلة مكومة
بتقله لأخوها:
. ولا أخوي بشو بدي اطبخ أي ما عندك شي نظيف
-الدراسة الدراسة يا أختي هالكتني يلا معلش جلي بعدين طبخي.
هيك بكل بساطة بتنتقل بديعة من عبدة عند أسعد ل عبدة عند أخوها
لما بتعمل الأكل بيقلها:
-وين الشاي ولو بدوع
.هلأ البيض و البطاطا بدهم شاي؟
.الظاهر هالواطي صهري نساكي عوايدو لأخوكي لك أنتي ما بتعرفي إذا عامل فتة كعك بشاي بدي جنبها شاي قومي عملي شاي.
وهون بتكتشف إنه المرأة شغلتها الوحيدة تحفظ أخوها وأبوها وزوجها وأمها شو بيحبوا.
بمشهد لاحق بتسأل سؤال ديبة وقت سليم بيشتكي على أسعد وجودة و مضمون السؤال هو ليش؟
فيقلها سليم
.أنتو لا تفكروا تركوا التفكير عليي أنا
وهيك من جديد دور المرأة بتسيير حياتها بينتهي عند قمع أحد الأطراف المذكورة فوق. الخلاصة إنه المقصود من الحلقة مو شهامة سليم ولا وقاحة أسعد وجودة ، المقصود إنه عذاب المرأة بهالمجتمع عبارة عن سلسلة مهما قطعت منها بترجع بتركب بحلقة تانية
عدو المرأة بكتير أحيان هو عيلتها الأولى والتانية والحياة والمجتمع والكوكب بكتير أوقات. لهيك لا تعتب عليها لما تدافع عن حالها بكل شراسة لأن نحنا كلنا هاجمنا بدون رحمة.

أندرو عيسى

لحظةَ تحقيقِ هدفٍ، ترى شعوركَ يصلُ قمَّةَ النَّشوة، ثُمَّ ينتحر.
تشعرُ بهِ يسقطُ طابقاً طابقاً، يفردُ يديهِ وقدميه، يتناولُ نفساً عميقاً، ينظرُ إلى الأرض.
وبعدها، اصطدام ينفجرُ كالبنياتة ويمطرُ من الأسفل شوكولا وأشخاصاً وذكريات، منعطفاتٍ ولافتاتِ طُرق، سلالمَ وأفاعي.
هذا الانفجار يسمَّى، التَّجربة.
التَّجربة هي انتحارُ الشُّعورِ فرحاً.
أندرو عيسى

أمَّا أنا فعندي فوبيا أوقات الفراغ، فيها أبكي كثيراً.
أندرو عيسى

يفوزُ المجانين في نهايةِ المطاف فهم يملكونَ وجهةَ نظرٍ مميَّزة، على عكسِ الأشخاص الطَّبيعيين الَّذي يجتمعونَ حول فكرة، الموت قادمٌ لا محالَ.
أندرو عيسى

أنا يا جماعة أول أغنية انهديتها كانت لزياد برجي "مش ناوي على خير "
وبما إني بحب اتحايل وقال يعني ما فهمت شو المقصد فبحاول كبّر معلاق..
أندرو : رومنسية هي بتجي؟
هي : هي قمة الرومنسية بالنسبة إلك
أندرو : ماسكة أعصابك يعني أنتي هلأ؟
هي : أي لحد هاللحظة وانشالله ما يفلتو.
بعد بفترة وبعد خناقة مرتبة، اتصالحنا وكل حدا هدا التانية أغنية، فوقتها بعتتلي " العيون العسلية " لسيرين عبد النور.
طبعاً هون تلافيف مخي استقامت وما عاد سمعت من الأغنية غير جملة " العيون العسلية وعت فيي الغرام "
أندرو : أنا عيوني ملونة !
هي : هذا يلي سمعتو من كل الأغنية؟
أندرو : ليش شوفي كمان بالله؟
هي : " باقي أنت الأغلى مرك عندي بيحلى، راجع مية أهلا بيكفي ترمي السلام "
أندرو : " زعلانة بس شوية قرب قرب ليي عيون العاسلية وعت فيي الغرام "
هي : " قلبي تقبر قلبي كتير كتير اشتقتلك، بدي قلك أكتر مش عم لاقي كلام "
أندرو : في كلام عن العيون العسلية إذا بدك
هي : الله أكبر أندرو !
أندرو : "شكله كدا مش ناوي على خير "
هي : فظيع شو مستفز !
بعد بفترة كانت المشاكل عم تزيد وافترقنا لوقت منيح من الزمن، كانت فترة صعبة وما كان حدا فينا مرتاح نفسياً بحكم الأزمة وبحكم إنه كنا بكلوريا.
بادرت هي وقتها بأغنية لفيروز بتقول : " اشتقتلك اشتقتلي بعرف مش رح بتقلي، طيب أنا عم قلك اشتقتلك "
رأسي كبير شوي بالزعل شوي كتير، ورغم إنه قلبي كان كتير مبسوط بالأغنية بس ما قدرت ما كون أجدب وعلّق..
أندرو : بتعرفي إني ما بسمع فيروز
هي : أنت لازم الواحد ما يهديك الأغنية، لازم يدحشها بحلقك لتختنق وتريحنا !
معها حق على فكرة، مو لشي بس لأن هي الأغنية كانت السبب الثاني يلي خلاني خاف من فيروز بوقتها غير إنه كل العيلة الحمدلله كانت حاطة أغاني فيروز كنغمات رنين ومنبهات صباحية.
سافرت العيلة وخلصت قصة أول علاقة حب ورجعت اسمع فيروز وأنا مرتاح، وبيني وبين حالي دائماً أوّل جملة بتخطرلي لما بدي اسمع هالإنسانة عم تغني هي
" اشتقتلك اشتقتلي..بعرف مش رح بتقلي..طيب أنا عم قلك اشتقتلك"
أندرو عيسى

أن يقتلَ غزالٌ نمراً واحداً فلا مشكلة، لكن ماذا إن قتلَ الغزلانُ النُّمور؟
أندرو عيسى

الغبارُ الخارجُ من عيوني، اعتقادُكِ أنَّ الصَّحراء أفضلُ ساحةٍ لرقصِ الباليه.
أندرو عيسى

كان " بوست " صغير للأستاذ حسن يجمعُ أبناء جيلي على مختلفِ مذاهب كتابتهم وطُرقِها. نقلَ إلينا مقهاهُ المفضَّل، وزَّعَ أقلاماً وأوراقاً بيضاء وتركَ لنا ملاحظةً صغيرة من كلمةٍ واحدة، البراءة.
أحبَّ البراءة وميَّزها وعَلمَ أنَّ ثقافتنا، زماننا، ظروفنا ومكاننا جميعها أسباب سنفقدُ على أطرافِها كُلَّ طفلٍ صغيرٍ يركضُ بينَ السُّطورِ المكتوبة.
أتذكَّرُ كُلَّ تفاعلٍ تفاعلتهُ مع كلماتٍ كتبتُها على الموقع الافتراضي الأزرق، وحتَّى تلكَ التي تفاعلتَها على نصوصِ الأصدقاء كانت أكبرَ دافعٍ للقراءة بهدوءٍ وشغف.
أحبُّ تلاميذكَ، تواصلتُ مع أغلبهم. وحتَّى الَّذين رفضتهم، شاركتهم حزنهم وعتبهم عليك. كان الدَّافعُ أن أعرفكَ أكثر وأكثر قبل الرَّحيل.
مرَّ يومٌ ونصف وأنا أشعرُ بأصابعِ يدي مكسورةً، يومٌ ونصف وجميع الكلماتِ التي خرجت للوداع بريئة كما أردتَ تماماً.
أنتَ تسمعنا جيِّداً، أعلمُ هذا ولذلك أملكُ سؤالاً أخيراً، هل يمكن للحزن، القسوة، الحسرة، الخيبة، الضَّغط، وجميع المعادلات الحياتيَّة المكتوبة على أبناء هذه البقعة، أن تصنعَ رجلاً بريئاً آخر؟
أندرو عيسى