وانته اعله الرمح ما ينحمل بعدك
واشتاگيت ابوسك والدي ابخدك
واشتاگيت لحظات . روحي ابحضنك اتبات

بينك او بيني مسافه يالهجرت ابنيتك
والرمح عالي يبويه او گمت احن البوستك
ارقيه آنه او يمي رتك تنزل اشتم ريحتك
حتى احضنك حتى اخلي ابراسك انته اعمامتك

حتى اتذكرك واتذكر ايامي
چنت اتگلي بويه ابهالحضن نامي
نامي ابحضني ساعات . روحي ابحضنك اتبات
_____
عالي رمحك وآنه مگدر اوصل الخدك واحب
يمتى تنزل حتى احضنك بويه شيخلصه الدرب
گمت احن العطرك اشتم بويه وايحن الگلب
والله مشتاگه إمن ادينك اشرب الماي العذب

ما مشتاگ تشبگ بنتك الحلوه
او من اضحك تگلي فدوه الچ فدوه
يمك احله ضحكات . روحي ابحضنك اتبات
_____
من يجيني الليل گلي وين انام ابيا حضن
الورده من تعطش يبويه تشتكي الهم للغصن
وانته بس راس ابجواري او روحي الحضنك تحن
وين احط راسي ابحضن من او من اونن وين اون

مشتاگ النفس يا بويه لانفاسك
مشتاگه اخلي راسي يم راسك
واشبع بويه نظرات . روحي ابحضنك اتبات
_____
خوفي لو شبگنه راسك بويه تگرب موتتي
واعله راسك نفس بويه مايظل ابريتي
ويه راسك آنه اريدن ياحبيبي دفنتي
وابحفرتك كون بويه اتصير لازم حفرتي

آنه اوياك اريد اتلمنه بس حفره
راسك يمتى اشبگه بويه منتظره
مو بس مره مرات . روحي ابحضنك اتبات
____
واشحلاة الموته يمك بويه يم راسك اريد
ادري صح بس راسك انته يمي او جسمك بعيد
بس اذا ما موت گربك ما اظن روحي تهيد
هالعمر من غبر وجهك يا ابو اليمه اشيفيد

يم راسك اموتن آنه مقتنعه
الجفن العين لازم ترجع الدمعه
روحي كلها دمعات . روحي ابحضنك اتبات
____
قبل ما موتن يبويه ارد اشوفك بالحلم
انته وي راسك اشوفك لاتجيني ابلا جسم
اتشيلني بالحلم ردتك بويه والجسمك تظم
بنتك ارقيه يغالي او عظم يطبگ عالعظم

قبل الموت جسمك ارد اشبگنه
او عطر اثيابك آنه ارد اشمنه
مر بحلامي لحظات . روحي ابحضنك اتبات

حيدر الحلفي

رقية عليها السلام

انته لو مو انته مو انته
البارحه الشابگته شابگته
حظني شو ماشفته ماشفته

انته معقوله ابوي البالأمس حاظني
لو صدگ لحسين إنته گوم هسه اشبگني
گوم واحظني يبويه ابغربه شو عايفني
جيت ادور عنك آنه والمشي تعبني

اعتذر معرفتك معرفتك
اشموسهم غيرتك غيرتك
او خدك امسومرته امسومرته
____
ماعرفتك بس عرفتك بويه من وجناتك
بيها بوسات العزيزة الحره وابنياتك
عاين الوجناتي بويه بيها اثر لمساتك
راح تعرفني رقية آنه من بوساتك

السوط كلشي ماسح اي ماسح
بس اثر ما رايح ما رايح
خدي من قبلته قبلته
_
فتح اعيونك ثواني وابتسم گدامي
حيل مشتاگه الضحكتك وين ذيجه ايامي
افتحلي حظنك ياحبيبي او گلي غمظي او نامي
فدوه بس لا لا تگلي طلعيلي اسهامي

طلبه يا محبوبي محبوبي
اتغطه انته ابثوبي ابثوبي
ابلا هدم ليش انته ليش انته
_
ردت انام او راسي بويه عالترب خليته
جيت انامن فوگ صدرك والصدر ملگيته
إلسهم شفته اعله نحرك بس ولا جريته
ازغيره ايدي اچبير سهمك والدي حسيته

گمت اظم بالشيله بالشيله
جسمك ابهالليلة ابهالليلة
والصبع دورته دورته
___
امجرحه اجدامي يبويه شوكهم ماذيني
محترگ ثوبي يغالي گوملي او طفيني
ما اشوفن بويه دربي والجمر عاميني
فتح اعيونك اريدك تنظر الأيديني

حرمله طيحني طيحني
عالجمر من ذبني من ذبني
او چفي هالحارگته حارگته

حيدر الحلفي

محررررم 1446هـ الحُسين والزهراء عليهم السلام

هلا يمى تعاي .. جيتي ابوكتچ هالساع
هلا يمى تعاي .. آنه الطايح عالگاع
كافي لا تدوري . آنه اهنانه نظري . ماشميتي عطري
تعاي . تعاي

هلا يمى چنت انتظرچ . أعرف مشتاگه الشوفي
لتمدين ايدچ ليه . ترى مگطوعات اچفوفي
لتدورين اعله اثيابي . كلشي الأجل ابنچ عوفي
جيتيلي اهنا مشتاگه . وبيه اشسوه الطف شوفي

خليني ابحضنچ فدوه . اتراب الطف يحرگ گوه . يمى ابروحي
ذكريني ابذيچ ايامي . اتنوميني يلله اتنامي . طيبي اجروحي

انه جرحي الچبير .. ودعتچ وآنه اصغير
انه جرحي الچبير .. إبنچ مذبوح ايصير
زين وما نظرتي . من گطعوا رگبتي . چا هم يمي متي
تعاي . تعاي
____
صار اسنين ابچي انتظرچ . مشتاگ آنه الحنيتچ
بس ابيا حال اشتمچ . ابدمي اهنانه اتلگيتچ
يمي وملزمتچ وسفه . ولا گمت ولا شميتچ
منتظرچ كل هالمده . او بحضاني ما ضميتچ

منو أمه گاعد يمها . بس مايگدر يشتمها . وشيحملها
هاي اصعب حالة اعليه . أمي اتجيني ابعوچيه . وما گوم الها

ترى هذا اللقاء .. مجروح ايصد مجروح
ترى هذا اللقاء .. أم واضناها المذبوح
ماشايف حبايب . اتلاگوا عالترايب . عاشوا بس مصايب
تعاي . تعاي
____
حگچ لو معرفتيني . ابلا راس او جسمي امگطع
لتشيليني إمن الحومه . اضلوعي ابأحضانچ توگع
لا صدر اللي اتشمينه . كلشي اعله الكاع اتوزع
البي ألف او مية طعنة . شتضني ايرد يتجمع ?

شتلمين إمن الحومه . إبنچ مدفونه ارسومه . ما يرجعلچ
ندري الأيديه مگطومه . مابي يافاطم گومه . شلون ايردلچ

عله روحي السلام .. إقري ونادي يحسين
عله روحي السلام .. راحت فاطم مرتين
مره يم بو فاضل . ومره وآنه شايل . عبدالله واسائل
تعاي . تعاي
____
هم شفتي اخيول اتعدت . ترفس بيه وبطفالي
الگاطع منحر من عندي . شفتيه إمن اتعنالي
ماريد احچيلچ أكثر . بس موقف ضل ابالي
اطلبت الماي وما واحد . يالزهرة اشوي ودالي

ماجبتي ابإيدچ بلله . ماي اشويه العبدالله . ميت ضامي
ماجبتي الزينب خيمة . ماشفتي اشچم ايتيمه . اتون گدامي

سوى من الخيام .. طلعن شفتي النسوان
سوى من الخيام .. صاحن ذبحوه عطشان
زينب دورتني . هم مثلچ إجتني . بس ماوچدتني
تعاي . تعاي
_____
الخد الچنتي اتقبلينه . محفور وما يتقبل
راسي وجسمي اللي اتگطع . مايرجع مثل الأول
عبدالله الميت ضامي . يافاطم ماظن يعدل
الحبل البيدين الحره . ملفوف ولا ماينفل

ماترجع زينب زينب . وما تطفه اخيامي التلهب . راحوا أهلي
ميرد عبدالله ابحضني . ولا لاكبر يرجع إبني . وبويه ايگلي

وله يرجع أكيد .. عباس وبيده اللواي
وله يرجع أكيد .. ونشوف ابإيده الماي
ماترجع إليه . يافاطم رقية . لتدور عليه
تعاي . تعاي

حيدر الحلفي

نص آنه اوياچ خنلوليه
حيدر الحلفي

مستهل آنه اوياچ خنلوليه
حيدر الحلفي

محرررم 1446 هـ ليلة الوداع رقية وعبدالله الرضيع ع

آنه اوياچ خنلوليه خنلوليه عبدالله ابمهده
طول الليل وانشم بيه وانشم بيه ومنعوفه الوحده
ابحظن امه وصوت اخته . بلكت تضحك شفته
عبدالله ابمهده

يالرباب الليلة اريدن أغفه يمه . وحيل اشمه . هذا اخوي الغالي
آنه من لغروب أشعر صاح اليه . يارقية . هذا اخوي الغالي
هذا آخر ليل چنه وي عضيدي . ولازم ايدي . هذا اخوي الغالي
فدوه فتحي اگماطه رايد خيي چنه . حيل احضنه . هذا اخوي الغالي

عالچفين كون اينام كون اينام خيي ويتبسم
ومو بالماي لو بخيام لو بخيام يبچي ويتحلم
واهنا لو نومته . بلكت تضحك شفته
عبدالله ابمهده
____
من حنان اخته أريدن خيي يشبع . كافي مدمع . ذبلت ادري اعيونه
إمن البچي عالماي ذَّبل حتى خده . ازغير بعده . وذبلت ادري اعيونه
اجفونه ماغمضن ثواني ابهالمخيم . اشگد تألم . وذبلت ادري اعيونه
لو ثواني مايشوف إحسين يبچي . ودمعة يحچي . ذبلت ادري اعيونه

مدري اشبيه شو مهموم شو مهموم عبدالله انظرله
يشعر خاف آخر يوم آخر يوم باقيله اويه اهله
مدمع لو شربته . بلكت تضحك شفته
عبدالله ابمهده
____
يارقية اوليدي آخر ليلة عندي . يمنه گعدي . وخلنلولي اثنينه
وخلي آخر صوت يسمع أمه واخته . انصد ضحكته . وخلنلولي اثنينه
خالي باچر يارقية يبقى مهده . ابلايه وردة . خلنلولي اثنينه
منه بس لگماط يبقى أحلى ذكرى . بيه عطره . خلنلولي اثنينه

يضحك ليچ إبني اهواي إبني اهواي من اتشيلينه
هو ايريد تنطي ماي تنطي ماي واتغسلي اجبينه
ماي ايريد اعرفته . بلكت تضحك شفته
عبدالله ابمهده
____
هذي آخر ضحكة من عبدالله شوفي . كلشي عوفي . وخل نناغي اوليدنه
ضامي إبني او ماگدر بضماه يغفه . لزمي چفه . خل نناغي اوليدنه
قَبلي عالمنحر وشيليه ساعة . حل وداعه . خل نناغي اوليدنه
يادللول الولد صيحيه فدوه . نام توه . خل نناغي اوليدنه

يم إحسين خنوديه خنوديه وابحضنه انخله
بلكي اينام لو شم بيه لو شم بيه الوالد وايقبله
ابحضن الوالد عفته . بلكت تضحك شفته
عبدالله ابمهده
____
يالرباب العمي خنوديه يلله . شفته صلى . وصاح ياعبدالله
بلكي من عباس يشتم كل حنانه . ايحس بامانه . وصاح ياعبدالله
الأكبر اباب المخيم يندعيله . ويه ليلى .وصاح ياعبدالله
وجاسم الحزنه عله ابنچ عاف عرسه . اسمعته هسه . وصاح ياعبدالله

سكنة اتصيح بويه إحسين بويه إحسين چيف اصبر يلله
من الموت يرحل وين يرحل وين باچر عبدالله
بچفوفك لو شلته . بلكت تضحك شفته
عبدالله ابمهده

حيدر الحلفي

#ياعلي

إخذ انظاري وروح . لو متعود . ليه اردود . إخذ انظاري وروح
بابي ايظل مفتوح . الجيتك يوم . أنطر دوم . وبابي ايظل مفتوح
صيحة گلبي الفاگد . هم ترجع يالوالد
بابي ايظل مفتوح

زينب يابوية اسمع نوحي . مو دمعات ابچيلك روحي
طبرة راسك بين انفاسي . دخيلك
يانبظة حب عاشت بيه . ياحيدر يابو الحنية . ازغيرة وناوي اتشيب راسي . دخيلك

ناوي اتروح إمن ايد ابنيتك چا وآنه امشي وين
وين اللكى المثلك يابويه محبوب وحنين
عطرك لمساتك دمعاتك ظلت بالإدين
لو ماشوفك كل صبحيه ماحس عندي عين

يمعودني الليل . تحت اضواك . يگضي اوياك . يمعودني الليل
اشبيها الدنيا اتميل . طيحة ماي . دوم اوياي . اشبيها الدنيا اتميل
ابتابوتك صح گاعد . هم ترجع يالوالد
بابي ايظل مفتوح
__________
من راحت أمي المفجوعة . لي هسه ابچيها او موجوعة . ساعة فرگتها ابدلالي . چوتني
لحظتها احضنتك ملچومة . ازغيرة او من الأم محرومة . ظلت منك چلمة ابالي . حيتني

يازينب لميها ادموعچ گتلي ابهالمكان
ماعوفچ وابقالچ والد اشما مر الزمان
اهنا ردت روحي او انفاسي او طب گلبي الأمان
تشبه أمي ابكل حنيتك إي يابو الحنان

يمواعدني شلون . ابنص رمضان . موتك حان . يمواعدني شلون
عميه اتظل لعيون . ولا صد ليك . امسبل ايديك . عميه اتظل لعيون
الگبرك ترحل رايد . هم ترجع يالوالد
بابي ايظل مفتوح
__________
أول مره انظرلك طايح . ولمچان ابعيد اعرف رايح
ومشيول ابچفين اولادك . عجيبة
أول تالي اتگل لحسيني . إلزمني ومدد رجليني
وتحظنه ابأحضانك رادك . غريبة

مره اتشم إحسين او مره تتبسم عجيب
ثاري اتشوف الزهرة اتگلك إقبل يالحبيب
بس ابشوفك يابو احسيني ضلعي اعرف يطيب
ثوب إمن إحسين اطلب منك من تحظر تجيب

عايفنه ابرمضان . ولمنه اتروح . بس اجروح . عايفنه ابرمضان
يالگلبك عطشان . إمن الزهراء . إخذ الماء . يالگلبك عطشان
ماظل منكم واحد . هم ترجع يالوالد
بابي ايظل مفتوح
__________
بآخر أنفاسك وتنادي . يازينب صيحيلي اولادي
حسين وخل عباس اهنانه . يجيني
ساعة اتصد عباس اچفوفه . قبلته وما ناوي اتعوفه
وخليت اچفوفه ابچفي او وجدانه . بديني

ياعباس اختك خليها ابگلبك بويه دوم
لاتترك زينبنه اوحيده يابو الغيرة يوم
لو عطشت والماي اتبده صب دمعك غيوم
بيدك گعدها ونومها وبيدك خل تگوم

اوصية والد هاي . لختك كون . تنطي اعيون . اوصية والد هاي
گلها ابنص عيناي . امچانچ صار . وراسي الحار . گلها ابنص عيناي
ناوي اعلينه اتباعد . هم ترجع يالوالد
بابي ايظل مفتوح
_______
صد اعله إحسين ابدمعاته . وبالگوه ايطلعن چلماته
ضل يمسح نحره ابإيدينه . حبيبي
باس الخنصر باس اعيونه . وانطاه ماي وكظ امتونه
وصاح امصابك ليأذينه . حبيبي

طفك ياخذ منك بويه جسمك والثياب
وهاي اخدود الترفه اوليدي يحفرها التراب
مايسلم من جسمك كلشي امغطيك الخضاب
زينب تندهلك ياخويه وما تسمع جواب

بالحومه اتلم بيك . إختك ليش . تدري ابيش . بالحومه اتلم بيك
اتدور وتحاچيك . خويه إحسين . راسك وين . اتدور وتحاچيك
الشمر اعله ابنك گاصد . هم ترجع يالوالد
بابي ايظل مفتوح

حيدر الحلفي

#أم_البنين_ع

يالتدفن بيه عندي اوصية
لو جاني احسيني دله اعليه
لو جابه الحنين . دله ابگبري وين
لو جاني احسيني دله اعليه

سنين .. منتظرته موت . من يمي يفوت . وايصيح ابسكوت . وين ام البنين
بچيت .. كل عمري عليه . واللمسة إديه . مشتاگة الحچيه . من دمعي عميت

يالتدفني ما وصيك لاتنساني واتدله
الگبري واشجره إمن اسنين بيه امروتك گله
گله سيدي فرگاك حط بيها ألف عِله
ماتت گله واهيه اتگول العافك بالعمر شله

گله امك ماتت وامنيتها
اتشمك وانته اتشم ابشيلتها
عذبني الونين . دله ابگبري وين
لو جاني احسيني دله اعليه
__________
تشوف .. لو نسمة هواء . واصوات وبكاء . جت من كربلاء . وادموع ابچفوف
حُسين .. يعني ليه جاي . وجايب ليه ماي . ايرش بيدينه هاي . گبري ايدوره وين

من اتعرفه هو إحسين ماتت گله تنتظرك
خلصت كل عمرها اهنا اتدور نسمة من عطرك
ماغمض جفنها الموت إله وتلهج ابذكرك
إحسين إحسين اموت اعليك يبني ماخلص هجرك

أكتب وصتني عالگبر آنه
آنه ام الراحوا كل اخوانه
الضحوله البنين . دله ابگبري وين
لو جاني احسيني دله اعليه
__________
أريد .. تحچيله ابعذاب . گلبي والعتاب . واشگد اعله باب . بيتي اكتب قصيد
حچيت .. حتى اويه الطيور . ماشفتن بدور . رجعوا من قصور . سكتن وايسيت

گله الليل اخلصه انحيب واقره ازيارة العاشر
واقنع گلبي باچر راح ترجعلي عگب باچر
تبچي الحالتي الجيران واكسر للطفل خاطر
صارت شوفتك يحسين عند امك حلم شاعر

كله امك ميته بس اتريدك
عالگبر اتخلي يحسين ايدك
اتحبك من سنين . دله ابگبري وين
لو جاني احسيني دله اعليه
__________
أريد .. ايحط جسمه اعله طول . گبري وبس يگول . آنه ابن البتول . جيتچ بس وحيد
بچيت .. گلبي ابأبني حاس . جسمه ابلايه راس . الحافر صدره داس . يالتدفن دريت

خوفي ايمر عليه إحسين ابلا راس وبلا منحر
شلون ايشمني يالدفان اوليدي ما أظن يگدر
صدره من سحگ لخيول خوفي يوصل امكسر
كل الردته من إحسين گبري الليلة يتعطر

ردت اول ليلة يحظرني احسيني
لو بس اشتمه وما صدله ابعيني
ماظلي معين . دله ابگبري وين
لو جاني احسيني دله اعليه
__________
أخاف .. جسمه امگطعيه . حيل امعطشيه . ثوبه امسلبيه . لو من يمي طاف
جروح .. وامترس سهام . مكسورة العظام . ايدور عن خيام . الزينب من تروح

زينب راحت إمن إحسين ابلا خيمة وبلا كافل
شدعي اعله السباها هناك راحت دون ابو فاضل
شدعي اعله الخذه للشام راس ابني ابرمح شايل
اشما مال الرمح وياه محملها يظل مايل

زينب هم مثلي ماتت دونه
عافاها احسيني امغمض اعيونه
مگطوع الوتين . دله ابگبري وين
لو جاني احسيني دله اعليه

حيدر الحلفي

كل گلبي خذاه . واتمنة لقاه . محبوبي حُسين . ماعندي سواه
وفقني أروح . مشاية وانوح . ياربي وازور . واشتمة هواه

إبعد عن اعيوني الدنيا . وخليني ابأيامة اشوية . أمشيلة واخدمة حبيبي حُسين
مشتاگ امشي او أذكر زينب . تصرخ من تمشيلة او تتعب . مشتاگة أشمة حبيبي حُسين

انه ريت .. أشعر بحساس المسبية
انه ريت .. أمشيلة حبيبي يومية
انه ريت .. نتلاگة ابكل احسينية

يازينب اصيح . من امشي واطيح . لو صد عله نوگ . واذكرها أريد
وعالناگة أطوف . وماريدن اشوف . عالهزلة حبال . وتنشد بيها إيد
__
رايد أعطش من امشيلك . واظماك اتذكر وابچيلك . دمعاتي أهلها حبيبي حُسين
من انظر تتمشة ابنية . طفلة وكون ابعمر ارقية . والدها لزمها حبيبي حُسين

انه كون .. وي عبدالله اعطش واتعذب
انه كون .. انه اسلم اعليك اِمن ارد اشرب
انه كون .. أقرة إمن امشي او تسمع زينب

لو راية أشيل . اشما مالت اميل . واتذكر اريد . من طاح الكفيل
لو صدلي خيام . متروكة ابظلام . يمها اگعد انوح . الزينب والعليل
_____
عايف بيتي او عايف كلشي . سديت الباب او جيت امشي . لعيونه أحبة حبيبي حُسين
لعيونك من فدوه اجدامي . ماصد بس حبك گدامي . بگليبي أكتبة حبيبي حُسين

مشي جيت .. وماهمتني الدنيا او ناسي
مشي جيت .. بس انته العايش بنفاسي
مشي جيت .. ويوصل قبلي كون احساسي

خطواتي غرام . وادموعي حمام . بالممشة تطير . عالگبة تنام
أمنيتي أدير . واشتمة عبير . تربانة واصيح . محبوبي سلام
__
بالممشة انفاسي اتسبحلة . وخطواتي ادموع اتطشرلة . تسبيحي صلاتي حبيبي حُسين
كل خطوة اتگلك محبوبي . ماغيرك يمسحلي اذنوبي . بس انته نجاتي حبيبي حُسين

انه وين .. مثلك أللگى ابلهفة امشيلة
انه وين .. غيرك أللگى او همي اشكيلة
انه وين .. مذنب بس دوم اتناديلة

واليمشي حلاه . من يلگى غلاه . بدروبة يصيح . حي الله تعال
فاتحلي ضريح . وايگلي استريح . حي الله اليزور . امدللني دلال
_____
أحسب من ساعة العد ساعة . يمتى اجدامي اتدگ ابگاعة . واشتمة ترابة حبيبي حُسين
بعتابة أحبك أكتبلة . وركضة عابس كون اركضلة . من بيتي لبابة حبيبي حُسين

انه جيت .. أصرخ وي زينب بالحظرة
انه جيت .. وجايبلك ماي إمن الزهرة
انه جيت .. والموت ابصحنك منتظرة

أمنيتي اموت . من صحنك افوت . واصرخ ياحُسين . ابيوم الأربعين
واتغمض اِلعيون . بيديك انته كون . واتگل لله هذ . خادمني سنين

حيدر الحلفي