فيه طريقين انك تبقى انسان كويس

طريق سهل وطريق صعب

الطريق السهل انك تسمع الكلام من غير جدال وتسبتدل الوقت اللي بتضيعه ف الفيس واليوتيوب والخروج والقعده ع القهوة والافلام والمسلسلات لعبادات مع ربنا ونوافل ودراسة القرآن وحفظه وتدبره وساعتها لما بتلجأ لربنا وتحطه اولويه ف حياتك فهتوصل للنفس المطمئنه والرضا مهما كانت ظروفك او الظروف اللي حواليك وحتى لو حصلك ابتلاء هتكون فاهم ليه وربنا هيديك ادوات الصبر

والطريق الصعب انك متعملش كده وتخلي علاقتك مع ربنا باهته مقتصره على صلاة الفروض وتسرح ف الدنيا وتتخبط لسنوات وسنوات وتبقى مش فاهم ايه اللي بيحصل .. تلاقي ايام حلوة عليك فتفتكر ان ده بمجهودك وايام وحشه فتعتقد ان ده تقصير منك فتتعب اكتر فتحلو فتفتكر انه بمجهودك فتتعك على دماغك ف تقول وبعدين بقى

ممكن تقعد ف الطريق التاني عشرين سنه .. و ف الاخر هتوصل لنفس النتيجه اللي وصلها زميلك اللي خد الطريق الأولاني .. بس وانت مكسور وغالبا ساعتها مش هتعرف تتعافى

طريق ربنا بيغير مفاهيم كتير ف دماغك

ان النجاح مثلا مش شهادة وتخصص وعلم طبي ومنصب ف انجلترا و فلوس النجاح الحقيقي ان تحس برضا ربنا عليك

ان مفيش حد كويس وحد وحش فيه حد بيتحسن وحد لأ .. وان انت مش من حقك تحكم ع الناس الا ف مواقف معينه قليله جدا

ان السواد اللي حواليك مالوش دعوة انت عايش فين وفلوسك كام ومين حواليك ولكن ليه دعوة بقوة قلبك على استقبال الأشياء وان قلبك ده بإيد ربنا ممكن تكون ف غزة مش ف مصر وربنا ينزل عليه سكينة روح الروح

ان الدنيا اللي انت شايفها حواليك دي كلها ديكور .. مسرح .. كرتون .. تصوير وفيلم بيتصور ويوم موتك يتهد الديكور وتاخد حسابك وتبدأ حياتك الحقيقية

ان المتعة الوحيده الحقيقية في الدنيا في حاجتين .. أنسك بالله ومساعدة غيرك .. انت بتساعد غيرك عشان انت اناني وبتستفيد ودي انانية حميده وليست انانية الدنيا الحمقاء

ان الغيرة الحقيقيه انك تغير من اللي اقرب لله وان اللي احسن منك علم طبي وفلوس اللي كنت بتغير منه هتشفق عليه لما تشوف الدنيا ماليه قلبه

ان تربية عيالك وتأمين مستقبلهم ان تعلمهم عن ربنا وهما هيعرفوا طريقهم ويخوضوا اختبارهم مش انك تفضل خايف على فلوسهم وشققهم وجوازهم

ان الرزق مش فلوس ولكن راحة بال اللي ربنا ممكن يدهالك دلوقتي حالا مهما كانت ظروفك لو قمت اتوضيت وصليت

نصيحتي خد الطريق السهل لأن نسبة انكسارك وفشلك في الطريق الصعب اعلى بكتير زى مليارات الناس اللي حواليك

ابصر به واسمع

عبد الرحمن شايفها سودة
وزياد عايز يسأل سؤال معرفش ف ايه
وساره خايفه من القانون الجديد

لايف الساعه ١١ بالليل نشوف المواضيع دي

الخير والشر

الخير واضح والشر أوضح

كلام وافعال الخير واضحه وكلام وافعال الشر أوضح

المشكلة ان الانسان نفسه جواه الخير والشر مع بعض

(فألهمها فجورها وتقواها)

اسوأ دكاترة تعاملت معاها اللي جواهم الخير والشر ومفيش واحده غلبت على التانيه

اللي جواهم شر وغالب فبيبقى واضح والواحد بيبعد عنهم وخلاص

انما التانيين فيهم خبث ومكر .. يقابل ناس بوش الخير بتاعه فيتقال عليهم ملايكه .. ومع ناس تانيه ومواقف تانيه يبان الشر

فيه دكتور استشاري كبير اتعاملت معاه واعرفه كويس

بيعلم نايب تحت منه وبياخده معاه ف البرايفت ومهتم بيه وشايف انه ولد له مستقبل .. النايب ده بيقول عليه احلى كلام وبيدافع عنه

ونايب تاني مضطهده ومطنشه وبيعنفه احيانا وبيقوله انت مش نافع ومش بيعلمه .. عشان مش عاجبه طريقة كلامه وشكله (اه والله العظيم مش مثلا انه كسول ومهمل ) .. النايب ده مكتئب وشايف الاستشاري ده شر

ورغم ان النايب اللي اتعلم ممكن يموت نفسه لو فيه كلمه اتقالت ع الاستشاري ده إلا ان النايب التاني مغلول وحاسس ان مستقبله بيضيع بسبب الاستشاري ده

المشكلة ان من يجتمع في قلبه الخير والشر مش بيأذي بنسبة خمسين ف الميه وينفع بنسبة خمسين ف المية

انت كده تبقى مش فاهم .. الاستشاري ده كده مؤذي بنسبة مية ف المية .. لأنه على مدار مثلا عشرين سنه من عمره هيتسبب ف اكتئاب وتدمير عشرات الدكاترة مقابل عدد بسيط من اللي هيسبحوا بحمده

تخيل الأثر الطويل ف ده ع العيانين

تخيل بقى ان عشرات الدكاترة المكتئبه دول لما يكبروا هيعملوا زيه كده ويمكن اسوأ لأن ظروفهم هتكون صعبه لأنهم متعلموش كويس وتم اضطهادهم وقلوبهم اتملت امراض نفسيه هيطلعوها على غيرهم .. ده غير ان الناس اللي سبحت بحمدهم برضه هيعملوا زيهم لما يكبروا ويضطهدوا جنايرهم ويعلموا ناس ويتسببوا في اكتئاب ناس اكتر

ودوريني يا لمونه

قصه حزينة متكررة من الأطباء عايشتها بنفسي وشفتها بعيني

ويكون العقاب الإلهى في النهاية قانون بالحبس

انصر الخير ف قلبك وانت صغير ومتجيش على مبادئك مهما تغيرت الظروف حتى لو هتتضر ومتحكمش على حد عشان انت مش إله بيتحكم في الأرزاق

اللهم ارفع مقتك وغضبك عن أطباء مصر وارفع عنهم ذلك القانون الجائر

#المتلخبطين

الاستبيان الاخير اللي فوق ده حتى الآن جاوب عليه ٢٧٥ واحد

١٨٢ اللي هما ٦٦ ٪ جاوبوا الإجابة الأولى

٦٣ اللي هما ٢٣ ٪ جاوبوا الإجابة الأخيره

انا حاطط اربع اجابات عشان اقل نسبة الاجابة الأولى، يعني لو حاطط اجابتين كانت هتبقى النسبه اكتر من كده كمان

يبقى معنى كده ان فيه ١٨٢ واحد او ٦٦٪ ع الأقل من طلبة الطب كل واحد عنده مشكلة ومتخيل انها مشكلته لوحده و مختلفه دونا عن الناس كلها

طب ادي أول اثبات انها مش مختلفه ولا حاجه، وانها مشكلة common جداً

طب انت عارف بقى اننا لو عملنا التصويت ده لكل التخصصات جوة الطب وبره الطب هتلاقي النسبه مش اقل من كده !!!

ايوة يعني يا دكتور عايز تقول ايه؟

الإجابة أكتر في ميتينج المتلخبطين القادم

ان شاء الله النهارده عشرة بالليل

وعلى الله قصد السبيل

مش كل طريق مش ماشي معاك وانت مش طايق تعمل فيه مجهود يبقى تقصير منك .. بطل تجلد ذاتك انت طريقك مختلف عن زميلك .. تماماً تماماً تماماً .. انت وحيد في الدنيا بشكل انت لا تتخيله الآن بس هتعرف قدام .. وما وجدنا إلا لنهون على بعض الطريق .. او ساعات نصعبه .. للأسف

ساعات الشيطان يزنقك ف الحته دي عشان يوهمك ان مفيش مخرج الا الطريق اللي انت مش طايقه او مستصعبه

متجيش على نفسك واختار الأيسر .. الرزق مش بحساباتك .. الشرط الوحيد انك تكون بتسعى فقط حتى لو في الأيسر

ان شاء الله

الجمعة القادمة الساعه ١٠ مساءاً

2nd Free Plab session

One to one practice

وعلى الله قصد السبيل

السلام عليكم ورحمة الله وبركاته

الجمعة القادمة الساعة ١٠ مساءاً

UKMLE Orientation and Free sessions

كونت team من ناس اثق فيهم

وإن شاء الله هنبدأ من أول يوم الجمعه الجايه نعمل تدريب على امتحان المعادلة البريطانية (المعروف بالبلاب سابقاً)

في البداية هعرفكوا بالتيم وهنعرفكوا بالامتحان

ثم هنعمل one to one practice وندي feedback

وعلى الله قصد السبيل