O, g'am yema!
Halolman,
Pokman,
Men tonglardan qolib ketgan nur.
Men quyoshdan uzilgan chog'man,
Bor gunohim muhabbat erur.

O, g'am yema!
Halolman,
Pokman,
Bori aybim ishonch va orzu.
Ishonganlar gunohkor emas,
Odam ishqdan kirlanmaydiku!

Shubhalanma,
Qarama g'ayir,
Ey, poklarning vasliga yetgur.
Men ham asli chil-chilman, lekin
Siniqlarim ichimda erur.

O, g'am yema!
Halolman,
Pokman,
Bir yurakman, epkinli, nekbin.
Endi yetar!
Bas, bunday yurma
Gunohimda poklanib ketgin!
Kel qalbimga, poklanib ketgin!

@Gulrux_Xudoyorova_ijodi

Kunlar sag'ir
Tunlar sag'ir
Qon yutmoqda qancha bag'ir
"Zamon shu-da",- dema axir
Azal- azal kimlar omon-
Omondadir bilmaysanmi?
Kimlar och-u, kimlar chanqoq,
Qonmoqlikka qòrqmaysanmi?

Biri- og'ang, biri - ining,
Biri-tomir, biri-joning,
Ularning-da, ham seningda
Qizil erur axir qoning.
Tinmayursan gunohi-yu,
Ayblarini aytib uning.
Xudoyimning yaratig'i
Mukammaldur anglaysanmi?
Azal naqqosh bitigidan
Ayb topishga qo'rqmaysanmi?

Derlar dunyo zo'rnikidir,
Yo bo'lmasa zarnikidir.
Yo'q, xatodir,
Dunyo azal
Nomus bilan ornikidir.
Zo'r bo'lsang-da oxir bir kun
Zo'ring ketib tinmaysanmi?
Bu dunyoning ne'matlarin,
Jabrlarin tortmaysanmi?

Uying qolar, yering qolar,
Hatto yozgan she'ring qolar.
O'g'il qizing qoladurlar,
Yurting qolar, eling qolar.
O'zing bilan qolsa bir kun
Xudosi bor diling qolar.
Bu dunyoga diling sotib
O'lsang afsus tortmaysanmi?
Yer ostida bitta o'zing
Qolar bo'lsang qo'rqmaysanmi?

Ehtimol bu so'nggi nafas,
So'nggi kiprik qoqishingdir.
Nima qilsang qilavergin
Bari sening xohishingdir.
Nima qilma shu osmondan,
O'tib ketish imkoni yo'q.
Nafsing o'pqon bo'lsin yerni
Yutib ketish imkoni yo'q.
Kel, shu eski dunyosiga
Mehr yuqtir, sevgi yuqtir.
Sen oshiq bo'l qolganlari
Bo'laverar o'zi taqdir.

Odamzotning farishtaga,
Aylanmog'i muhabbatdan.
Bir ayolning vujudida,
Ulg'aymog'i muhabbatdan.
Bu dunyoda sen-u men yo'q
Muhabbatsan!
Muhabbatman!
Muhabbatsiz ketar bo'lsang
Qiyomatdan qo'rqmaysanmi?
Qiymatga qadar faqat,
Sevmaysanmi, sevmaysanmi?
Muhabbatsiz o'tar bo'lsang,
Qo'rqmaysanmi, qo'rqmaysanmi?

Qozonimda oshim bor,
Oshginamda toshim bor.
Toshlar bekor ketmasin,
Oting, mana, boshim bor.

Bu dunyo to'rt tomondir,
To'rt tomoni yomondir.
Yomon dunyo ichinda
Qaysi yaxshi omondir?!

Siz yomon-u, men yomon,
Kuymang yorim omon yor.
Yig'lab aytdim qo'shiqlar,
O'ynang yorim, omon yor.

Alpomishni choh ichra
Nolon-nolon ko'rganman,
Mashrab bobo, doringni,
Yig'lab-yig'lab qurganman.

Kechirilmas gunohim,
Qancha qilmay tavallo,
Qulman narxi bir aqcha,
Ammo ko'nglim ming tillo.

Ayol ko'ngli azaldan
Dunyo uchun ermakdir.
Alpomishlar bor lekin,
Oybarchinlar ertakdir.

Chil-chil ko'nglim, omon yor,
Tilsim ko'nglim omon yor.
Ochilmagin yovlarga
Sim-sim ko'nglim, omon yor.

Ertak aytdim o'glimga,
Ertak aytdim qizimga.
Ertagimni eshitsang
Yosh keladi ko'zingga:

"Ko'ngil ochmay hech kimga,
Hech kimga ochmasdan dil,
Eshigini yovlarga
Ochib bergan sodda el"

Savol qora qarg'aday
Dilginamni cho'qiydi:
Bizlar haqda avlodlar,
Ne deb ertak to'qiydi.

Na botirmiz, na yovqur,
Ayting, nima qilamiz.
Ertagi yo'q dunyoda,
Qolib ketar bolamiz.

Ro'molining uchiga
Ertak tuggan momolar.
Agar tug'sa, mard tuqqan
Erkak tuqqan momolar.

Ro'molingizni yopib,
Qo'shiq aytgum, omon yor.
Qo'shig'imga ismingiz
Qo'shib aytgum, omon yor.
Yaralguncha ertaklar,
Jo'shib aytgum, omon yor.

O'zimga yoqib qoldi. Eshitib ko'ringlarchi. Sizga qaysi biri yoqadi??

Bu dunyoning hamma gullari
Yuragimda yotibdi gullab.
Seni mushtoq kutganin bari,
Qanday beray senga tasvirlab?!

Izlarimni quchoqlab, chopib,
Tegrang uzra soyam ham sarson.
Agar seni olsa-yu topib,
(O, buyog'i uzun hayajon!)

Yuragimning kosasi ham mast,
Ishqning ta'mi tegib labiga.
Sening noming eshitib qismat,
Cho'kib ketar yurak tubiga.

Endi menga shart emas najot,
Endi menga xayoling -toqat.
Faqat to'xtab qolmasin hayot,
Qismatimni qutqargin faqat.

Yuragimni qo'y payvand etib,
Quriyotgan biror daraxtga.
Men har kuni nomingni aytib,
Qaytaraman uni hayotga.

Shivirlasa kimdirlar, shitirlaydi dillarim,
Tavba uchun yurakdan ungan ildiz qo'llarim,
Men yurganda hadikda, titrab turar yo'llarim,
Bilmam qaysi yo'l to'g'ri, bilmam qaysi xatodir,
Yerning yuziga qo'ygan har bir izim xavotir.

Yarmi -ayon, yarmisi sirdir ayol zotining,
Yarmi - g'urur, yarmisi ordir ayol zotining.
Bir ko'zi ochiq, biri ko'rdir ayol zotining,
Ayol zoti eng boshi, Havosidan xatodir,
Doim basir ko'zimdan ochiq ko'zim xavotir.

Qaysi beshikda - nomard, qaysi birida- botir,
Birida Tohir yotur, birida Qorabotir.
Bir beshikda yaxshisi, yomoni o'sayotir
Dardsiz alla aytilgan qora tunlar xatodir,
Oldim jonday chayqalgan beshiklardan xavotir.

Sirlarini boy bergan ko'zda qadr ko'rmadim,
O'z o'rnini bilmagan hisda qadr ko'rmadim,
O'ylanib bosilmagan izda qadr ko'rmadim,
Muhabbatdan or ketsa, har lahzasi xatodir,
Ey muqaddas tuyg'ular, oldim sizdan xavotir,
Oyoqosti bo'lmangiz, bo'ldim sizdan xavotir.

Bir paytlari inson degan zot,
Irqchilikka qo'yganmish ruju.
Insonlarning rangiga qarab,
Oq-qoraga ajratganmish u.

Bir paytlari inson degan zot,
Ajratganmish nasl- u nasab.
Oqsuyakka, oddiy faqirga
Ajratganmish insonni, ajab.

Shundan kelib qilsam xulosa,
Fikrlasam moziyga qarab.
Bo'linmishdir inson degan zot,
Oqlar taraf, Qoralar taraf.

Chetda qolib ketmagan hech ne,
Oppoq tongdan qora tungacha.
Ammo nega azaldan ko'ngil
Rangi muhim bo'lmagan uncha.

Hayratdaman. Avval ham hozir
E'tibordan chetda qalbimiz.
Yuraklarni ne uchun oqqa
Va qoraga ajratmaganmiz.

Agar tana rangiga emas,
Yuraklarga boqsaydik, hayhot,
Qancha kulfat, qancha azobdan,
Qutilardi inson degan zot.

Термуламан. Бирам чиройли,
Бузилмаган ҳаётий мантиқ.
Узилади барглар иболи,
Гўзаллик йўқ бунданда ортиқ.

Бир тартибда одамлар кезар,
Қайғу билан бахт орасида.
Дунё шундай батартиб яшар,
Деразанинг ташқарисида.

Ташқаридан тамоман фарқли,
Алғов- далғов бўлган бир юрак.
Тўрт томони аламли, дардли,
Хона узра сочилган тилак.

Юрагини андуҳлар эзар,
Минг қайғу бор кўз қорасида.
Вайрон бўлган битта дил яшар,
Деразанинг ичкарисида.