1⃣2⃣8⃣4⃣ дні ў палоне. 1⃣*2⃣ дзён без ?.
Турма №8 Жодзіна, строгі рэжым!*

Мы неймаверна цешымся паведамленьням пра чарговых вызваленых палітвязьняў. Чым болей людзей можа дыхаць вольным паветрам, тым шчасьлівей жыць на зямлі Беларусам!

А наш Дзяніс Івашын напісаў мне сярод іншага пра тое, што набывае сабе ва ўнутранай краме турмы. На пачатак верасьня сытуацыя ня надта з мянілася зь вясны ці лета. І гэта, калі шчыра, дзівіць. Калі дзяржтэлебачаньне штодня распавядае, якія надоі і ўраджаі зьбіраюцца Беларусамі, а вязьні амаль зусім не забясьпечаныя айчыннай садавінай і гароднінай, то ўзьнікаюць заканамэрныя сумневы ў праўдзівасьці словаў прапагандыстаў. Лічу, што для прадстаўнікоў уладаў такая сытуацыя - сапраўдная ганьба!

"Набываю сабе збольшага марскую капусту, шпік. Скрайняга разу прыдбаў таксама цыбулю (рэпчатую) - нарэшце! Доўга на яе чакаў!"

Барацьба за вызваленьне краіны трывае!
СВАБОДУ ПАЛІТВЯЗЬНЯМ І ВЯЗЬНЯМ СУМЛЕНЬНЯ!

#FreeIvashyn #FREEPOLITICALPRISONERSINBELARUS

1⃣2⃣8⃣1⃣ дзень у палоне. 9⃣ дзён без ?.
Турма №8 Жодзіна, строгі рэжым!

Выходныя - добры час для літаратурных "падарожжаў". Таму я падзялюся з вамі знаходкай Дзяніса Івашына, якую ён нядаўна адшукаў і прачытаў у захапленьні:

*"Нядаўна прачытаў захапляльны раман брытанскага пісьменьніка Кадзуа Ішыгура (нарадзіўся ў Японіі) - "Не адпускай мяне" (Never let me go, 2005) - уваходзіць у top-100 лепшых ангельскіх раманаў усіх часінаў, паводле вэрсыі выданьня Time. Сам аўтар - ляўрэат Букэраўскае прэміі. У рамане вядзецца пра альтэрнатыўную рэчаіснасьць, Вялікую Брытанію нашых дзён, у якой перамог тэхнафашызм. Галоўныя героі - выпускнікі адмысловае школы для клонаў, прызначаных для... донарства. Раман - папярэджаньне для сучаснага сьвету, у якім усё больш і больш дамінуе канс’юмэрызм. Засьцярога для нашае цывілізацыі, якая праз мэркантыльныя чыньнікі можа ў пэрспэктыве адмовіцца наагул ад пытаньняў  біяэтыкі. Раман-набат, якім аўтар спрабуе дагрукацца да душаў і сэрцаў людзей, каб яны жылі ўсё ж духоўным сьветаглядам; шанавалі кожны момант і імгненьне свайго перабываньня поруч з блізкімі ды роднымі".

Барацьба за вызваленьне краіны трывае!
ЖУРНАЛІСТ - НЕ ЗЛАЧЫНЦА!*

#FREEIVASHYN #FreePoliticalPrisonersInBelarus

*1⃣*2⃣0⃣0⃣ дзён у палоне. 3⃣3⃣ дні без ?. ШЫЗА 3⃣1⃣ СОДНІ!!!**
Турма №8 Жодзіна, строгі рэжым!

Мінула 40 месяцаў з часу захопу ў палон нашага ваяра Дзяніса Івашына. Больш за месяц мы ня маем ад яго ніякае карэспандэнцыі, дагэтуль ня ведаем, дзе ён знаходзіцца, як сябе пачувае і што зь ім наагул адбываецца.

А нашыя заходнія суседзі вырашаюць, ці адгароджвацца ад Беларусі зусім, ці яшчэ зрабіць "апошняе кітайскае" папярэджаньне і пачакаць на добрую волю акупанцкай адміністрацыі. Пад пагрозай адзіныя дзейныя пасажырскі і грузавы пераходы, хаця яшчэ ўчора гучалі спадзевы на тое, што хутка можна будзе адчыніць яшчэ адзін пункт пропуска.

Новы ўдар па ледзь жывой эканоміцы - напэўна самае то, што дапамагло б краіне вырвацца з татальнай залежнасьці ад акупанта. Бо ў Беларусі ж самыя лепшыя іканамісты і стратэхі (не, я не памылілася ў напісаньні).

А ўсяго ж трэба было выправіць дахаты навезены з усяго "трэцяга" сьвету  "гум"дэсант акупанта, выпусьціць Анджэя Пачобута і ўсіх рэпрэсаваных Палякаў, перастаць перасьледаваць Польскую меншасьць на Беларусі, ганяцца за "картамі Паляка" і т.п... Але не, у вар’ятаў свой неадэкватны шлях у бездань. Шкада, што ўсю Беларусь за сабой цягнуць. Так бывае, калі здраджваеш свайму народу і пачынаеш дбаць пра інтарэсы іншага. Дзякуй ня скажуць, бо абслуга не заслугоўвае на падзяку. І рана ці позна твае халуйства табе ж самому дасца ў знакі. І гэта справядліва.

Барацьба за вызваленьне краіны трывае!
ЖУРНАЛІСТ - НЕ ЗЛАЧЫНЦА!
#FREEIVASHYN #FreePoliticalPrisonersInBelarus

*1⃣*1⃣9⃣9⃣ дзён у палоне. 3⃣2⃣ дні без ?. ШЫЗА 3⃣0⃣ СОДНЯЎ!!!**
Турма №8 Жодзіна, строгі рэжым!

Гэтую навіну я сёньня прачытала і не змагла стрымаць усьмешку: супрацоўнікам закрытых установаў, а менавіта, турмаў і калёніяў змогуць выкарыстоўваць для выкананьняў сваіх "абавязкаў"... дроны і сыстэмы прыпыненьня мабільнай сувязі. Так сабе і ўявіла, як Дзяніс Івашын ці іншыя палітвязьні будуць засмучаныя тым, што цяпер ня змогуць карыстацца сваімі схаванымі мабільнікамі. У кожнага ж па два недзе ляжыць на ўсялякі выпадак. А цяпер усё, finita la comedia. Ці яна толькі пачалася?

Падаецца, начальнікі гэтых установаў цяпер проста будуць забаўляцца з дронамі ў вольны ад іншых заняткаў час, а тымі сыстэмамі будуць кашмарыць падначаленых.

Сур’ёзна, нашыя палітзьняволеныя ў палоне й кроку ступіць ня могуць без нагляду, ім забаронена ўсё, што нават іншым вязьням дазволена. Якія мабільнікі, на каго разьлічаная гэтая ахінея і да чаго насамрэч злыдні рыхтуюцца?

Барацьба за вызваленьне краіны трывае!
СВАБОДУ ПАЛІТВЯЗЬНЯМ І ВЯЗЬНЯМ СУМЛЕНЬНЯ!

#FreeIvashyn #FREEPOLITICALPRISONERSINBELARUS

*1⃣*1⃣9⃣8⃣ дзён у палоне. 3⃣1⃣ дзень без ?. ШЫЗА 2⃣9⃣ СОДНЯЎ!!!**
Турма №8 Жодзіна, строгі рэжым!

Беларускі і Польскі журналіст Анджэй Пачобут стаўся ганаровым варшавякам. Так вырашылі мясцовыя дэпутаты. Вельмі добра, што Беларускага паляка ёсьць каму падтрымліваць. Шкада, што Беларусаў у Беларусі няма каму падтрымаць і дапамагчы праз здраднікаў пры ўладзе. Ды й, бадай, ва ўсім сьвеце мала знойдзецца тых, хто б хацеў, а яшчэ таго болей мог нечым нам дапамагчы. Вядома, ё тыя, хто імкнецца, мае добрую волю. Але ж нельга прабіць пабудаваную акупантамі й здраднікамі "сьцяну". Тым больш, калі знаходзяцца нават у нашых шэрагах карысныя дурні й памагатаі тую "сьцяну" ўмацоўваць і разбудоўваць.

Мы зь Дзянісам Івашыным заўжды выступалі за тое, каб усяляк выцягваць нават акупаваную Беларусь з удушлівых абдымкаў "рускава міра". Каб Беларусы мелі магчымасьць бываць у цывілізаваным сьвеце і прагнулі да яго далучыцца. Але маем, што маем. І лепей сытуацыя не становіцца, на жаль.

Барацьба за вызваленьне краіны трывае!
ПЕРАМОГА БУДЗЕ ЗА НАМІ!

#FREEIVASHYN #FreePoliticalPrisonersInBelarus

*1⃣*1⃣9⃣7⃣ дзён у палоне. 3⃣0⃣ дзён без ?. ШЫЗА 2⃣8⃣ СОДНЯЎ!!!**
Турма №8 Жодзіна, строгі рэжым!

Сёньня мінуў ужо месяц, як мы не атрымлівалі ніякае карэспандэнцыі ад Дзяніса Івашына. І абсалютна невядома, калі вестачка ад яго даляціць да нас. Пэўна, у гэтым і была асноўная задума арганізатараў такога катаваньня. Каб мы ня мелі сувязі зь ім, каб мне не было (як яны сабе мяркуюць) пра што пісаць для вас штодня. Таксама і каб Дзяніс сустрэў свае Народзіны на самоце ў халоднай камэры.

Ганебнікі ж ня ведаюць, што прайшоўшы "Вадохрышча" ледзяной вадой на Майдане ў 40-градусны мароз наўрад ці спалохаецца прахалоды замкнёнага пакою ў летнюю сьпёку. Ды й наагул Дзяніс мае, чым заняцца на самоце нават бяз кнігі ці аркуша паперы з асадкай ці алоўкам. Ён піша вершы, разважае над экзыстэнцыяльнымі пытаньнямі чалавецтва і свайго жыцьця, прысьвячае час малітве. Вядома, той, хто не прызвычаены да інтэлектуальнай працы і самааналізу, ня будзе ведаць, што рабіць. Відаць, няшчасныя выканаўцы чужой волі судзяць паводле сваёй уласнай сапсаванасьці, як той казаў. Наш жа ваяр мае цьвёрды непахісны стрыжань.

Барацьба за вызваленьне краіны трывае!
ВЕРЫМ! МОЖАМ! ПЕРАМОЖАМ!

#FreeIvashyn #FREEPOLITICALPRISONERSINBELARUS

*1⃣*1⃣9⃣6⃣ дзён у палоне. 2⃣9⃣ дзён без ?. ШЫЗА 2⃣7⃣ СОДНЯЎ!!!**
Турма №8 Жодзіна, строгі рэжым!

Сёньня мы ўзгадваем нашага славутага нацыянальнага пісьменьніка Васіля Быкава, які нарадзіўся роўна 100 год таму ў вёсцы Бычкі Ўшацкага раёну Віцебскае вобласьці. Дзяніс Івашын, дарэчы, у палоне заняўся вывучэньнем і моўным аналізам творчасьці Васіля Ўладзімеравіча. Дзяніс прачытаў і перачытаў наноў за кратамі зь дзясятак ягоных твораў, такіх як "Альпійская балада", "Сотнікаў", "Мёртвым не баліць", "Жоўты пясочак" ды інш. Вынікамі свайго аналізу наш ваяр падзяліўся ў сваіх лістах.

Асоба Быкава - надзвычай таленавітая, адораная рознымі здольнасьцямі і якасьцямі характару. А найперш, шчырасьцю і сумленнасьцю, пачуцьцём агіды да халуйства і падхалімства. За што пан Васіль і пры жыцьці  ўшаноўваўся як сябрамі, так і ворагамі.

Толькі пасьля ягонае сьмерці нікчэмнасьці, ня вартыя шнуроў ботаў Васіля Ўладзімеравіча, адчуўшы зьнікненьне такога маральнага аўтарытэта і ўласную беспакаранасьць пачалі нішчыць народную памяць пра пісьменьніка. Творы Быкава выкрэсьліваліся з школьнае праграмы па Беларускай літаратуры, быў зьнішчаны аўтэнтычны дом-сядзіба Быкавых, замест якога ўсталяваны навабуд-музэй. Ніводная вуліца, бібліятэка ды інш. у Беларусі не названыя ў гонар Васіля Быкава... Але пан Васіль - гэта сумленьне й стрыжань нашае нацыі, ён як бы распушчаны ў самой Беларускай зямлі, у мове, думках, веры, крыві Беларусаў. Таму марныя ўсе намаганьні здраднікаў і зайздросьнікаў!

Барацьба за вызваленьне краіны!
БЕЛАРУСЬ ЖЫВЕ І БУДЗЕ ЖЫЦЬ. ЗРОБІМ ЖА ЎСЁ ДЗЕЛЯ ГЭТАГА!

#FREEIVASHYN #FreePoliticalPrisonersInBelarus

*1⃣*1⃣9⃣4⃣ дні ў палоне. 2⃣7⃣ дзён без ?. ШЫЗА 2⃣5⃣ СОДНЯЎ!!!**
Турма №8 Жодзіна, строгі рэжым!

Зь вялікай доляй верагоднасьці можна меркаваць, што нашага ваяра Дзяніса Івашына чарговы раз выправілі ў ШЫЗА (ці хутчэй нават не выводзілі адтуль), калі ўжо за амаль цэлы месяц ён не напісаў нам ніводнага радка. Канешне, застаецца яшчэ шанец на тое, што цэнзары жодзінскай вязьніцы пайшлі ў летнія адпачынкі, таму карэспандэнцыю вязьняў амаль няма каму правяраць.

Але мне падаецца, больш праўдападобнай ё вэрсыя пра тое, што яго зноўку хацелі кінуць у тую камэру зь непрымальным суседам і Дзяніс, вядома, адмовіўся. То гэта будзе ўжо нібы трэцяе "пакараньне" і новы невядомы тэрмін халоднай "адзіночкі".

Ня ведаю, чаго такім чынам хочуць дабіцца ад Дзяніса, ці можа быць нас. Але адназначна магу сказаць: усё гэта - марныя ганебныя намаганьні. Дзяніс досыць прынцыповы й непахісны ў перакананьнях чалавек. А мы, паколькі ня мае аніякага разуменьня прычынаў, то таксама ня зьменім сваіх паводзінаў і перакананьняў.

Барацьба за вызваленьне краіны трывае!
БЕЛАРУСЬ ЖЫВЕ, А РЭЖЫМ ЗДОХНЕ!

#FREEIVASHYN #FreePoliticalPrisonersInBelarus