#من_ديوان_سفرة_العطاء_الجزء_٦_

نوحيه للأمام الكاظم عليه السلام

لامنك رساله ولاوصيه
بويه وغيبتك طالت عليه
أعدن وأحسب أيام......صار أثمنطعش عام
لاشفتك ولا مريت بيه

أعدن بالليالي وصارن سنين
طالت غيبتك بويه وغبت وين
ياشمعه زماني وياضوه العين
ياسور وسكف وأنته التجيه

ياسور وسكف يالدللتني
ميت لو عدل لو يتمتني
غايب وين هالغيبه وعفتني
أفكر بيك كل صبح ومسيه

أفكر بيك هالمده الطويله
هنياله الكعد وياك ليله
تمسح دمعتي وهمي تشيله
أبوي وماكو أعز منك عليه

بويه ولوكلت بويه شحلاتك
غريب وبالغرب خلصت حياتك
مهضومات ماتدري بناتك
من غير الأبوا شتسوه البنيه

ماتسوه البنيه بغير أبوهه
يصيرلهه سند لو عاركوهه
روحي مصوبه أعله الفاركوهه
ضلت ونتي بكلبي خفيه

أكابر عالونين وماأون حيل
ناس أتنام وأنه مساهره الليل
ضلت عالمخده دموعي أتسيل
هاذه الحال وأكثر صار بيه

هذا الحال وأكثر صار بالحال
كبرنه أعله الهظم خليتنه أطفال
لاطارش وصل لاشفنه مرسال
عونه الحاضرك يوم المنيه

✍الشاعره ام ريام دخيل الركابي الناصريه قضاء الرفاعي غير مبري الذمه من يحذف الاسم او يتلاعب بالقصيده

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

فزاعيه  للكاظم ع

الشيعه عالجسر  دكت رواياها
اجت ومصيبة المسموم تنعاها
(منكوبه  / بيوم  الكاظم)
.........
عالكاظم تون والمدمع تسيله
يامسموم  طلعت تلطم اليله
ضل نعشك طريح ومحد يشيله
(العياله /  يالكاظم وين  )
..........
هاليله البيارغ ترف  لمصابه
متعنيه  عليه وجايه احبابه
وسفه يبن جعفر صاحت ابابه
(بزنزانه /  عالجت الموت  )
.........
زوارك  اجت  والعين  تجريها 
الك شالو  روايه وهوسو بيها
تعيد ايام موسى وزود ماضيها

(يعرفونه / الزود  البيك )
..........
ها يبن النبي وصيتك يعرفونه
كضاي الكلافه  الكل  يسمونه
صدك وكت المنيه يدير بعيونه
(ماحضروه /  اسباع الملعب)
.......
الك هذا العزه والنوح العبره
ويانه تنوح  وتلطم  الزهره
ويجيت المواكب طبت الحضره

(عله مصابه / ادك وتنوح)

✍أم زينب كربلاء غير مبري الذمه من يأخذ الكلام اويحذف الإسم

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

#جديد. #جنوبي

#لموسى_أبن_جعفر_

ــــــــــ❋❋❋ ـــــــــــ

رف بالكاظميه. بيرغ الساده
عالكاظم حزن ومبين احداده
ــــــــــ❋❋❋ ـــــــــــ

رف بالكاظميه وواصل الغيمه
ترهب ياخلك هيبه تصاميمه
محزن عالسبع وضحت مفاهيمه
((البيرغ كدر//بحزانه))

ــــــــــ❋❋❋ ـــــــــــ

يمشي وي النعش بيرغ الخياله
هزه بكل فخر وبنوح شياله
ترا الشايل سبع والونه تحلاله
((الون للكاظم//يحلاله))
ــــــــــ❋❋❋ ـــــــــــ

مُهيبه ورفعت الليله بيارغكم
حزنت كل الولايه لمصيبتكم
لسبع بغداد ذبوها عمايمكم
((يالسادة//امغرب جدكم))

ــــــــــ❋❋❋ ـــــــــــ

ذبوها العمايم عالجسر يمه
كون من اللطم ياصدرك تهدمه
عالشايل غريب ورايح بهمه
((اطلب ثاره//مغدور الشال))

ــــــــــ❋❋❋ ـــــــــــ

تطلعلك عراضه اليوم سادتنه
نارك يالشلت تسعر وجوتنه
عليك اليوم ماتنشف يدمعتنه
((انشيع نعشك//بهيابه))

ــــــــــ❋❋❋ ـــــــــــ
تمت بعون الله وتوفيقه🧿

بقلم اسراء اللامي ام ذو الفقار

غير مبري الذمة من ياخذ المفردات ويحورها وينسبها لنفسه خصيمه ابا الفضل العباس ع

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

#جديد_وحصرياً_.
#الطميه_بديوان_خير_النساء_الجزء_١_.

لطميه للزهراء عليها السلام( يمه لفيني ابعباتچ )

يمه لفيني ابعباتچ خل اشمن ريحتّچ
ماهو وكت اوداع يمه اتيتمين ابنيتّچ
طفله وبعازت حنان ... چان الي اوجودچ امان
گلبي وشلون ابغيابچ يمه يحمل وحشتچ
❥━──➸➽❥?❥━──➸➽❥?
يمه يوم الرحتي عني خيم ابگلبي الحزن
يمه جدامي مشيتي للمگابر والدفن
ليش ذبيتي العبايه ولابسه الأبيض چفن
غاليه أو كلچ محنه يا بعد روحي ام حسن
دونچ اشيسوه العمر ... فرگتچ تحني الضهر
گلبي وشلون ابغيابچ يمه يحمل وحشتچ
❥━──➸➽❥?❥━──➸➽❥?
يمه كل ليليه افزن واصرخ اعليچ ابهظم
والله فرگاچ اشمصعبه مني سل حتى العظم
بس اليفارگ عزيزه يشعر بمعنى الألم
ادخل الغرفت منامچ ريحتچ فواحه اشم
احضن اهدومچ واون ... والدموع اتسايلن
گلبي وشلون ابغيابچ يمه يحمل وحشتچ
❥━──➸➽❥?❥━──➸➽❥?
احضن اهدومچ ييمه وابچي ابحرگة گلب
چنتي امس يا زهره يمي وهسه بحضان الترب
ضايعه اخلافچ وعيني ادموعهه من دم تصب
ضلمه بيتچ يلحنينه گمت اشوفه بس اطب
همي يكثر والدمع ... خالي اشوفه وانفجع
گلبي وشلون ابغيابچ يمه يحمل وحشتچ
❥━──➸➽❥?❥━──➸➽❥?
ثاري كلمن فارگ امه ايعيش عيشه باهته
واعلى خده ابحزن تجري كل مسيه دمعته
من عمت عين المگابر يمه وجهچ ضمته
گلبي مكسور ابرحيّلچ والله توجع كسرته
ها يروحي او دنيتي ... صار موتچ غصتي
گلبي وشلون ابغيابچ يمه يحمل وحشتچ
❥━──➸➽❥?❥━──➸➽❥?

تـــمت والـــــفضـــ?ـــل لله تعالى
بقلم✍الشاعره أميره أم محمد الكناني
صاحبه ديوان?أقل الوفاء في مصائب كربلاء
*❌لايجوز شرعاً وغير مبرء الذمه كل من يحذف أسم الشاعره وينسب القصيده اله علماً أن القصيده قد سجلت بدفتر الزهراء عليها السلام❌*

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

قصيدة لمولاتنا الزهراء "عليها السلام"

حنينة وغالية والگلب يهواچ
رافگنه الحزن من ودعيناچ

واعلينه الهوه ضاگ
يتعب اهواي الفراگ

ندور غرفتج بس ما لگيناچ
رافگنه الحزن من ودعيناچ
ــــــــــــــــــــــــــــــــــــــــــــــــــ
رافگنه الحزن من رحتي عنّه
شمحله الموت والله وياج يمنه
يموت الولد گبل امه ايتمنه
خيمة وطحتي واتطشر شملنه

ينعمة ومني تنباگ
يتعب اهواي الفراگ

صعبة فرگتج ويانه ردناچ
رافگنه الحزن من ودعيناچ
ــــــــــــــــــــــــــــــــــــــــــــــــــ
صعبة ايفگدچ المتعود اعليچ
أصَبْر اشلون روحي معلگه بيچ
تأمن الروح لو بس يمر طاريچ
دعيت الموت ياخذني ويخليچ

اعليه اليتم ما لاگ
يتعب اهواي الفراگ

كسر البالضلع للموت وداچ
رافگنه الحزن من ودعيناچ

✍?زينب الواسطي
ــــــــــــــــــــــــــــــــــــــــــــــــــ
كـسـر الـبـلـضلـع يا ريـت بـيـه
ناديــت ابــهــضـم آآيالـزچــيـه
بحسره اتعيش دون امها لبنيه
لـمـصـلاچ اصـد كـل مـغـربـيه

الچ كل لحضه اشتاگ
يتعب اهواي الفراگ

ريـت انموت كلنه كـون وياچ
رافگنه الحزن من ودعيناچ
ــــــــــــــــــــــــــــــــــــــــــــــــــ
ريـت الـموت ياخذنه ويـخليچ
ما احمل جـفاچ امعلمه عـليچ
يمن فدوه رحت يمه المعانيچ
ذاري الـمگـبـره خـافـنه ياذيچ

وينشف ذيچ الرياگ
يتعب اهواي الفراگ

يمن عاب الگلب لويوم ينساچ
رافگنه الـحزن مـن ودعيناچ

✍?خادمة آل البيت
ــــــــــــــــــــــــــــــــــــــــــــــــــ
نستني العافيه بس لونسيتج
يلعشتي بوريدي مـــــو ابّيتج
صارت غفل يــحبيبه مشيتچ
لو بس ساعه   وتردين ريتـچ

الج حيل الگلب طاگ
يتعب اهواي الفراگ

يهد الحيل يم حسين طرواچ
رافگنه الحزن من ودعيناچ
ــــــــــــــــــــــــــــــــــــــــــــــــــ
احس حتى الهوه يخنگني يمه
وهذا الكون عگبج صــار ظلمه
ومن اشتاگلـــج  ثوبچ اشـمه
الفاگد زهرته   يريد اليضمه

دمعه يكت  حراگ
يتعب اهواي الفراگ

تنعينه ردت لا موش ننعاج
رافگنه الحزن من ودعيناچ

ام عــــ✍?ــــــلي البابلي
ــــــــــــــــــــــــــــــــــــــــــــــــــ
تمت بعون الله تعالى بأقلام

✍?ام علي البابلي
✍?خادمة آل البيت
✍?زينب الواسطي

لانجيز حذف الأسماء
نسألكم الدعاء

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك

لطميه للأمام الحسن العسكري عليه السلام

اليوم العسكري شايل أو شيعوده
والمهدي حزين وروحه ممروده
❥━──➸➽❥?❥━──➸➽❥?
حزنان أبو صالح شال أبو عنه
أمگابل جثته أو بس يجهر الونه
صاح أشلون أبوي الگبره أشيلنه
بيت العز وگع يا ناس عاموده
❥━──➸➽❥?❥━──➸➽❥?
لاوين الحسن شايل أبهالليله
نرجس تنتحب لمصابه وأنحيله
والمهدي يون وضل يتچيله
صورة والده أمن البيت مفگوده
❥━──➸➽❥?❥━──➸➽❥?
أبسامره الحسن مسموم وأتراده
گعدو بلحزن يم راسه الساده
ويلي السم ثجيل وهدم أفاده
الليله جثته أعلى القبله ممدوده
❥━──➸➽❥?❥━──➸➽❥?
عرگان الجبين أو ضل يون وحده
والمهدي حزين أو گاعد أبسده
الدمعه ضلت أتلالي على خده
صاح أبصوت بويه العشره مريوده
❥━──➸➽❥?❥━──➸➽❥?
عشرتنه عمر مريوده يالغالي
وياك الأمسامر بويه يحلالي
بيتك يالأبو صبح صدگ خالي
وهسه المدرسه والدار مسدوده
❥━──➸➽❥?❥━──➸➽❥?

لخادمة الأمام الحسين 《ع》
الشاعرة ✍ نشوان الكناني
غير مبرء الذمة كل من يتلاعب بلقصيدة

الثلاثاء / ٦ من شهر ربيع الأول
الموافق / ٢٠٢٤/٩/١٠

https://t.me/joinchat/AAAAAELdvGssZMurwfLsJA
قصائد نسائيه لكل ايام محرم اشترك