استشهاد الزهراء ع

بالمدمع تجاره إقراها الزياره

سلم واهمل دموع .. صوتك عدها مسموع .. وترده سلامك
لتگلي الگبر وين .. ابكل بقعه ام الحسين .. تتردد علامك

ما حاجه مناره اتشوف ابني ابگلبك الگبه
واتخيل تطب لحسين هيچ المدمع اتصبه

من تبني المناره إقراها الزياره

ربح الزهره مو مال .. اتنجيك امن الاهوال .. ربحك بالقيامه
اشتنفع بالله دنياك .. تتخلد تره اهناك .. اهنا ماكو سلامه

لو نوح النبي عمرك هم تخلص تره سنينك
غير الزهره يا مسكين ياهو اللي يگر عينك

مفهومه العباره إقراها الزياره

وياها ابني مشروع .. سمي دمعه وضلوع .. ولطماتك بضاعه
ابمشروعك تحط باب .. وارسم فوگه المصاب .. وحدره اكتب شفاعه

كونك تنچوي بالباب وصدرك ينترس دخان
واسيها بنفس مجروح واغرگ حيل بالاحزان

بابك ويه ناره إقراها الزياره

عيش بوضع الجنون .. واعمي اعليها العيون .. وجرحهن خدودك
نايم بيها مسمار .. حيل ابچي عله الصار .. اخلص من قيودك
مسمار الكسر الضلوع طيّح محسن اعله الگاع
طلعت من گلبها الآه من ام حسن كلشي ضاع

وبهاي الحراره إقراها الزياره

من انسطرت العين .. ما صاحت يبو حسين .. اتصورها الفجيعه
ظلت دمعه تجري .. عنده اوصيه تدري .. ويلي اعله الوديعه

ما همها الالم والنار دين الهادي كل همها
ما ندبت علي الكرار رغم الضلع لاچمها

ما جرد فقاره إقراها الزياره

حيدر عاش الاحزان .. ودع اغلى انسان .. آهاته چبيره
غسلها بالجروح .. روح وفارگت روح .. فارگله عشيره

علي من غسل البضعه انلچم وياها ابو الحمله
يطيح امن البچي ويگوم مصاب الزهره شيحمله

صار أظلم نهاره إقراها الزياره

الشاعر اياد الديراوي

استشهاد الزهراء ع

يالزهره فرگاچ اشعمل بسنيني
بس الله يدري اشگد بچتلچ عيني
متنه سويه اتمنيت بعدچ ولا يسوه البيت
يالزهره

مات الحيل كله ولا هوه ابريتي
دفنت اوياچ يم حسين عافيتي
من دونچ يزهره شلون تاليتي
اول مره اكره ادخل البيتي

ما يندخل داري بعد يالزهره
بعدچ وحگ عشرتنه صار امگبره
ياوسفه وحدي ظليت بعدچ ولا يسوه البيت
يالزهره

عالحلوه اتفقنه انعيش والمره
وعالَمْنه بصلاة الليل نختصره
نرفض چنه كلمن يختلي بگبره
مو گلنه سويه انموت يالزهره ؟

متّي ورفضتي ابلحدچ اتخليني
مو ذاك حيدر راح اظل تدريني
فوگي ترايب هليت بعدچ ولا يسوه البيت
يالزهره

دفنتچ وانه صرت ابمشيتي اعثر
مو چني علي ذاك اليهد عسكر
استعديت إلمحن دنياي اتصبر
لچني الفرگتچ يالزهره ما اگدر

انه اقتنع بس گلبي شنهو ايقنعه
عايش زماني الخاطرچ يالبضعه
حزام المصايب شديت بعدچ ولا يسوه البيت
يالزهره

خلص بيچ الالم من ساعة الدفنه
كسر ضلعچ اكيدن طاب بالجنه
وجب هجرچ اخلصه ابدمعه والونه
عشرين وتسع اعوام اعيشنه

كل لحظه من دونچ تمر احسبها
عل حايط البي دم ضلع اكتبها
ما ينفع اشما كتبيت بعدچ ولا يسوه البيت
يالزهره

يمچ كل مسه يم الحسن انعه
ورشنّه الگبر يا فاطمه بدمعه
النفس يصعد لون إبايدي ما رجعه
اليعيش بلا حبيبه الدنيه متنفعه

اشتنفع بعد هالدنيه وانتي ابعيده
عمر اليخلص بس بچي ما ريده
من دم مدامع صبيت بعدچ ولا يسوه البيت
يالزهره

الچ مدري اليه الفاتحه اقراها
زينب كل مسيه ابابي الگاها
احضنها واطيحن انه وياها
يفطر الكون يم حسين مبچاها

نبچي ونصيح ابدونچ اتيتمنه
اتطرشنه غيرچ لا ابد ميلمنه
الگعدتنه ذيچه حنيت بعدچ ولا يسوه البيت
يالزهره

الشاعر اياد الديراوي

ابو ذيات مولد الرسول ص

بآن المصطفى نوره ورسمه
شمس عينه اخطنها ورسمه
محمد من يمر اسمه وره اسمه
نصلي ابعالي صوت اعله سويه

الحزن هالليله اطلگنه وحِجبه
تاه الكون بعيونه وحجبه
انه حروفه اطوفنها وحج به
للكعبة شرف سيد البريه

الشاعر اياد الديراوي

استشهاد الامام الحسن المجتبى ع

انه الحسن يا هالناس يشبهني بس العباس
بالسيف الي احچايه من احمل الرايه
يشبهني بس العباس

بالكرم ادري اتوزع عليكم صيتي
حيدر ابويه اشتطلع اذن تربيتي

ليش (الجمل) محد يسولف بيها
انه الگلبت الأول ابتاليها
ويه الدلال المعركه چافيها

للدله مو بس النار يجدح بديه الفقار
حيدر علي اويايه من احمل الرايه
يشبهني بس العباس

بثْلث حرايب راية ابويه ابايدي
وانه اصرخ اكثر يالله الكتايب زيدي

البصره فلا تنسه ابد قتالي
بعده عليها منرسم خيالي
رمحي ابشمسها الهل وكت يلالي

بالبصره سألو اشسويت بآل الزبير اشخليت
چان النصر غايه من احمل الرايه
يشبهني بس العباس

ثاني حروبي بيها انكتب عنواني
الشام وزلمها فنها إذا تنساني

وكت الزعل سألو عَلَي صفيني
باليمنه وحدي والدي امخليني
عل مهره يم عدواني تضحك عيني

حيدر يعاين مناك ويگلي يبني حياك
وسط الحرب آيه من احمل الرايه
يشبهني بس العباس

بين آل اميه ميداني كله ابكيفي
الشارد ميدري صار اتجاها السيفي

من كل كتر موت انه أطلع ليهم
مهله يشمون الهوه مَنطيهم
وي سيفي عزرائيل يحصد بيهم

كلها اتجاهي الدروب ايلاگوني صارو كل صوب
اتفنن ابهايه من احمل الرايه
يشبهني بس العباس

انه المنيه بسيفي صور ميعادي
الحمله الاخيره بالنهروان امجادي

تاريخي خله ايسولف البطوله
اشمحلاته سيفي اعله الكفر نزوله
اكتاب الله احنه انرفعه لا مو ذوله

للخرجو انطيت ادروس اگطع واردّن بالروس
سيفي عِله إفيايه من احمل الرايه
يشبهني بس العباس

اليسألني رايد خل يستمع للآتي
من زغري آني لابس هذن ريشاتي

ابدم الزلم وسط الحرب صابغهن
بس الكفل إختي كفو صار الهن
باچر عضيدي اعله النهر يلبسهن

يصرخ غداً بالخيمات انطاني الحسن هالريشات
هوه اليدگ ثايه من احمل الرايه
يشبهني بس العباس

الشاعر اياد الديراوي

ليلة الوحشه

اجه الليل اجه الليل يبو اليمه اجه الليل
--------
لا عباس لا انته يحله الليله الونين
اجه الليل ----
وحشه وغربه يا خويه اشتنفع دمعة العين
اجه الليل ----
كل اخيامي محترگه گلي نستچن وين
اجه الليل ----
شمر لمن گطع راسك جابل سوطه متنين
اجه الليل ----

عسن انه اللي ذبحوني شافو طولي ياحيف
اجه الليل ----
گوم وشوف ذباحك يشتم صار بالكيف
اجه الليل ----
خويه بعينه يخزرني ومن نظراته ميعيف
اجه الليل ----
سيفه اب ايده راواني بدمك يگطر السيف
اجه الليل ----

اجه الخيل اجه الخيل يبو اليمه اجه الخيل
--------
بذاك الظهر لو تدري من شبوها لخيام
اجه الخيل ----
احامي اليا طفل منهم وانه اشگف بالاسهام
اجه الخيل ----
نركض وين ياخويه مچويه تره اجدام
اجه الخيل ----
گوم وشوف بعيونك حدر الحافر ايتام
اجه الخيل ----

دخنان ورمل حافر بيهن يلعب الريح
اجه الخيل ----
هامت بنتك ارقيه ظلت والدي اتصيح
اجه الخيل ----
من الخوف ياخويه تنهظ مره وتطيح
اجه الخيل ----
انسلبت منها ترچيه وظل دم بنتك ايسيح
اجه الخيل ----

الشاعر اياد الديراوي

ضلوعك باچر حدر الحافر .. ونته بدلالك سهم
اتعنالك وابچي اگبالك .. وشكيلك حرگ الخيم
ياخويه وسمعهن وناتك
ياخويه لمتوني نظراتك
1
من يخلص وداعي اوياك اويظم الليل نجماته
يخويه الطف يلم عيون اشاگف بيش نظراته
المخيم لو رحت بعدك تهده الخيل ركظاته
وتالي ايشب علي يحسين وطفي بچفي جمراته

بلوني اخيامي اتصير اجدامي .. حال اختك باچر صعب
ويحيطوني وهاي امتوني .. تنظرها عيون الغرب
ياخويه تتكاثر اهاتك
ياخويه لمتوني نظراتك
2
مثل الريح عشت اوياك ما واحد عرف لوني
لچن وي حرگة اخيامي عدوانك يعرفوني
الرماد ايهب علي وبهاي تبّين دمعة عيوني
السياط بلا عرف يحسين تندل باچر متوني

بذاك المدمع صوب المصرع .. احضى بطولك ارتجي
بجفني الدامي وهاي الامي .. اترك هالعيله اواجي
ياخويه بجروحي شوغاتك
ياخويه لوتوني نظراتك
3
دموعي اشگد يخويه اعزاز لچن باچر يرخصنلك
اتيهك بين الف مذبوح بس من عطرك اندلك
راح الگاك بآخر موت وحاول وضعي اشرحلك
لچن يلفي الشمر يحسين وصوب الخنجر ايجبلك

خنجر بيده وانا وحيده .. إبعد گتله وما يرد
ظل يضربني وظل يشتمني .. صرت اتعثر وبتعد
ياخويه افهمهن حسراتك
ياخويه لمتوني نظراتك
4
يخلص ليلي ودري بهاي الشمر بالحومه ينتظرك
يرفسك والسهم يحسين يطلع كله من ظهرك
ذباحك اشوفه شلون يتربع على صدرك
تسحگني عسنها الخيل ولا شوفه يحز نحرك

يگعد فوگك ونته جروحك .. تصرخ يازينب سبي
چن تحچيلي وتأوميلي .. بالچ يختي عل عبي
ياخويه شما تكثر طبراتك
ياخويه لمتوني نظراتك
5
بگد موتك اموت اوياك اثنعش مره يماي العين
كل طبره اعله نحرك روح تطلع مني خويه حسين
الشمر من شيبك ايشيلك بهذا الراس اناشد وين
اعلگنه اعله رومحي وگال انتي لليسر تمشين

موذر جسمك خويه ودمك .. يگطر من راس الرمح
راسك عالي وظل يبرالي .. سترچ اغلى امن الذبح
ياخويه يجرن لي دمعاتك
ياخويه لمتوني نظراتك
6
سبايه انروح باخر ليل بس وگفه بگت لينه
الكفيل انودّعه اعله الماي ونِلم ياخويه چفينه
على صدره احط راسي وتصنت عله اونينه
العذر يازيب ايگلي اخافن زعلت اسكينه

احمر لونه بست اعيونه .. ومن عينه شلت السهم
ونه بروحه تصيح جروحه .. عذريني حرگو خيم
ياخويه حرگوهن خيماتك
ياخويه لمتوني نظراتك

الشاعر اياد الديراوي

استشهاد الحمزه بن عبد المطلب ع

وسط الحرايب نار يشهد علي الكرار
واگف جبل .. من الازل .. سيفي زعل
من هلهل الاسلام للهادي انه احزام
واگف جبل .. من الازل .. سيفي زعل

گبل لا تبدي الرساله واضح ابعيني الدرب
الشيمه هيه وما تغير ينبع ايمان الگلب
من محمد علن دينه رنت سيوف الحرب

مستعد الهايه
بسيفي عندي احچايه
آنه اول ناسه
انطاني احمد رايه

ما غمضتها العين امتانيها صار اسنين
حل الوعد .. انه الأسد .. سيفي صعد
غاضب عله الضلام للهادي انه احزام
واگف جبل .. من الازل .. سيفي زعل

كل قريش ابعزمي تدري اصوابي ما يرحم ابد
العسكر اگبالي اعده اشما كثر قله العدد
يمي حيدر وابو العتره ياهو يدناله الأسد

حيدريه اطباعي
والرسول اشراعي
بالقتال افنوني
امجريبنه اذراعي

للمصطفى هالروح اگبالي إنتصار ايلوح
ابصدري جمر .. فدوه العمر .. هذا النصر
ما عاشرت الاوهام للهادي انه احزام
واگف جبل .. من الازل .. سيفي زعل

من يهد اوياي حيدر تشهگ انفاس الزلم
الراكب وراجل نذبحه والغضب بيهم يعم
وننده الملچ المنايه هوه بالعسكر يلم

الموت محني اگبالي
ينبهر بافعالي
والمَلك يتراجف
من يشوف الوالي

كلمن حضاله ابصوب اليتحده اي مغلوب
الحگ يعتلي .. اليمنه الي .. اليسره العلي
احنه الرفعنه الهام للهادي انه احزام
واگف جبل .. من الازل .. سيفي زعل

عندي خوه اويه الرجوله اكسر وما انكسر
إحد ما تنسى حسامي وما نست چفي بدر
من يفوح ابصدري غيضي الگاع اگلبها گبر

انطي هل معلومه
انه سيد الحومه
كاتب ابتاريخي
اشگد زلم مهزومه

إكتبها يا تاريخ عم الرسول الشيخ
غيضي يصب .. إبكل گلب .. زارع رعب
وابفعلي ما انلام للهادي انه احزام
واگف جبل .. من الازل .. سيفي زعل

هاشمي واصلي كرامه احنه شرفنه الارض
ابحكمته الهادي محمد ثبّت أحكام الفرض
وآنه بالسيف اويه حيدر نشطر ابطول وعرض

كلمن اثبت دوره
شهدت المعموره
والنبي حاچيها
احنه آيه وسوره

شرفنه رب الكون النه النصر مضمون
عدنه وعد .. من الصمد .. هوه السند
ما زالت النه اجدام للهادي انه احزام
واگف جبل .. من الازل .. سيفي زعل

الشاعر اياد الديراوي

استشهاد الامام علي ع

غمضها العيون .. يدرون . بيه كل هلي
لا ينشغل بال .. كفال . لختي يا علي
شالت كفاله امتوني
زينب تره بعيوني
يبو الحمله يضرغام يبو الحمله يضرغام

اصد بويه الجروحك .. ألم تارسها روحك
يحدر والحزن إمخيم اعليك
عله الحره اشوفك .. تئومي لن چفوفك
بأختي منشغل يا علي ادريك

علامه ايهل دمع
سهل هذا الوضع
انه الكافل بعد عينك تراني
نشم مثلك تره
كفيل الهل مره
احاميها بچفوفي وبحناني

هدّيها الجروح .. والروح . ختنام ابرغد
اوليدك واحاچيك .. انطيك . ياحيدر وعد

من هسه تبدي افنوني
زينب تره بعيوني
يبو الحمله يضرغام يبو الحمله يضرغام

وحگ جرحك يغالي .. تره سيفك حِلالي
اريدك تطمئن چفيني گدها
انه سبع الملاحم .. اعرفن طفي قادم
زينب بالحفظ حيرتها اسدها

صراع اويه الصبر
بديت انه انتظر
اريدن هسه ابدي بانتقامي

وحگك يا فرض
اريد اطوي الارض
وهد الدنيا بسمك يا امامي

اتصبر اشلون .. محزون . گلبي الحالتك
انظر للرسوم .. ودموم . صبغت شيبتك

هاي الاخت مضموني
زينب تره بعيوني
يبو الحمله يضرغام يبو الحمله يضرغام

انه ادروبي دروبك .. اعيدن كل حروبك
قسم يا والدي بنتك متنهان
خلقني الباري الها .. منو اليگدر يذلها
عله الگاع السمه اطبگها لهفان

انه ابگد الدهر
يتانيني النهر
يبويه اعله الشريعه خيبر اتعود

ادفننه الضمه
لجل بت فاطمه
مو بس عيني راح انطيها الزنود

ميعادي مكتوب .. منصوب . يم المشرعه
بايسلي الچفوف .. الطفوف . تصبح واقعه

حاشه ايتغيّر لوني
زينب تره بعيوني
يبو الحمله يضرغام يبو الحمله يضرغام

يبويه اسمع ونينك .. بدت تعرگ جبينك
تألِم حالتك وبعينك الموت
بده اوداعك انه ادري .. طفح غيظ اعله صدري
خلص ماي العمر واتخافت الصوت

يذباح الزلم
تودعنه حلم
مچانك محد ايعوضه يكرار

ولكن يالولي
صبح دورك الي
يمن للطف نطيت الأمي اسرار

گلتلها نبراس .. عباس . كفال الاهل
مرهون اله السيف .. والحيف . لچفوفه انتقل

بفعالك ايشبهوني
زينب تره بعيوني
يبو الحمله يضرغام يبو الحمله يضرغام

گبل هل رحله اريدك .. يحيدر ترفع ايدك
وتحط چف زينبك بويه اعله ايدي
دگل زينب عليه .. الگمر غيره وحميه
ابو فاضل شهم والكلفه عيدي

يواريك الترب
وان أب انگلب
اخو زينب انه وآنه ابوها
جمر صدري انترس
لحد آخر نفس
ابطفوفي لا تظن ايسلبوها

انطيها هل عين .. وحسين . يشهدلي تره
بالجنه الاگيك .. وانطيك. تفصيل الجره

كلي دمه تلگوني
زينب تره بعيوني
يبو الحمله يضرغام يبو الحمله يضرغام

الشاعر اياد الديراوي

استشهاد الامام علي ع

ويلي انطبر علي علي
هلي المدامع يا عين

كتاب الله .. وگف صله .. ابو الحمله
يستاهل الليله دمعتي
علي اتخضب .. اريد انحب .. مثل زينب
ترست مخيمها حسرتي

ترجمان المصحف ايعرفونه
چا بعد ليش الوصي ايطبرونه
حگه جبريل ابسمائه اينادي
يا علي بمصيبتك فجعونه

ويلي انطبر علي علي
هلي المدامع يا عين

علي القبله .. العرش كله .. انفجع لجله
وانهدمت اركان الهدايه
عله الامه .. اليطش رحمه .. نزف دمه
وسفه علي اتحضنه المنايه

حيدر المن عنده يرعد موته
ترجف اگلوب الزلم من صوته
تالي ما تالي تصب ادمومه
شلون اصدگ حظرو تابوته

ويلي انطبر علي علي
هلي المدامع يا عين

صعب حاله .. البچي اتعاله .. الحسن شاله
والداره رد ابهل فجيعه
گعد عنده .. بده ايضمده .. علي ابشده
والشيبه بدمومه نجيعه

اتجمعت بالونه يمه الساده
منفطر راسه اشيفيده اضماده
وسفه تتغير بدت الوانه
امودعين ابالله حيدر ناده

ويلي انطبر علي علي
هلي المدامع يا عين

علي لنه .. جذب ونه .. انمله ابحزنه
ويم راسه زينب هل دمعها
انذبح صبحه .. تصد جرحه .. تره الفرحه
يتواره بترابه شمعها

اتگله يا خيمتها هاي العيله
صرنه ياحيدر يتامه الليله
العيد ريته ما يهل اهلاله
الحسره يابويه تراها اطويله

ويلي انطبر علي علي
هلي المدامع يا عين

علي احبابه .. على بابه .. عله امصابه
من دم يهل لجله دمعهم
علي الحَبهم .. التكفلهم .. كبر همهم
منهو البعد يمسح عليهم

إليتامه والد ايحسبونه
الخبز بس ابچف علي ايشمونه
إليتيم ايحاچي ظل الثاني
اليموت اويه الوصي خيعونه

ويلي انطبر علي علي
هلي المدامع يا عين

الشاعر اياد الديراوي

هوسات لمولد السيده رقيه ع

ابتسم لحسين من اتبشر ابطفله
ابهلاهل ظل يتانيها الضعن كله
الثوره ابلا رقيه حاشه ما تحلى

( واكثرهم زينب فرحانه )

فرحانه العقيله ابجية ارقيه
ملامحها ملامح طفله ثوريه
وي زينب تذل باچر بني اميه

( لرقيه اشمحلات الهوسه )

مو مشروط بالطف البطل زلمه
الگمر معروف زوده وزود ابو اليمه
لچن طفله بثلاث سنين متحزمه

( منتصره ارقيه اعله الناگه )

الشاعر اياد الديراوي