Şamil Alâdin

?️ELPİDE!

Batumdan çıqtım men, kelem Qırımğa;
Yalıdan el sallay bir urum qızı.
Közleri yaşlanğan, çeresi solğan, –
Qalbime nur saçqan cenüp yıldızı.

Unutma, dülber qız, yelkenler tübünde,
Şu elâ közlerniñ esiri oldım.
Sevimli Elpide, sevimli Elpide!
Men seni bağçada qıdırıp yoruldım.

Incındım, telmirdim bir cıllı sözge,
Yüzüñde kene de bulutlar sezdim.
Sen sustıñ. Men dedim: “keteyik bizge”.
Közümden uçtıñ sen, ökündim – kezdim.

Batumnıñ tumanlı dağları başında
Ötken şeñ künlerim çıñlaycaq sesimde.
Ğam-qasevet bilmegen bu civan yaşımda!
Elpide bir tüşday qalacaq esimde.

?️Batum, 1931 s.

#şiir

Şeryan Ali

?️EKİ DÜNYA ARASINDA

Nurlu ruhlar fezasına taltınıp kelem,
Eki dünya arasında qalqınıp kelem.
Maddiy dünya ep tartsa da ayaqlarımdan,
Maneviyet alemine tabınıp kelem!..

?️Kiyev 15.06.2000 s. iyün 15

#şiir

Refat Çaylaq

?TAQDİR

Meni nasıl sıqma, ezme.
Teslim olmam, tiz çökmem.
Arttan, ögden yolum kesme,
Saña aslı baş egmem.

Yıqalmazsıñ, men insanım,
Yaşamançün doğdım men.
Halqım içün qaynay qanım,
Halqım içün barım men.

?️

#şiir

Ziyadin Cavtobeli

?️ BİR ARZU

Elȃ közlüm, baq ne şirin aylı gece!
Seniñ közüñ kibi nurlı Çolpan yıldızı.
Kök dülberi – ay, suqlaña qarap bizge,
Bu ömürde biz de açqan güllerdaymız.

Baq bademler çeçeklendi, gür, yarışıq,
Aynıñ altın nuru oynay yaprağında,
Kel, işten soñ biz de biraz yal alayıq
Bu yaşlıqnıñ quvançlı der çağında.

?️

#şiir

Çerkez-Ali

?️QUTURMA, DEÑİZ

Quturma, deñiz sen, quturma,
Qaçırma meni öz yalıñdan.
Dalğañnı betime şıpırma,
Añla sen musafir alından.

Sakin tur, qozğalma, durul sen,
Sailge hoş ava alıp kel.
Çayqalıp taşlarğa urul sen,
Sıypasın tenlerni serin el.

Yalıñda kezmekte nice can,
Er biri yal ala, zavqlana.
Er kesniñ göñlünde eyecan,
Duyğular uyqudan uyana.

Köksümni toldırıp eliñle,
Şadlanam ğururlı kezerek.
Kezem men bu yerde zevq ile,
Özümni qonaqbay sezerek.

?️

#şiir

Riza Halid

?️BU – TINÇLIQMI?

Kök güdürley,
Yaşın çıza çeşit yölaq,
Soñ yıltıray
Diyarnıñ bol çimenleri...
Sanki ücüm meydanını
Añdıraraq,
Çeçeklerge ene
Balqurt sürüleri.

Qarılğaç da,
Şu arada qanat kerip,
Avelene edi telli
Kökquşaqta, - 
Şay fırlana,
Tıpqı dersiñ göñüllenip,
Yañı-yañı ezgilerni
Uydurmaqta!

?

#şiir

Emine Üsein

?️ GÜZELLİK HAQTADIR, QALĞANI YALAN

Bir güzel göñülge göñülim tüşti,
Mecnun da Leylȃçün icrana tüşti,
Gül içün fiğana bülbülim tüşti,
Güzellik aşqtadır, qalğanı yalan.

Baarni qarşılay göñlüm ve ahım,
Meni menden ister tek Lȃle – şahım,
Zümrüt yapraqlarğa töküldi ruhum,
Güzellik ruhtadır, qağanı yalan.

Nurdan yaratılğan aslım ve neslim,
Lȃleden ayrılmam, Mecnun misali,
Asıl baqi O’dır, qalğanı faniy,
Güzellik Haqtadır, qalğanı yalan.

?️

#şiir

Şamil Alâdin

?️EFKÂRLIM AZAÇIQ

Azbarda furtana iñley,
Ayşe, nereye gidesiñ?
Geceley seni kim bekley,
Meni terk idesiñ?

Serbestlik arayan teniñ,
Ayşe, ruzgârdan kögergen!
Bir asret qurtçığı seniñ
Qalbiñni kemirgen.

Güzelsiñ, carizsiñ... kene,
Ayşe, perişan olsañ da!
Bu dünya daima döne,
Ölseñ de, qalsañ da!

Giderseñ, qapunı urma,
Canım, gizliden örtip çıq!
Ögümde şınşıqlap turma,
Efkârlım azaçıq!

#şiir

Refat Çaylaq

?️ UNUTAMIZ

Şeytannıñ şeytan olğanın unutamız,
Patta-satta ondan eyi söz eşitsek.
Dalğa taşqa urğan kibi urulamız,
Bile-bile olacaqmız parça-kesek.

Dinsizden eyilik bekleymiz asırlarnen,
Şeytannıñ dinsiz olğanın bileturıp,
Bostanımız suvarsaq da zem-zem suvnen,
Hiç bir vaqıt tatlı olmaz accı turup.

?️

#şiir

Şeryan Ali

?️AÑLAR SENİ...

Yunus Qandımğa

Yüce Alla emirinen alsañ qalem,
Nağmeleriñ hoş ellerday kezer alem.
Ülviy duyğu dalğalanır, sığmaz qalpke,
Sözleriñ çıq tamçısıday nurlanır em.
Qatmer güller yapraqları olur defter,
Aşq közyaşıñ yar boynuna inci eter.
Nefasetniñ çiçegine sevda bülbül,
Doğma yırlar maqamını şay diñletir.
Işığına pervaneday talpınır can,
Mücizeler mamür göñlüñ etermek yan.
Ğayret, küçüñ coşqunlığı şelâleday,
Añlar seni añlamağa qadir insan!...

?️Temeş 2000 s. oktâbr 22

#şiir