عظم الله لكم الأجر بإستشهاد الإمام الحسن العسكري (ع)

(( جـرح الـغـايـب ))

اليوم الإمام الغايب *** دلاله اصبح ذايب
فاگد ابوه وسلوته
الله يعينه بمحنته
دلاله اصبح ذايب

هاليوم حـزنـان الفلك وبـيـت الرسالة امكدر
وعيونه تجري المنتظر عالعسكري دمع احمر
يـا للأسـف جـار الـوكـت وبعترة الهادي افـتـر
وابـن اللقيط المعتمد سـم ابن ساقي الكوثر

طالت ادين الظالم *** وسم الإمام العالِم
يا ويلي فتت چبدته
الله يعينه بمحنته
دلاله اصبح ذايب

مــاكــو اختلاف ابموتته مثل الــزكـيِ الـزاهر
جــده الإمـــام المجتبى صـاحـب العلم الباهر
نفس السبب والمظلمه نفس الاسم والظاهر
منهجهم السم الحسن سم ابو المهدي الطاهر

نفس الالم والحيره *** لكن بعيده الديره
مات الأمين ابغربته
الله يعينه بمحنته
دلاله اصبح ذايب

الله يعينك ســيــدي شلون اعله نعشه اتباوع
ومن والدك يبن النقي شوف وعطف ما شابع
چــا گلبك شـلـون احتمل يــوم النظرته اينازع
مـقـتـول لـمـن فــارگـك ولروحته الـمـر جارع

خلصت هلك مذبوحه *** وگلبك چبيره اجروحه
المثلك عظيمه امصيبته
الله يعينه بمحنته
دلاله اصبح ذايب

يــا سـيـدي ابعمر الـزغـر عشت اليتم واعوامه
ونحبت لابـــــد عالحسن لـمـن ذكـــرت ايـامـه
شلونك والحسين السبط ظــــل لا نحر لاهامه
ومخضب الشيب ابدمه وعالراس ماكو اعمامه

غسله الدم الجاري *** وچفنه هناك الذاري
وزينب امگطع شافته
الله يعينه بمحنته
دلاله اصبح ذايب

من ادفنت جثته بألم چان اكو اوياك الشاله
مــولاي وتــراب الـگـبـر بـهـداي قطعاً هـاله
جــدك تــوذر عـالارض مـن سحگته الخياله
وزيـن العباد ابكربله لمها ابحصيره اوصاله

يمشي ويلم بضلوعه *** وآخ الوجع مسموعه
گدامه ذبحوها اخوته
الله يعينه بمحنته
دلاله اصبح ذايب

علي الشاوي

عظم الله لكم الأجر بوفاة النبي الأعظم محمد (ص)

(( بيت الزهره طايح سوره))

اليوم بيت الزهره طـايـح سـوره
والسمه اتون عالجره ومكسوره

اليوم راح النور اليشع بالسمه
والاملاك امن الحصل متألمه
عظم الله اجـر الزچية فاطمه
فگدت الغاطيها عطفه ونوره

راحل الطبعه التواضع والوفه
وظلت اخلافه ابحزن متچتفه
ياهـو اليطيب جـروح العاطفه
حگها لو ونت عليه معذوره

فارگاها وعگبه ماشافت هنه
وحيدر ابكسره ومواجع چفنه
بالمصايب خلصت ذيچ السنه
اگلوب حزنانه ومهج مفطوره

ظلمه دنياها اصبحت ومكدره
والـدمـع دم اعله والدها جره
بـاچـر تلحگه بضلوع امكسره
وتمشي بعده مألمه ومقهوره

سكنت ابيت الحزن والنايحه
والدليل اللي تصوب ما صحه
بيا گلب عالهادي تقره الفاتحه
وبالفكر ذكراه حفر محفوره

فارگاها الچانت اعليه تنتچي
والنواصب حرّموا حته البچي
فاجعة يعجر يوصفها الحچي
خالفوا نهج النبي ودستوره

علي الشاوي

( شــــــور )

يا كفيل العايله
يا كفيل العايله

من صوب الخيم صايح يناديك
ماذينه العطش ظـل الامل بيك
عله جمر الهظم ضعنك يتانيك
يــــا حــنــيــن
ياساقي تره اطفالك عطاشه وتنتظر جودك
تتركهم يـبـو فاضل حشاك وتخلف اوعودك
غدروك العده وسفه يحامي وگطعو ازنودك

يا كفيل العايله
يا كفيل العايله

فــوگ المشرعه طاحنلك ازنـــود
بس ذيــچ الـخـيـم متأمله اتـعـود
ما مسهن هظم كون انتَ موجود
يــــا حــنــيــن
ابراگ العلگمي طايح يويلي شصاير بحالك
والكلفه الشمر بعدك طــگ اوشتم اعيالك
مشاهم غصب عنك بس ما مشو من بالك

يا كفيل العايله
يا كفيل العايله

يـا ذاك الظهر مـا ينحمل حار
فوكاه العطش سوه الچبد نار
صعبة وزينبك بيها الوكت دار
يــــا حــنــيــن
هيچ الچانت ابزودك يخوها الغالي مهيوبه
تبقه ابولية اعداكم اسيره ابسوط مضروبه
ويطلعوها فوگ النوگ حزينة وحيل متعوبه

يا كفيل العايله
يا كفيل العايله

شـلون اتـوادعت يالصاير اوصال
راسك عالرمح وعله الارض ظال
گطعوا چفك وچف الرجس طال
يــــا حــنــيــن
مشوهم بـعـد عينك واعله الحومه مروهم
بـچـي وتــوديــع مـن ابعيد مينزلون خلوهم
والجدهم رسول الله حسافه اليوم اسروهم

يا كفيل العايله
يا كفيل العايله

من يمك سبي للكوفه والشام
راحـــو والگلب عالخوه محتام
مــا سلهم جفن بغيابك ونـــام
يــــا حــنــيــن
بدفوف وطـبـل وصـيـاح دخـلو سـوگ يالعالي
وزيـنـب مـن بـعـد عيناك صــارت للحرم والي
رخيص الماي مـا شربو شرفهم يـا گـمـر غالي

يا كفيل العايله
يا كفيل العايله

علي الشاوي

(( رجالٌ صَدَقوا ))

هُم رجالٌ صَدَقوا
كُـلَّ شـيءٍ انفقوا
لِنُـصرةِ الـحسينْ

انصارك ورب العرش عن معرفة وقدره اختار
صفوة عباده بهالارض من عدهم انطاك انصار
انـــه اعتقد طـــف كربله لولاهم اصـلاً مـا صار
لــو چانو ابغزوة اُحــد چـا ربـح جيش المختار

وكـمــا قــالَ بقوا
كُـلَّ شـيءٍ انفقوا
لِنُـصرةِ الـحسينْ

گبل انتهاضك للحرب مـن گبل لا تبدي اتصيح
هل من مناصر صحبتك سد وگفو اگبال الريح
هاي الحرب رادت زلم والـمـا لحگ بيها ايطيح
مثل اليصلي ابـلا فِـكـر سَلّم ونـاسـي التسبيح

فعلوا مـــا نطقوا
كُـلَّ شـيءٍ انفقوا
لِنُـصرةِ الـحسينْ

چنهم سـبـع مـيـة ألف يوم اطلعوا مو سبعين
كلهم گـلـب واحـد اجـو خـاطر ينصرون الدين
ثبتوا عـلـى احـدود الخيم مـنـك اشاره متانين
يمكن حديد الله القوي سوه افئدتهم مو طين

بالعِدى لم يرفِقوا
كُـلَّ شـيءٍ انفقوا
لِنُـصرةِ الـحسينْ

هاي الصلابة وهالعزم ورثوها اظن من داوود
وچا شارك وياهم نعم لـو چـان بالطف موجود
ينصر سـبـط طـه الـنـبي وبنفسه للغالي ايجود
ما يخسر ابن آدم حرب لو نيته يرضي المعبود

صهوةَ المجدِ رَقوا
كُـلَّ شـيءٍ انفقوا
لِنُـصرةِ الـحسينْ

صبر الحرب صبر التعب صبر العطش فاق أيوب
ويتسابقون اعـلـه الـذبـح مـحـد يـبـيـن مـتـعوب
فدوه لـحـرايـر فاطمة كون الگلب حسره ايذوب
الما يصبغ اللحيه ابـدمـه مـن الذنب يمته ايتوب

بالـدما قـدْ غرقوا
كُـلَّ شـيءٍ انفقوا
لِنُـصرةِ الـحسينْ

علي الشاوي

(( امودعين الله ))
عندما خرج ركب الإمام الحسين (ع) من المدينة ودعتهم مولاتي فاطمة العليلة (ع) قائلة....

امودعين الله ابسفركم واندعولي
وانــه بعتاب الـحزن نــوخ ذلـولـي
من مشه عني الضعن
دمعي اصبحلي وطن
وانــه بعتاب الـحزن نــوخ ذلـولـي

رايحين اتـوسـل الله لــي يـردكـم بالسلامه
مـن طلعتو ابـدار فاطـم للدمع قامت قيامة
صــارت ابنوحي عليكم فـوگ وجناتي علامه
والحزن يمسح ابراسي خلافكم مثل اليتامه

الـمـن امخليني للهم والـمـآسـي
طفله بس روحتكم تشيبلي راسي
گـلبي بالفرگه امتحن
دمعي اصبحلي وطن
وانــه بعتاب الـحزن نــوخ ذلـولـي

عيني تـربـي اعله المحامل والگلب زايــــد ونينه
وروحي وي النوگ راحت والجسم ظل بالمدينة
خلصت رمـش النواظر هـا يـجـي هــا مـا يجينه
حسين راحـــل بهله للـدم وهوه ربـان السفينة

مـا اعطل مشيك اگعد يم خواتي
وصحه بويه من همومي ونايباتي
نـوگـك بـيـوم المشن
دمعي اصبحلي وطن
وانــه بعتاب الـحزن نــوخ ذلـولـي

مختنگ صدري بجفاكم ريتي شـح عنها هواها
والنواظر ضلمه صارت هم مشه وياكم ضواها
حسين مـا فاگدله طفله اعليله معقوله نساها
مـا كـسـر گلبه بچيها ابظهره يــوم الـفـارگاها

شـلـون اليروح ابسفر يترك عليله
يـاهو اليساعدها عالفرگه الطويله
كسرت ضلوعي المحن
دمـعـي اصبحلي وطـن
وانــه بعتاب الـحزن نــوخ ذلـولـي

نـــوخ النوح ابدليلي والعتب فــــك ليه بابه
وگلبي بـس الباري يعلم حرگته ولوعة عذابه
مو جمر شجره اويهوّد بالگلب محترگه غابه
رحتو عن داري وفگدكم طـابـع ابدلالـي نابه

ياهو اليطفي الدليل التدوي ناره
يهلي صح يشبه سعير البلمعاره
ابدخنته عيوني عمن
دمعي اصبحلي وطن
وانــه بعتاب الـحزن نــوخ ذلـولـي

مـن بـعـد مـكـه وحرمها لـو نزلتو الغاضريه
طـيـر دزولـي رسـاله اويـه الهوه ودولـي ريـه
كلشي منكم راح اقبله يالمشيتو بحسن نيه
اخ لــو تـدرون هسه فـراگـكم شمسوي بيه

ذابت المهجه ورسايلكم بعيده
واليظل ابـلا اهـل مـحـد يريده
قــبـل ميلفني الچفن
دمعي اصبحلي وطن
وانــه بعتاب الـحزن نــوخ ذلـولـي

علي الشاوي

(( وحــــشـــه ))

وحشه واجساد الحبايب عـالـترايب
وحشه والليله الگمر بسماها غايب
چـان غاطيها بضوا طـول الشهر
وسفه مخسوف ابعمد يم النهر
وحشه وحشه

من جلوس = الليله صلت = الواجبة والمستحب
والـــعـــذر = منك يكافل = ماخذ اعظاها التعب

هالليله ظلمه وعيلتك بعدك شمر يرعاها
والما بچت مـن الجمر من شتمك بچاها
يا وكت تسهر زينبك عباس مـوش ويـاهـا
الجاب الدرب بعمامته شما نعست غطاها

ويلي والليله الحبيب ابلا حبيبة
صارت اخلاف الگمر زينب غريبة
خلصت ليل اهدعش سجده وسهر
وسفه مخسوف ابعمد يم النهر
وحشه وحشه

عالرمال = يـابـو فـاضـل = نـامـو اعيال النبي
والامل = مات برجوعك = من حداهم اجنبي

المتذبحين اهله الظهر شنهي اليريح باله
شما يغفه يگعد مرتعب تركض وراه خياله
يـسـأل بمدمع عمته عـن الحلم واهـوالـه
وعباس عنه شأخره مو طبعه ينسه عياله

تنحب الاطفال تنشد عمنه وينه
ماهو عباس السهم طافيله عينه
بس درت وجهك عَلَي دار الدهر
وسفه مخسوف ابعمد يم النهر
وحشه وحشه

يا حرام = اطفال تبچي = ما بقت ليهم خيم
والگمر = يـم الشريعة = طايح ابصفه العلم

حامي الفواطم منذبح مطروح يم الشاطي
متگنطر العنهن گبل طبگت جفن ما باطي
وجه الگمر ذاك اليشع يا للأسف دم غاطي
وزينب تحشم يابطل بعدك چثيره اسياطي

تدري بالخيمة التلم ضعنك زغيره
ناحله وتبچي الحرم حيرتها حيره
بـعـدك الـمـا منذبح ميـت قهر
وسفه مخسوف ابعمد يم النهر
وحشه وحشه

اي حبال = يـاخـو زينب = حضروهن للسبي
وبالظلام = وي چفوفك = آخر وداع الـعـبـي

ضعن الفواطم بالحبل باچر تـره ايربطونه
ودرب السبي عالمشرعة لو طلعو ايسوونه
واليحچي بيهم لـو بـچـه گـدامك يضربونه
بـغـضـاً بعباس وعـلـي عـدوانـك ايسبونه

ندمه والجينه ابحماه امن المدينة
باقي فوگ الغبره مرمي وذابحينه
ويلي وبحر الشمس جسمه انصهر
وسفه مخسوف ابعمد يم النهر
وحشه وحشه

تدري مال = حمل اخيتك = بعد عينك يالولي
وبالسياط = بـت مـحـمـد = وليه بـاچـر تنولي

بسياط وسفه القافله من بعدك ايمشوها
والتوگع ابچعب الرمح لو رادو ايگوموها
مـن الحبال البرگب كل طايحه ايجروها
وبراسك الدامي غصب شماتك ايبچوها

نـادت اچـفـوف الحمنه بهالمعاره
نمشي عنهن وسفه للظالم يساره
يـلـي فگدك كـاسـر لزينب ظهر
وسفه مخسوف ابعمد يم النهر
وحشه وحشه

علي الشاوي

( يـا أهـل الـغـيـرة )

صوت امن الشام يـا اهـل الغيرة
اخــت الـعـبـاس هـالـيـوم ابحيره
زينب ماتت يخوة زينب چا يمته اتحضروها
تـرضـون الناس الاذتـها بـالـشـام ايشيعوها
يـا أهـل الـغـيـرة

هذا صوت امن الضماير
يـنـدب اصـحـاب المنايـر
زينب ابديره بعيده تحتضر ما يمها حاضر
اصفر وذابـل وجيها
والحبل عايش بديها
لخاطر حسين وبناته عالألم چانت تكابر

حسافة ام الخدر ترحل غريبة ولا أهل يمها
لا بو اليمه لا عباس ولا أحّـد من ولد عمها
الـمـن تتجه ياصوب والـمـن تشتكي همها
لحد اخر نفس تجري مصايب كربله ابدمها

مشتاگه هــواي وتـون مـهـضـومـة
لعيون حسين المسلوبه اهدومه
يا وسفه الگوم الما ترحم بجفاك ايبچوها
ترضون الناس الاذتها بـالـشـام ايشيعوها
يـا أهـل الـغـيـرة

غربة والحره الحنينه
عاشت اوماتت حزينه
چـان اكـو بـيـرغ تحبه عافته عالغبره طايح
دنـيـه وافـتـرت عليها
والهضم شمسوي بيها
والدهر عذّب گلبها من دره بحاميها رايح

حزينة ابلا اهل ظلت تـون مكسورة الخاطر
هـذا اخر نهار الها وتموت امن القهر بـاچـر
اذا شافت حـوافـر خيل تذكر سحگة الحافر
من مولدها حد الشيب گضّتها بچي وعاشر

چا يمته ايطيب خاطرها اصوابه
وگـبـر الاحـزان يـنـهـال اترابـه
آخـر مـا چـانـت تـتـمـنـه اخـوتها ايدفنوها
تـرضـون الناس الاذتها بـالـشـام ايشيعوها
يـا أهـل الـغـيـرة

حيره والفرگة طويله
ماكو واحد تشتكيله
وين اليغمض جفنها والحبايب كلها راحت
عازة العافوها عازه
ياهو اليشيل الجنازة
والولد بالغاضرية عالترب مذبوحه طاحت

خذتهم كربله وظـلـت حزينه ابدمعه مذروفه
ومغصوبة مشت للشام واعله الناگه مچتوفه
تضمد ياجـرح ويطيب يـاهـو الممكن اتعوفه
اسيره وشافت العباس ذبيح امگطعه اچفوفه

شاغت وتصيح عباس الغالي
انــتَ المذبوح لـو يـتـراوالي
سمعوها اتناديك وگامو يالوالي ايشتموها
تـرضـون الناس الاذتها بـالـشـام ايشيعوها
يـا أهـل الـغـيـرة

شـافـت اللوعه ابصباها
وكبرت السوط ابگفاها
والعمر گـضتّـه لچمه وعايشه ابهم ومناحه
نادي يا شاعر بيثرب
زينب ايتانيها مغرب
يبتدي الليل بنعاوي ويغبش بجمره صباحه

مصيبتها تـهـد الحيل ياهو بهالخبر سامع
الـمـا شافو خيال الـها عليها الوادم اتباوع
يحديها الـشمر يـاحـيـف ويشتمّها بالشارع
من الطف لحد الشام بقت مخنوگه وتنازع

تقبل هالحال يـا جـد والينه
ذباح احسين هوه اليحدينه
بالسوط ايمشون ابناته والتحچي ايطگوها
تـرضـون الناس الاذتها بـالـشـام ايشيعوها
يـا أهـل الـغـيـرة

انتهت بس هالمسيه
زيـنـب اتعيش بـأذيـه
والوجع والحسره تگضي والليالي المرمرتها
تترك الدنيه العجيبة
وتلتقي بمها الحبيبة
والزچية ابچفها تمسح عالجروح العذبتها

گضت قصة حزن زينب والمدمع غلگ بـابـه
والگلب الخلص بالضيم راح ايشابگ احبابه
يـاظلم الـوكـت لـم عـون طابع بالفكر نـابـه
ابـد مـا خـلـه بالدلال كتر ما صابه نـشّـابه

ياقوس الموت كتاله اسهامه
وشاف الحوراء صارت گدامه
مثل الاكبر رادت تـرحـل وبدمها ايحنوها
تـرضـون الناس الاذتها بـالـشـام ايشيعوها
يـا أهـل الـغـيـرة

علي الشاوي

عظم الله لكم الأجر بوفاة مولاتنا زينب (ع) لاتنسوني ووالدي من خالص دعائكم..

( شـــور )

حسين
راجــع اخـيـي اومحني گفا
للخيمه اشوفه اوجدمه ثگيل
يــم الشريعه اشـاف اوحنا
معقوله هذا ابن امي يميل

معقوله هوه
جاي ايتلوه
اوكسره ابگفا تنشاف
ابيض سواده
واعليه نــاده
طاح العليه ينخاف

رد حـزنـان واتعنه لعامود الخيمه
شاله اوصاح راح الحارسچن بالهيمه

لازمني چفه اوگلبه جريح
ساكت لسانه ويحچي دموع
عفت العضيد هناكه ذبيح
امهشم يخيتي اعظام وضلوع

زينب خليلچ
ونست دليلچ
فوگ الترب مطروح
راهب خيامي
دلالـه دامــي
يم النهر مذبوح

ظل اهناك عالشاطي اومضروب ابراسه
وجرح السيف متعدي اواصل لحساسه

نايم يويلي افراشه الرمال
واغطا يزينب دم اوسهام
راعي الكفاله وحامي الدلال
بكتاره طاحن چف اوحسام

يختي الحنينه
گطعو يمينه
وذراعه بس اردان
ارماح وحجاره
ودمه ايتجاره
وفاگد يسرته چان

اي يم عون شفت العباس اموذرينه
اوحته الجود عالگاع ابسهم امبدينه

يهمس سمعته وصوته ضعيف
وبعينه نبله ودمها يسيل
وادعته مبچه الگلبه عفيف
ودموعه صبن دم الكفيل

عين ابسهمها
والاخرى دمها
جامد لگيته اهواي
يمسح عيونه
بيمن اخونه
وچف ماكو للوفاي

انه حسين گتله وشابگني ابدمعاته
چي عطشان ماتن بالمنحر چلماته

راجع عليچ لوحدي غريب
بدر الهواشم بحضاني مات
هيمه الخيام ابلايه حبيب
وبلا بو فاضل ظلمه الحياة

امگطع عضيدي
ولميته بـيـدي
وجمرة وداعه اتفور
حامل لوانه
كاسر گفانه
ابسيف الغدر منحور

اخـر صـوت يـا زينب وصاني اعليچن
وسفه النار من ارحل تحرگ رجليچن

علي الشاوي

اسعد الله ايامكم بعيد الغدير الاغر أسأل الله أن يثبتنا وإياكم على ولاية أمير المؤمنين ويتقبل منا هذا القليل بكرمه...

(( آنـــــه غـديـري ))

رضو والما رضو انه غديري
وعلي الكرار للمحشر اميري

انــه مـن گبل الولادة مـن گـبـل تكويني
من عِرض الله الامانه واخـتبرنـي ابديني
اتوقعت لعيون حـيـدر خالقي امسويني
اتوسلت يرزقني حبه وكلشي لا ينطيني

هذا عيد الله الچبير
يا ابن آدم لا تحير
ادعي بارينا القدير
عالولايه ايثبتك
افرح بيوم الغدير
عاهد الموله الامير
گله خليني اصير
يا علي من شيعتك

ابمحبتك ثبت احساسي وضميري
وعـلـي الـكـرار للمحشر امـيـري

اول احچايه اسمعتها امن الزغر بصياري
ياعلي وفرفح دليلي وهـيـه شبت نـاري
ساكن ابروحي وكياني وانتَ سابي أفكاري
يمكن اول واحد انه يعشگ اعله الطاري

عالسمع عاشگ هواك
مهجتي فدوه لضواك
طيب اجروحي بلواك
يا امير المرجله
الغاوي غيرك ماغواك
گبرك شلون احتواك
محد ايشبهك سواك
ياعلي من المله

اضيع ونهجك ايحدد مصيري
وعلي الكرار للمحشر اميري

بالصلاة اعله الرسول المصطفى وذريته
حصنوني اهلي ونهجكم هالنفس هاويته
امـي گالت عـلـه حب المرتضى امربيته
ورايـده ايصير الـه خادم لـو كبر تاليته

علمتني اعله الاصول
حبك وديــن الرسول
يا علي ابكلشي تگول
وانه منها اتعلمت
العارضـه شنهي ينول
خلي يسمعني العذول
شجره يوليها الذبول
لو ابغيره اتمسكت

على درب الوصي حيدر مسيري
وعلي الكرار للمحشر اميري

للحياة بأسمه جيت اولمن ايشيعوني
هم على اسمه وضريحه باچر ايفروني
هايه نعمه وأحمد الله بيها اگر اعيوني
انه من شيعته العالم كلهم ايحسبوني

رافضي الوادم تصيح
وافتخر بالحب ذبيح
تابع النهج الصحيح
والله شاهد عالعشك
گـلـبـي ويـا مستريح
آمـن ابصحنه اطيح
چن حمامات الضريح
والنبض حيدر يدگ

زغيره الوادم اوهوه چبيري
وعلي الكرار للمحشر اميري

علي الشاوي