رفضت الأوفر، ومن يتق الله !

كنت ملاحظ إن واحد من الشباب المشاهير اللي بيعملوا إعلانات على السوشيال ميديا بدأ يعلن لشركات نشاطها محرم، وكان عندي يقين إنه مش عارف الحكم الشرعي في الموضوع. فقلت لازم أوصله بطريقة مناسبة.

كتبت تعليق على أحد بوستاته وقلت له: “أنا مش بحب أعلق على العام عند المشاهير، لو مهتم نتكلم على الخاص.”

بعت له إضافة وتركته فترة يتابعني على حسابي عشان يطمن ويتعرف عليّ أكتر.

وفجأة، لقيته هو اللي داخل يسألني عن حكم إنه يعمل إعلان لشركات من النوع ده. رديت عليه بكل وضوح: “غير جائز.”

بصراحة، كنت متوقع إنه هيبدأ يجادلني ويقولي “طيب اقنعني” أو “ليه حرام؟”

لكن سبحان الله، قالي: “تمام” وانتهى الكلام!
والأغرب، إنه تاني يوم الصبح لقيته باعت لي رسالة جميلة وشاكرني على النصيحة. 👇🏻

يا جماعة الخير،
والله العظيم، الناس فيها خير مهما كنت شايف من مظهرهم إنهم بعيدين عن ربنا. أحيانًا الشيطان بيدخلك من باب الإحباط ويخليك تحس إن الدنيا سودة وإن الناس مش هتقبل النصيحة أو الدعوة بالحسنى. كل ده عشان يبعدك عن إنكار المنكر باللطف واللين.

تذكر دايمًا:
الدعوة بالأسلوب الحسن ليها أثر كبير وبتفتح قلوب الناس مهما كانوا بعيدين عن الطريق.

وطبعًا مش هقول اسم الشخص ده، ولكن ربنا وحده يعلمه. وأسألكم الدعاء له بالبركة في الرزق وأن يرزقه الهدى والتقى والعفاف والغنى. 🤲🏻 ونسأل الله لنا ولكم الهداية والقبول.

#باسم_عليوة
#شريعة_أوديت

الهَمزِ واللَّمزِ آفة أصابت الناس ولم تترك حتى أهل الفضل والدين،خاصة في مواقع التواصل الاجتماعي!

قال ابنُ القَيِّمِ: (وكم ترى من رجلٍ متوَرِّعٍ عن الفواحِشِ والظُّلمِ، ولسانُه يَفري في أعراضِ الأحياءِ والأمواتِ، ولا يُبالي ما يقولُ!)

فاللهم احفظ ألسنتنا من الذلل واحفظ صدورنا من الحقد والغل ظاهره وباطنه 🤲🏻

#باسم_عليوة
#شريعة_أوديت

اوعى تكون بتأجر عقارك لمشروع حرام!

هل يجوز تأجير وحدة عقارية لمشروع نشاطه فيه شبهة حرام؟

✅ الإجابة:
لا، ما ينفعش تأجر شقة أو محل أو أي وحدة عقارية لمشروع الغرض منه نشاط محرم شرعًا، لإنه لازم تكون المنفعة مباحة شرعًا.

📌 وده نص معيار الإجارة من الأيوفي (1/5/1):
“يشترط في العين المؤجرة أن يمكن الانتفاع بها مع بقاء العين. ويشترط في المنفعة أن تكون مباحة شرعًا، فلا يجوز إجارة مسكن أو أداة لعمل محرَّم مقصود من الإجارة؛ كمقر بنك يتعامل بالفائدة، أو حانوت لبيع أو تخزين ما لا يحل، أو سيارة لنقل ما لا يجوز.”

✔️ يعني باختصار:
• لو النشاط في شبهة حرام، تأجيره لا يجوز.
• مثال: تأجير محل لبنك ربوي، أو متجر يبيع سلع محرمة، أو مكان لممارسة نشاط غير مباح شرعًا.

📌 طيب، لو المستأجر استخدم الوحدة في نشاط حرام بدون علم المؤجر؟

🔹 هنا الشروط والأحكام اللي في العقد هي اللي هتحكم المسألة. لازم تكتب في عقد الإيجار شرط واضح يمنع استخدام الوحدة في أي نشاط محرم، وتوضح فيه موقفك الشرعي.

🔹 مقترح لشرط يضاف في العقد:

“لا يجوز للمستأجر استخدام الوحدة العقارية في أي نشاط محرم، وفي حالة اكتشاف ذلك، يعتبر العقد مفسوخًا من تلقاء نفسه، وإذا تم ذلك بدون علم المؤجر، فالإثم الشرعي على المستأجر والمؤجر بريء منه.”

⚠️ الخلاصة:
✅ لو عارف إن النشاط محرم، ما تأجرش من الأساس.
✅ لو مش عارف، حط الشروط دي في العقد عشان تضمن إنك بريء شرعًا لو حصل أي تجاوز بدون علمك.

وربنا يخلف عليك باذن الله ،

#باسم_عليوة
#شريعة_أوديت

خلوني أحكي لكم بعض المقتطفات من حياة عمي حمدي اللي توفي اليوم، لأول مرة بحكيها للموعظة ، وأولاده نفسهم لم يعيشوا أغلب هذه اللحظات فقلت أوثقها و أبشرهم بها .

كنت في المرحلة الابتدائية، وكان عمي حمدي ملتحيًا متدينًا كما هو، فما رأيته إلا كذلك. كنت بشوف شخص غريب جدًا عن الوسط اللي إحنا فيه، يكاد يكون الوحيد في عائلتنا من الدرجة الأولى اللي كان ملتحي، وطبعًا في الوقت ده كان اللي ملتحي يعني “إرهابي” كما كان يروج الإعلام آنذاك .

في هذه الفترة، كان عمي غير متزوج، وكان يحب أبي جدًا وأبي يحبه أيضًا. كان بيجي يقعد معانا في بيتنا بالأيام، ولو والدي اتعصب علينا أو ضربنا، كان يلبس وينزل من البيت من شدة رقّة قلبه، لا يتحمل هذا الأمر.

إذا ذُكر " غض البصر والحياء وحسن الخُلق " تصورته ، دائمًا كانت صورته تتبادر لذهني؛ شخص خجول، وجهه يحمر خجلًا إذا حدّثه أحد.

عايز أقولكم إنه وهو قاعد معانا في البيت كان بيخبي لبسه من أمي عشان ما تغسلهوش لأنه محرج منها ومش عايز يتعبها
،

وكان لما بجي يفطر عندنا في رمضان في البيت يجيب معاه الفطار عشان ما يقولش لوالدي وهو اكبر منه يجي له البيت وفضل كده حتى بعد وفاته

كان يتعرض لمضايقات كثيرة من أفراد المجتمع ، كنت اشاهد بعض الاقارب من السيدات “اللي تجري وراه عايزة تسلم عليه” أيوه بيكون هزار بس فعلاً وقتها كانت حاجه غريبة ، ومستنكرين خجله وعدم موافقته على ذلك وكأنه شخص غريب هبط من كوكب آخر .

وكان من رقة قلبه لما بيدخل على والدي في المستشفى خلال مرضه، كان لا يتحمل النظر إليه من رقة قلبه وحبه له، وتظهر عليه علامات التوتر والقلق.

لو ينفع أتكلم بالتفصيل عن الضرر اللي كان بيقع عليه نتيجة انه أمين في عمله كنت كتبت، لكن ربنا يعلم اللي حصله بسبب هذه الأمانه وعدم رضاه بالفساد

وفي مرحلة زواجه، ولا أنسى هذا اليوم، كأنه حدث بالأمس. دخل علينا بالجلباب الأبيض، وطبعًا ده كان أمر غريب جدًا بالنسبة للعائلة كلها. ولم ينتهِ الأمر عند هذا الحد، فقد أقام فرحًا بدون موسيقى، وعروسه كانت منتقبة، مخبأة وراء ستار أبيض. مرت هذه المشاهد أمامي وأنا طفل صغير، لكنها محفورة في ذاكرتي حتى اليوم.

ومع انشغالاتي وسفري الدائم، كنت قليل الود به، ربنا يغفر لي تقصيري. لكن عندما اتصل به، لم يكن يعاتبني أو يقول لي كما يفعل الآخرون: “أنت فين؟ ما بتسألش ليه؟” بل كان ودودًا، طيبًا، يقول: “الحمد لله إنك بخير وأخواتك ووالدتك بخير”.

إذا أردت أن أصف حاله، أقول إنه شخص رزق سلامة الصدر، وكفى بها نعمة تُدخله الجنة بغير حساب، نحسبه كذلك ولا نزكيه على الله.

في آخر أيامه، مرض مرضًا شديدًا في المخ، وكأن الله كان ينقيه من بقية الذنوب والخطايا قبل وفاته. رحل في هدوء، دون بهرجة، ولا سرادقات، ولا نعي، بنفس البساطة التي عاش عليها.

فكم من مجهول في الأرض معروف في السماء واحسبهم منهم والله حسيبه.

رحمه الله رحمة واسعة واجعل هذه الليلة أسعد لياليه ??

#باسم_عليوة
#شريعة_أوديت

هل الهَمِّ يُكفر السيئات !؟

قال رسول الله ﷺ: ما يُصِيبُ المُؤْمِنَ مِن وصَبٍ، ولا نَصَبٍ، ولا سَقَمٍ، ولا حَزَنٍ، حتَّى الهَمِّ يُهَمُّهُ؛ إلَّا كُفِّرَ به مِن سَيِّئاتِهِ.

النَصَب : التعب ، الوَصَب : الوجع الدائم

‎والهمُّ هو الكَرْبُ والغَمُّ بسَببِ مَكروهٍ وقَعَ بهِ، سواء الهم بما سوف يحدث له في المستقبل، عشان كده بيقولوا "شايل الهمُّ " ، أو الغم والحزن بسبب ما حدث له في الماضي

لذلك كان من دعاء النبي ﷺ يستعيذ من الهم والغم والحَزَن

بل قال تعالى : {وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ وَبَشِّرِ الصَّابِرِينَ}

فاللهم فرج هم المهمومين ، ونفس كرب المكروبين ، واقضِ الدَين عن المدينين ??

#باسم_عليوة
#شريعة_أوديت

هو أنا ينفع أستأجر محل وبعدين أؤجره من الباطن لحد تاني؟!

ورد في المعيار الشرعي رقم (9):

“يجوز لمن استأجر عيناً أن يؤجرها لغير المالك بمثل الأجرة أو بأقل أو بأكثر، بأجرة حالّة أو مؤجلة - وهو ما يُسمى بالتأجير من الباطن - ما لم يشترط عليه المالك”.

يعني يجوز لك ذلك ، إلا لو وقّعت على شرط في عقد الإيجار بأنه لا يجوز لك الإيجار من الباطن للغير، فلا يجوز لك مخالفة هذا الشرط لعموم حديث: “المسلمون على شروطهم”.

فياريت تتفقوا على النقطة دي من البداية ولو مفيش اتفاق واضح فالقانون هيكون معتبر في الفصل والحكم

#باسم_عليوة
#شريعة_أوديت

سؤال للشباب عندما تسأل يوم القيامة هذا السؤال "وعن شبابِه فيما أبلاه"!؟

ماذا سيكون ردك ، قولنا الإجابة من باب تشجيع غيرك??

https://www.facebook.com/share/p/1AUHoU8HGC/

#باسم_عليوة

اتعودت لما أكتب بوست يثير الجدل أو يتفهم بكذا معنى أحذفه، ديانة لله ❤️

تصدر الرويبضة للتحدث في أمر العامة نبوءة لا مفر منها
#باسم_عليوة

⚠️ أكيد كل يوم بيجيلك مكالمات من أرقام غريبة تعرض عليك شقق وفيلات، وغالبًا بتكون يا إما مش مهتم، يا إما بالفعل اشتريت.

ففكرت في مبادرة جديدة لتغيير واقع عقود شركات التطوير العقاري في مصر ?

و أتمنى تكون نافعة، وناوي أبدأ بنفسي فيها بإذن الله وأعمل كده :

لما يكلمك أي موظف مبيعات “سيلز”، جرّب تقول له الرسالة دي:

“لو عدلتوا الشروط غير الجائزة في العقود، ممكن أفكر أشتري منك، وأعرف ناس كتير هتشتري لو عملتوا كده.”

طبعًا هيسألك طيب ممكن تقولي الشروط اللي حضرتك شايفها غير جائزة شرعًا من وجهة نظرك

الشروط المقترحة للتعديل:

❌1. الشرط الأول: غرامة التأخير
✅البديل الشرعي: ممكن بدل فرض غرامة، يحل القسط المتأخر مع القسط اللي بعده " يعني لو اتأخرت في القسط الثاني يبقى عليك الثاني والثالث " أو تعمل خيار لفسخ العقد بعد شهر بدل شهرين.

❌2. الشرط الثاني: الاحتفاظ بالملكية لحين سداد الأقساط بالكامل
✅البديل الشرعي: استبدله بعمل حظر بيع لحد سداد كامل الأقساط بدل من الاحتفاظ بالملكية.

ليه ده مهم؟

الموظف هيسجل الكلام ده في نظام الشركة المعروف بـ “CRM”، وده بيتحلل بشكل دوري عشان يفهموا أسباب عدم إتمام البيع، وده بيأثر بشكل كبير في القرارات الإدارية وبيوصل لمجلس الإدارة.

اعمل الخطوات دي بنية النصح و إنكار المنكر وانها سُنة حسنة فلك أجرها وأجر من عمل بها إلى يوم القيامة ، واحتسب الأجر بأنك بتحاول تغير الواقع للأفضل، وإن شاء الله تكون بداية لتغيير في السوق.

جرب ولو حصل أي نتيجة، شاركها معايا هنا في التعليقات . ?

ربنا يجعله في ميزان حسناتنا جميعًا. ??

#باسم_عليوة
#شريعة_أوديت