ــــــــــــــــــــــــــــــــــــــــــــــــــــــ
📜 القصيدة: كـلشي ولاَ علي
🎤 أداء: سيد فاقد المُوسَوي
🖋 كلمات: الشاعر حَمزة الحسناوي
ــــــــــــــــــــــــــــــــــــــــــــــــــــــ
ماظل واحد إلي
بالله وبيكم هـلي
لا كلشي ولا علي..يوليـــدي .. يوليـــدي
ــــــــــــــــــــــــــــــــــــــــــــــــــــــ
نسكت گبل لو سَولفت يابعد أبوك وروحه
ما واصل لجدمك ترب ماچنت اخلهَ ايلوحه
و افترت وانا الگمت بتراب اغطي جروحه
باوعت بوية لرگبتك ماهيه مو مذبوحه
من بين السيوف بالگوة شفته
تترامض الناس كلها لرگبته
صاحوا هزوا الرمح
حتى يحس بالذبح
واخر شي ينذبح..يوليـــدي .. يوليـــدي
ــــــــــــــــــــــــــــــــــــــــــــــــــــ
لاتبقى بالخيمة مَرهَ جبت المگطع جبته
خل نبچي ونصيح بعد مو مال تخلص سكته
ياخيل بس خلي افتهم ساحـگته لو شايلته!!!
هاي الشوية المن علي عود شكثـر جمعته
شايلته السيوف ومطشره ابنه
كل خطوة بالگـاع گمت ألگه منه
صحت بدمعي اليهل
ما اريده يرد عدل
بس مو هَيچ الكتـل..يوليـــدي .. يوليـــدي
ــــــــــــــــــــــــــــــــــــــــــــــــــــ
يّدَنه شفته و كـيفت واركض رحتـله ابهمة
ثاري إبني ما ضل بي ثگـل والهـوة يدني بجسمه
لاينجمه لا يندفن لا بي مكـان انلزمه
دَفانه باچر من يرد يدفن اهدومه ودمـه
درب ابني مسدود وتراكـضوله
المالحـگوا بي من مات إجوله
مايرتاح واحد حتى لو مات
وادم بالعدّل والميت تعيل
بصدره الحـافر گعـد
و مطشرين الولد
شاخذ منك بعد..يوليـــدي .. يوليـــدي
ــــــــــــــــــــــــــــــــــــــــــــــــــــ
اكـبر هضم من تـِنكسر وانته ابو الراس العالـي
وتغطي دمعك بس يظل ظهـرك مبين خـالي
بوليدي ظليت أشتبه بوليدي ذاك الغالي
اشگد گبله ماخذ للخيم مو هوَ يطلع تـاليِ
هالمرة بس كون يوليدي انته
صاحلي رد بي مو هو جبته
صاحن صوت انسمع
هذا الگوة انجمع
هم مو ابنك طـلع..يوليـــدي .. يوليـــدي
ــــــــــــــــــــــــــــــــــــــــــــــــــــ
هالمرة ماريد اشتبه وابلي المخيم بلوة
من بين كل ذيچ الجثث لميت واحد گوة
مو مال ادور عليه بعد يا ليلة گمت اتلوه
شوفيلي هذا الجبته الچ بس كون يطلع هوَ
اي هوَ يحسيـن إبني و وحيدي
تتأكد تريد؟ من رجفة إيدي!
صحت اعليك وطحت
اي هوَ اتأكدت
من جبته وتيهـت..يوليـــدي .. يوليـــدي
ــــــــــــــــــــــــــــــــــــــــــــــــــــ
@faqdalmawsawi

ــــــــــــــــــــــــــــــــــــــــــــــــــــــ
📜 القصيدة: على الترابة ماتت رقية
🎤 أداء: سيد فاقد الموسوي
ــــــــــــــــــــــــــــــــــــــــــــــــــــــ
-بليل الخرابة وعلى الترابة ماتت رقية-
يتيمة من الظعن نروي خبرها
تلاثة من الأعوام ينعد عمرها
راحت سبية وحرگوا گلبها
وتريد أبوها يگوم يحضرها
طفلة وسبوهـا وتريد أبوهـا..بالغاضرية
ــــــــــــــــــــــــــــــــــــــــــــــــــــــ
من وصلوا الشام نزلوا خرابة
ذكرت رقية حسين ومصابه
كل لحظة وتصيح بابا بابا
عذبني الفراگ شجرع عذابه
مابيه كل حيل لمساهر الليل..عوّد عليه
ــــــــــــــــــــــــــــــــــــــــــــــــــــــ
يا بيت الأحزان اسمع رقية
لو ونت دگول امها الزچية
وتريد أبوها بهاي المسية
ما غمضت العين بس للمنية
ياحضن الحسين بي تغمض العين..راح من اديه
ــــــــــــــــــــــــــــــــــــــــــــــــــــــ
تگاطر دمعها يم راس ابوها
تشكيله من ضيم گوم السبوها
فك عينك وشوف عيني اضربوها
مثل امك انا يوم الولوها
إسمع ونيني سطروها عيني..مثل الزچية
ــــــــــــــــــــــــــــــــــــــــــــــــــــــ
لا نشف دمعي لاشفت ضيمي ولا عني سامع
عن روحي يحسين ضليت ادافع
اشگف بدية و اجري المدامع
وبخدي مرسوم طبع الإصابع
خدي التحبه خصمك يضربه..
ــــــــــــــــــــــــــــــــــــــــــــــــــــــ
حاچيني وشلون اگطع دمعتي
وگبالي يحسين مچتوفه عمتي
مثل امي صارت واست غربتي
من انحب دگول ياعمة سكتي
تخاف السبوها لا يشتموها..شتحمل أذية
ــــــــــــــــــــــــــــــــــــــــــــــــــــــ
@faqdalmawsawi

ـــــــــــــــــــــــــــــــــــــــــــــــــــــــ
📜 القصيدة:عَايف دَاره
🎤 أداء:فاقد الموسوي
🖋 كلمات: علي مَالك الموسوي
ـــــــــــــــــــــــــــــــــــــــــــــــــــــــ
زينب عِزيز الدَار عايف دَاره
مو حِلوة اشوف الليله گلبي اخَباره
ـــــــــــــــــــــــــــــــــــــــــــــــــــــــ
مِن هَسّه اخوچ حسين واگف گلبه
متحزّم إعليه وكته بيش يِطلبه؟
مِن هَسّه زينب بِدت بينا الغُربة
يا هُوَ مِثلي ببيته تيّه دربه؟
نفس المُخيّم گلبي تلهب نَاره
مو حِلوة اشوف الليله گلبي اخَباره
ـــــــــــــــــــــــــــــــــــــــــــــــــــــــ
يبچي الحِنين وهَم بِدت تبچيله
وتگلّه ما اشوفنها تگضي الليلة !
دخيلچ يگلها و هَم تگلّه دخيله
ما بيها حيل وهُوَ دافن حيله
وحسين وَرّم گلبه مِن صياره
مو حِلوة اشوف الليله گلبي اخَباره
ـــــــــــــــــــــــــــــــــــــــــــــــــــــــ
گرّب علينا العيد هَاي اللوعة
ومبيّنة ياهي الوادم المفجوعة
مِن تلگه واحد غَارگ مِن دموعه
عزاز گلبه العَاصرين ضلوعه
محتارة رُوحي تريدهم محتارة
مو حِلوة اشوف الليله گلبي اخَباره
ـــــــــــــــــــــــــــــــــــــــــــــــــــــــ
لو نشدت الوَادم شَ ارد إعليها
وبخيره چان وصايته مغطّيها
ما تنحچي المّا هُوَ حَتّىٰ احچيها
دگّة الباب رويحتي تبچّيها !
اللهُ الاحد لو لفوا خطّاره
مو حِلوة اشوف الليله گلبي اخَباره
ـــــــــــــــــــــــــــــــــــــــــــــــــــــــ
يُوجعني كِلشي وكلشي ما ضَل بيّه
مگضية اموتن يَلّه احس مگضية
هلبّت يسيّر ظيم گلبي إعليه
شُوفة عزيزي بكل وَكت عيدية
بَس هُوَ يدري بگلبي شِنهي اسراره
مو حِلوة اشوف الليله گلبي اخَباره
ـــــــــــــــــــــــــــــــــــــــــــــــــــــــ
شِلّي بحياتي وبالعُمر هَم شِلّي؟
گطعوا الهوا ولا بيّه يگطع خلّي
مشلوع گلبي وخل اموت احسنلي
ما مِش حنين بِساع خَل يفزعلي
طَلّاب ثار وگلبي كتلوا ثاره
مو حِلوة اشوف الليله گلبي اخَباره
ـــــــــــــــــــــــــــــــــــــــــــــــــــــــ
@faqdalmawsawi

< °بسمة تعالى °>

القصيدة :- دفان اهلنه
أداء :- سيد فاقد الموسوي
كلمات :- محمد نعمة

°~°~°~°~°~°~°~°~°~°~°~°~°~°~°~°~°

تانيني يادفان اهلنه
هاي امي ام المحنه
نزلهه ماينحمل فركاهه
وافتح جفنهه وشيلني وياهه

هاي امي بچتافك صدك لو انا حلمان
ماخذهه وين لياكبر اوكف يدفان
تدري بوداع الأم صعب للكلبه تعبان

باوع علينه وشوف حزن العدنه
الليل ما لابس سواد بكدنه
لمن اجه التابوت شايل امنه

الدمعه صارت هاكبرهه بخدنه
مو لحضه تكتل من خذاهه
جيب اليشيل أيدي بوراهه

صحنه عليهه مو وكت روحه
وحسين طلعت من وكت روحه

تانيني يادفان اهلنه تانيني يادفان اهلنه

~°~°~°~°~°~°~°~°~°~°~°~°~°~°~°~°~

ياهوه عنده هيجي ام كلش حنينه
الليل هذا تخلصه بس تفتر علينه
ترجف اديهه من البرد وتغطي بينه

جان الأمان ابيتنه مغطي الكاع
من ماتت امي اتغير وكلشي ضاع
الموت مدري منين اجه بساع

وانه واخواني صغار مو مال وداع
يمر على البيت الهوى الهاب
نذكر ضلعهه الكاسره الباب

التموت امه يموت كل حيله
يطلع حركته بشمت الشيله

تانيني يادفان اهلنه. تانيني يادفان اهلنه

~°~°~°~°~°~°~°~°~°~°~°~°~°~°~°~°~

بيا دمعه اسولف واشتكي سمعوني يحباب
كدامي باب اهلي احترك وامي وره الباب
انعصرت وطاح الطفل وما طاح الحجاب

اهنا عرفنه الموت مابيه غايه
من شفت فضه تلف بالمصلايه
اصعب ليالي جانت بعمري هايه
راوتني سبحه عليهه دم اهوووايه

يكضي الصبح ويصير الغروب
ويبدي الوجع من فوك الكلوب

ابجي على امي لو على اخواني
من هسه واحد شابك الثاني

حسبالي نامت فاطمه ماادري بيه
من غمضت بالمغتسل وماتت اديه
لبسن حمامات السمه اسود عليهه

اتصور امك جايه بنص تابوت
تباوعلك وترجع تغمض وتموت
دكله اكعدي وهيه ما تسمع صوت
ويشيلهه وياخذهه كوه الزاتوت

حدك وياهه لعتبت الباب
ويصير ردن هدومك انكاب

ويلچمك اليسأل على أحوالك
وسوالف امك تفتر ابالك

الماله ام ماله وطن مثل اليسافر
ويصير بيت اهله مثل بيت المكابر
يضل يحسب الموته ويعد هاهسه باجر

اليفكد امه وهو عمره صغيرون
من البواجي ماتضل عنده عيون
تكبر جروحه على امه من يسئلون

لكبال عينه جنازة امه
كل امنياته تصير ضلمه
تخلص حياته بحسره وبلوعه
ومن يذكر امه يلزم ضلوعه

تانيني يادفان اهلنه تانيني يادفان اهلنه

________
نهدي ثواب هذا العمل الى المرحوم ( سجاد يحيى)

@faqdalmawsawi

®< بسمة تعالى >®

القصيدة :- انت رايح
أداء :- سيد فاقد الموسوي
كلمات :- سجاد الخرساني
________________*_

جنت اخاف من الوداع وهسه صار
ضلمه مو چي ضلمه لا بس مدري ليش
الليل صاير يطلع بعز النهار
ما اغار عليك من اهلي استحيت
هسه لو تدري شكثر ضليت اغار

ماكو نار بثوبي چا محتركة ليش
ثاري قلبي اليحترك مو اله نار

ياروح من تالي مليت من حالي
والصار چتالي اقرب من الكلب
مكتوب ينساني ياموت شمتاني
مادام خلاني ابجي كبال الغرب

كمت ماشوفه دربي انكسر كلبي اعله كلبي
اذا نشدوا عليكم شكلهم فاركوني

ياروحي الدللوني...... مشو ماودعوني

______________

جرب فراكك ثواني وبله شوف
شوف كلبي شكم جرح خليته ضام
بنص ضوه الله عيوني اخليها بجفاك
لا ضوه يبين ولا حتى الضلام
استلذ بالفركه منك مو غريب
كون من غيرك كلت كلش حرام
عيوني ليليه بحلم تتمنه اجيك
اهوواي عندي احلام بس ماجاي انام

تانيت چم ليله..... وفراك شد حيله
كلساع ادعيله..... يارب نرجع سوه
لو راح مايرجع.... والروح ماتطلع
وياي من تكطع.....كون يضيع الهوى

ضعت والليل اجاني وتكبرني الثواني
سؤال الهدلي حيلي شجاهم ماخذوني

يروحي الدللوني.....مشو ماودعوني

______________*_

حالهم حال النفس لو اكطعه اموت
كون طير كبالهم يوميه احوم
لا سهر لا فركه لا كلساع اضيع
كون مختصرتهه ميته ثاني يوم

ماتهنيت بوداعك من بعيد
عطلتني چدامي بيهن كمت الوم
انتجي اعله الكاع اريد اوكف واطيح
انته جازي وانه ليهسه اريد اكوم

ياحيل ياخذني.... والكاك شابكني
ياريت تحسبني.... من تحسب بل ضعن

وتكول ماكمتي.... وياي حتى انتي
تمشين يبنيتي.....حالج حال المشن

وكلك تعبي يسوى الك كل عمري فدوه
يمن كون انت سالم عساهم كطعوني

يروحي الدللوني..... مشو ماودعوني

______________*

مره اكولن كون اموت ومره اكول
خاف اموت ومحد يطلع وراي

انه كلي بكيفك وبس وحده اريد
من اروح وياك كون بكيفي هاي

مره عن عبدالله كتلك وكتلي زين
راح يكبر لمن تشوفينه جاي

بس بعد من ينذكر يمج اريد
مااكلج ليش بس ثوبيله ماي

حسيت شي بيها.... بهداي يحجيهه
بس عود غص بيها.... ومدنك من حجه

حباه من صغره ويكوم ينتضره
شماه من نحره ودار عيونه وبجه

خفت من هل علامة وصحت كون بسلامه
اذا مارد اليه بعد يادنيه هوني

يروحي الدللوني..... مشو ماودعوني

________________*

بل خيال تخيلت جن شي غريب
ناس تركض عله الحرم مدري شتريد

خطوة المجويه من تمشي اعله كيف
وانته مو يمهم طحت طايح بعيد

هوسه بس ردت افتهم يابويه ليش
بل حوافر حاطين شكد حديد

اطرد افكار وكلت لا ماكو شي
وترجع النسوان تركض من جديد

ياحيف نسوانك.... كدام عدوانك
يحسين واخوانك....محد بيهم عدل

وتصيح وين اهلي بي روح يفزعلي
وافكار ترسملي زينب فوك الهزل

وحك بختك يبتخي تضل ذمه بركبتي
اذا لا سامح الله سبوها وماسبوني

يروحي الدللوني..... مشو ماودعوني

*_

نه*دي ثواب هذا العمل الى المرحوم ( سجاد يحيى)

@faqdalmawsawi

بسمه تعالى
___

القصيدة :- لا تسألي يافضه
أداء :- سيد فاقد الموسوي
كلمات :- محمد النواس
-_-_-_-_-_-_-_-_-_--_-_-_-_-

شلونك لا تكليلي يفضه
اريد ارتاح تالي شويه لحضه

انه بلا حيل راجع وانه ابو الحيل
يفضه
اله الله اليوجعنه عيونه باليل
يفضه

درب ماشوف بيه اصبعي من الدموع
وطفه الليل فوانيس المدينه

غريب ووحدي وبعيده الكبور
وفوك چتافي ماخذلي حنينه

درب مابيه اسم الله من اعثر يكول
ويرد للبيت بيش الدفن عينه

اطب للفاتحه بياشيب بياحيل
شيكومني للناس التجينه

لا تسألي يافضهُ لا تسألي

_-_-_-_-_-_-_-_-_-_-_-_--_--_--_-_

كمت كل مااشوف باب مدفوع
اذكر باب بيتي وتبدي الدموع

علي الما باجي عمره شابع اثغيب
يفضه
اليطلع شيبه شيحطوله ويطيب
يفضه

الابو من يشوف ولده يبجون
بينه وبين روحه يكول حكهم

جنازة فاطمه من طبت البيت
الحسن وحسين طلعوا من غرفهم

واحد يعثر بواحد يركضون
وحرت مابين الم دمعي والمهم

وكد ما جلبوا بالنعش الاولاد
شلعوا خشبة من تابوت امهم

لا تسألي يافضهُ. لا تسألي
_-_-_-_-_-_-_-_-_-_-_-_-_-_-_-_-

يفضه اليوم اجيت بكسرة الخاطر
ما ينحسبن چم عثره عاثر

جنت لربعي انطي أيدي من اجيهم
يفضه
عكست هسه ربعي انطوني اديهم
يفضه

انا الا صايره ولا دايره وياي
جنازة وفوك متني جنازة شايل

عيونك ما تلحك تقره مضمون
من يلوحها ماي الرسايل

ياهو المثلي مرته انعصرت اباب
ورد للبيت لازم ظهره مايل

ضلع بالمغتسل كضيته مكسور
وأثر جف اعله خدها انطبع كامل

المن عايش سمعي نوحي
لو ميت وياها وطام روحي

انا ذاك الرجع كوه من الكبور
يفضه
اول مره احس بروحي مكسور
يفضه

الموت انطيته اديه وعافني وراح
ورجع من بيتي اخذ اغله ابتسامه

ياهو العاش مثل العشته ياناس
ربعه تكوده وتلبسه العمامه

حجايه المو محلها تهدك اهوواي
مثل حجار مشمور اعله جامه

ردتها بوكت ثاني اعليه تنكال
الف الحمدلله اعله السلامه

اخ يافاطمة

_______
نهدي ثواب هذا العمل الى المرحوم ( سجاد يحيى)

@faqdalmawsawi

☜ بـسمـه تعـالى ☞

الـقصـيدة : عطر المشاية
اداء : سيد فاقد الموسوي
كلـمات : محمد الموسوي

✮✮✮✮✮✮✮✮✮✮✮✮

يالغالي وستر خيامك .. لو كل الدنيا أيامك
يحسين الظل خدامك .. هذا عشگنا حلاته جروح
مشتاگه العين هوايه .. فرحها بجية راية
گرب عطر المشاية .. عطر الخدمة يرد ويروح

كاتلني گلبي بهايم
مشتاگ اصيحن خادم
ومتاني هل الجيه سهرانة عيني تناطر
ومتاني جية زاير بلكت يمر بيه
تحلى الشوارع باجر .. بالأربعينية

✮✮✮✮✮✮✮✮✮✮✮✮

نترسها الدنيا مواكب .. ونخدمك شاب وشايب
محد فوگك يا حاجب .. انتَ العين وماي العين
لو ماخذ مت عاشورك .. بمقابل منه نزورك
ضلينه بحسره بدونك .. ضلمة الدنيا بلا حسين

لو ماخدمتك هايه والركضة والمشايه
ماضل شرف بينا
منك عرفنا الغيرة
يا شيخ هاي الديرة
بس انتَ غالينا
الدنيا هاي زغيره بالخدمة هاي خلينا

✮✮✮✮✮✮✮✮✮✮✮✮

يالحبك غير حالي .. شما ابچيلك هنيالي
ما گلت لغيرك غالي .. ما رايد مال ولا جاه
ما اسوه تحطني بگلبك .. بس رايد في بگربك
يا اثمن شي عند ربك واقدس شي ربك سوا

ياهو المثل محبوبي
شباچه يمحي ذنوبي
كلما اجي مقصر
ماعندي غيره احجيله
ياهو الاروح اشكيله
خاطر الي يكسر
بس الحسين دخيله رغم الذنب يستر

✮✮✮✮✮✮✮✮✮✮✮✮

أسرت گلوب الوادم .. يهنياله العندك خادم
ويعيش بدربك هايم ..مو كل واحد حصل هاي
يا رحمة من الله ونازل .. عابس مجنونك عاقل
يالكلش ما تستاهل .. تعطش وانت بديك الماي

ما شفت مثلك واحد
طشر الماي البارد
وخيامه عطشانه
مثلك منو مسلبينه
وساترنه ومربينه
وزينين سوانه
لو ما نظرته وعينه ضيعنه دنيانا

✮✮✮✮✮✮✮✮✮✮✮✮

صرت لخدامك خيمة .. ومشيب گلبك ضيمه
نسوانك نص الهيمه .. غربه خلافك عميه العين
يحسين بهايه الغربة .. ويلمنا فياي الگبه
واحنه الماي من نشربه .. نشرب يلا نگول حسين

يالعيشتنا بخيرك
مو حلوة نخدم غيرك
يالغيرك شعدنا
انتَ اكبر من الغاية
والخدمة والمشاية
والدمعة شاهدنا
يمك قليله هواية حبنه وقصايدنه

✮✮✮✮✮✮✮✮✮✮✮✮
@faqdalmawsawi

{بسمة تعالى}

اسم القصيدة :- رايات العزاء
أداء :- سيد فاقد الموسوي
الكلمات :- محمد البطحاوي

____

رفعوا رايات العزاء
استقبلوا طف كربلاء
بالدمع

محرم ياخدم اجه واهلاله دم
الحضر دمعته وحزامه خادم

الباني چادره يبلغ المادره
تره شهر الذبح ياناس قادم

حضروا لحسين الدمع لبسوا السواد
بعد چم يوم وتجينه ايامه

إلي ناسي ومامحضر روحه زين
ليش يحسب روحه من خدامه

خادم لخادم يروح
يكله اجه شهر الجروح
بالدمع

رفعوا رايات العزاء
استقبلوا طف كربلاء
بالدمع

°~°~°~°~°~°~°~°~°~°~°~°~°~°~°~°

الاسود ينلبس على الضل بالشمس
وانكثر العزه لبن الزچيه

المجالس قائمة. بكثر نجم السمه
وتصير الشوارع حُسينيه

وين ما فارغ شبر ننصب عزاء
وتنسمع لطمتنه كون بصوتها

روحي تركض وين مامنبر يصير
وماكو مجلس للحسين يفوتها

الصرخة تبقى ويالسنين
خالد ايضل الحسين
بالدمع

رفعوا رايات العزاء
استقبلوا طف كربلاء
بالدمع

°~°~°~°~°~°~°~°~°~°~°~°~°~°~°~°~

على الحب والعهد نضل وللابد
بدمعنه انلاكي عاشور المصيبه

محرم بي جرح. نحر شاله رمح
وبي زينب يسموها الغريبه

كون عام يصير عاشور الحُسين
حتى بالخدمه نخلص ايامنه

والچوادر تبقى مبنيه بسواد
وبالحداد تضل ترف اعلامنه

هاي امنيتي اكول
كون تقبلها البتول
بالدمع

رفعوا رايات العزاء
استقبلوا طف كربلاء
بالدمع
°~°~°~°~°~°~°~°~°~°~°~°~°~°~°~°~

وصل شهر الدمه. اليبچي فاطمه
نحر مكطوع منه. وشيب دامي

قميصه ينشر. سبوا حتى الخدر
وفوك السحك. جان حسين ضامي

حسين طايح والحوافر بيه تدوس
راحت وردت يعالم فوكه

كون يلطم يكضي ليله والنهار
اليدري هيجي صاير ابمعشوكة

حسين عاشوره چبير
مو نعش چثته ابحصير
بالدمع

رفعوا رايات العزاء
استقبلوا طف كربلاء
بالدمع

°~°~°~°~°~°~°~°~°~°~°~°~°~°~°~°~

السبي الماينحمل على النوك الهزل
والايتام بحبل. مجتوفه كلها

الخرابه والقصر. يريدلهن عمر
يابواچي الي ترد. زينب لهلها

لو نكضي اعمارنه نبجي وننوح
ما نوافي عثره من اجدامها

بعد ما طاح الحسين وسلبوه
على زينب احركوها اخيامها

ويالسبي لازم نطوف
هذا قانون الطفوف
بالدمع

رفعوا رايات العزاء
استقبلوا طف كربلاء
بالدمع

__
@faqdalmawsawi

نعزي صاحب العصر والزمان الأمام الحجة " عجل الله فرجة " و الأمة الأسلامية والعالم بأسرى بذكرى استشهاد سيد الشهداء وأبي الأحرار ورمز الثوار الأمام الحسين ابن علي " علية السلام " فـ عظم الله لنا ولكم الأجر والثواب وجعلنا وأياكم من السائرين على نهجة والفائزين بمعرفته ونصرته .

https://youtu.be/tlD4GQWvNjo?si=SYK8Tggf82Hn88QN