لمن تلكه مشاعرك خامده، مدتحس بشي، لا شي يونسك ولا شي ياثر بيك سلبا ولا شي يضحكك من صدك، و مدتكدر تتواصل ويه العالم بشكل سلس و تسولف براحتك و تندمج… فهل شي مو صدفه ديصير، وانما اكو اشياء مكبوته جواك مثكله على نفسك بحيث دتخليك بهل شكل، ضروري نوصل لهل اشياء الي كابتتنه و نحرر نفسنه منهن حتى ترجع الروح بينه مثل قبل

خالط الناس و احجي وياهم و تعرف عليهم، بس خلي يكون عندك قيم، لتسمح لاي احد يكون صديقك، كل شخص تكضي ويا وكت ممكن تتطبع بي و كلما تنطي وقت و تركيز اكثر تصير تشبهه اكثر، لهل سبب لتنطي وقتك لياهو الجان حتى متصير ياهو الجان

"كل امرء لاقٍ ما يفر منه في فراره"

الامام علي/ نهج البلاغة/ الجزء ١٤٧

افيستوي ماءا الطهارة و النجاسة؟

ام يستويان من يشربان من ايٍ منهما؟

جزء مهم من حياتك لازم تكضي بانو تستكشف نفسك و تعرفها، تعرف شتحب و شتكره، شنو نقاط ضعفك و قوتك، تعرف وين ممكن توكع و شتسوي لمن تضوج و شلون تطلع نفسك من هل شي، كذلك شتسوي لمن تفرح و شنو اصلا يفرحك و يحزنك، تضل تكتشف بهل اشياء حتى تعرف و تحفظ نفسك و تتعلم شلون تداريها باستمرار و تعرف شنو دواها، و ضروري تبقى تطبق الي تعلمته ويه نفسك

هل شي يجي ويه الوقت و التجارب المستمرة، مرات يصير بوعي مرات بدون وعي بس بكل الاحوال ركز بي لمن تكدر

" من العار ان تخذلك الروح في هذه الحياة قبل ان يخذلك جسمك "

- ماركوس اوريليوس

مثالين لنفس الفكرة

لتخلون احد يحسسكم انو هوه هوايه عليكم، على كولة احمد زكي: انتي تتحبي زي ما انتي
يعني احنه نشتغل على نفسنه و نطورها باستمرار بس ابد لتخلون ببالكم انو لازم نكون مثاليين يلا نحصل الحب، ماكو احد مثالي بالدنيه، و الي يعاملكم باهمال او دونية و يحسسكم بعيوبكم هوه هم عنده عيوب و مو شرط يكون احسن منكم

المثال الثاني من اغنية عبدالمجيد عبدالله لمن يكول: اتحمل خطاهم كأن فيني قصور

هل احساس ضروري تنتبهوله، لمن احد هيج يعاملكم من نيه و كأنما هوه فوكاكم… تخلو عنه و خليكم ويه الناس المحترمه و الي تقدركم و تتقبلكم و ترحب بيكم على طبيعتكم

ماكو مجال ترجع بعد، فات وقت الرجوع، انت كطعت هل طريق حتى توصل لشي مو حتى ترجع للقديم الي تدري بي ميفيدك، فاذا تعرف انو التوجه مالتك صح و حيثمر بالمستقبل فكون شجاع و اصبر على الصعوبات الي دتواجهها هسه، لمن تنجح و توصل للي تريده ساعتها كلشي حيكون بصالحك

ماكو شي تسوي ببلاش

كله دين عليك

انت صنيعة يداك

فاصنع من نفسك ما تشاء