"يارب أنت السلام ومنك السلام، سلِّم قلبي من أذى الدنيا وحزن الأيام، يارب إن كان في نفسي انكسارًا فلا جابر له سواك، وإن لامس قلبي شيء من أنين فإنه لا يعلم بحالي إلا أنت، فاجعل لي من كل ضيق مخرجا، يارب معجزة من عندك تغيّر الأقدار، وتحقق الأماني، وتسعدني."

يارب 🩶

'بالامس كانوا هنا واليوم قد رحلوا'

بيت قديم لازال يظهر عليه بعض الدفىء والجمال في احدى ارياف فرنسا 🤎

مرحبًا بعد غياب

في الحقيقة
كل شي هكِ، ليه زاويتين نظر،
كل شخص مننا يشوفله على أساسه هُو، لأن هكِ
باينله، فتخلق هني بينا فجوة ال (ماتفهمش فيا).

يقولو أنه الأمل حيلة، بأمانة هو حيلة،
على الأقل من زاويتي، أنا نتحايل بيه على روحي
على الليالي الصعبة، على الظروف القاهرة
على المشاعر المؤذية (لين لين خلاص)
نقول لروحي بلا ما حد يسمع مزال في أمل،
ونصدق في روحي بكل براءة أنه بالحق
قاعد فيه أمل ..

منعرفش .. منعرفش هلبا حاجات، مثلًا
منعرفش الا نكتب كل ما نحس فيا فوضى،
منعرفش الا نبكي لما نحس أنه في حاجة غلط
منعرفش الا نحنّ نهاية كل سيناريو قاسي،
منعرفش الا نفكر هلبا .. هلبا هلبا بجديات!

الأيام سريعة، معبية، مكتظة، مليانة
الفترة الأخيرة بالذات، حسيت العالم بدي زحمة
مشاغل ومواضيع وأفكار ومشاعر وناس
وقلق مرات .. لين نلقى في روحي نغمض
في عيوني في خضم هذا كله ونحاول
على أساس (نفصل) .. مِش على حد
لا نفصل من الواقع (الزحمة) ..

نفكر ديما هل كل الناس تفكر بإنهمار
زي ما أني نفكر، لدرجة وصلت بيا
نفكر في فكرة أنه التفكير حاجة مكتسبة
ولا فطرة .. يعني مثلًا من أول
يوم ينجاب فيه الإنسان يبدأ يفكر !

في بالي هلبا حاجات تنكتب، مشاعر
ممكن تنضاف للسطور فتخليهم ألذ،
أفكار ( أياه علينا ! ) مختلفة وغريبة
وتبي عقل ثاني يشيل حملها معاي بالذات
في أوقات الليل المتأخر ( الصبح يعني )..

بصراحة مفروض نصيغ نهاية، وبصراحة
أكثر أني نحب النهايات بما فيهم من حاجات
تزعل، لكن مفهوم النهاية عندي = الحرية
مثلًا نهاية حاجة نحبوها هي تحرر من خوفنا
من نهايتها ..

لأننا وبصدق !

كلنا خوافين، بلا أستثناء يذكر
هني فيه شواذ للقاعدة
الناس المش نظيفة (الخبيثة مثلًا)
هدوكا بالذات مش خوافين
الا من أرواحهم .. وقداشها حاجة تزعل
انك تكون برغم جبروتك وطغيانك (عدوك الأول)

٨:٣٧ مساءً
( مش لسبب )

شيئان في هذه الحياة يستحقان الصراع..
وطن حنون وامرأة رائعة!
‏-رسول حمزاتوڤ

تعبان
مريض
زعلان
صلي!
حاس روحك بروحك، حاس أنك ضايع صلي .
مِش عارف حاجة من حاجة، الأيام كلها غريبة، الأحداث كلها مِش مرتبة، حاس أنك فعلًا معاش قادر تكمل صلي!

صلي وصلي وصلي .. مفيش حل إلا أنك تنوض
تسيب كل شيء وتوقف بين أيدين رب كل شيء
وتدعي

والله العظيم مهما تعددت الخطط ومهما الأنسان حس روحه بطل، ما فيش حاجة حتُقضى الا بعد ما تسلمها لقاضي الحاجات..

اللهم لا حول ولا قوة لنا إلا بك..

ما تضيعوش ليلة بلا أثر
لأن اللي رخي حبال دينه.. مشت كل دُنياه عبث?

"كلٌ يراك بعين طبعه وبقدر مكانتك في قلبه"

حتلقى اللي يشوفك أطيب الناس واللي يشوفك اسوأهم، اللي ينسالك خمسين موقف حلو عشان موقف واحد مش حلو.

حتشوف اللي يكره وينتقد الجانب السلبي في شخصيتك ومن يلتمسلك الأعذار لما تغلط ويمدح الجوانب الحلوه فيك ويخترع اسباب تحببه فيك أكثر.

واللي يستر عيوبك ويصون العشره واللي يدوي بيك ويجري علي تطيح قدرك.

وفي النهاية انت نفس الشخص، لكن كل عين حتشوفك بقدر محبتها ليك وكل شخص حيتعامل معاك حسب الزاوية اللي انت واقف فيها في قلبه والأيام ماتغيرش الأيام تبين الحقيقة بس.