EP: Shahrixonda uyushmagan yoshlar uchun sport tadbirlariga e'tibor zarur
"Andijon viloyati, Shahrixon tumani, Turkiston MFYda har yili uyushmagan yoshlar o‘rtasida futbol musobaqalari o‘tkaziladi. Bu tadbirlar maktab hududidagi kichik stadionda bo‘lib o‘tmoqda. Afsuski, hozirgi paytda stadionning holati qoniqarsiz – yomg‘irli kunlarda maydon loy bo‘lib qoladi.

2023 yilda bu maktabga yangi mini-stadion qurilishi rejalashtirilgan edi, ammo 2025 yilga kelib ham bu loyiha amalga oshmagani ko‘rinmoqda. Agar zamonaviy stadion mavjud bo‘lganda, yoshlar quruq va qulay sharoitda futbol o‘ynash imkoniyatiga ega bo‘lishardi.

Shuni ta'kidlash lozimki, uyushmagan yoshlar o‘rtasida jinoyatchilikning oldini olish maqsadida bu kabi sport tadbirlarini tashkil etish juda muhimdir. Biroq, bunday faoliyat uchun sharoitlarning yetarli emasligi ham ahamiyatli muammo bo‘lib qolmoqda. Bizga sifatli va zamonaviy stadion kerak!"

@eltuzportali - muammolar yechimi!

EP: "Izboskanda bitta shifokor va u ham pullik"
Andijon viloyati Izboskan tumanidagi tibbiyot birlashmasiga o‘g‘limni yo‘tal bezovta qilayotgani uchun birinchi marta olib bordim. Ammo u yerda faqat bitta bolalar shifokori borligi, u ham pullik xizmat ko‘rsatayotgani meni hayratda qoldirdi. Konsultatsiya narxi 20 ming so‘m ekan.

Shifoxonada odam gavjum bo‘lgani uchun yuqumli yoki yuqumsiz viruslar tarqalish xavfi ham katta. O‘g‘limni davolatish uchun Izboskanga borganimdan pushaymon bo‘ldim. Yaqinroq joydagi bolalar shifoxonasiga bormaganim uchun o‘zimni koyidim.

Izboskan tumanida faqat bitta bolalar shifokori borligi juda achinarli holat. Viloyat miqyosida bunday shifokorlar soni sanoqli ekan. Shuning uchun masʼul tashkilotlardan iltimos qilaman: Izboskan tumanida bolalar shifokorlarini ko‘paytiring. Navbatlar sabab isitma yoki boshqa muammolar bilan kelgan bolalar og‘irroq holatga tushib qolmasin. Mutasaddilar ushbu masalaga e’tibor qaratishingizni so‘rayman!"

@eltuzportali - muammolar yechimi!

EP: “Ko‘chamizda gaz yo‘q, chiroq ham o‘chyapti”

“Farg‘ona shahri Gulzor MFY Alisher Navoiy ko‘chasida gaz yo‘q, chiroq ham o‘chyapti. Aholi qiynalyapti. OAV vakillari ham keldi, hokimiyatga borildi, lekin masala hal bo‘lmadi. Nogironlar, yosh bolalar, qariyalar bor. Mahallada ko‘pchilik shamollagan, gripp. Puli borlar ko‘chadan ovqat, issiq choy sotib olyapti. Puli yo‘qlar-chi? Limitdan oshsa elektr energiya narxi ham qimmatlaydi. Holat yuzasidan amaliy ko‘mak so‘raymiz”.

@eltuzportali - muammolar yechimi!

EP: Mahalla binosi yaqinida ko‘p qavatli uy. Bu vaziyatda Shaharsozlik kodeksi buzilmoqda”
. “Qashqadaryo viloyati Qarshi shahri 4-mitti tuman Cho‘lquvar mahallasida yashovchi faollar nomidan murojaat qilmoqdamiz. Viloyat hokimi Murodjon Azimovning qo‘lidan faxriy yorliq olgan 61 yoshli tadbirkor I.Q. mahalla binosi yaqinida, tor joyda tiqilinch qilib, Shaharsozlik kodeksiga zid tarzda, qizil chiziq hisoblangan, ichimlik suv va chiqindi quvurlarini qonunga xilof ravishda buzib, daraxtlarni kesib tashlagan holda ko‘p qavatli uy qurishni boshladi.
Bundan tashqari, ko‘p qavatli uylar orasidan tez yordam yoki favqulodda holatlarda yong‘in o‘chiruvchi maxsus texnikalarning erkin kirib-chiqishi va toza havo aylanishi to‘sib qo‘yilmoqda.
Mazkur noqonuniy qurilishni malakali va adolatli mutaxassislar o‘rganishlari va uni to‘xtatishlarini so‘raymiz”.

@eltuzportali - muammolar yechimi!

EP: "Quvur yo‘rilib, suv isrof bo‘lmoqda"

"Surxondaryo viloyati, Termiz shahri Guli Rano mahallasida yashovchilar ichimlik suvi quvuri yorilib, toza suvning behuda oqib ketayotganidan shikoyat qilishmoqda. Muammo Ohunboboyev ko‘chasining ikkinchi burilishida yuzaga kelgan.

"Mazkur vaziyat tufayli nafaqat suv isrof bo‘lmoqda, balki uyimizga kirib-chiqishda ham qiyinchiliklar yuzaga kelmoqda. Bir necha marotaba suv idorasiga murojaat qildik, ammo hech qanday natijaga erishmadik. Hozirda toza suv global muammo bo‘lib turgan bir paytda, suvsozlarning bu muammoni tezda hal qilishiga umid qilamiz," — deya mahalla aholisi o‘z noroziliklarini bildirgan.

Aholi suvsozlardan va mas‘ullardan ushbu muammoni imkon qadar tezroq bartaraf etishni so‘raydi."

@eltuzportali - muammolar yechimi!