عيد سعيد ومبارك عليكم جميعاً إن شاء الله
أسعد الله أيامكم بكل خير
إن شاء الله الصحة والسلامة وتحقيق الأمنيات
وقبول الطاعات .

دائماً أكول هذا الكلام للطلاب
السادس رحلة طويلة تمتد لسنة كاملة
لذلك لازم تسير خلال هذه الرحلة
بشكل مدروس عقلائي بلا مبالغة بالدراسة .

بعض الطلاب يبدأ بحماس مفرط وقوي
ويقرأ هواي كلش ويسهر وينام أقل من ٧ ساعات !!
هذا الطالب ما راح يكدر يكمل الرحلة بصورة صحيحة.
راح يوكع بسبب الاجهاد البدني والنفسي.

لذلك طلابي الأعزاء
حتى تمشون بصورة صحيحة
لازم تسوون جدول يتكون من ثلاثة أمور
١- الدراسة
٢- النوم
٣- الترفية ( تره الترفيه مو نفس الاستراحة )

وأي خلل بواحدة من هذه النقاط الثلاثة راح ينعكس سلباً على قرايتك .
فأنت لازم تصير ذكي وتوازن بين هذه الأمور

وأكرر النوم ما يقل عن ٧ ساعات .

واتذكروا القراية ما تخلص
ما ما ما تخلص لذلك لا تعيش بأجواء السجن
وما تطلع وما تحلق ولا تمشط شعرك ولا ترفه عن نفسك وووو
احذر من هذا الشيء

خلال هذه السنة أدي اللي عليك بصورة صحيحة وإن شاء الله تحصل معدل حلو تحلم بيه .

الكلام اللي عندي هواي بخصوص هذا الموضوع
بس أتمنى تلتزمون باللي ذكرته أعلاه

بعد ما تكملون الامتحانات مباشرةً بلشوا ادرسوا
لا تضيعون يوم واحد .

وين أكو هيج شيء ؟
وراكم سنة طويلة
أول ما تكمل امتحانات الخامس
استراح ورفّه عن نفسك كم يوم

تحية طيبة
أعتذر جداً جداً عن الانقطاع بالتصوير
لأن صوتي تعبان كلش بسبب أصابتي بفايروس كورونا .
وإن شاء الله من هذا الأسبوع أكمل الفديوات اللي بقت من الأساسيات.

من الأمور اللي جاي اشوف تأثيرها عليَّ بشكل مباشر :
المكان اللي أكعد بيه ، وممكن يكون الطالب
بيتهم صغير وأصلاً ما عنده مكان مخصص إله .
بس النتيجة بكل الأحوال :
مكانك صغير أو كبير
مستقل وخاص بيك أو لا
لازم يكون بيه شغلتين :
نظيف ومرتب

لأزم مو هوسه ، المكان إذا مو هوسه أنت ترتاح وتكدر تشتغل وتقرأ بنفسية مرتاحة .
والعكس صحيح

لذلك نصيحتي إلكم
دائماً رتب الهوسه اللي بدماغك وكذلك الهوسه اللي يمك .

تحية طيبة لطلابي :
مِن الآن وإلى فترة المراجعة مِن
العام المقبل إن شاء الله تعالى
راح تسمعون كثيراً هذه الكلمة مني

"طالب السادس هو طبيب نفسه "

هو يحدد مرضه ويحدد العلاج
بس مو معناه يترك الاستشارة طبعاً

كلامي يتعلق باضاعة الوقت ،
بالمستقبل راح تسووي جدول
خلال الصيف ، أو المدرسة ، أو المراجعة
وراح تشوف أكو ضياع بالوقت

فبنهاية اليوم تكعد مع نفسك
وتشوف ليش ضاع الوقت ، أو بعض الوقت
وشنو السبب ؟
راح تشوف السبب إما التليفون ، أو الأصدقاء ، أو أمور أخرى

والعلاج بكل بساطة
الشيء اللي يخليك تضييع وقتك أتخلى عنه .

إذا التليفون يضيع وقت اتركه
وهذا نسولف بيه لاحقاً إن شاء الله
لأن يحتاج تفصيل

وإذا سبب آخر أترك هذا السبب .
بالأخير أنت طبيب نفسك
أنت تحدد مرضك وعلاجه

أعمق كلمة وأدق كلمة قِيلتْ في الصديق هي مقولة النبي الأكرم ( صلى الله عليه وآله وسلم ) :
المرءُ على دين خليله

ثق :
من تمشي وي (٤)مؤمنين
راح يصير عدد المؤمنين (٥ )

ومن تمشي وي (٤ )ناجحين
راح يصير عدد الناجحين ( ٥)

ومن تمشي و ٤ فاشلين
راح يصير عدد الفاشلين (٥ )

وأكيد عرفتوا منو الرقم (٥) مو ؟

لذلك من الان ابتعد عن كل شخص ممكن يأثر على دنياك وأخرتك . وبالأخص في مرحلة السادس.
إذا تمشي وي شخص يضرب محاضرات أو يتأخر بالحضور للمحاضرة أو يرسب يوم بعد يوم بدون ما تحس راح تلكي نفسك صاير مثله