السلام على غريب السجون
موسى أبن جعفر

والله وحگ الرايه والجود 
خدام الچ يم عون وجنود 
•••••••••••••••

والله فعل مو چلمه تنگال 
احنه يزينب زلم الأفعال 
أنضحي الچ بالروح ولمال
گبرچ يضل والشام ينشال 

والله نخلي أيامهم سود 
خدام ألچ يم عون وجنود 
••••••••••••••••

لازالت لهل يوم الأحقاد 
مـولاتـي واللـيوم يـزداد 
بس الحشد يم عون مرصاد
أنـرده كـلمن مـاله رداد 

بينه تضل محميه الحدود 
خدام ألچ  يم عون وجنود 
•••••••••••••••••

والله قسمنه وجود عباس 
خـدامـچ وللـموت حراس 
يامن خدمتچ ترفع الراس
كلمن يمسچ راسه ينداس 

ونضحي فدوه أرگاب وزنود 
خدام الچ يم عون وجنود 
••••••••••••••••

انتي الكريمه وبنت الاكرام 
نتـوسـلچ  سجـلينه  خدام 
نتفاخر أعله الخاص والعام 
دونچ يزينب نحرگ الشام 

فدوه لترابچ يخت الحيود 
خدام الچ يم عون وجنود 
•••••••••••••••••

ليـهمچ ألـي صار ويصير 
الگبرچ احنه نضل نواطير 
دونچ يحره رگــابنه أطـير 
مولاتي ونحس عدنه تقصير 

ماتوصلچ نيران نمرود 
خدام الچ يم عون وجنود 
•••••••••••••••••
عـلي عگـاب الـعمري

السلام على غريـبة الشام

الموت اجاني .. وانه أتاني
لرجعت حسين وعضيده
⇔⇔⇔⇔⇔

ماكو واحد يمي حاضر وانه حضرتني المنيه
لاأهــل لامــن گــرايب للأجل يســـــبل أديه
هـذا ملك الموت أجـاني المن أحچيها الوصيه
وانه ما عندي أله وحده أنـدفـــن بالغـاضـريه

ياغـربتي .. وياحسـرتي
لرجعت حسين وعضيده
⇔⇔⇔⇔⇔

الموت أجاني لروحي رايد بيه روحي ما لگاها
گلي وين وگتله منـي راح الحسين وخذاها
روحي برض الغاضريه راحت بروحت ضناها
أسأل أعله الضيعيته لعله تسـأل عـن دواها

للمــــنيه .. مـاكـو جـيه
لرجعت حسين وعضيده
⇔⇔⇔⇔⇔

ولعلي السجاد أعاين گـطعت گـلبي دمعـته
گـتله لا تبـچي عليه أبچي لحسين وغربته
أنه مهضومه على أبني راح أموت وما حضنته
كلمن بوادي صفينه لاحضرني ولاحضرته

گـلبي ذايب .. وانه أراقب
لرجعت حسين وعضيده
⇔⇔⇔⇔⇔

ريت أبو فاضل يجيني وانه بأنفاسي الأخيره
أرد أسـمعه يگـلي يمه حلوه من بدر العشيره
ويـنه حـماي الفــواطم هـذا وكـته لكله غيـره
شوفته وشوفت عضيده مرهم جروحي لچبيره

الله يدري .. فدوه عمري
لرجعت حسين وعضيده
⇔⇔⇔⇔⇔

هـذا وكـت الفارگــوني الودعوني بلايه رجعه
حانت الساعه الأخــيره ولنـعش راد اليشيعه
يبجي الحسين الرحيلي والكفيل أعليه ينعه
عين ابو فاضل صويبه وانه اخاف يجرحه دمعه

فكري حاير .. وانه أناطر
لرجعت حسين وعضيده
⇔⇔⇔⇔⇔

عـلي عگـاب ألــعمري

يالـزهـره مصـابچ هـد حيـلي

------*

زهـرة عمـري وشمعت بيـتي 
تـدريـن بــروحـي شــسويتـي 
حيـــل بحـــيدر مـــا خلــــيتـي   

بالـون بعـــدچ يخــلص ليلـي 
يالـزهره مصـابچ هـد حيـلي 

&&&&&&&

يضـماد ومـرهـم لـــجروحي 
خلـيتي لكـــل يســـمع نـوحي 
انـه بگـــبرچ دافـــن روحـي     

رديت وصــبري يتــچــــيلي
يالـزهـره مصـابچ هـد حيـلي 
••=••=••=••=••=••

ســهم  فــراگـچ  طـــر دلالـي 
غــيرچ  بالـــدنيـا شضـــلالـي 
يالعـندي اغـلى مـن كـل غالـي 

ريـت مــن المــوت تـرديـلي 
يالـزهـره مصـابچ هـد حيـلي 
×=×=×=×=×=×

مـن شـفت الباب واثـاره
دمـچ موجــود أبسمــاره 
يتـراوالي الشــن الغـاره 

بابـچ عــا لحادث  يحچـــيلي 
يالـزهـره مصابچ هـد حيـلي 
&&&&&*&

هـد حيـلي مصـابچ يالبـضعه 
يالمــن گـــبرچ مالــچ رجـعه 
زيـنب شتـگــــــلچ مــن تنـعه

وينــــــچ يالـچـــنتي تلـوليـلي 
يالـزهـره مصـابچ هـد حيـلي 
×=×=×=×=×=×=×=×

يبچي حسـين وتجـري دموعـه 
يلـطم يالـزهـره علـه ضـلوعـه 
ولــدچ بمـصــابـچ مفــــجوعـه 

انـه الما واحــــــــــد يبـچـيلي 
يالـزهـره مصـابچ هـد حيـلي 
••=••=••=••=••=••=••

حيدر انـه انتـي تعـرفيـني 
محـد بالحــومـه يـلاگـيني 
لـو ما بوچ الي موصـيني 

تل من الروس مسويلي 
يالزهـر مصـابچ هـد حيـلي 
=~~=~~=~~=~~=
عـلي عـگاب العــمري   

ياصاحب الزمان

اجـه الموت واخـذ من عندي الأثنين 
أخـــــذ مني  محمد وأم  الحـسـين 
البنص الگلب .. صفو حدر الترب 
يروحي .. يروحي
⇔⇔⇔⇔⇔⇔⇔

بعدني بثوب حزني ما خلص حزني 
على الهادي ومصاب الزهره شيبني 
اغلى ثـنين  عـندي   ورحــلو مــني 
الا من  ناصرآ عـالـفرگـه ينـصرني 

بعد فگـد النبي وفگـد الزچيه 
مثل طعم العـسل عندي المـنيه 
نسوني بنص غرب .. صفو حدر الترب 
يروحي .. يروحي 
⇔⇔⇔⇔⇔⇔⇔

علي انه علي الما تنـتهي احـزاني
اشـد مـن نـار بابي بگـلبي نـيراني 
أسـولف  ما أسـولف يعـجز لساني 
وكت والناس ضدي وكلشي عاداني 

عـلي انه لسـطرته تـهد الـجبال 
صرت بعد الجفوني مثل الهلال
سند وكتي الصعب .. صفو حدر الترب 
يروحي .. يروحي 
⇔⇔⇔⇔⇔⇔⇔

شلي بعمري بعد ياروحي وشنفـعه 
دنـيا ومنـها  راح الـهادي والبضعه 
وسـعه هـواي بـس بعيني مو وسعه 
عـلى راسـي أحسـهن طاحن السبعه 

اسـولف وي گـبر روحي وأگله
عـلي بعد البــتول بـروحـه شـله 
شلي بدرع الحرب .. صفو حدر الترب 
يروحي .. يروحي 
⇔⇔⇔⇔⇔⇔⇔

شمــسويه  وعلـيمن  ياذنب عـدها 
يتـيمه وتبـچي أعـله فراگ والدها 
تغفـه مــن البچي وطـيفه يگـعدها 
هظمتني يروحي السطره البخدها 

درت وجهي وبچيت وصوتي عالي 
شــفت  حتى  الصـبر حن وبچـالي 
اثر سوط وضرب .. صفوي حدر لترب 
يروحي .. يروحي 
⇔⇔⇔⇔⇔⇔⇔

أعـاين للحســن وحسيـن  وأتحـسر 
أردر ليام جـــدهـم  وامـهم  اتـذكـر 
أليام  المـــــضن  والـيل ذاك ا لـمر 
عصف ريح المصايب والزمان أفتر

أحط زينب على أيدي وأكلها 
يبويه مصيـبتچ مـاكـو مثـلها  
خـيم فـوگـچ تـشب .. صفو حدر الترب 
يروحي .. يروحي 
⇔⇔⇔⇔⇔⇔⇔
عـلي عگـاب ألــعمري

نزال

نواسي علينه .. لفقدچ أجينه
يازهراء .. يازهراء 
⇔⇔⇔⇔⇔

مأتم اليله نصبنه بي نواسي المرتضى 
راحت ويه الزهره روحه واظلم بعينه الفظى
عينها من الطمه حمره والضلوع مرضرضا 
حيدر شگد صبره چان ويم المغيسل گضه 

هاليله ابو حسين .. دم يهمل العين 
يازهراء .. يازهراء 
⇔⇔⇔⇔⇔

نلطم وننعى لفگدها ويه حماي الحمه 
بالسـمه ناده المنادي اليله ماتت فاطمه 
الأرض حزنت عليها وحزنت املاك السمه 
فاطمه ماتت شـهيده والضلوع مهشمه 

من عصرت الباب غطاچ التراب 
يازهراء ..  يازهراء
⇔⇔⇔⇔⇔

ماتت أم روحك يحيدر الله ينطيك الصبر 
روحـك  وروح  الزچـيه شيعـتهن للگبر 
منـكـسر منها ضلعها وانت كـلك منـكسر 
شنهي حالك من تعود وتلگه زينب تنتضر 

صارت يتيمه .. هاي الهظيمه 
يازهراء .. يازهراء 
⇔⇔⇔⇔⇔

من تسئلك أمي وين ومدمع الفرگه يصب 
سيدي ودمع اليتيمه لوجرى يگطع الگلب 
ياعـلي اللـه يعـينك  سيدي المشهد صعب 
التغـطيها  بعطـفها اليله  غـطاها الـترب 

ليلة مواجع  ..  نوح ومدامع 
يازهراء .. يازهراء 
⇔⇔⇔⇔⇔

سـاعه ينعى حسين لـمه وساعه ينعاها الحسن 
ضلو اهــل الـبيت بعدچ مـاكـو بيت ولا وطن 
تربه ومصلايه عفتي وسبحه ورضيتي بچفن 
مـرن سنيـنچ ييـمه  مـرن بسـرعه وگـضن 

بعدچ يأمنه .. ياهو ليلمنه 
يازهراء .. يازهراء 
⇔⇔⇔⇔⇔
عـلي عـگاب الـعمري