كل مرة غيّروا المكان
اللي بتصلّوا فيهُ ،، ما تثبتوا في مكان واحد!

إستغفروا وسبّحوا وأذكروا الله
في أي شارع
وأي مكان بتجوا مارّين بيهُ = لأنه الأماكن دي حتشهد ليكم
بكُل عمل صالح عملتوهُ فيها يوم القيامة 💕

قال عطاء الخراساني :
" ما مِن عبدٍ يسجُد لله سجدة في بقعة من بِقاع الأرض إلا شهدت له بها يوم القيامة، وبكت عليه! "

خلّيها على صفحتك ،، ذكّر غيرك ،، في ميزان حسناتك

ممكن نصلّ على الحبيب!♥️
#الذكر
#الإستغفار

قالت :
حبوبة أبوي ماشاء الله تبارك الله صلّاية وبتذكُر الله كتير
دائماً سِبحتها في يدها ..

ما كانت بتعرف تقرأ وتكتب، عشان كده ما قِدرَت
تقرأ القرآن من المصحف!

لكن مما فتّحنا في الدنيا دي لقيناها
بتشغّل الراديو جنب سريرها ♡

سبحان الله
حِفظت سُور كتيرة بالسّماع ده ،، وكانت يومياً
بتقرأ
سورة المُلك وسورة السجدة قبل النوم
من حِفظها من رأسها .

بعد ما إتوفت ربنا يرحمها ويغفر ليها، شُفتها في رُؤيا
وسألتها :
حبوبة، كيف حالك ؟

قالت لي :
أنا مرتاحة وفرحانة شديد مع القرآن
وسورة المُلك والسجدة 💕
..

رسولنا الحبيب ﷺ قال :
" إن سورة من القرآن ثلاثون آية
شفَعَت لِرجُلٍ حتى غُفِر له، وهي سورة تبارك الذي بيده المُلك"

وكان ﷺ لا ينام في لَيلة حتى يقرأ سورة السجدة!

#سورة_الملك

فاللهم طيّب عمَلي وبارِك بلُطفك سعيي وطاعاتي، أعوذ بكَ من عذاب القبر وفِتنته، أن تُحسِن خاتِمتي وتكتُبني وأحبّتي من أهل الجنّة.

ممكن نصلّ على الحبيب!♥️
#تيسير_الصادق
..

أيام الخِدمة كان في دكتورة نزلت جديدة معانا في المستشفى، طيبة وفرفوشة اللهم بارِك .

بعد أسبوع جات مهمومة وكان واضح عليها
إنها متضايقة!

ما حبّيت أتدخّل
أو أسألها، لكن قعدتَ أتونّس معاها وحاولتَ أطلّعها
من جو الحُزن ده ..

سبحان الله بعد الدوام إنتهى لحقَتني برّة جنب باب
المُستشفى، وقالت لي عايزة أفضفض
معاك شوية .

مما بدَت كلامها دموعها نزلَت طوّالي
وكانت بتشتكي
من ناس علاقتها معاهم كانت جميلة وقدّمَت ليهم
كل الخير، لكن فجأة إتغيّروا في التعامُل معاها!

قلت ليها :
كلُّه لخير ليكِ بإذن الله، وبتعرفي الحِكمة لقِدّام .

عامّةً في الدنيا دي
الباب الحيقفِل في وشّك والناس الإنتهَت علاقتك معاهم
ما حيكونوا نهاية ليك إنتي!

دي نهايات وجودهم في حياتِك و عطائهم ليك .

وبعد كده
ما ح يضيفوا ليك حاجة = كانت مرحلة و خلصَت!♥️

وخلّيك واثقة إنه أي حاجة
انتهَت حتبدأ غيرها حاجة تانية، و كل باب اتقفل حيتفتِح غيره
بدل الباب الواحد بابين وتلاتة

حتى الشعور بيتعوّض ،، والفكرة البِتفشَل حتلقي غيرها
أفكار تانية!

الحاجات والمواقف بتحصل
عشان تصنع منك شخصيّة أقوى، وتزيد ليك الوعي وتقدري تعيشي بيهُ الفترات الجاية من عُمرك .

وطالما واثقة إنك ما ظلمتي إنسان، وما قدّمتِ غير الخير
فما تضيّعي وقتك وصحّتك في التركيز في حاجات وعلاقات مُنتهية!

انتي البِتختاري
أثر الناس والمواقف عليك = كبّري الكوم البِفرّحك ويبسطك،
والبزعّلك أنسيهُ وانتي الكسبانة!

#الحياة

فاللهم اجعلني طيّبة القلب صاحبة الخير في الدنيا، أن تنثُر الحِكمة في تعاملي مع الأحداث من حولي، عزيزةٌ أنال قسمتي بقلبٍ راضٍ ونفسٍ مُطمئنة، زائدة الخير مأمونة الجانب ماحَييت .

ممكن نصلّ على الحبيب!♥️
#تيسير_الصادق
🌹

قالت :
قريت طب بشري ، وكنت عايزة أتخصّص
تخصُّص معيّن 🌸

استخرت و مشيت أسجّل ، لقيت البنك قفل
و ده كان آخر يوم للتسجيل!

سبحان الله اتسهّل لي تخصّص مختلف تماماً
من التخصّصين اللي فاتوا ، و ربنا وفّقني أبدعت فيهُ و بقيت من المتميّزين عالمياً ماشاءالله تبارك الله ♡

قالت :
اتفصلت من شغلي بدون سبب واضح ، وفي نفس الفترة
خطيبي قال لي ما بقدر أواصل معاك!

اتكسرت شديد لِدرجة بقيت زي العيانة من
الهموم و عدم الأكل .

الحمدلله الحمدلله ربنا وفّقني
و لقيت شغل أحسن من الأول بِمليون مرة ، و بعد سنة و شوية ربنا رزقني زوج مهذب
محترمني و مبسوطة معاهُ ❤️

قال :
كنت أستاذ في مدرسة و راضي جداً من شُغلي ، حصل سوء تفاهم بيني و بين أستاذ زميلي ..

المدير من غير ما يفهم الحاصل
قال لينا :
جزاكم الله خير ، قدمو استقالتكم!

ربنا سهّلها علَي
و فتحت بزنس خاص بَي ،
و اتفتحت علَي أبواب الخير من كل الجهات 🌸

و الحمد لله رب العالمين
بقيت فترة الصباحية اللي كنت بمشي فيها المدرسة ، بمشي حلقات تلاوة
و حفظت القرآن الكريم كامل ، أسأل الله الثبات و القبول .

🌸🌸..

شفتوا ربنا كريم و رحيم كيف!
و عوضُه
جميل شديد لمّن بنسّينا كل الوجع اللي عِشناهُ .

عشان كده ما تفقدوا الأمل مهما يحصل!

خليكم متفائلين و واثقين إنه ربنا حيجبُر خواطركم
و إنها حتتيسّر بإذنه تعالى ❤️

ولازم نتعلم نعيش و نحنا راضين بالـ كتبُه
لينا ربنا ..

الرضا بجيب البركة و الرزق
و الرضا بخلّينا متطمّنين و مُرتاحين بال

واتذكروا دايماً إنه :
حنقعد نفكر ونخطّط= وتجي ترتيبات ربنا
تودّينا لِمكان تاني
أحسن بِكتير ،، و عمرنا ما كنا متخيّلنُّه!

فالحَمدُ لله على خطواتٍ لم تكتمل ، نسأله الرضا و اليقين و حُسن الظنّ به ، أن يهَبنا البركة و التيسير فيما سيأتي ، و تطِيب أيامنا بأجمل الإختيارات .

ممكن نصلّ على الحبيب!❤️
#تيسير_الصادق
..

قالت :
أخدتَ وقت طويل حتى قدرتَ أواظِب على قيام الليل!

مرة أنوم ومرة أقفِل المنبه بدون ما أشعُر
ومرات أمشي أتوضأ
والشيطان يوسوِس لي "نُومي نُومي وأقيمي الليل بُكرة"

حاولتَ كتير
ودعيت كتير ،، وضبطتَ منبّهات كتيرة ،، ووصّيت ناس بيتنا
كتير لحدي
ما ربنا وفّقني أناجيهُ كل يوم في الثلث الأخير من الليل ♡

حصَل لي شنو ؟!

أي حاجة بتمنّاها بشُوفها قِدّامي، وأي دعاء بقولُه
بلقاهُ مُستجاب
وحتى الكلام البقولُه بيني وبين نفسي بيبقى حقيقة!

قيام الليل ممكن يكون هو [الخبيئة]
بينك و بين الله تعالى
لِقول رسولنا ﷺ " مَنِ استطاعَ منكم أنْ يكونَ لَهُ خِبْءٌ مِنْ عمَلٍ صالِحٍ فلْيَفْعَلْ "..

#قيام_الليل

فاللهم اجعلني مّمن صلّت فرضها و أرضَت ربها و قامَت ليلها، أن تحفظني يوم يفزع الناس، و قِني شر غفلة في ليلةٍ صُبحها ليس في الدنيا .

ممكن نصلّ على الحبيب!♥️
#تيسير_الصادق
🥀

خالتو جارتنا بناتها صحباتنا، يوم كنا قاعدين سوا
قالت لينا :
بعد ما إتزوّجتَ ، قعدتَ خمسة سنين ونُص ربنا ما رزقني
أطفال .

كنت مقلّقة وخايفة من كلام الناس!

بِقيت أقرأ دعاء سيدنا زكريا في كل سجدة ،، وإشتريت لَي
سِبحة عشان أتذكّر أسبّح طُول اليوم

أول مرة في حياتي أستغفر بالأعداد الكبيرة
ألف وألفين وخمسة آلاف!

القلق راح وبعد فترة بسيطة
والحمدلله ربنا رزقني ولدي البِكر، وبعدُه جوني البنوتات
الغلباويّات ديل 😁

كانوا زي كل الأطفال
بيلعبوا ويوسّخوا البيت ويصرّخوا ويبكوا، مرات بكون
تعبانة ومساهرة أو عيّانة = لمن أتضايَق شديد

بتذكّر إنه كيف كنت زمان بتمنّى واحد بس منهم!

وبقول لنفسي :
معليش، ديل نِعمة من رب السماء ♥️
..

كلام خالتو ده ذكّرني
قريبتنا الكانت عايزة تبدأ بزنس ودائماً تقول لينا :
أدعوا لَي
منتظرة متين أبدأ وأحقّق حلمي ،، ولمن بدت ماشاء الله
تبارك الله اتوفّقَت وعملت زبائن

لكن كانت زهجانة من كترة الطلبيّات والتعب!

وذكّرني أخو صحبتنا اللي حكَت لينا عنّه
وقالت :
من الثانوي بقول لأبوهُ
أنا منتظر متين أتخرّج عشان أساعدك في المسؤولية

بعد إتخرّج وإشتغل، بِقى ينقنِق في الدوام وطُوله!

وإتذكّرتَ الطالبة
البِتقول للشيخة في حلقة التحفيظ :
أدعي لي بالزوج الصالح 🙈

وبعد ما إتزوّجت ،، بقت تشتكي من المسؤولية!

كل القِصص دي وغيرها بتخلّينا نتأكّد تماماً
إنه النعمة = ميقاتها عند الله سبحانه وتعالى، و كل حاجة عنده بقدر .

وكل الأهداف والإنجازات في الحياة
ما مربوطة
بأي عُمر ولا زمن!

ولمّن نصل لأهدافنا ولمّن أحلامنا تبقى حقيقة = ياريت
نحمِد ربنا عليها ونقدّرها ♡

#بيوت_متطمنة

فاللهم بلّغني رجائي برحمتِك ويسّر أمري بلُطفك، أن تكرمني في داري البسيطة وتُبلّغ قاربي الصغير مراسيه الآمِنة، فأظل سعيدةً بقُربك ومُطمئنةً بطاعتك وخاتِمتي الجنة.

ممكن نصلّ على الحبيب!♥️
#تيسير_الصادق
🥀

صحبتي خليجيّة
أختها ماشاء الله تبارك الله عليها زولة طيبة
وجميلة ومُحترمة جداً ♡

اتزوّجت وبعد ما طفلها الأول تمّ سنتين، عملوا
حادث وزوجها اتوفّى ربنا يرحمه .

مرَّت بلحظات صعبة شديد ،، أغلب اللي حوليها
ضايَقوها
وأقرَب الناس اتخلّوا عنها

يوم رسلت لي تسجيل بتبكي
قالت لَي :
البنات في عُمري بِقوا يقولوا لَي عديل
نحنا خايفين أزواجنا يعرّسوكِ!

سبحان الله
الفترة دِيك بدَت
تحفظ قرآن، وكانت بتقرأ سُورة البقرة يوميّاً
اللهم بارِك ♡

و عندها
وِرد
للصلاة على الرسول ﷺ بالصيغة الإبراهيميّة ?

بتقول الصلاة الإبراهيميّة دي كل يوم
بالآلاف ،، وقبل
الفجر
بعد تصلّي القيام بتقعُد تقولها .

إتخيّلوا الحصَل شنو ؟?

ربنا أراد ليها تسافِر قطر ويقابلها واحد من
المشايخ الكبار
في البلد، ويطلُب يدّها من أبوها..!

ماشاء الله تبارك الله
الليلة هي وولدها عايشين في قصر، وزوجها شايِلها
جُوّة عيونُه .

وسعيدة سعادة ما بتقدر توصِفها ☺️

وبتقول لَي :
ربنا جبَر خاطري جبر إتعجّبوا ليهُ كل الناس?
..

كيف لا
وبالصلاة عليه = يُكفى همُّك ويُغفَر ذنبُك!

فاللهمّ صلّ على محمد وعلى آل محمد كما صليت على إبراهيم وعلى آل إبراهيم، وبارِك على محمد وعلى آل محمد كما باركتَ على إبراهيم وعلى آل إبراهيم إنك حميدٌ مجيد .

#أوتروا
ممكن نصلّ عليه!♥️
?

قالت :
أنا مغتربة وفي وحدة من إجازاتي
مشيت لناس من أهلنا زيارة، قدّموا لي عصير خفيف وسكره
قليل شديد لمن غلبني أشربُه!

رجعت بيتنا وما كلَّمت أي زول والأيام مشت ..

بعد قريب ٣ سنين
لاقيت سِت البيت دي في إجازة تانية في مناسبة
جات قعدت
جنبي وسلَّمَت واتونّست ♡

وأنا الموقف ما قادرة أنساهُ!

كلما أشوف عصير بتذكّرها، ومرات الشيطان
يقول لَي :
أي ما أكرموكِ وده شنو العصير ده ؟

اها بعد قعَدت جنبي
قالت لي :
أنا عايزة أوضّح ليك حاجة ، يوم جيتينا داك ما كان
عندنا غير ملعقة السكر دي
في البيت والله .

وده كان
آخر عصير لقيتُه في المطبخ عملتُه ليك، وما عندي
ولا جنيه
أشتري بيهُ وقتها!

قلت أحسن العصير
يكون خفيف من تطلعي مننا من غير ضيافة!?

وضعنا وقتها كان صعب شديد
لكن
ما حبّينا نوضّح لأي زول ..
كان علينا
ديون ومرات حق الأكل بكون في تَلتَلة!

بعد ولدي سافَر الحمدلله الوضع اتصلّح والخير كتير
لكن خجلانة منك
وقتي ده كلّه وقلت لازم
أوضّح ليكِ
لأنه
ده ما طبِعنا وإكرام الضيف مهم شديد عندنا ♡

..
لمّن تمشي زيارة لزول في بيته ❤️
أقعُد مكان قال ليك، ما تقعُد تتحاوَم من غرفة لغُرفة
ومن باب للتاني!

لمن يجيبوا ليك العصير أو الشاي
أشرب وأحمِد ربنا
وخُت الكباية، ما تقعُد تقول السكر ده ناقص
والعصير خفيف
وماله شاييكم عامل كده!
(يمكن ما عندهم سكر، أو ده آخر عصير عندهم أكرموك بيهُ)

اضطريت تدخل الحمام ولقيت اللمبة مكسورة
أو بايظة، أفتح فلاش تلفونك
وأطلع أمشي
في سُكات من غير تحرجهم وتقول ليهم :
لمبتكم مالها طافية!
(هم عارفنّها طافية ، يمكن ما عندهم قروش يشتروا)

**خلّونا نتعلّم الزوق ونتعامل بطريقة راقية ♡

نكون خفيفين
على الناس و زياراتنا محبوبة .**

#بيوت_متطمنة

فاللهمّ خِفافاً خِفافاً لا نأذي ولا نُؤذى، طيّب برحمتك خواطرنا وارضنا بمصائرنا التي ترضاها لنا، أن تزيّن بلُطفك أخلاقنا وتُسلّم بالخير قلوبنا، فتطِيب لنا الحياة بتمام اليُسر والنعيم مع العافية.

ممكن نصلّ على الحبيب!❤️
#تيسير_الصادق
??

جارَتنا بتحكي لَي
إنها اتظلَمَت وفي يوم كانت موجوعة ونامَت بتبكي
من الزعل!

صلّت الوِتر ودعَت ربنا شديد
إنه يجبُر خاطرها ويبدّل حُزنها = سعادة وسُرور ♡

قالت شافَت رؤيا في الليلة دِيك
إنها لابسة لِبس الإحرام
و واقفة في جبل عرفات، ومعاها الحُجّاج كانوا
بردّدوا في الآية :
{ قد أُوتِيتَ سُؤلَكَ يا مُوسىٰ }

صحَت فرحانة وما كلّمَت زول بالرؤيا .

سبحان الله بعد شهر ونُص ربنا كتَب ليها
تسافِر
للعُمرة فجأة وبدون تخطيط!

قعَدت نُص شعبان في مكة ،، وبقُدرة ربنا حضرَت
رمضان في الحرم المكي ?

وبدل عُمرة واحدة = اتيسّرَت ليها أكتر من
١٢ عُمرة!♡

و عيّدَت في المدينة المُنوّرة ?

رجعَت السودان خلاص ؟
=لأ
قعدَت في المملكة، و ربنا كتَب ليها تحِجّ وتقيف
مع الحُجّاج في عرَفة

وتردّد الآيات :
{ قَد أوتِيتَ سُؤلك يا مُوسىٰ }
الحمدلله الحمدلله

وهي في
قمّة السعادة وخاطرها مجبور
اللهم بارِك ♡
..

{ ومَن يتوكّلَ علىٰ اللهِ فهُوَ حَسبُهُ }?

فاللهم أكرِمني بما يسُرّ قلبي ويُرضِيك عنّي فأرضى، أن تنثُر اليقين والتوكّل في قلبي وحياتي لأعيش بقُربِك مُطمَئنة، فيَطِيب عمَلي وتُحسِن خاتمتي وتجعل مُستقرّي الجنة .

ممكن نصلّ على الحبيب!♥️
#تيسير_الصادق
?

..

عندما أُصِيب سعد بن مُعاذ يوم الخَندق
جَاءهُ النبي ﷺ واحتضنهُ ♡

فبَكىٰ النبي ﷺ ثُمّ بكىٰ سعد ، فانفجر جُرح سَعد
و سال الدم
علىٰ عَاتِقَي النبي ﷺ
ثم فاضَت روح سَعد إلىٰ باريها جَلّ في عُلاه .

فقال له رسول الله ﷺ :
" يا سَعد
جَزاكَ الله خيراً من سَيِّدِ قَومٍ فقد أنجزتَ مَا وَعَدتَّهُ
و لَيُنْجِزَنَّكَ الله ما وَعَدك " ♥️

وفي تِلك اللحظة
جاء جِبريل عليه السلام لِيُخبر النبي ﷺ بِأنّ عَرش الرحمَـٰن
قد اهتَزّ
لِمَوت سَعد بن مُعاذ رضي الله عنه!

فاللهم اغفر لنا وارحَمنا وعافِنا واعفُ عنّا، اجعلنا مِن عبادك المتقين المُخلصين الأخيار، أحيِنا وأمِتنا على سنة رسولنا الحبيب المصطفى الهادي، احشُرنا في زُمرَته وارزقنا شفاعته، وأورِدنا حوضه هانئين مُطمئنين ومُكرَمين برؤية وجهك الكريم .

ممكن نصلّ عليه!♥️
#تيسير_الصادق
?