قصيدة رقم ١

باليسر زينب عالحـرم ظلها ردّت بالعيال وإبروس أهلها
وإتصيح هاذي كربله چا وين أهلنه
إبحامـي الضعينه من يـدلينه

فرفرت عالظعن روحي من وصل للغاضريه
ريت ماي العمه إبعيني ولا تشوف الفاطميه
إبكل گلب جمرة أحزان وكل ضلع حدره شجيه
إشحال التروح إميسره ما نظل بعد إمخدره
وإتظل غريبه إمحيره وإـّحوفها المنيه
نسمع إبزينب لاچن يهالناس
إمن اليسر ردت تلطم عله الراس
وتصيح جينه إمن اليسر وين الكفلنه
إيحامـي الضعينه من يـدلينه

هالله هالله إشلون وگفه وگفت إبدار المخيم
صدت إبعين المصيبه وشاهدت خدر المهدم
إو چنها تتصور النار وخيمه عالخيمه إـّلايم
صـاحت ومدمعها سجم إبيـا دار أنزل هالحرم
چا وين حراس الخيم إو وين البخدري توزم
دار الخيم هاي چانت زهيه
شو مظلمه اليوم يهل الحميه
ما تغمض إعيون الحرم موحش نزلنه
إبحامـي الضعينه من يـدلينه

إشلون لوجت گلب صارت بين الگبور ومحنّه
هاي إلتنادي يالأكبر يا شباب إلما تهنه
إو ذيچ تصرخ آ يجاسم معرس وبالدم تحنه
إو هاي إلتدور عالطفل وإتصيح والمدمع يهل
عطشان يبني وتنچتل والشرب محروم منه
گوس الذي صاب نحرك رماني
وإبناظري طاح سهمه وعماني
ظليت أنوحن وأنتحب وأجذب الونه
إبحامـي الضعينه من يـدلينه

إحضنت گبر حسين زينب تلثم إترابه وتشمه
خويه خليتك رميه إو جسمك إمغسل إبدمه
إمگطع إبحد المواضي إو حرت بيه إشلون ألمّه
فجـارنه إصواب الحجر چتفنه بحبال الدهر
إو سهم المثلث بألأثر مرد لب إحشاك سمه
من عگب عيناك ما نمت ليلي

والكوفه والشام هدمت حيلي
راسك عله راس الرمح يبره الظعَّنه
إبحامـي الضعينه من يـدلينه

إو چني إبزينب إتنادي يا ربات الخدر گومن
إوياي نمشي للشريعه إو يم گبر عباس حومن
وإحچن الصاير علينه إو لا تعتبن لا تلومن
عباس ما يحمل عتب من گطع إلچفوف السبب
يسرونه والعز إنسلب وإبضعيف الصوت حنن
عالشاطي عفناه غصباً علينه
وإنخبره بالصار من عگب عينه
چي ما حضرنه إنـودعه إو نعتذر منه
إبحامـي الضعينه من يـدلينه

يالطحت من عتب سكنه إو گطعت جسمك إلغيره
إبطيحتك دهري سباني وأجفي ديره وأطب ديره
صابني سهم إلبعينك إو يبس إبگلبي نميره
ألله يصواب العمد صوبني والعز إنفگد
لا ظل أخو إو لا ظل ولد إولاعمام إو لا عشيره
من عگب عيناك دهري ولاني
يا خويه ظليت آني وزماني
إو لا ظل حميم إو لا حمه إلبيه إنتچنه
إبحامـي الضعينه من يـدلينه

الشاعر الشيخ كاظم المنظور الكربلائي

#قصائد_زيارة_الاربعين

كعدة للوداع
الشاعر الشيخ كاظم المنظور الكربلائي

زينب والحسين إو گمر هاشم
مصيوبين بمصاب الفواطم
للتوديع يردون ألله إشمصيبه

زينب إبليلة العاشر جاعده إتحسب بأمرها
لن تشوف الشمس بزغت والگمر يزهي إبخدرها
حسين والعباس عدها إو شوفة إخوتها تسرها
صاحت هله إبعينة هلي يحسين يا نعم الولي
إو صدت لعد راية علي بيد أبو فاضل ذخرها
إو لزمت رايتـه بيد الكفاله إوبيد الخدر أُومت عله إعياله
إو صاحت يخوتي إشلون ألله إشمصيبه

حسين للتوديع واجف والمنايه إتحوم دونه
زينب إو بدر الهواشم للعتب يتناگلونه
گطّعو گلب الحسين إو ذوّبو شحمة إعيونه
لاجت إبعينه دمعته إو خوفـه إعله حامل رايته
إو صاح إعله زينب رادته بالعتب لا تضهدونه
إو صاح حسين يا مهجة الزهره للعباس لتحرجين أمره
عتبچ صعب ميهـون ألله إشمصيبه

هالله هالله إشلون صده صدت الحره الوليها
عينها إبوجه الحسين إو لازمه الرايه بديها
إتريد متمانع أخوتها والفراگ إيعز عليها
صـاحت إو مدمعها جره لحّد يسبع الگنطره
أمر الحرم شيدبره لو دنت ساعة سبيها
حيرني زماني باصروني وإبهالليل ما تغمض إعيوني
إو چيف إتنام العيون ألله إشمصيبه

إگعدو عد زينب أخوتها والفلك وضعه تغير
إو صاح أبو السجاد عندچ علم يمودعة حيدر
إحنه قسمتنه الشهاده إتسجلت من عالم الذر
واليسر يختي حصتچ گومي إستعدي الغربتچ
وإتسلمي إعيال إخوتچ وإحنه نمشي إعله المگدر
صاحت وألله لحفظلك كرامه بعيالك وأربيلك يتامه
وإبزينب إشتـدرون ألله إشمصيبه

إهنا يريحانة محمد غربتچ هدمت حيلي
آنه أدري إشيمر بيّه إو يا سهم يگطع دليلي
آنه زينب والكفلني عدل وأرد أنشد كفيلي
عباس أدري إبشيمتك ويّه الحسين إشنيّتك
ضحّي لخوك إبرگبتك والدهر خلي جبيلي
صاح حسين أخوچ إتشجعينه هذا إيبيع للخوّه يمينه
إو هذا إوداع مرهون ألله إشمصيبه

إتجلدت بالصبر زينب واليسر لبست إثيابه
إو ما دريت إشلون ردت لبن والدها جوابه
إرشد إرشد للشهاده والعهد صفّي إحسابه
إحنه رضينه باليسر نصبر إو للـه ألأمر
والصبر عالبلوه الصبر والدهر عيّن إصوابه
للشامات لو سدَّر ضعنّه وإنتو إبكربله ظلو يهلنه
إو عالغبره تنامون ألله إشمصيبه

بعد إوصّيچ إبوصيّه لو چتل بالطف گضينه
لو حده الحادي إبسبيكم مُرّي للتوديع بينه
إو حگ لبو فاضل يزينب ظل عليچ إو تعرفينه
وإچفوف أخوچ إمگطعه تلگيها دون المشرعه
إيريدچ تجين إلمصرعه شوفي حاله إو تعذرينه
صاحت خـاف للعباس أشوفه گلبي ينگطع گطعة إچفوفه
وإعيـالك يسيبون ألله إشمصيبه

الشاعر الشيخ كاظم المنظور الكربلائي

كعدة للوداع
الشاعر الشيخ كاظم المنظور الكربلائي

زينب والحسين والهاشم گمر
تتحمس إبجمر الوصيه ها يالمسيه

چني بحسين اوعضيده طبَّو الخدر العقيله
وكل فرد منهم ابجمر الصبر يتحمس دليله
حست ابغربتها زينب صاحت ابونه ثجيله
حياكم الله وياهله ببدور اهلنه المجبله
وشلون الموادع حله والدمع فجر مسيله
تتطـاير اسهام من گوس النصر
والهدف للذروه العليه هاي المسيه

اسهام گوس الصبر صابت ضامر العالم العلوي
وصوت نايبة المصيبه بالأفلاك السبعه يدوي
وانكسف بدر الحياة وگام نجم السعد يهوي
وتفجرت اعيون السمه والدمع يتفايض دمه
اعله حسين وإعله إمخيمه والشهاده ابچاس تروي
وتبـرد الگلوب من حر الجمر
وبدر الفراگ ابخطر ضيه هاي المسيه

وچني ابطير المنايه يرفرف ابجو المصيبه
ويگطع احبال المواصل بين محبوب وحبيبه
وچني بگلوب الامان املذعه ابجمرة الريبه
وچني ابصناديد النزل لا يالعلي وحتى الطفل
دون النزل خلصو چتل وچني ابزينب غريبه
واتصور الروس على روس السمر
والجثث عالغبـره رميه هاي المسيه

وگف سير الفكر مني لاچن إبحد المخيم
وصاغي ابسمع العقيده وباكتشاف الحال مهتم
وشفت ريحانة محمد واسمعت كلما تكلم
وحالة مفارج حالته تظهر معالم غربته
وزينب تنـوح الفرگته والدمع منها يهل دم
صاحت يعباس يا نعم الذخر
ودع الرايه الهاشميه هاي المسيه

صد ابو فاضل الزينب ناده عد عيناچ شوفي
كون اضحيلچ رگبتي واصخي ابگطعة اچفوفي
وسهم المفارگ يصيبچ من يصيب السهم شوفي
يمودعة عقد الوله ويمخدرة إويمدلـله
لأمرچ نود لتمثله واليواعد كون يوفي
عالخـدر وإحماه ميعز العمر
نامي ابرغد يالفاطميه هاي المسيه

نادته أدريك توفي والوفه جوهر صفاتك
وراضع ابثدي الموده والموده ثمر ذاتك
خدري وشمعة حياتي تزهر ابشمعة حياتك
چني أشاهد عزتي تمشي ابرفجكم يخوتي
يا ضيعتي يا غربتي وچني اتصور خواتك
متگيدة اگياد بحبال اليسر
صوبني سهم الغاضريه هاي المسيه

يخوتي هالخدر بيكم وبمواضيكم ترتب
وعگب هذا النور چني بيه اشوف النار تلهب
وچني بالگوم ادهشتنه ناس تحرج ناس تنهب
بهاي الحرم متحيره چني غريبه اميسره
وانتم ضحايا على الثره

يخوتي أديتو حگ الخوه ويايه ابوفاكم
لاچن اشبيدي عليكم سهم المگدر رماكم
وحگ خوتكم يخوتي لألزم الحد ابحماكم
واكفل حرمكـم يخوتي وأرعه اليتامه ابمهجتي
وأروي عطشها ابدمعتي

الشاعر الشيخ كاظم المنظور الكربلائي

الليلة العاشرة للوداع

بحق علي الاصغر عبد الله الرضيع
الشاعر الشيخ كاظم المنظور الكربلائي

هاك إخـذ طفلك هاك يحسين يبن أمي
يشتعل دلاّله والعطش چتاله
يحسين يبن أمي

زينب وديعة فاطمه إتحشم وليها وتصفج بديها
إدرك إعيالك والعطش أثر عليها وتصفج بديها
وأم الطفل من العطش يابس ثديها وتصفج بديها
دسمعني وأرد أنخـاك يحسين يبن أمي
طفلك يبس دمه من نشف ثدي أمه
يحسين يبن أمي

صد ابو اليمه الزينب إو يجذب الحسره والعطش جمره
خل گلبچ إبهالنايبه يدرع إبصبره والعطش جمره
ردي الطفل لُمّ الطفل خل تدرك أمره والعطش جمره
صاحت وحگ عيناك يحسين يبن أمي
ما عدنه كل چاره من الظمه وناره
يحسين يبن أمي

زينب وأخوها للطفل يتناوشونه ويجلبونه
والطفل من حـر الظمه غارت إعيونه ويجلبونه
كلسا يموت إو يحتيي إو ينچبد لونه ويجلبونه
أدري إبضمير إحشاك يحسين يبن أمي
نيـران لهابه للطفل وإنصابه
يحسين يبن أمي

كلسا تشوط أم الطفل شوط إو تنادي مرّد أفّادي
يحسين طفلك إي وحگ جدك الهادي مرّد أفّادي
إو بت فاطمه إبصوت الحـزن رجنت الوادي مرّد أفّادي
چن الطفل يفـداك يحسين يبن أمي
لا نِفَس لا نگاد لحد يبو السجاد
يحسين يبن أمي

يحسين لمصاب الطفل تيهت دربي يشهدلي ربي
گلبي علمني إبرادته وما چذب گلبي يشهدلي ربي
طفلك يلوج إعله السهم وإعيونه تربي يشهدلي ربي
وإخذ الطفل لعداك يحسين يبن أمي
خلهم يذبحـونه بالسهم يروونه
يحسين يبن أمي

يبن أمي برسوم الطفل نور السعاده حكمه وإراده
گلبي علمني إو عله ألإيمان إستناده حكمه وإراده
دم الرضيع إيكمل إشروط الشهاده حكمه وإراده
وإخذ الرضيع إويـاك يحسين يبن أمي
يشـرب إو يتهنه من كوثر الجنه
يحسين يبن أمي

وحسين سدر للوغه إبنيّه سعيده والطفل بيده
ولن السهم من حرمله صابه إبوريده والطفل بيده
ورد إعله زينب والطفل يتلوه جيده والطفل بيده
دم طفلك إبيمنـاك يحسين يبن أمي
كمّل شهاتكم تمت سعادتكم
يحسين يبن أمي

الشاعر الشيخ كاظم المنظور الكربلائي

بحق علي الاصغر عبد الله الرضيع
الشاعر الشيخ كاظم المنظور الكربلائي

عبـدألله يبني يبني عبدألله يبني
در ثديـك إو سابيني عبدألله يبني

متعوبه ومساهره وگلبي مالوم من سهم فـگدك
بس جسمي عينه إغمضت والروح إتحوم يوليدي عندك
فزّيت مرعوبه وأنه إبحلو النوم شاهدت مهدك
والمهـد خالي خالي والمهد خالي
إو بفراشك إصبي عيني عبدألله يبني

در ثديك ودرت عليك إدموعي وإندهش حالي
وإعله المهد يبني حنيت إضلوعي إو من شفته خـالي
راجعت صبري إو ردت أسكّن روعي إو لنّك إگبالي
وإسمعت دمك دمك وإسمعت دمك
من نحرك إيناغيني عبدألله يبني

أگضي نهاري بالنحب والحسرات وإنته إعله بـالي
إو ما چنت أغط بالنوم أغط بالحسبات وأگضي ألليالي
إوسهم إلبنحرك نابت إبعيني بات والدمع هالي
حربه إعلـه حربه حربه حربه إعله حربه
من حرمله ترميني عبدألله يبني

يالنايم إبحجر الشهاده إتنوع سهمك إبگلبي
وياك روحي نايمه بالمصرع والباري حسبي
ماني أُمك إو گلبي عليك إمگطع وإعيوني تربي
والسهم حاجز حاجز والسهم حاجز
ما بينك إو ما بيني عبدألله يبني

من چنت عطشان إو تـلوج إو متهيد إشچان إلك راده
عالماي تفغر چنت لو چنت إتريد چاس الشهاده
وآنه أدري غير الچتل ميطح بألإيد هاي السعده
سلمت أمـرك أمرك سلمت أمرك
للباري وإيجازيني عبدألله يبني

كملت شهادة والدك بإستشهاد دمك الغالي
من نمت بحجور ألأجل عالميعاد ريّحت بالي
للتضحيه سجلت صفحة إرشاد لأهل المعالي
دوّنت جهدك جهدك دوّنت جهدك
وآنـه الصبر تدويني عبدألله يبني

الشاعر الشيخ كاظم المنظور الكربلائي

بحق علي الاصغر عبد الله الرضيع
الشاعر الشيخ كاظم المنظور الكربلائي

هـاك الطفل يحسين غارت اعيونه
وانخطف لونه
ظامي ويريد الماي ومنين اجيبه

گبر بچه الرضعان يبن امي دسمع
والطفل ما بي روح بس المنازع
يتلاگف اعله الماي گلبه ايتگطع
حيرني امره والعطش جمره
لو مسَّت الـدلال يثگب لهيبه

لـَمّه الطفل وديه ضمـدي اجروحه
من ثديه اتغذيه خل ترد روحه
شنهو السبب يحسين لو نشف موحه
چا بيش أغذيـه ؟ وشلون ألهيه ؟
وشيصبر العطشـان لو جف حليبه

زينب وخــوها حسين يتناوشونه
للطفل ايد الأيد ويجلبونه
والطفل كلسا لون ينجلب لونه
زينـب والحسين للطفل گلبين
بيها اسعرت نيران جمر المصيبه

واتوسط الميـدان والطفل بيـده
من گبل شرب الماي حزّو وريده
إبسّم السهم فطموه طوگو جيده
والصدره ضمه وبنحره شمه
ادموم الطفل لحسين خضبت شيبه

سالم سدر مذبوح رد للمخيم
ومن حدر كتر حسين يتفايض الدم
وجسم الطفل مطعون من شدة السم
وتغير الحال وتلوج العيال
وصوت النحب والنوح گبر حريبه

وام الطفل ساعات مرت عليها
تتشاوه بيها الموت ميطح بديها
عگـب الرضيع ابليل من در ثديها
ما تكتم النـوح ما تهجع الروح
شلون البگه إبهالحـال يبطل نحيبه

درت ادموع العين من در حليبك
من الثدي والماي يالشـح نصيبك
لو يمي چنت اسجيك واطفي لهيبك
من جمرة النـار يبني الامر صار
انت ابسهم فطموك وامك غريبه

الشاعر الشيخ كاظم المنظور الكربلائي

كعدة بحق علي الاصغر عبد الله الرضيع
الشاعر الشيخ كاظم المنظور الكربلائي

لـَمْ حسين دم الطفل بيده إو نبلة حرمله حزّت وريده
شيگول شيگول الطفل گلب أمه شيگول

چني بأم الطفل تصرخ يا إلهي إبجفن دامي
إلماي ما يحصل بدينه إو نشّفت ثديّ المرامي
لا لبن لا ماي عندي وإبني ظامي إو گلبي ظامي
وإتكبر إبإذن الطفل وإتنادي والمدمع يهل
عطشان يبني تنچتل إو حرمله إينحل إعظامي
يبني وإنگطـع منك نصيبي جمر النايبه نشّف حليبي
إو گلبي إبنار من فرگاك مشعول
شيگول شيگول الطفل گلب أمه شيگول

إو بالطفل گصدت الزينب تنحب إو تسچب العبره
هاكم إستلمو طفلكم يجذب إعله الماي حسره
إتسلمت منها الرضيع إو ظلت إمحيّره إبأمره
بالطفل حارت عمته وإعله المخيم فرته
ما لگت مـاي إو چبدته صارت إمن العطش جمره
إو سـارت لبو السجاد إبرضيعه إو تتعثر إبممشاها الوديعه
إو راي الطفل من إظماه مذهول
شيگول شيگول الطفل گلب أمه شيگول

حسين من شاهد وديعة فاطمه إو طفله ذهلها
گام إجلال الكرامة زينب إو قدس فضلها
وأخذ منها الطفل لاچن ما تنشدوني إشيگلها
كفي يزينب دمعتچ والطفل ذوّب مهجتچ
إوجمرة چبدتـه إبچبدتچ دهري إو دهرچ شعلها
يختي الطفل لأُم الطفل وديه إو خلها إبكسرة الخاطر تغذيه
إو عند أهله الرضيع إيصير مدلول
شيگول شيگول الطفل گلب أمه شيگول

إو بالرضيع إرجعت زينب عالرباب إو عله إسكينه
إو لن گمر هاشم نحرها إو رايته إترف إبيمينه
صاح زينب ها يزينب طلعتچ تصعب علينه
من الخدر يمخدره إشبيچ إو طلعتـي إمحيّره
صاحت چبدتي إمرمره والطفل دخّنت عينه
هاچ إخذي يزينب ماي عيني لو عالمشرعه تنگص يميني
وآنه إبهالحرم والماي مسؤول
شيگول شيگول الطفل گلب أمه شيگول

يختي كون الماي أجيبه وإخذي من عيني مصبّه
إو لعد زينب والكفلها إعيون الحسين إتّربه
فرفرت روحه إعله زينب والعضيده إنسلب گلبه
إو صـاح إعله زينب هوِّدي لو راح ضنوة والدي
سيفي يگع من ساعدي والطفل يرعاه ربه
بس راعـي العلم والعلم يسلم لو مات الطفل ليهمّچ الهم
شاء ألله الرضيع إيشوفه مچتول
شيگول شيگول الطفل گلب أمه شيگول

إو موقف حسين إويه زينب والرضيع إو گمر هاشم
غيّر الكون إو نظامه إو روّع إگلوب الفواطم
حسين صاح الطفل خله إيموت بس عباس سالم
هاك إخذ طفلك نادته للگوم وإعرض حالته
بلچن تروي چبدته لو يموت إبسهم ظالم
خل تكمل شهادتكم يهلنه إو چني إبحرمله ما يعف عنه
والنحر الرضيع السهم مرسول
شيگول شيگول الطفل گلب أمه شيگول

شال طفله حسين بيده إو بالگلب ماضي إصوابه
إو طلب شربة ماي من الگوم ما واحد أجابه
بس إبن كاهل تصدّه إو بالنحر عيّن إصوابه
والطفل من حس بالسهم وإبوجه أبو صد وإبتسم
إو مذبوح بي رد للخيم إو زلزل العالم مصابه
إو طلعت للرضيع إو شـافته أُمه إملولح رگبته وإيسيل دمه
وإبحجر الشهاده إشوف محمول
شيگول شيگول الطفل گلب أمه شيگول

الشاعر الشيخ كاظم المنظور الكربلائي

شوط كربلائي بحق مسلم بن عقيل "عليه السلام"

يهل تنشد عله مسلم چتل وإنچتل بالحـومه
وإنشدني عله أطفاله الراحت چتل مظلـومه

مسلم بالعزم والسيف خله الكوفه محتاره
صدگ يصعب چتل مسلم إو تسعر بالگلب نـاره
تطفي النار لو گلنه أخذ گبل الچتل ثاره

وإيحگ النحب والنـوح
عله أطفاله التذوب الروح
طفل فوگ الطفل مذبوح
بريّـه من الچتل لاچن إبسيف الظلم محكومه

إنچتل مسلم إو ظلت له يتيمه واليتامه إثنين
يتامه إو مـو يتامه إنگول چي حي بالوجود حسين
سلمهم لعد زينب إو دارتهم إبماي العين

إبمـاي العين دارتهم
عن اليتم سلتهم
إو نسّتهم مصيبتهم
لكـن عگب عين حسين ذكرو مسلم إو يومه

عگب مسلم وعين حسين تدري بألأطفـال إشصار
هجت من المخيم من جور النهب والنار
ظلت بالبراري إتحوم تصبح دار تمسي إبدار
وأهل الغـدر لزموهم
إو لبن إزياد ودّوهم
إو صدر أمره يسجنوهم
وإلهـا بالسجن حنّه إو إلها إگلوب مالومه

چني بالسجن حاضر إو للأطفال أمثلها
چنّه الخوف ماخذها إو هم اليتم نحلها
واحد شابگ الثاني إو تتراجف مفاصلها
وإيگله يخويه إشلون
ما تغمض لخوك إعيون
صدله إو صاح أمرنه إيهون
لو سـاعة فرج تگرب تزيل السجن وإهمومه

طفت نار بلواها إبذكر وإبطاعة الرحمن
هذا الراكع إو ساجد إو ذاك إيرتل القرآن
والسجّان شاهدهم وكسرو خاطر السجان
إنتو إمنين ناشدهم
إو عرف سيد البشر جدهم
إو چتيل الكوفه والدهم
من السجـن طلعهم إوباح الجدهم إدمومه

عله جدم الخطر سارو وين الوجه ما يدرون
النهار إبچهف يگضونه إو لو أمسه المسه يمشون
مطرودين مطلوبين وإمن المـوت يتجفلون
منيتهم حدت بيهم
عله الحارث تدليهم
إو شهادتهم دنت ليهم
وإبوجـه الرضا إتلگو شهادتهم المقسومه

مسلم عف عن إبن إزياد لجل هاني إو شرف داره
إوشوف الحارث المجرم ذبح عالطمع خطاره
ذب واحد عله الثاني إو بيهم فتك بتاره
وإنشدني إبدمع همال
شنهي حرجة ألأطفال
لجل الجائزه القتّال
وده الروس لبن إزياد إو تلگه إهناك محتومه

الشاعر الشيخ كاظم المنظور الكربلائي