👍

تهاني _ للرسول وآله .
تهاني _ للصبر وابطاله .
تهاني _ للكرم وإدلاله .
__

آني النجف ياناس ، والأشرف آني .
للعتره والمختار ابعث تهاني .
وياس اوورد وشموع بأحلى الصواني .
اجمل خبر بالكون هاليوم اجاني .

العقيله _ نورت دنيانه .
العقيله _ زمزم وروّانه .
العقيله _ فاطمة بكل حاله .
_____

نجمه بسما اهل البيت هالليله طلعت .
بيها احتفل جبريل والعتره فرحت .
يثرب شكر لله مو مره صلت .
ومريم بنت عمران للزهره هنت .

صبرها _ ينولد وياها .
صبرها _غذته وغذاها .
صبرها _ وياها هل اهلاله .
___

اخت الحسن وحسين للزهره زهره .
عفه وشرف واخلاق صديقه صُغره .
ابطف المجد والآه زينبنه ثوره .
بضعة علي الكرار للعِبره عِبره .

علمها_ من علم هادينه .
علمها _ للعدل يهدينه .
علمها _ ما ضعف دلاله .
_____

ام الخدر والله طاهر نسبها .
وانظف گلب ميمون واطهر گلبها .
درب النبي وجبريل زينب دربها .
يوم الحشر لا ريب فايز حزبها .

شفيعه _ للسخيه اچفوفه .
شفيعه _ لليباري اضيوفه .
شفيعه _ للصِدگ باقواله .
____

نعم السند للدين نعم العقيله .
نبع الوفه والطيب نبع الفضيله .
تروي الگصد عطشان تشفي غليله .
مثل الوصي الكرار حامي دخيله .

كريمه _ ما ترد السائل .
كريمة _ يعتينها العاقل .
كريمه _ حققت آماله

الحمد لله
محمد هادي المجتومي

👍

واعلياه __ حاضــر اتمنيتك
واعلياه __ اني شمعة بيتك
____

يامــن بچفــــك الفـردوس ولضـى
والارض مخلوقـــه لجلـك والفضـا
دِنــت لحظـات الاجــل يالمرتضـى
بيـــدك تمنيـــت جفنــــي اتغمضـه

عيني للباب __ بلهفتي تانيتك
واعلياه __ اني شمعة بيتك
___

تجبـــر الخاطــر يحيــدر مـــن تطب
ومــن اشوفــك تنطفــي نــــار الگلب
يبره جرحي وتنشف دموعي التصب
وتـنجلـي اهمومــي يصنديـد الحرب

ياضوه العين __ بحسرتي ناديتك
واعلياه __ اني شمعة بيتك
__

يانبـض گلبـــي وحبيبـــــــه وسلوتـه
زهرتــك ، آخـــــــر وضــوء اتوضتـه
وگبـل مـا يغمـض جفنـهـــــا بدمعتـه
يحضــــر الشاركهــــا هـمـهــا تمـنـتـه

بلحظة الموت __ يالوفي احتاجيتك
واعلياه __ اني شمعة بيتك
___

الفظ انفاســـي الاخــــيــره ومُنيتي
حاضــــر الشـــدات يحضــــر شدتي
ردت اگلـــك لا يشــيـيـــــع اجنازتي
اليتّـــم اولادي وهضـمنــــي بدنيتي

بين الأطياب __ من گبل وصيتك
واعلياه __ اني شمعة بيتك
__

هــذا ملـك المـوت واسنينـي انطفن
وانـت مو يمــي ولا احسيـن وحسن
هلّـن دموعـــــــــــي يسلطـان الزمن
وداعــة اللـه ياهلـــي عيونـــي غفن

لولا الأقدار __ والله ما خليتك
واعلياه __ اني شمعة بيتك

الحمد لله
محمد هادي المجتومي

👍

يا ليل - حيلــي أتهدم
يا ليل - شحمل يا هم
نامت عين الزهراء -- وسهرت عين الحوراء
يا ليل - شحمل يا هم
____

آني الذي ما قصرت ياليلي
حامي الحميه ألما بخلت أبحيلي
أهدي الورد والأمـه سـم تهديلي
أنطيها عيد ومأتم أتوديلي

بالخير _ما جازتني
بالخير – ما ذكرتني

خلت روحي بصحراء_وسهرت عين الحوراء
ياليل - شحمل ياهم
___

شمعة حياتي بيا ذنب طفوها
وبيا سبب روح النبي هضموها
ياليلي شوف بيا جزه جازوها
كسروا ضلعها وعالوجن سطروها

أتمنيت - أمري بكيفي
أتمنيت - شايل سيفي
چا ما ردوا أحياء --- وسهرت عين الحوراء ياليل - شحمل ياهم
____

صورة المحسن والضلع جدامي
وصوت الزجيه بيقضتي وأحلامي
تناديني عينك يا على أعله أيتامى
وحسره بأثر حسره غدت أيامي

حسرات _ خنگت صدری
حسرات _ تاكــــل عمري

من طعنوا حرف الباء --- وسهرت عين الحوراء
ياليل - شحمل ياهم
__

ما أكدر أدموع الحزن أخفيها
ولا أكدر أجفوف القهـر ألويها
عالماتت وجمـر الضلع ما ذيها
لاخر نفس نوحي يظل أعليها

والله _مــــا أنسـاها
والله _روحي وياها
من راحت للعلياء --- وسهرت عين الحوراء
ياليل - شحمل ياهم
_____

يبره الطفل لو صاحت أمه بأسمه
ولمن تناغيه ولصدرها أتضمه
يشتم عطرها وهيه عطره اتشمه
وأم الحزن حرموها جلمة يُمه

مكسور _ گلبي أعليها
مكسور _ شيـسلـيهــا
غمّض جفن الآلاء --- وسهرت عين الحوراء
ياليل - شحمل ياهم
___

كل ليله زينب تنسمع ونتها
وأكبر من أسنين العمر حسرتها
تنشدني يا ليل وتصد لخوتها
هم ترجع أمنه ونفرح بشوفتها

يا ريت – ما نشدتني
ياريت - ما سمعتني
گلتلها اتبده الماء --- وسهرت عين الحوراء ياليل - شحمل ياهم

الحمد لله
محمد هادي المجتومي

أحفاد الشجره الملعونه _ والعدهم وجهين .
يسّبون الحره الميمونه _ بغضاً بالنورين.
فرعوني وشيطاني _ هالفعل السفياني
بغضاً بالنورين
_____

للعرب عادات چانت _ منها للميدان أصوله
اليحرگ إخيام الحراير _ وتسحگ الرضع خيوله
ويمنع الماي أعله خصمه _ هذا خالي من الرجوله

وجيش أل أميه بكربله _ من آخره حد أوله _ ابشع مِن اوحوش الفله_ اقسم بالله ورسوله

حاقد عالكرار وآله _ يطلب حيدر دين
عطشانه يخليها اعياله _ يگطع نحر حسين
طاغوتي وعدواني _ هالفعل السفياني
بغضاً بالنورين
__

معركة عاشر محرم _ كشفت اخلاق البغايه
الذبحت ابن الزهره ضامي _ إبلا دفن خلت ضحايه
الرووعت گلب اليتامى _ وتأخذ الخدر سبايه

ذرية الهادي النبي _ بطف المنايا تنسبي _ من الشمس حمره العبي _ أعله الهزل آل الهدايه

يالوعه التشبه هاللوعه _ وين العالم وين
زينب مهضومه ومفجوعه _ وهيه اخت السبطين
صاحت يا شرياني _ هالفعل السفياني
بغضاً بالنورين
_____

الوسوس الشيطان الها _ وبايعت أبن الدعيه
وحاربت قرآن ناطق _ وذبحته بالغاضريه
أسست للجور والشر _ ومهدت للجندريه

هالامة تتحمل وزِر _ لتبرر ولا تعتذر _ چم طاغي خلقت چم شمر _ وچم مصيبه الها ورزيه

اسباب المأساة الكبره _ نلخصها بشطرين
اتباع الخمار وشره _ واتباع الشيخين
انقلها بوجداني _ هالفعل السفياني
بغضاً بالنورين
______

لولا أفعال ال اميه _ المو رشيده ولا حميده
ما تجاسر هالوضيع _ ومزگ القرآن بيده
لكن إيقلد فعلهم _ وهالجرايم مو جديده

مدرسة هند الفاحشه _ اتخرج بشر متوحشه _ مسعوره عالناس وحشا _ السامع الواله الصميده

مدرسة التغتال الحمزه _ يخجل منها الشين
عنوان الطاغوت ورمزه _ ما تملك أي زين
والرايد برهاني _ هالفعل السفياني
بغضاً بالنورين
_____

بهالمجالس والمآتم _ ننصر السُنه الصحيحه
ونكشف الملعون مِعقل _ ونفضح الفكره القبيحه
من علي عدنه شجاعه _ أحنه اتباعه الصريحه

صوت المجالس يعتلي _ سلمٌ ٌلمن سالم علي _ حرب ٌ لمن خان الولي _ ويهضم اللبوه الجريحه .

احرار تعلمنه من الطف _ لو دارت صوبين
ما نتخاذل عن المصحف _ والضحه بچفين
والنهج القرآني _ هالفعل السفياني
بغضاً بالنورين
__

للمصايب والنوايب _ زينب الحوراء مركز
ثكلى مسبيه وغريبه _ وچالجبل حاشاها تهتز
لكن اهتز كل گلبها _ للطفل من شافته فز

ينشدها عن حامي الضعن
ليـــــش الخيــام اتلاهبن
ليـش الحـــــــرم يتسلبن

اتحيرت أم المصايب _ وللنهر دارت وجهها

الحمد لله
محمد هادي المجتومي

?

?

?