لمولاي موسى ابن جعفر عليه السلام

بالسجون المظلمه اسنينه گضت
وساگة من گيد الحديد اترضرضت
ــــــــــــــــــــــــــــــــــــــ

حجـة الله وطاعتة نزلت فرض
وهوه امام اهل السمه واهل الارض
ليش گيد السنسله بجسمه يرض
ما كفت بالغربه الاسنين المضت
ــــــــــــــــــــــــــــــــــــــ

گضى عمره بنص طوامير السجون
والسجين ابسجنه يتگيد اشلون
اسنين ماشافن ضوه ذيچ الاعيون
وليله عينه ابراحه ابد ما غمضت
ــــــــــــــــــــــــــــــــــــــ

ابلايه اهل ظل الغريب ابلا بنين
ابعيد عن ديرة هله عايش اسنين
يمسي دمعه ويصبح بدمعة العين
وروحه لنواع المئآسي اتعرضت
ــــــــــــــــــــــــــــــــــــــ

وابسجون الطاغي يتنقل عمر
ومن عذاب السجن يتجرع المر
مايليق ايطب امامي ابهل الگدر
موش گدره امچانه والوادم رضت
ــــــــــــــــــــــــــــــــــــــ

ابسجن ابن شاهك نهاية منزله
وباأشد انواع العذاب ايعامله
حفر جسمه ذاك گيد السنسله
وعينة علباطل ابد ما غمضت
ــــــــــــــــــــــــــــــــــــــ

اخذ شوفة ابغربته ذاك الظلام
وهوه ابگيد السنسله ايصلي وينام
حجة الله مو گدر هذه المقام
والايام ابحزن والهم گوظت
ــــــــــــــــــــــــــــــــــــــ

أشد من الصوط لچمات اللسن
اذا شتمو فاطمة اباب السجن
چان مو للسوط للزهراء يون
روحة چالمذبوح علزهره انفضت
ــــــــــــــــــــــــــــــــــــــ

فوگ كل هاي المصايب والأشد
وبرطب مسموم سم چبدة العبد
ومن حرارة سمة ممرود الچبد
ونفسه لله بالمصايب فوضت
ــــــــــــــــــــــــــــــــــــــ

روحة فاضت والچفن بعبايته
وعلجسر ظلت غريبة اجنازته
ابسرعه مافزعت عشيره وشالته
الناس امام الرافظة فوگه الفضت

طارش يخبر الهواشم يلحگ يخبر الرضا
بالسجن بيد السلاسل موسى بن جعفر گضه
ــــــــــــــــــــــــــــــــــــــ
بالسجن گضه حياته بلا گرابه ولا هله
وين اهل هذه الغريب اتشوف عينه الهامله
وتمسح ادموع الغريبه وتفل گيد السنسله
ومسرعه تفل السلاسل بيهه ادينه امرضرضه
ــــــــــــــــــــــــــــــــــــــ
بوسط طامورة ظلام ومن سجن عاش السجن
شلون حاله الينسجن وبعيد عن اهله ويحن
بلا هله وابلا أولاده لبس جلباب الحزن
ابغربة هسه اسنين عمره وابغرب عمره المضه
ــــــــــــــــــــــــــــــــــــــ
سجن اظلم من سجن والگلب بالهم منفطر
وبالمچان الموش گدره خلص اسنين العمر
ومن ابن شاهك حسافه علوجهه من ينصطر
وابسجن سندي بن شاهك ضاگ بعونه الفضه
ــــــــــــــــــــــــــــــــــــــ
كلشي يتحمل سلاسل والسجون المظلمه
صابر على اسياط متنه التصب من عده الدمه
وگلبه ما يحمل ثواني تنسب أمه فاطمه
لعنه الله على القتله لعنة الله على الرضه
ــــــــــــــــــــــــــــــــــــــ
يشهگ انفاسه الاخيره وسمه گطع جبدته
وين ولده اتشربه ماي وبيده اتمش دمعته
اتحظنه ويقبلون خده ويعدلون اعمامته
الچان ما حاظر حياته ابموته خل ايعوضه
ــــــــــــــــــــــــــــــــــــــ
ياال هاشم هسه افزعو موسى بن جعفر غريب
وحشه تشييع الجنازه بلاية صايح لا نحيب
ومن بعد فرگه طويله الرضا اتلاگه ويه الحبيب
ملگه موت وصوت عالي شيعو امام الرافضه
ــــــــــــــــــــــــــــــــــــــ
والرضا جهز ابيه ودمعت اعيونه تصب
والرضا يبچي بونين ونايحه تفطر الگلب
لچن ما شافه ذبيح على الترايب منسلب
حسين موش چفوفه ابنه بسحگ عينه امغمضه

السلام على مولاي موسى ابن جعفر عليه السلام

بالاحزان زينب گظت
ابلايه اخوان من غمظت

---------

عاشت عمرهه مصيبه تاخذهه المصيبه
عاشت غريبه وماتت بديرة غريبه
ما فتر ونهه ولا گلب ييطفي لهيبه
تنعى الحسين وجثته الظلت سليبه

ابلا دفان جثته بقت

------------

امصايب رسمهن ماگظى الهسه بالعين
شافت اخوهه واگف وعدوانه صوبين
بجروحه طايح شافته من مهره الحسين
حي الحسين وناس هجمت علنساوين

بالنيران لخيامه اجت

------------
من الصبح يبدي البچي لحد هدوه اليل
واتفسر امصايب شكل كل دمعه التسيل
وابلا بواچي ولا لطم من ينهد الحيل
ينهد اشما تذكر حسين وسحگت الخيل

علعطشان حيل اركظت

--------------

ما ينحمل ذرة مصاب من العقيله
بدموعهه العباس صدت تشتكيله
مچتوفه زينب خويه طلعت علهزيله
سبي ودواوين وخرايب مو قليله

والنسوان اتگيدت

------------

فزعت عشاير علخرابه ديره ديره
مارظو حرمه بالظعن تبقى اسيره
الدرب السبي ظلن الماعدهن عشيره
الزينب ولا واحد اجه وشالته الغيره

ابلا وليان من انسبت
-------------

وصلت الشام وگالت اه الشام دربه
وي كل نگلت جدم متروسه غربه
الشام هذه الكون زينب ما تطبه
كل غيور ابهل مصيبه احترگ گلبه
لچم ديوان زينب مشت

اشما بيه بچي ابچيك
وشما بيه  حچي يحسين منك ليك

عشت وياك كل عمري بتدابيرك

واظل ابعتبتك عطشان
ولا اتروى من غيرك

يم اسمك امطشر كل عناويني
وغيرك ماردت عنوان

بصوتي ابسكتتي وياك
احبك من گلب والسان

ماي ابرمل وكت المو ابطاريك
بلا انته العمر خسران

بس بيك الگلب ربحان

اشما اكبر عمر وياك اظل زغران
اشما ابچيك احس اكمل واصير انسان

گالو ذلة تنعد وگفت البيبان

واذ ازورك وما أوگف ودگ بابك
احس بزيارتي النقصان

اسولف بيك اضل من اختلي بدربي

واذا ما يحن ما يبچيك
احسب گلبي مو گلبي

واحس ازيارتك تنكثني من ذنبي

طعم حبك دوه ومرهم

ويطهر گلبي حيل وياك
اشما بمصيبتك ينهم

عمري الراح مو وياك
اشما بيه عليه اندم

ودمعات التطيح عليك
اعذب من نبع زمزم

يترسنه حزن اسمك اشما ينجاب

ياابو امصاب ما يوصل الدمه امصاب

حزنك يفتح اشچم باب

وبنهايه ذبح نحرك يبدي چم اصواب

دمك بي سترت الدين
وثوبك بي سترت الناس
يلظليت دون اثياب

بظهر عاشور شفتك دمعة تچوي العين

سمعتك اه من صوت
النياحه ونت الباچين

مو گد الحزن عشناك

علگد احزانه كلمن واگف اگبالك

بچينه بركظه اطويريج
ومر ابالنه حزن الشغل بالك

طبينه وبچيناك ولطمنه عليك
وعشنه شلون لطمن يمك اعيالك

مر بينه الحزن بس من ورى الشباچ

الله يساعد الشافتك نايم دم
الله يساعد الشافتك ما تنلم

والتمن بناتك نوح
وفيي ذاك العبي فوگ الدمه خيم

الما ينجاب طاريهن
وي صدرك اتكسر كل خواطرهن

ما ينهابن من الناس
بعد ما ضل اخو لا ضل ابو عدهن

بناتك عگب چف عباس
راح الحبل يلزمهن

من السبي للديوان
وبنص الخرايب يبقى منزلهن

لشهادة الامام علي الهادي عليه السلام

وين الذي يطوي البعيده
علريح يعبر بيده بيده
ابگلب يلهب يسبج الريح
لهل الكلايف والشديده

------------

يوگف على حدود المدينه
محروگ گلبة وحمره عينه
للساده حيهم حيهم ايصيح
مسموم هاديكم لگينه

------------

وين اهل بيظ ال بلحرايب
وين اهل طالب واهل غالب
اتمدد الهادي وغمظ العين
ومن ذاك سمه الچبد ذايب

------------

حيهم اوين اهل المعالي
المن زودهم كل راس عالي
حاسر اجيت الراس هليوم
چي راسه حاسر علي الهادي

-------------

اتعنى للساده ابهل امصاب
ناعي المصيبه ابعتبة الباب
الكلفه عدكم ياال عدنان
باچر الهادي اتشييع الاجناب

--------------

امصاب وي حسين ينعاش
ميت الهادي وحدرى الافراش
بدم الجروح اتغسل حسين
وتچفنه ماصح وصلة اقماش

------------

الحسن سد للهادي الاعيون
واعيالة فوگه ابراحه يبچون
وحسين فوگ اجروحه علگاع
مفتوحه عينه وبي يسحگون

--------------

غير اليموت اهله يجوله
واجهاز ميت يجهزوله
اكرام اليموت ادفنه العزاز
والگبر اهله اليحفروله

--------------

وحسين ثلث ايام عاري
مسلوب وبحر الصحاري
بس الجسد والرس برماح
وي الظعن يمشي ويباري

منتظره جيتك بالظعن وابدمعة العين
من العاشر وعدي علم مذبوح يحسين
حسين حسين حسين حسين
انه ام الابنين

--------------

اربعه انطيت وقليله
يلتسوه گوم اوقبيله
الطولك وطول العقيله
تمشي في اخوان

راحو بيارغ نشامه
في علذيچ الاعمامه
كل اخو فدوه ال امامة
هذه مبدء چان

خدام ولدي ابطعلتك
ويستئنون ابخدمتك
وگفتهم بسد وگفتك
ايات وي قران

لمن رحت يبني عني
ماگطع كل ليله وني
ما ينگظي يمه حزني
عمري كله احزان

ابيتك المغرب من يطب ايخيم امصاب
وي العليله اعليك ابچي ابعتبة الباب
حسين حسين حسين حسين
انه ام الابنين

------------

امحزم ظعن بالهوشم
خيمه على روس الفواطم
راح الظعن كله سالم
من حرم واطفال

امدللين ابسفرهم
بعيد الخطر ما يمرهم
وابچلمه محد هظمهم
وما تجي على البال

ابهودج وراياته عامر
هيبه ويسر النواظر
ماكو بي كسرت خواطر
والعثر ينشال

يمشي الظعن عنده والي
وغالي ايتفگدله غالي
وبكل بلد راسه عالي
وينعدل لو مال

ابهيبه اوقار ابكل بلد لمن يدخلون
الساد تسد عين الشمس مو بس الاعيون
حسين حسين حسين حسين
انه ام الابنين

------------

وايام مرت علينه
غير الحزن ماكو بينه
واحدنه عالي ونينه
من رحت لليوم

وبالرؤيه وابليله عاشر
اخبرني عن كلشي صاير
شفت النبي راسه حاسر
واشعث ومهظوم

من انعى يايمه حيره
كل المصايب چبير
يلرحت ماخذ عشيره
ياچبير الگوم

واچبيرهم باقي وحده
وما ظل اخو هسه عنده
شدتة ويه اخيامه شده
وعلحرم ملچوم

كل خطوه يطلع للحرب علخيم يندار
وكل خطوه يطلع تعلى چان صوات الزغار
حسين حسين حسين حسين
انه ام الابنين

------------

ذاك العطش غطه شوفك
كل هذه محد يعوفك
خيل وعساكر تطوفك
يلطحت عطشان

اتگوم وطعنهم يعثرك
كل السهام على صدرك
يحسين محد يحظرك
من الطعن تعبان

ابلا اخو يشيلك جريبك
وكل سهم لمن يصيبك
خظبت چم مره شيبك
وانته بالميدان

ما ظاگ واحد محنتك
شافن بناتك عثرتك
ومن طحت شافن ذبحتك
هنه والنسوان

غير اليطيح الهن عزيز اعليه يلطمن
طايح ابوهن والحرم بالهيمه فرن
حسين حسين حسين حسين
انه ام الابنين

------------
الحرم زينب تلمهن
علترب نومه زلمهن
علشاطي طايح علمهن
ابخيمه كله اتبات

الصبح اصبح عليهم
والنوگ جابوهه ليهم
طلعو ومجتوفه اديهم
والحرم مهظومات

ماكو أخو ايحامي عدها
الحرم عافت اهلها
أبلا دفن محد الها
والظعن يمهم فات

اكبر مصيبه النه هايه
ابلا أخو وماكو رايه
للكوفه تمشي السبابه
وابخرابه اتبات

وعلى الظعن دار الوكت وهسه اهل الحسين
وطبن الما شافن بشر بين الدواوين
حسين حسين حسين حسين
انه ام الابنين