Қишнинг сўнгги куни… яхшиям
Умр давом этади ҳали.
Тополмадим, арзирли сабаб,
Ҳар гал ҳузурингга боргали…

Шунча йиллар ўтди орадан,
Қанча куз, қиш, қанча кўкламлар.
Ёт қўлларда қовжираб сўлди,
Фақат сенга аталган гуллар…

Қайда бўлма, бахтли бўлсанг бас,
Сўзларингни қўмсайман бироқ.
Ўйланаман ҳатто соатлаб,
Қилсаммикин, дея қўнғироқ…

Кўриб қолсам ногоҳ кўчада,
Парво қилма, тушма ташвишга.
Сенга қорлар отишим мумкин,
Раҳмат айтгим келади қишга...

t.me/sherzod_abdusamadov

https://youtu.be/Z_tsOw5WG3E?si=OH8-A1NA-spl62ps§

📝 Бир сатр илҳомлари

"Кўзимни юмсаму, очсам март бўлса..."

Соҳиба:
Қиш бўйи дилимнинг ғуборин ювдим,
Ҳаққа етолмайди зарра гард бўлса.
Баҳорни шунчалар интиқиб кутдим
Кўзимни юмсаму очсам, март бўлса…

Шерзод:
Умр, ҳар сониянг асли бебаҳо,
Бироқ кўникаман, бу қисмат бўлса!
Ранжимасми айтинг, февралнинг ярми:
"Кўзимни юмсаму очсам, март бўлса"?...

Жаҳонгир:
Баҳор соғинтирди бизларни ёмон,
Ғунча дудоғидан олсайдик бўса.
Шу сафар кечирар феврал - қадрдон,
"Кўзимни юмсаму очсам, март бўлса"...

Соҳиба:
Мени тушунади баҳор ҳам, қиш ҳам
Аслида кўнгилда ўзга дард бўлса.
Ўнгидан келарди бу ёруғ туш ҳам,
Кўзимни юмсаму очсам март бўлса...

Жаҳонгир:
Бойчечак - суюнчи, тутай қўш қўллаб,
Ногоҳ кипригингга зарра гард қўнса.
Қуёшли юртимнинг саломин йўллаб
"Кўзимни юмсаму очсам, март бўлса"

Соҳиба:
Юртимнинг чечаги, шамси соғинчим
Ҳавосидан кўнглим кемтиги тўлса…
Февралдай охирлаб борар илинжим -
Кўзимни юмсаму очсам, март бўлса!

Феруза:
Қуёшнинг нурлари аллалаб аста,
Нафис ғунчаларнинг чиройин очса.
Қалбларга азалий меҳр пайваста,
"Кузимни юмсаму очсам, март бўлса"

Аҳмад:
Ҳар ёнда чечаклар анвойи гуллар
Ифори кўнгилни қитиқлаб турса.
Ҳаммамиз соғиндик, соғинди диллар,
"Кўзимни юмсаму очсам, март бўлса!"

Отабек:
Наҳот, сизлар учун фасллар фарқли?!
Қанийди, қиш севган битта мард бўлса.
Қўшилиб йиғлардим агар, мабодо
“Кўзимни юмсаму очсам март бўлса...”

Жамшид:
Март сенга неларни беради эркам,
Наҳотки ваъдалар шунча кўп бўлса?!
Февралим йиғлайди куйдириб қалбим
“Кўзимни юмсаму очсам март бўлса...”

Мушоира иштирокчилари: Жаҳонгир Шарофбоев, Шерзод Абдусаматов, Феруза Қурбонова, Аҳмад Юсупов, Отабек Жўраходжаев, Жамшид Ахмеджанов.

✍🏻 Соҳиба Ҳаёт.

👇🏻Каналга уланиш:
https://t.me/sohibahayot

#mypoetry

Февралда яхши одамлар туғилади...

Бир неча бор улуғ шоирнинг суҳбатидан баҳраманд бўлган бўлсам, бир марта айнан шу санада уйида меҳмонлар  сафида иштирок этган эдим. Шунда ҳар бир ижодкорнинг фақат ўзигагина хос бўлган инсоний сифатлари бўлишини ва ана шу жиҳатлари ила бошқалардан ажралиб туришини ҳис қилганман.
Азим Суюн қўли очиқ, самимий, кибрдан йироқ, бир сўз билан айтганда, тили билан дили бир инсон эди. Ҳаммани ўзига яқин олиб гапирар, муаммоларини эринмай суриштирар, оталарча маслаҳатларини аямасди.
Меҳмонлардан бири Азим Суюннинг унга  қачондир қилган яхшилигини миннатдорлик билан хотирлаганда ўша воқеани эслолмади. Шунда давримизнинг етук олими Қозоқбой Йўлдош ва бошқалар Азим Суюнни жуда кўпчиликка ёрдам берганидан ҳаммасини эслаб қолиши қийинлигини ва бу инсоний фазилат бошқаларга ҳам ўрнак бўлишини таъкидлади. 
Булунғурдан эканимни айтганимдан сўнг суҳбат бир муддат Булунғур тарихи ҳамда Анвар Жўрабоевнинг ижоди хусусида бўлди.
Адабий кечага айланиб кетган тадбирдан кўпчилик халқнинг кўнглидан жой олиш учун аввало,  халқни севиш, бировга яхшилик қилиш имконсиз бўлса, ҳеч бўлмаса ёмонлик қилишдан тийилиш кераклигини ўзига ибрат сифатида олганига ишонаман...
Азим Суюн ҳам халқимиз муҳаббатига сазовор бўлган ана шундай улуғ шоирлардан бири эди.
Шу ўринда яна бир нарсани эслаб ўтишим лозим. Бир кун  Азим Суюннинг китобини ўқиб ўтиргандим, кейин ўзига қўнғироқ қилдим. Бу китобни менга Азим Суюннинг укаси Исомиддин ака совға қилганди. Олдин гаплашмаганим учун ўзимни таништирдим. Вилоятда экан, овоз узилиб қолавергани учун, машинани тўхтатиб анча гаплашди.
Ўшанда балки биринчи мартадир, шунчалик халқ эътиборидаги машҳур шоирнинг бу қадар камтарлиги ҳақида анча вақт ўйлаб юрдим.
Азим Суюн сингари замондошларимиз орамизда кўпайса, кўпинча амал курсисидаги,  санъат соҳаси вакиллари ёки сал таниқлироқ бўлган кишилар билан учрашишга тўғри келганда ҳам, уларнинг муносабатларидан ўкинмай, барибир яхши одамлар бор деган хулосага келаверамиз.

Андиз ўсган ерларда...

Андиз ўсган ерларда отлар бевақт ўлмағай,
Яхши бўлса аёллар эрлар юзи сўлмағай.

Қайси юртда чинакам ботир эрса йигитлар,
Ўша юртнинг эллари ёвларга қул бўлмағай.

От минмаган от минса, чопа-чопа ўлдирар,
Боғ кўрмаган боғ кўрса, пайҳон қилар, сўлдирар.

Ҳушёр бўлгил, жон элим, элдай сақла элингни,
Ёвларингга қўл берсанг, паймонангни тўлдирар.

Бош кесилса, ёронлар, сочга мотам тутилмас,
Қон қусилса, ёронлар, ичга сувдек ютилмас.

Қай бир миллат тупроғин топтар экан маккор ёв,
Ўзлигин билганларнинг бахти асло бутунмас!

Арғумоқларга мининг, ғолиб қилич ёр бўлсин!
Бу дунёда ҳар кимнинг ўз Ватани бор бўлсин!

Азим Суюн.

https://t.me/sherzod_abdusamadov

Телеграмда нотаниш манзилдан қуйидаги ёзув ва шеър келди. “Бу кечаги шеърингизга жавоб шеъри, шуни ҳам каналингизга қўйинг".
Унга миннатдорлик билдириб, ушбу ижод намунасини ўзгартирмаган ҳолда Сизларга ҳам илиндим. Мазкур ҳазиломуз жавобни тўғри қабул қиласизлар, деб умид қиламиз.

Тунов куни Тошкентдан,
Хоразмга борибсиз.
Энг яқин дугонамга,
Севги изҳор қилибсиз.

Бугун "ўлдим-куйдим" деб,
Менга мактуб йўллабсиз.
Дугонамни унутиб,
Йўлларимни пойлабсиз.

Хоразмча ўйнайми?
Хоразмча сўйлайми?
"Муҳаббат" овчиси, деб,
Достон қилиб куйлайми?

Хоразмлик қизларнинг,
"Оға" сига учмангиз.
"Қўйсангиз-а" деган,
Нағмасига учмангиз.

Сизга айтжақ гапим шу,
Севгингиздан тонмангиз.
Юсуф каби мард бўлинг,
Агар ошиқ бўлсангиз.

https://t.me/sherzod_abdusamadov

Кўзларингга тўқнашиб,
Ишонмади кўзларим...
Яхши гапирмоқчийдим,
Дағал чиқди сўзларим.

Хоразмча ўйнаб бер,
Хоразмча куйлаб бер,
Неларни ёқтирасан,
Бир бошидан сўйлаб бер.

Вужудим қулоқ бўлсин,
Майли ишқ гуноҳ бўлсин,
Ишқнинг гуноҳлигига,
Лабларинг гувоҳ бўлсин...

Айтгин, шу севгимиди?
Қайтгин, шу севгимиди?
Гапларингга тўймаган
Пайтим шу – севгимиди?..

Оға, дедингу нега,
Сўзимга ишонмадинг?
Чиройингга термулиб,
Кўзимга ишонмадим...

Севги шундай бўлурми,
Титрайдими қўл-оёқ?
Келсанг тўрт томон яшнар,
Кетсанг зимистон ҳар ёқ...

Хоразмча ўйнаб бер,
Хоразмча куйлаб бер,
Неларни ёқтирасан,
Бир бошдан гапириб бер...

t.me/sherzod_abdusamadov

Дўстим, истагингиз  — кўнгил хоҳиши,
Кимни соғинсангиз, соғининг майли.
Лекин шундай кунда қолдирманг ёлғиз,
Қорли кунда кўнгил дийдор истайди...

Таъсир қилмасидан аёзнинг ниши,
Қуриб кетмайдими дунё ташвиши...
Сизнинг истагингиз  — кўнгил хоҳиши,
Қорли кунда кўнгил дийдор истайди...

Билмайман, қанча йўл юрибман ҳозир,
Кулбангиз ёнида турибман ҳозир.
Қанча кўп кутмайин, кутишга арзир...
Қорли кунда кўнгил дийдор истайди...

Кўчага йўл қараб чарчади кўзим,
Чой бу бир баҳона, асли азизим.
Ёки ёнингизга борайми ўзим,
Қорли кунда кўнгил дийдор истайди...

https://t.me/sherzod_abdusamadov

«– Ҳазратим, – деди Моҳим Бобурга мулойим тикилиб, – сиз ҳам шоирсиз, ҳам олимсиз. Мен орзу қилардимки, барча эл-улуслар сизни ҳам Берунийдек, Деҳлавийдек фақат яхши сўзлар билан тилга олсалар.
Бобур Моҳим бегимнинг ботиниб айтолмаган сўзларини тушунди-ю, юзи тундлашди. Хаёлида яна ўша совуқ изғирин қўзғалди.
– Сиз менинг подшоҳ ҳам эканимни нечун эслатмоқчи эмассиз?
– Чунки мен сизни ижодингиз олови ёнган илиқ қутбда муқим туришга чорламоқчимен!
– Мен ижод қутбида умрбод қолмоқчи бўлиб, Даҳкатда, Осмон Яйловда ялангоёқ юрганимда нечун учрамадингиз? Энди кеч!.. Подшоҳни барча эл-улуслар фақат яхши сўзлар билан тилга олиши – ушалмайдиган бир орзу. Мен одамларнинг мақтовига ҳам, таънаю маломатига ҳам роса тўйганмен!»...
Пиримқул Қодировнинг «Юлдузли тунлар» романидан.

– Ҳазратим, сиз шоир, олимсиз, –
Титраб кетди Моҳимнинг лаби...
– Тилга олсин эл-улус сизни
Деҳлавий ва Беруний каби.

Кўтараман қандай бу ғамни,
Билганларим бўлсайди рўё.
Фотиҳларнинг кўпдир ғаними,
«Борса келмас» юриши гўё,

Қонли уруш, оловли чоҳ бор.
Наҳот дунё шундай, беомон,
Ёлвораман, ҳазратим такрор,
Бахтли кунлар келгайдур қачон?

Ҳинд юриши, ўйлаб қўрқаман,
Паноҳига олсин Аллоҳим...
– Мен Даҳкатда юрган кезларим,
Айтинг, қайда эдингиз, Моҳим?!

Аросатда қийналар жоним,
Илиқ қутб «қол» дейди, қўймас,
Бор умидим тикканман ахир,
Олис қутб... бормасам бўлмас,

Ўша зотга бергум топшириб –
Ким ташнамас ҳокимиятга.
Бошқарасиз маълум бир муддат,
Ишонаман сизга албатта.

Тўйдим мақтов, маломатлардан,
Кетгим келар дунёдан кечиб,
Чўчиб сўнгсиз изтироблардан,
Исинаман гоҳо май ичиб,

Вақтимни гоҳ ўтказдим овда
Ялангоёқ қорда, қировда,
Юрганимда Осмон яйловда,
Айтинг, қайда эдингиз, Моҳим?

https://t.me/sherzod_abdusamadov