على عناد الناصبي باركوا الطه النبي
بمولد الزهراء بنته فاطمه *
بمولد الزهره فخر كل آنسه
للنبي زفوا التهاني هالمسـه
أتباركوله بفاطمه خير النسه
خل نعيد نحتفل نبارك لسيد الرسل
وبالتهاني أتعنته أملاك السمه
بمولد الزهراء بنته فاطمــــه
غصبن أعلى الناصبه والكافـره
أحتفلوا في ميلاد بت خير الوره
وألعنوا كلمن يعادي الطاهــره
وحق من سن السنن مانعوف أم الحسن
كلوبنه بحب الزجيه هايمه
بمولد الزهراء بنته فاطمه
خلوا هاليوم الهلاهل ترتفــــــع
أبهالولاده الطاهره شعلوا الشمع
وبالسمه صوت الحفل خل ينسمع
أحتفلوا ياشيعة علي وهنوا هاليوم الولي
أبن عم المرتضى حامي الحمه
بمولد الزهراء بنته فاطمــــه
هالمسه شموع الفرح خل تشتعل
بمولد أم حسين خلنه نحتفــــل
عيدينه شايب وشاب وطفــــل
وغصبن أعلى المارضه اليوم عيد الرافضه
أويه النبي وجوه الروافض باسمه
بمولد الزهراء بنته فاطمــــه
محلها أسمها بالثغر مثل الشهد
ومنها أفضل هالخلق لا ماشهد
وألها رب الكون بالعصمه شهد
طاهـره بت طاهـره جوهره بت جوهره
طه رب الكون دره سلّمــه
بمولد الزهراء بنته فاطمه
الحزن هاليوم أنسه وظل وأنطرح
وأنكتب غفران للصدره أنشـــرح
صفي كلبك يالمحب في هالفــرح
أفرح أو أخذ الاجر بعيد ميلاد الطهّـر
أتوجه اليوم النبيك كلمـــه
بمولد الزهراء بنته فاطمه **
طرت من الفرح بالجو وعالي
أهلهل عالي والميت وعالي
بعد ما أهتم الجرحي وعالي
شفاني مولد الزهره الزجيه

سلام المشعل

في السيده فاطمة المعصومة

أحاه يجرح البعد يالمايجيلك شفـــه
مامثل جرحك جرح ياكاصي بهل الوفه

شيصير بالعاطفــــه لمن يطش الشمـل
ويصبح غريب البشر محزن عيونه أتهمل
والغربه لهل الوفه أشما كلت صعبه تمل
تحفر حفر بالكلب موسهله ماتنحمـــــل
أبلا رحمه تولي البشر تتولى عالعاطفه

حال الغريب الذي بدار الغرب ويموت
ما أشد منها بعد بس حالته مبخــــوت
يوم الغريب بسنه لتظن سهل ويفــوت
عنده المحنه الهوه والشوك عنده الكوت
ظيمه سنين أشكثر ينراد لوسولفـــــه

جرحچ يدار الغرب يأذي ويكصر العمر
نيشان جرحچ يظل ببنادم وللحشــــــر
آه لو وصل للعظم كسره فلا ينجبـــــر
معروف يهده الجرح بس هذا ما يستقر
سلطه ظيم الدهر عالمغترب وأكتفه

أحآه يدار الغرب بينه أصوابج مضا
وظل يدي ضيم وقهر ياذينه من نعرضا
لا مارحمتي شعجب معصومه أخت الرضا
بالغربه أخذتي العمر والموت بيها حضا
وأنتي بقدرها شعجب يالغربه ما عارفه

در صافي أخت الرضا ومو در فقط عالمه
ومستارثه فاطمه أم الحسن فاطمــــــه
سهم المنايا فجع أتباع حامي الحمـــه
صوب كلب كل محب هالسهم لمّن رمه
ينزف بقى ماكطع جريانه مانوصفــه  

مدفنها أصبح ثغر لهل العلم يبتســـــم
قم مو مدينه أصبحت عاصمه لهل العلم
من يدخل ألها المحب عطر الزجيه يشـــم
وبس يكبل أعلى الصحن عالخد دمع ينرسم
تكصدها شيعة علي زوار متلهفــــــــه
* * * *                                  سلام المشعل

{وَلَا تَحْسَبَنَّ الَّذِينَ قُتِلُوا فِي سَبِيلِ اللَّهِ أَمْوَاتًا بَلْ أَحْيَاءٌ عِنْدَ رَبِّهِمْ يُرْزَقُونَ}
سيد المقاومة
هنيئاً لك الشهادة ..

لبنان .. 🇱🇧
نسأل الله العلي القدير أن يرعاهم ويحميهم ويدفع عنهم شر الاشرار وكيد الفجّار وأن يشمل شهداءهم الابرار بالرحمة والرضوان ويمنّ على الجرحى والمصابين بالشفاء العاجل .

أصطفى من خلقه الخالق نبي له
أبو الزهره الذي أطباعه نبيلــــه
حبيب كلوبنــه المرسل نبي لــــه
صــلاة أبهالحفـــل يالجعفريــــه *
ألي الصـادق كلـب ينبـض وأليروح
شحلات أسمه اليزيح الهم واليروح
أيعرفني جعفــــري اليجبل واليروح
يظل مبهـــور مني ويحجي بيـــــــه ***
سلام المشعل

الامـــه حـزنانــه بفكــد هـاديـهـا
طــه ابو العتــــــره النبي وآليها

اليــوم دين الله أرتفع منـه نحيب
وأمــة الأسلام ألمـها الـمـغـيــب
مغيب سيد الكون هاديها الحبيب
صعـب مـو هيــن غيابــه عليها

ضجــت اركان الديانه بغيبتـــه
ومحزنـــه اليوم برحيله أمتــه
فاجعــه وفجعت يويلي عترتــه
مصابـه صاب العتـره اثر بيها 

حين سافر وارتحل ويه الاجل
دمع من المرتضى عالخد نزل
ومدمع الزهراء عالهادي همل
بحسره وبآه وهضم تجــريها

خيم أعله الكون هاليوم الحـزن
يكفكف الدمعات كل مسلم يون
بعـده يتحسـر ينـوح وممتـحـن
وحشه أرض الله بفكد منجيهــا

وحشه ارض الله وحزينه ومظلمه
وكـل ملائكة السمــــه مـتــألـمـــه
بفكــد ابــو الزهره الزجيه فاطمه
غاب بــدر الــدنـيـــه المضــويها

أثـــر غيابــــه بعترتــه امن انفكد
بعــده توضــح حقد كلمـن حـقـــد
وياحسافه أستوحدوا راعي الشدد
بحادثــه تجرحنـــه مـن نــرويـها

حادثــه تجرحنه ويطول الحديث
حادثــه محيوكه والمكصد خبيث
بكل وسيله كون يبعدون الوريث
وماجن أصحابــه النبي موصيها
* ****  
سلام المشعل

طب للحرب وحده حسين لا اخوه اولا انصار
ابن أمي متشوفه العين توسط جيوش الاشرار
نترقبه التمينــــــــه .. كلمن دمعته بعينه
ياوسفه حجبوا عنه .. سيد شباب الجنـه

ترجه عيون الايتام بلكت تشوف الغالي
لو طاح متظل خيام وآنه شيصير بحالي
دنيه وخيول واعلام متشابجه ارماح اسهام
غطت سليل الاكرام وآنه التوه دلالـــــي
العيله بقت تنتظره .. وعيونها اعلى الغبره
سالم يجي اتأملنه .. سيد شباب الجنه

اشما تلتم اعليه رايات ابن النبي يهزمها
ظلت جثث كــوم اللات تارس البيده دمها
جالليث يحمل حملات ويتواره حيهم بالمات
سيفـــه لعب بالهامات بعض ابعض يردمها
رووس وجثث مجسومه .. بيدر غدت بالحومه
بالركب سيفه سنــــــه .. سيد شباب الجنـــــه

سبعين ألف بالميــدان كلهم عليه او وحــده
حاطوه حزب الشيطان وما إخوه ظلوا عنده
ياحسرتي اعلى الخوان وانصاره اهل الايمـان
جانوا رعب للجيمــان واليدنه ليه شحده
العسكر دنت لخيامـــي .. وما بقى إلنا حامي
وماظن بعد يسمعنــــه .. سيد شباب الجنه

اتناخت جيوش الارجاس هجمت وصالت كلها
ضيعت عين العباس جان بحسامــه يذلها
من جان راعي النوماس ما جرأه عد هاي الناس
وما جانت تجـــــر انفاس يرعبها حتى ظلها
من راح راعي الرايـــــه .. هسه دنوا للثايــــه
بالدنيه بس هوه إلنه .. سيد شباب الجنـه

من شفته اغبرّ الكــون وجنها اظلمت دنيانه
وكاموا الكوم يهوسون كلبي اضرمت نيرانه
حگچن تصبن يعيون واتهملن اعلى اليسوون
رد خالي لينـه الميمون راح اليكض إعنانــه
صارت مصيبه بينـــــه .. صالوا الكوم اعلينه
اتحيرنه وما يمنــــــــه .. سيد شباب الجنه
* سلام المشعل

حجاية أبوي حجاية بخت يحجيها
حجاية أبوي هواي المعاني البيها
حجاية أبوي آنه أموت أعليهــــــا
يازماني .. يازماني

الابو يسولف سوالف .. شكثـــر بيهن معارف
حجي يريح العواطف .. دوم .. دوم
درر تنثر حروفـــــــه .. وهو كلمن يشوفه
يتمنه مايعوفه .. يوم .. يوم
آنه ابوي شكد بخيت
خير وصاراله صيت
الشافني حكـج يكول
حيدره افراكـه مميت
نسمة شمال والدي كضه عمره
نسمة شمال حجيه الكلب ينتظره
نسمة شمال وبشرجي كيض البصره
يازماني يازماني * ها بويه كلشي تسوه .. حلوه بلسانه حلوه
هوّه حياتي هـــــوّه .. غاب .. غاب
آنه كتلني فگده .. شيخلصه عمري بعده
لهب گلبي شيهوده .. ذاب .. ذاب
جنت أحس بروحي طير
ويه أبوي العيشه غيـــر
دنيــــه مابيها أبــــــوي
دنيه أبد مابيها خير
الفاكد أبوه معناها ميت حُبه
الفاكد أبوه أحسب اصوابه بكلبه
الفاكد أبوه زين ويوجد دربــــــه
يازماني يازماني * الفارك ابوه بشبابه .. بده ضيمه وعذابــه
ومحن تقرأ بكتابــه .. هواي .. هواي
الابو خيمه علينه .. سند بيه انتجينــه
وفراكه خله بينـه .. داي .. داي
الزمن مثلـــــه مايجيب
وهوه شيعوض الحبيب
حكه الميت ابوه
ابيته من يشعــر غريب
حيدر علي عشرته والله جنـــه
حيدر علي بالدنيه ماكو منــــه
حيدر علي حيره شسولف عنه
يازماني يازماني * انختم عمر السعاده .. مشه الحبه عباده
علي ثالث شهــــاده .. راح .. راح
المفرح اليتامـــــه .. الزرع بيها ابتسامه
فلا كمل صيامه .. طاح .. طاح
راح أبو كلب النظيف
راح الانسان الشريف
راح ابو حلو اللســان
الكلبه للفقـره مضيف
مات الامير العاش عيشــة فقره
مات الامير الماكو مثيل الصبره
مات الامير وشكد هموم بصدره
يازماني يازماني * ألّي فكدله غالـــي .. ومن ابوه بيته خالي
بجي يكضي الليالـي .. نوح .. نوح
بكيت اصفك بديه .. مشه الكلشي اليه
ومتعجبه آنه بيـه .. روح .. روح
كل ملائكة السمه
أمن الازل بيه هايمه
وسجـــدوا الآدم لأن
بصلبه حماي الحمه
كلي الحسين لمّن سمعني أنحب
كلي الحسين أدري بدليلـــج يلهب
كلي الحسين كضي الصبر يازينب
يازماني يازماني * سلام المشعل

نــزل خيـر الأنام حمل نعـش الامام
كل وصي ومرسل تعنه كل ملائكة السماء
حضروا يشيعــون حيدر أجوا كل الانبيــاء
نــزل خيـر الانام حمل نعـش الامام

ليلـــة الشيعــوا حمــاي الحمه
ضجت أركان الوسيعه والسمه
مامثــل تشييــع ليـث المـوزمه
كـرمــه رب الجـلالــه وعظمه
الرسل كلها تسير
وره نعـش الامـير
وكل سكنة الجنه أجتله تشيعه وتنصب عزاء
حضروا يشيعــــون حيـــدر أجـوا كل الانبياء

آدم وموسى وعيسى والخضـــر
شالوا أعلى الرووس نعشه للقبر
ونوح وأبراهيم دمعه منهمــــــر
ويوسف ويعكوب كلبه منكســـر
وبجوا يونس وهود
وبجـــه كل الوجــود
وصالح أو يحيى وشُعيب ويوشع أويه الازكياء
حضروا يشيعــــون حيـــدر أجـوا كل الانبيــــاء

أدريس وأسليمان وأصحاب الكهف
والنبـــي داوود ســــاروا للنجــــف
وعالجرى هارون يصـرخ ياوسف
وينتحب أيوب دمعه مانشـــــف
وعلى أجتاف الرسول
نعش فحل الفحــــــول
وبيده طه أتوله مدفن علي سيد الاوصياء
حضروا يشيعـون حيـدر أجـوا كل الانبياء

سارا أو حوه وخديجه أتناحبن
وهاجر ومريم على حيدر بجن
أتعنن أمن الجنه للكوفه أجـــن
ولطمن بتشييع نعش أبوالحسن
وأجت حور الجنان
تهل دمع الحنـــــان
أتقدمتهن سيدتهن فاطمه خير النســـاء
حضروا يشيعون حيدر أجوا كل الانبياء

أبوطالب نزل بمر الله القديــــــر
وكل صحابي حظر تشييع الامير
حظر سلمان وخلف نعشه يسيــر
وأعتنه المقداد حزنان وكسيــــــر
أعتنه الحمزه وأجاه
ونزل جعفر معـــــاه
ومالك وعمار حظروا وأبوذر والاولياء
حضروا يشيعون حيدر أجوا كل الانبياء

أجت سكان السماء ومحزنـــه
وأجه عزرائيل للكوفه أعتنــه
نزل ميكائيل ليلـــة مدفنـــــــه
وهبط جبرائيل يم نعشه أنحنه
أنحنه الروح الامين
ألأميـــر المؤمنيـــن
وبيده أسرافيل حامل نعش خير الاتقياء
حضروا يشيعون حيدر أجوا كل الانبياء

الصحف والانجيل نزلن والزبور
اللوح والتوراة وياهن حظــــــور
يعزن القرآن والمدمـــع يفــــــور
ودم كلام الله نزف من السطـــور
ونزل عرش الجليل
حمل حامي الدخيــل
وشارك وشيع جنازة ثاني أصحاب الكساء
حضروا يشيعـون حيـــدر أجـوا كل الانبياء
******* سلام المشــعل