Seenaa Gabaabaa Nimoonaa Xilahuun (1986-2014GC)

Nimonaa Tilaahun Imana Godina Wallaga bahaa Magalaa Jimmaa arjootti bara 1986GC dhalate. Nimoonaan abbaa isaa Obbo Xilahuun Imaanaa fi haadha isaa Aadde Laaqechi Indaalammaa Mul’ataa irraa godina Wallaggaa Bahaa magaalaa Arjootti dhalate.
Barnoota isaa kutaa tokkoo eegalee hanga kudha lamaatti achuma magaalaa Arjootti baratee xumuruun barnoota sadarkaa olaanaatti fufuuf bara 2004GC yuunvarsiitii Finfinnee seene. Baruma kana diddaa barattoota Oromoo dhimma Finfinnee waliin walqabatee ka’een murtii jal’aa mootummaa wayyaaneen barattoota Oromoo 400 ol ta’an irratti dabreen, Nimoonaa Xilahuun waggaa tokkoof barnoota irraa arihatame.
Nimoonaa Xilahuun (1986 2014GC) Waggaa tokko boodas barumsa isaatti debi’ee bara 2005-2007GCtti “BSc / Banking and Insurance “ dhaan eebbifame. San booda bara 2007GC keessa godina Shawaa Kaabaa aanaa Qimibitti/magalaa Shanootti mindeeffamee achitti hojii eegale. Achitti utuu barsiisuu hiriyoota isaa biraa konkolataan Patrol/3F kan jedhamuun humnooti tika wayyanee ukkaamsanii fudhatan.
Haga ji’a tokkootti Mayikalawwitti dhoksaan hidhamee mana dukkana akeessatti gidiraa guddaa argaa ture. Dhiibbaa fi iyyannaa qaamota miran namoomaatiin dhiyaachaa tureenis, himannaan itti banamee gara mana Hidhaa Qaallittiitti dabarfame. Manni murtii Wayyaanees dhaddecha jallootiin murtii jalloo waggaa 11 akka hidhamuuf itti murteesse.
Nimoonaan mana hidhaa Qaalittii, Zuwayii fi Qilinxoo keessaatti garafamaa ture; Reebicha garmalee irra ga’eenis dhibeef saaxilame. Mana hidha akeessatti wal’aansa gahaa waan dhabeef hedduu miidhame. Dhukkuba kanaan erga hiraarfamee boodas, bara 2012GC keessa gara Hospitalaa Xiqur-Anbassaatti geeffamee ture.
Haata’uutii, wal’aansa garaa baqaqsaa godhameef iyyuu sirnaan otuu madaan isaa hin qoorin gara mana hidhaa Qaallititti deebifame. Achitti doorsisaafi dararaa guddaattu irra ga’aa ture.
Dhukkubni isaa itti hamaachaa waan dhufeef, dhiyeenya kana gara Hospitaala Xiqur-Anbassaatti deebisan. Garuu, qaamni laafee, bututee waan jiruuf dhibee san irraa dandamachuu dadhabee Waxabajjii 6, bara 2014GC ganama barii keessaa saatii 6:00 irratti lubbuun isaa addunyaa kana irraa dabarte.
Sirni awwaalcha Nimoonaa Xilahuun bakka warrii fi lammileen hedduu argamanitti bakka dhalootasaa Arjotti raawwatee jira.
“Qabsaa’aan ni kufa; qabsoon itti fufa.

Oromoo Walloof Birmachuun Namooma Baraaruudha
Ibsa Gumii Maanguddoota Wallaggaa Menisootaa Irraa Kenname
====
Uummanni Oromoo Walloo dhiibbaa alagaatiin uummata Oromoo guddeessa irraa kophaatti baafamee hacuuccaa hangana hin jedhamne keessa eega seenee jaarraa tokko fi wallakkaa ol lakkoofsisee jira. Baroota kana hunda gabrummaa irratti fe’amuuf yaalame ofirraa faccisee aadaa, duudhaa fi afaan isaa tikfatee qoor-qalbii isaa gootummaa guddaadhaan eeggatee as gahee jira.
Haata’u malee yeroo dhihoo as akka baroota fi mootummoota darbanii afaan isaa fi aadaa isaa balleessuu qofa osoo hin taane akka uummataatti lafarraa dhabamsiisuuf duula guddaatu irratti gaggeeffamaa jira. Godinaalee naannoo Amaaraa jiran keessaa addaan fo’amee bu’uraaleen misoomaa tokkollee akka hin diriirfamneef ta’ee jira. Milishaa, polisii fi Faannoon Naannoo Amaaraa bifa qindaayeen irratti duulanii ajjeechaa irratti raawwatanii jiru. Qe’ee isaa ibidaan gubanii jiru; qabeenya isaas barbadeessanii jiru. Itti marsanii bahaa fi gala dhorkuudhaan madoon isaa illee yaala akka hin arganne godhanii jiru. Mana hidhaa keessaa baasanii ajjeesaniiru; ambulaansii keessaa buusanii jumlaan fixanii jiru.
Kana mara mootummaan Naannoo Amaaraaas ta’e kan federaalaa ni beeku. Bakka bu’oonni uummatichaa mana maree Federaalaa (Parma’s) keessatti wayita iyyatan itti qoosamee, warra gocha kana raawwatan irratti tarkaanfii tokkollee osoo hin fudhatamin hafeera. Kun tahuunsaa ammoo gochi amma jiru jabaatee akka itti fufu taasiseera. Gochaan suukanneessaan Oromoo Walloo irra gahu humnoota armaan olitti tarreeffamaniin qofa osoo hin taane duula qindaawaa kan qaamota uummataas dabalate ta’uu isaa fi duguuggaa sanyiif qophii jiru hiriirri magagaalaa Dabra Biraanitti “Godina Addaa Wanti Jedhamu HinJiru” jechuudhaan bahame ragaa gahaadha.
Yeroo ammaa kana Uummanni Oromoo Walloo Mootummaa Naannoo nageenya isaa eegsisus, Mootummaa Federaalaa mirgasaa kabachiisus, qaama isaa birmatus dhabee duguugiinsa sanyiif saaxilamee jira. Kunis qaama kaayyoo Oromoo mara balleessuuf yaaluuti.
Gumiin Manguddoota Wallaggaa Menisootaa haalli kun atattamaan jijjiiramuu qaba jedhee amana, abdatas. Balaa hamaa as deemaa jiru kana hambisuu yookin xiqqeessuudhaaf Mootummaan Naannoo Amaaraa fi Mootummaan Federaalaa Itoophiyaa itti gaafatama isaanii gahumsaan akka bahani fi furmaata bu’uuraa akka kennan waamicha dabarsaa, kun hatattamaan hin raawwatu taanaan badii raawwatamu akkasumas seer dhablummaa bakka biraatti babal’achuu danda’uuf itti gaafatama guutuu kan fudhatan ta’uusaa ibsa.
Uummanni Oromoos haala amma Oromoon Walloo keessa jiru dammaqina addaan hordofee waan barbaachisu maraan bira dhaabbachuun dirqama isaa isa guddaa tahuu isaa yoomiyyuu caalaa yaadachiisuu barbaanna. Uummata dhumiinsaaf saaxilame bira dhaabbachuun waan fedhaan raawwannu osoo hin taane dirqama namooma baraaruu ta’uusaa gadi cimsinee hubachiifna.
Dhumarratti hoggantoonni, beektonni, aktivistionni, abbootiin amantaa, manguddoonni, fi dhalatoonni Amaaraa akkasumas uummattoonni Itoophiyaa fi dhaabbileen mirga namoomaa gocha farrummaa kana sagalee tokkoon akka balaaleffatan wamicha dabarsina.
Bitootessa 24, 2024
Gumii Maanguddoota Wallaggaa
Minnesota, USA

Please subscribe