**عاشگ وبـان الشوگ مـن نظراتي
مهدي حـلـم روحي المضى والاتي

نشدوني عنه وجاوبت
بنظرات عيني سولفت
عـاشـگ ولله اتـگــربت
بسـم الحبيب تفاخرت
مـن كـثـر مـاشـايل تـرافـه اباله
جـنـح الفـراشه حـجـر يم خياله
بـس اعلى طـاريـه يـجـن بسماتي
مهدي حـلـم روحي المضى والاتي

اسم الله عليه لاينحسد
من عنده اخذ لـونه الــورد
گــالـوا بـعـيـد ومـايـرد
گتـلـهـم بـنـبـضي يـعـد
هـو اليـدگ وي الـگـلب ونفاسي
مـالك حياتي ودنيتي واحساسي
تـسبـيح بسمه بكـل وقـت نبضاتي
مهدي حـلـم روحي المضى والاتي

وجها احلى من وجه الصبح
مـايـجـرح اشـمـا يـنـجـرح
شايل جمال الله وسـمـح
بـدونـه الحچي مـابيه ملح
شـاغلني بالـذر مـوش شاغل بالي
ويـرخص اگبـاله الاغلى من الغالي
اول وتـالـي وبـس الـه حـسـبـاتي
مهدي حـلـم روحي المضى والاتي

مـن وجـنـته تغار الشمس
نــوره ابــد مـايـنـحـبـس
تطمأن مـن ذكـرى النـفس
يــا اول اواخــــر درس
بس اعلى واهس اسمه اگضي ايامي
من الطـفـلوله اعليه بنـيـت احـلامي
مـرسوم طـوله وهـيـبته ابصفناتي
مهدي حـلـم روحي المضى والاتي

اللام گـلـبي المـحترگ
ماعرف كل معنى العشگ
حـبـه نـعـم كل الـصــدگ
وبناره احيه امـن احترگ
حـبـي الامام المنتظر وامـجادي
بـيـه للـه اتـقــرب وجـده الهـادي
وچـكلـيت اطش ابـيا علي كلماتي
مهدي حـلـم روحي المضى والاتي

هـاني ناصر السعيدي**

**يارب الـحـجه
اشـفي صـدر الحجه
بظهور الحجه
ياالله

نسـألك ياربي بالاعـظم اسـمك
وسم النبي البسمه خزائن علمك
اشـفي صـدور المؤمنين بنصرك
عجل فرج مهدينا صاحب امرك
يا الـه الحـجـه بمـحـمـد نـدعـوا
لقـدوم الغـائب لـمـقـامـك نشكوا
اشـفي صـدر الحجه
بظهور الحجه
ياالله

بالمـرتضى الكـرار عـجـل مره
وبالطاهره امه البتول الزهره
كحل عيون العاشگين بنظره
سخرله هذا الكون كله بأسره
نـحـن ذبنا شـوقا لجـمـاله الازهـر
قم به احكامك وادحض اهل المنكر
اشـفي صـدر الحجه
بظهور الحجه
ياالله

بالحسن عـجل طلعته واخـباره
ويرجع حبيب اهل الوفه لدياره
مشاگ حيل المحب شوف انواره
بالسر الاعـظم وضـحـنـه اسـراره
اي نـصرا هـذا وبـسـيفا يـحـلوا
انه صوتا حق في المسامع يعلوا
اشـفي صـدر الحجه
بظهور الحجه
ياالله

بحـسيـن ردنه الغـايب يمر بينه
المهدي الحبيب لشوفته شتاگينه
ســر الحـيـاة ابـطلـعـتـه ايـرويـنه
الشوفة عـيـونـه مـن گـلب حـنينه
انما في عـدله يهتدون العالم
يرتقي بل يسموا انـه مـن سالم
اشـفي صـدر الحجه
بظهور الحجه
ياالله

هـاني ناصر السعيدي**

**وجه الله يامهدينه بالفرح نتلگاه
يالـبسمك اتـغنينـه بالفرح نتلگاه
يا كل الاعياد هذا احلى ميلاد
بالفرح نتلگاه

وجـه الصباح تغزلت بيه روحي
الشوگ اخذني وناسي وني ونوحي
عشگه ندى لو مر تطيب جروحي
ياوردة القـداح غنـي وفـوحـي
صفنت عشگ صفناتي بالفرح نتلگاه
وبس اسمك بنبضاتي بالفرح نتلگاه
يا معنى الامجاد هذا احلى ميلاد
بالفرح نتلگاه

كالولي كافي العشك مامليته
مـا دروا چـن اليـوم مــن حـبـيـته
بـيـن الـجفن والعـين رسمـه وبيته
شـدت حـرز بيـميـني مـن شـديته
شگد يختلف محبوبي بالفرح نتلگاه
وبعشگه امحي ذنوبي بالفرح نتلگاه
واشواگي تزداد هذا احلى ميلاد

غـايـب حـبيبي وبيه منـوره ايامـي
وباني اعلى حبه امن الطفوله احلامي
وحـت الـبـلابـل عـلمـتـها انـغـامـي
ديـن وعـقيده وبيه عـرفت اسـلامي
من كثر ماحبيته بالفرح نتلگاه
ناسي وهلي سميته بالفرح نتلگاه
يحييني لوعاد هذا احلى ميلاد
بالفرح نتلگاه

مفضوح حبـي وبين اعلى عيوني
ويـزيد عشـگي لـمـن ايـلـومـوني
وسنيـت قـانـون الـوفه بقانوني
والهـذا عاشگ والوفي سمـوني
من يمر ذكره هنانه بالفرح نتلگاه
طير ويلاگي اغصانه بالفرح نتلگاه
وتغني الاعواد هذا احلى ميلاد
بالفرح نتلگاه

هـاني ناصر السعيدي**

**يافاطمة الموت اهون من غيابج
رد قالع الباب ودموعه اعلى بابج
رجع خافي الكبر  علي شنهي الامر

ليش حيدر من كبرها رد ولا جنه علي
يصيح يافاطم يروحي ياهوبعدج ضل الي
يافرحتي وياحياتي ويابعد روحي وهلي
ياولي ومكسور خاطر من رجع فاگد ولي
معذور معذور يالفاكد حياتك
يالحدر الاتراب مدفونه امنياتك
شتحمل ياصبر     علي شنهي الامر

شلون بالدافن حياته شنهو يجبر خاطره
وحتى دمعاته الي تنزل ماتكفي وحايره
حيدر الله يعين گلبه دفن بيده الطاهره
راجع ومكسور ضهره الضلع كلش كاسره
  دمعه أعلى الخدود ضل تارك علامه
   وتـيـتـم اليـوم يـاوالـي الـيـتـامـه
   حيره ومنكسر   علي شنهي الامر

من اطب للبيت موحش ياعمد بيتي وضواه
ايضيگ يافاطم عليه خنكه مااشتهم هواه
صوت من كل باب يطلع والألم يطلع وراه
الحسن وحسين سهله صوت زينب اه اه
كل ذكره بالدار بغيابج حزينه
جارحني الفراگ وجروحج حنينه
جمر يلهب جمر   علي شنهي الامر

زينب تباوع لبوها سكته ويسيل الدمع
تكله امي شلون ماتت والله احس كلبي انشلع
يكلهه من غسلت امج مرت ايدي اعلى الضلع
بويه اسمع اخ صحت جنهه حست بالوجع
من دفعوا الباب عالحايط عصرها
يبنيتي بسمار متعدي لصدرها
الم ذاك الكسر    علي شنهي الامر

العمره 5سنين هذا يفارك امه امن الصعب
وصعبه يم الطفل صعبه لوذكرت اسم الحرب
شلون زينب شافت امها فوك خدها تنضرب
  ايد حاقد سطرت امها وعينها من دم تصب
     ياعشرت النار  ليش امن البدايه
     وحرگت اويلاه اطراف العبايه
    هذا اول يسر   علي شنهي الامر

من البدايه وصبر زينب عجز من عنده الصبر
چـم ضلع مر بسمعها وسمعت صوت الكسر
واكثر اجروح العقيله من رجع خالي المهر
  لا اهلها  ولا عشيـرة وسـلـمــت لله الامـر
       مابين عدوان چا وين الكفلها
       زينب يزهراء راحو كل اهلها
حاديها الشمر     علي شنهي الامر

? حبيب ناصر السعيدي
?هـانـي ناصر السعيدي**

**اول مره حيدر يمشي مكسور
عـايـف ذكـريـاته ابين الـگبـور
راجـع يمشي بالـگوه
الباب بحالته اشسوه

اليرجع امن الدفن ناسه بالدمع تستقبله
وتلتم احبابه بمصبابه حـت حزنه تقلله
ليش حـيدر راد وحـده والمدامع هامله
امنين مـايندار وحـشه ياحـزن يتحمله
تخوصر ونحنه وكض عتبت الباب
يتنفس هـضم ويسـولف اعتاب
سعفه ابريح يتلوه
الباب بحالته اشسوه

ابـهـمـه گـلـب ذكـريـاته ابـابـها لـمـن رجـع
ودخـل غـرفتها ولگـاها خـاليه وگـلبه انشلع
حاط سبحتها اعلى گلبه بلكت يخف الوجع
منحني ومكسور ظـهـره ولاچمه كـسر الضع
ذاك الشـهـم يـم مچانها يـنـوح
دافـن روحه توه وضل بـلا روح
ضل ابناره يتچوه
الباب بحالته اشسوه

مـد المصلايه بـيده وصـار ينطرها وگعد
ويحچي وي روحه ويگلها ماالچ جيه بعد
انا ذاك الچنت اكـابر مـاتهز طـرفي الشدد
هس حـاير بـعـد عـيـنچ مـابقه عندي سند
صحتچ والصدى مارجع الصوت
والله وفرگتچ اصعب من الموت
خدي بدمعتي اتروه
الباب بحالته اشسوه

روحـي مشتاگـه الحـنانچ حـايره بين الغرب
وانا اصبرها اعلى ذكرچ والله والموقف صعب
الگه بيه چم ذكرى منچ كل مكان البيه اطب
صعبه بسمت كـل حياتي عالشفايف تنصلب
يانبضات گلبي رايـحـه ويـن
نزلن چن مطر دمعات الحسين
مـراه الـيتم تـوه
الباب بحالته اشسوه

ياهـواي الچنت اشمه وعشت لجلچ مطمئن
هس اجـر النفس گوى اونـت المشتاگ اون
ياوطن روحي وحياتي صارت الدنيا سجن
غيبوا وجـهـچ يزهره والسـبـب كـلـمة وئـن
ناس الخلوا اولادچ ينوحون
بـاچر للنـبي راح اشـيـگـولون
ونتي الوالدچ سلوه
الباب بحالته اشسوه

كلشي راح وجرحي نفسه لوجرت عيني جره
ويـنلـچـم ويـگـلـي بـاچـر نـعـتـنـي للـمـگـبره
وعـالگـبـر اگـعـد وطـولـچ بالـدمـوع اتـصوره
سامحيني لهس عايـش مـنـچ ورجـو المعذره
انـه المفروض اموتن كون وياچ
مدري شلون روحي احملت فرگاچ
ماتت عشرت الحلوه
الباب بحالته اشسوه

هـاني نـاصر السـعـيـدي**

**يالماخذ امنه ابليل تدفتها
مـاخـلصينه اوداعنـه منها
فكت حزنها الـوالده الليله
ولون الچفن مايشبه الشيله

خلها هاي الليله يمنه والصبح شيل النعش
الگبـل چانت تفرشلنه افراشها اليوم انفرش
عاشت اثمنطعش لچمه مو عمرها اثمنطعش
ورده چـف حـاقـد وصـلـها مـامـذبلها العطش
خليها بـس هـالليله ويـانه
تـرتاح صـار اهـواي تـعبانه
عاشت حزينه وماتت انحليه
فـكـت حـزنها الـوالـده الليله

ردنه نشبع شـوف منها مابقه شـي للصبح
نريدها تضمنه بحضنها بلكت ايهيد الجرح
كون نسمع كلمه منها ندري صعبه وماتصح
طحنه يمها النفس حسره مثل طير المذبح
وحدنه مـن تمشي وتخلينه
ياهو اليضل يمنه ويواسينه
شيسد غربـته المنهدم حيله
فـكـت حـزنها الـوالـده الليله

سكته يمها انريد نبچي وصوت ابد ماينسمع
مـانـريـد انـزيـد هـمـهـا والمـتـاعـب والـوجع
نـريد بـس نلتم عليها ويحچي وياها الـدمع
ليش ميته امنه الحنينه وايدها فوگ الضلع
يالغسلتها اضلوعها اشبيها
ميته وضلعها انحس يأذيها
گـلنـه حـت ابحـرگه نبچيله
فـكـت حـزنها الـوالـده الليله

بـيـتـها مـضـلـم عليها وكـل حـيـاطينه تون
لـو خذتها ابليل عنه البيت يـتـحـول سجن
للـگبـر تـمشي الـمـحـنـه والـگبـر لا مـايحن
الله لايـنـطي الگطعها زهـره مـاخـذ للدفن
مو مال حدر الگاع تخفيها
كـون بعمرنه الزهره نسگيها
لاعـنـدك ولاعـدنا كـل حيله
فـكـت حـزنها الـوالـده الليله

ليـش فـرحة كل عمرنه اعليها وازانه الگبر
واحـنـا ضـلـيـنـه يـتـامـه ولله سـلـمنه الامر
كسرة اگلوب وخـواطر بـعـد شيطيب الكسر
والـتـروح امـه وتعـوفه يضل باقي اشينتظر
كـل مغربيه امچانها نزوره
ويانه زينب تبچي مكسوره
والـدمـع لامـايـنـگـطـع سيـله
فـكـت حـزنها الـوالـده الليله

نگـعـد انصبر بـعـضـنه وينلچم جـرح اليتم
ذيچ صورتها الحنينه بشوفنه نرسمت رسم
بـعـد مـايـحـلم ابـمـلـگه الميت ابروحه حلم
والحزن مـن راحـت امنه ضل يطشرنه ويلم
مـانـعـرف الهم چنه وياها
لـمـن مشت شيبنه فرگاها
والـحـزن مـن ابعيد نوميله
فـكـت حـزنها الـوالـده الليله

هـاني نـاصـر السـعـيـدي**

**يحسين للطف جينه زوارك
خدامك وشيعتك وانصارك
من كـربله نسمع هله
خدامك وشيعتك وانصارك

كـل واحــد الـبـيـنه اذا رادوا يـسـألـونه
يعرفون طبعه وجوهره ونيته ومضمونه
يلگون مـكتـوب أعلى گـلبه لمى يقرونه
مـجـنـون بحسين ونـعم يتباها بجنونه
هذا شعار الهايم بحبك
يترك حياته وماترك دربك
ويترك هله من كربله
خدامك وشيعتك وانصارك

محد عرف سر خدمتك والي خدم أكثر
ومعـروف بالخـادم نـعم بين البشر يزغر
چـا ليـش اليخدمك ملك ومن الملك أكبر
الشرب من مي موكبك يعرف شنو الكوثر
والطلع من البيت وتعنه
گاصدالجنه ويندل الجنه
شهلمنزله من كربله
خدامك وشيعتك وانصارك

خضرت موكب بالدرب كل گطره من نحره
وكـل صـابر ابمر الـزمن ياخـذ اجـر صبره
وانت جـزائك سيـدي والبـاري هذا امره
يأتـون مـن كل فج عميق العالم الكبره
لبيك والحج هذا ماينعد
زوار اجو واحرامهم اسود
والحق عله من كربله
خدامك وشيعتك وانصارك

كلمن گصد غيره الگمر يسگيه من جوده
حت أعلى ابو السجاد ابد ما يغلن زنوده
والـحـاولـوا مـاأثـرت نـيـتـهم السـوده
مـا لا نهايه سفرتك يحسين ممدوده
وين الضلم والي منع وينه
راح وعلى هالدرب ضلينه
من بدله من كربله
خدامك وشيعتك وانصارك

من السمه ومن الأرض وتعنت انصاره
والي حضى بزيارته هذا الله مختاره
والي متنع عنه جبر وصلوله البشاره
عنك نيابه انا زرت قلدني الازياره
هذا الدعاء كلشي انته يعنيلك
يم حضرت العباس ندعيلك
ونـقـبـله من كربله
خدامك وشيعتك وانصارك

كل موكب بهمه وكف بس اطلب وحاضر
مـوجـوده هـاي ابخـدمتك ارواح لو تامر
ونـريـد منـك بالـحـشـر يا سيـدي باچـر
يـنـادونـه بـيـن المـلأ كـون بأسـم زايـر
يوم القيامه من ينادونه
زوار ابو اليمه يسمونه
بين المله من كربله
خدامك وشيعتك وانصارك

هاني ناصر السعيدي**

**مـن الـبحـر للنـحـر زوارك
كلهم وفه يابوعلي انصارك

خـادم يوصـي بخادم يـگله
بس وي الحسين التعب يحله
تـعـرف كـرمـها بـلونها الـدله
شـافانه لـون الـدله خـطارك
مـن الـبحـر للنـحـر زوارك

شوف العشگ تعرف معانيه
وطـبع العـمل مرتبط بالنيه
شـايب اجاك سنينه محنيه
ومحد عرف يابو علي اسرارك
مـن الـبحـر للنـحـر زوارك

ارض وسمه يحسين عنايه
ورفت عشگ للبالمهد رايه
بالـغـيـم دگـوا للـوفه ثـايه
وشعت مثل ما شعت انوارك
مـن الـبحـر للنـحـر زوارك

اليمشي بطريقك مايمل منه
يحسين گبل الذر حچوا عنه
غـيـر بطـريقك هايمه الجنه
وتتمنه تصبح خادمه بدارك
مـن الـبحـر للنـحـر زوارك

شفنه المواكب والخدم غيره
ذهـلو الـدنيا وضـلت ابحيره
سر خدمتك منعرف تفسيره
جمرة عشك ماتنطفي نارك
مـن الـبحـر للنـحـر زوارك

والخـدم لـو كفت مواكبهم
مـاتنوصف يحسين حيرتهم
خيمة الخدمه الچانت تلمهم
طيحتها مثل الموت لحرارك
مـن الـبحـر للنـحـر زوارك

هـاني ناصر السـعيـدي**

**وي  عماتي  وخواتي
       امشي مذبوحه أمنياتي
ناسي حالي وعلتي   من اشوفن عمتي
       امشي مذبوحه أمنياتي

هل من ناصر تعيش بوسط بالي
   من گالاها  ابوي  امردت  دلالي
   گمت من المخيم مايسر حالي
  شفت بين الزلم ضل وحده الغالي
      شفته بين الجيش حاير
     وسمعت هل من مناصر
مگدرت ياحسرتي   من اشوفن عمتي
      امشي مذبوحه أمنياتي

عمـر بس ما تشافـت علتي علـه
كل صفنه تصيب الگلب چم نبله
مو سهله الفگد كل أهله مو سهله
على حسين ومصابه بدمعتي اتسله
        حسرتي ولوعة مصابي
       تشرح همومي  وعذابي
ما مفارگ دمعتي    من اشوفن عمتي
       امشي مذبوحه أمنياتي

حـزن ما فارگاني لآخر اسنـيني
هضـم ذيچ المصـيبه مايـجافيني
صور من كربله انرسمت وسط عيني
  اخـر نضــره مابيـن الابو وبـينـي
      حيره ذيچ النضره حيره
       بانـت بعينه الاخيره
منها همي وحيرتي   من اشوفن عمتي 
      امشي مذبوحه أمنياتي

انا ذاك العليل ويا عظم  صبري
عمي اعلى النهر طاح وكسر ضهري
والأكبر من مشه وياه اخذ عمري
وعلى شبل الحسن ماينجبر كسري
     والهلي وكل الصحابه
      گلبي محتار بعذابه
منهو يجبر كسرتي  من اشوفن عمتي
      امشي مذبوحه أمنياتي

بعد ردب السبي بياحال اوصفنه
عماتي وخواتي شلون يمشنه
انا كل همي يا ذاك الدرب منه
وما لوم الگلب لو ما گطع ونه
       عمتـي اه وسـبيها
    والحبل ماعاف اديها
شلون ابطل ونتي   من اشوفن عمتي
    امشي مذبوحه أمنياتي

اذا انسه واريد الروح اسليها
اذكر حسرة الجروا تراچيها
آخر دمعه حاير المن ابچيها
هنه هواي چا عيني شبگه بيها
      تعيش وياي المماتي
      اه يالـوعـت خـواتي
بروحي تلهب جمرتي   من اشوفن عمتي
     امشي مذبوحه أمنياتي

هاني الناصر السعيدي**

**غـيـره ياعـبـاس غيره
والـنـهـر مـنـك ابحيره

النهر من شافك خذيته
سـلم وضـاعت هويته
بجودك الضامي مليته
وللـمـخـيم سـدريـتـه
سـلـم وبـيدك مصيره
غـيـره ياعـبـاس غيره

النـهـر مـنـك تـاه رايه
طـلع مـن الطين مايه
شاف رمحك صار ثايه
ونزل سيفك والمنايه
وحلت الساعه الاخيره
غـيـره ياعـبـاس غيره

رايـتـك يـذبـح هـواها
نـضرتك يـحرگ ضواها
اعداك كل الذل غطاها
وكـربله چـفـك لـواهـا
واصبحت بـيدك اسيره
غـيـره ياعـبـاس غيره

الزلم من تجبل عليها
تحچي مايطلع حچيها
تـريد بس تشيل اديها
ومن بعد تسمع بچيها
مـوتـهـم بـيـن نـذيره
غـيـره ياعـبـاس غيره

سـيفك الطـاير يصيده
يصيد بالروس العنيده
ضـربتك هـي الـوحيده
ورث من چف الصميده
وفـچ الـيـگابـل يـديـره
غـيـره ياعـبـاس غيره

نــزل عــزرائــل  يـمه
ارواح كـلها تـطـير لمه
صاح ملك الموت بسمه
كـفــو يـاعــم الايــمـه
بالـحـرب مـاكو نظيره
غـيـره ياعـبـاس غيره

هاني ناصر السعيدي**